Ezekiyɛ́li 12 - MAWUXÓWÉMA

¹ Mawu Mavɔmavɔ ɖɔ nú mì ɖɔ:

² “Hwɛ gbɛtɔ́ ɔ́, mɛ e ma nɔ se tónú ǎ lɛ́ɛ tɛ́ntin wɛ a ɖe. Yě ɖó nukún yě ká nɔ́ mɔ nǔ ǎ; yě ɖǒtó, yě ká nɔ́ se nǔ ǎ. Yě tlí tó ɖésú.

³ Din ɔ́, hwɛ gbɛtɔ́ ɔ́, sɔ́ nǔ bó dó agban towe mɛ e ahwan nya sín to tɔn mɛ é ɖɔhun; sɔ́ nǔ có zǎn ní kú; mɛ bǐ nukún mɛ wɛ a ka ná sɔ́ nǔ ɖe. Afɔ nyɔ́ ɔ́, énɛ́ ɔ́ sixú ɖe xlɛ́ yě ɖɔ yě kún nɔ́ se tónú ó.

⁴ A nǎ ɖe agban ɔ́ tɔ́n kéze bɔ mɛ bǐ ná mɔ. É su gbadanu ɔ́, a nǎ sɔ́ nǔ bó ɖidó mɛ e ahwan nya sín to tɔn mɛ é ɖɔhun.

⁵ A nǎ tɔ́n ahohó e è mɛ lɛ́ lɛ̌ dó toxo ɔ́ é ɖo mɛ bǐ nukún mɛ, bó ná bɛ́ agban towe lɛ́ɛ gbɔn fínɛ́.

⁶ A nǎ tɔ́n, bó bɛ́ agban towe lɛ́ɛ ɖó abɔ̌ta ɖo mɛ bǐ nukún mɛ. A nǎ blá nukún mɛ, bó ná mɔ fí e yi wɛ a ɖe ɔ́ ǎ. Nǔ e ɖo Izlayɛ́li togun ɔ́ ná gbo wɛ ɔ́ hwi wɛ ná nyí xlɛ̌ tɔn nú yě.”

⁷ Un bló nǔ e Mawu zɔn mì é: un bɛ́ nǔ ce lɛ́ɛ tɔ́n kéze, bó dó agban mɛ e ahwan nya sín to tɔn mɛ é ɖɔhun; ée gbadanu su é ɔ́, un tɔ́n dǒ ɔ́ bó ɖíɖá agban ɔ́ ɖó abɔ̌ta, bó ɖidó zǎn mɛ ɖo mɛ bǐ nukún mɛ.

⁸ Ayǐhɔ́ngbe tɔn zǎnzǎn ɔ́, Mawu Mavɔmavɔ ɖɔ nú mì ɖɔ:

⁹ “Hwɛ gbɛtɔ́ ɔ́, Izlayɛ́li ví lɛ́ɛ ɔ́, nǔ tónúmasetɔ́ énɛ́ lɛ́ɛ ɔ́, yě má kan nǔ e wú a ɖo mɔ̌ bló wɛ ɔ́ byɔ́ we a?

¹⁰ Din ɔ́, yǐ gbe nú yě ɖɔ: ‘Aklúnɔ Mavɔmavɔ wɛ ɖɔ xó dó Jeluzalɛ́mu xɔ́sú ɔ́ kpó togun Izlayɛ́li tɔn e kpo ɖo Jeluzalɛ́mu toxo ɔ́ mɛ dɔ̌n lɛ́ɛ bǐ kpó wú.’

¹¹ Ɖɔ nú yě ɖɔ: ‘Xlɛ̌ ɖokpó wɛ un nyí nú mi.’ Ɖó nǔ e un bló ɔ́, nǔ mɔ̌hunkɔ ná gbo yě; è nǎ wlí yě yi to ɖěvo mɛ; è nǎ nya yě sín to yětɔn mɛ.

¹² Axɔ́sú e ɖo yě nu ɔ́ ná dó agban tɔn ɖó abɔ̌ta zǎn mɛ, bó tɔ́n sín toxo ɔ́ mɛ. È nǎ ɖe ali dó dǒ ɔ́ mɛ, bɔ é ná mɔ ali bo tɔ́n. É ná blá nukún mɛ, bó ná mɔ fí e yi wɛ é ɖe ɔ́ ǎ.

¹³ Bɔ nyɛ Mawu Mavɔmavɔ ɔ́, un ná ɖó mɔ n'i, bó ná wlí i, bó ná kplá ɛ yi Babilɔ́nunu lɛ́ɛ sín to mɛ, bɔ é ná kú ɖo fínɛ́. É sɔ́ ná mɔ to tɔn ɖó nukún wú gbeɖé cóbó kú ǎ .

¹⁴ Un ná gba mɛ tɔn lɛ́ɛ dó gbɔn wɛ̌kɛ́zo ɛnɛ lɛ́ɛ mɛ: sɔ́ja e nɔ cɔ́ ɛ lɛ́ɛ wɛ a, ahwangɔnu tɔn wɛ a, un ná gba yě bǐ dó, bó ná zé hwǐ ce bó jɛ yě gúdo.

¹⁵ Ényí un ko gba yě dó gbɔn akɔta lɛ́ɛ mɛ, gbɔn to ɖěvo ɖěvo lɛ́ɛ mɛ ɔ́, yě ná tunwun lo ɖɔ nyɛ wɛ nyí Mawu Mavɔmavɔ.

