Ezekiyɛ́li 1 - MAWUXÓWÉMA

Mawu ɖe éɖée xlɛ́ Ezekiyɛ́li

¹ Sun ɛnɛgɔ́ ɔ́ e ɖo xwe gbangɔ́ (30) ɔ́ mɛ ɔ́ sín azǎn atɔ́ɔ́ngɔ́ ɔ́ gbe ɔ́, un ɖo mɛ e ahwan wlí, bó kplá yě yi ɖó Kebáa tɔ ɔ́ tó lɛ́ɛ mɛ; fínɛ́ wɛ un ɖe bo mɔ jǐnukúnsin hun, bɔ Mawu ɖe nǔ xlɛ́ mì.

² Ahwan wlí axɔ́sú Yoyakini ɔ́, xwe atɔ́ɔ́ngɔ́ ɔ́ bló wɛ é ɖe hwenɛ́nu.

³ Mawu Mavɔmavɔ ɖɔ xó ɖé nú nyɛ vɔ̌sánú-xwlémawutɔ́ Ezekiyɛ́li Buzi ví ɔ́, ɖo Babilɔ́nunu lɛ́ɛ sín to mɛ dɔ̌n, ɖo Kebáa tɔ ɔ́ tó; fínɛ́ wɛ hlɔ̌nhlɔ́n Mawu Mavɔmavɔ tɔn wá jǐ ce ɖe.

⁴ Nǔ e un mɔ lɛ́ɛ ɖíe: un mɔ jɔhɔn ɖaxó ɖé bɔ é nyi sín totaligbé jǎwe; un mɔ akpɔ́kpɔ́ ɖaxó ɖokpó, bɔ myɔ nɔ bló mlamla ɖ'é mɛ, bɔ wěziza lɛ́ dó akpɔ́kpɔ́ ɔ́; nǔɖé nɔ́ kán zo ɖo akpɔ́kpɔ́ ɔ́ tɛ́ntin gan wɛ ɖo kínkɔ́n ɖ'é mɛ wɛ ɖɔhun.

⁵ Un lɛ́ mɔ nǔ ɛnɛ ɖé lɛ́ɛ ɖo akpɔ́kpɔ́ ɔ́ tɛ́ntin, bɔ yě cí nǔɖogbɛ ɖɔhun.

⁶ Nǔɖogbɛ lɛ́ɛ ɖokpó ɖokpó ɖó nukún mɛ ɛnɛ, awa ɛnɛ.

⁷ Afɔ yětɔn lɛ́ɛ jlɔ́ ganjí, bɔ afɔkpákpá yětɔn lɛ́ɛ cí nyibúví fɔ ɖɔhun, bó nɔ́ kɔ́n ganvɔ e è ɖǐɖí wǔ ná ɔ́ ɖɔhun.

⁸ Alɔ yětɔn lɛ́ɛ cí gbɛtɔ́ sín alɔ ɖɔhun, alɔ ɛnɛ wɛ yě ɖokpó ɖokpó ɖó; alɔ ɖokpó ɖokpó ɖo awa yětɔn lɛ́ɛ ɖokpó ɖokpó glɔ́; alɔ lɛ́ɛ kpan nukɔn wɛ̌kɛ́zo ɛnɛ lɛ́ɛ, nukún mɛ yětɔn lɛ́ɛ kpó awa yětɔn lɛ́ɛ kpó ɖɔhun.

⁹ Nǔɖogbɛ lɛ́ɛ sín awa lɛ́ɛ sín nuvínu ɖě sɔ́ ɖě; yě ɖo yiyi wɛ ɔ́, yě nɔ́ lílɛ́ kpan nukɔn fí ɖěvo ǎ; mɛ ɖokpó ɖokpó nɔ́ kpan nukɔn fí e yi wɛ é ɖe ɔ́.

¹⁰ Nǔɖogbɛ lɛ́ɛ ɖokpó ɖokpó ɖó nukún mɛ ɛnɛ: nukún mɛ e ɖo nukɔn ɔ́ cí gbɛtɔ́ nukún mɛ ɖɔhun, aɖisíxwé tɔn cí kinnikínní nukún mɛ ɖɔhun, amyɔxwé tɔn cí nyibúsú nukún mɛ ɖɔhun, bɔ gǔdo tɔn cí gangan nukún mɛ ɖɔhun.

¹¹ Lě e nukún mɛ yětɔn lɛ́ɛ cí é nɛ́. Nǔɖogbɛ lɛ́ɛ dlɛ́n awa yětɔn lɛ́ɛ we we dó jǐ, bɔ ɖě bɔ dó ɖě wú, bɔ yě cyɔ́n awa yětɔn we we e kpo lɛ́ɛ.

¹² Yě ɖokpó ɖokpó ɖo yiyi wɛ télélé; fí e jlǒ yětɔn yi ɔ́ wɛ yě nɔ́ yi télélé; yě nɔ́ lɛ́ kɔ ǎ.

¹³ Nǔɖogbɛ énɛ́ lɛ́ɛ cí hɛɛ myɔkán ɖɔhun; é cí lě e è nɔ tá zohwín é ɖɔhun, bɔ myɔ ɖé nɔ́ ɖo nǔɖogbɛ lɛ́ɛ tɛ́ntin gbɔn wɛ; yě nɔ́ kɔ́n myɔ ɔ́ ɖɔhun, bɔ myɔkán nɔ́ wú sín myɔ ɔ́ mɛ.

¹⁴ Nǔɖogbɛ lɛ́ɛ nɔ́ yi dě léwún bó nɔ́ wá léwún jǐkɛwun ɖɔhun.

¹⁵ Un ɖo nǔɖogbɛ lɛ́ɛ kpɔ́n wɛ, bó mɔ kɛkɛ́fɔ ɖo kɔ́ mɛ, ɖo akpá yětɔn, ɖo yě ɖokpó ɖokpó nukɔn.

¹⁶ Kɛkɛ́fɔ lɛ́ɛ nɔ́ kɔ́n awǐnnya xɔ akwɛ́ klizolíti ɖɔhun. Kɛkɛ́fɔ lɛ́ɛ bǐ wɛ ɖó ninɔmɛ ɖokpó ɔ́; é cí ɖě byɔ́ ɖě mɛ ɖɔhun.

¹⁷ Kɛkɛ́fɔ lɛ́ɛ hɛn ɔ́, yě ná yi ɖisí, amyɔ, gǔdo, nukɔn; é byɔ́ ɖɔ yě ná lílɛ́ ɖo tɛndo ɖokpó mɛ kpan ta fí e yě xwe ɔ́ cóbó yi ǎ.

¹⁸ Kɛkɛ́fɔ ɛnɛ lɛ́ɛ ɔ́, hlúu yětɔn lɛ́ɛ sɔ́ avɔ káká bó dó xɛsi, bɔ nukún kpé hlúu lɛ́ɛ wú bǐ lɛ́ lɛ̌ dó.

¹⁹ Nǔɖogbɛ lɛ́ɛ ɖo tɛn sɛ wɛ ɔ́, kɛkɛ́fɔ lɛ́