¹⁶ Ɖó un ná jó súnnu ɖé lɛ́ɛ dó, bɔ yědɛɛ lɛ́ɛ ná gán ɖo ahwan ɔ́ mɛ; adɔ ná hu yě ǎ, jɛmɛjí ná hu yě ǎ. Yě ná nɔ gbɛ, bó ná wlí nǔ baɖabaɖa e yě dó sin lɛ́ɛ ɖɔ gbɔn akɔta e tɛ́ntin un ná gba yě dó gbɔn lɛ́ɛ. Énɛ́ ɔ́, akɔta énɛ́ lɛ́ɛ lɔ ná tunwun ɖɔ nyɛ wɛ nyí Mawu Mavɔmavɔ.”

¹⁷ Mawu Mavɔmavɔ lɛ́ ɖɔ nú mì ɖɔ:

¹⁸ “Hwɛ gbɛtɔ́ ɔ́, a ɖo nǔ ɖu wɛ ɔ́, a nǎ ɖo sísɔ́sísɔ́ wɛ ɖo kú nukɔn; a ɖo sin nu wɛ ɔ́, a nǎ nɔ́ ɖo xɛsi jí bó ná nɔ́ ɖo adohu adohu jí;

¹⁹ énɛ́ gúdo ɔ́, a nǎ ɖɔ nú Izlayɛ́li ví lɛ́ɛ ɖɔ: Jeluzalɛ́munu e mi, xó e Aklúnɔ Mavɔmavɔ ɖɔ dó Jeluzalɛ́munu e kpo ɖo Izlayɛ́li yíkúngban jí lɛ́ɛ wú ɔ́ ɖíe: yě ná ɖu nǔ kpó xɛsi kpó, bó ná nu sin wǔbláwúblá, ɖó è nǎ gba to yětɔn bǐ hánnyá, nǔɖé sɔ́ ná kpo ɖo to ɔ́ mɛ ǎ, ɖó adǎnú kɛ́ɖɛ́ wɛ mɛ e ɖo to ɔ́ mɛ lɛ́ɛ nɔ́ wa.

²⁰ È nǎ nya mɛ lɛ́ɛ bǐ sín toxo lɛ́ɛ mɛ, bɔ to ɔ́ bǐ ná húzú gbětótló. Énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ.”

Nǔ e Mawu ɖɔ ɔ́ ná jɛ

²¹ Mawu Mavɔmavɔ lɛ́ ɖɔ nú mì ɖɔ:

²² “Hwɛ gbɛtɔ́ ɔ́, étɛ́wú Izlayɛ́li ví lɛ́ɛ ká nɔ dó acagbe, bó nɔ́ ɖɔ: ‘Azǎn ɖo azǎn jí jɛ wɛ, bɔ nǔ e è ka mɔ nǔ bó ɖɔ é ná jɛ lɛ́ɛ ɔ́, ɖě ɖo jijɛ wɛ ǎ.’

²³ Din ɔ́, a nǎ ɖɔ nú yě ɖɔ nyɛ Aklúnɔ Mavɔmavɔ ɔ́, un ná sú acagbe énɛ́ lɛ́ɛ dó; è sɔ́ ná se ɖě ɖo Izlayɛ́li ǎ. A ka ná ɖɔ nú yě ɖɔ: ‘Hwenu e nǔ e è mɔ nǔ bó ɖɔ lɛ́ɛ bǐ ná jɛ dó é ɖíe.’

²⁴ Mɛ ɖé sɔ́ ná ɖó adingban ɖɔ émí mɔ nǔ ǎ; nǔ e má ná jɛ ǎ ɔ́, è sɔ́ ná ɖɔ é ná jɛ ɖo togun Izlayɛ́li tɔn tɛ́ntin ǎ

²⁵ Ɖó nyɛ Mawu Mavɔmavɔ ɔ́, un ná ɖɔ xó, bɔ nǔ e un ná ɖɔ ɔ́ ná jɛ; é ná gblá ǎ. Nǔgbó wɛ, mi mɛ tónúmasetɔ́ élɔ́ lɛ́ɛ ɔ́, gbɛ hwenu mitɔn wɛ nǔ e un ɖɔ dó mi wú lɛ́ɛ ná jɛ. Nyɛ Aklúnɔ Mavɔmavɔ wɛ ɖɔ mɔ̌.”

²⁶ Énɛ́ gúdo ɔ́, Mawu Mavɔmavɔ lɛ́ ɖɔ nú mì ɖɔ:

²⁷ “Hwɛ gbɛtɔ́ ɔ́, xó e Izlayɛ́li ví lɛ́ɛ nɔ́ ɖɔ é ɖíe: yě nɔ́ ɖɔ: ‘Nǔ e é nɔ́ mɔ lɛ́ɛ ɖo nǎ jɛ wɛ égbé abǐ sɔ ǎ. Káká nukɔnmɛ ɖɔ xó dó wɛ è ɖe.’

²⁸ Énɛ́ ɔ́ wútu ɔ́, ɖɔ nú yě ɖɔ: Nyɛ Aklúnɔ Mavɔmavɔ ɔ́, un ná ɖó yibowá nú xó un ɖɔ lɛ́ɛ ɖěbǔ ǎ. Nyɛ Aklúnɔ Mavɔmavɔ wɛ ɖɔ mɔ̌.”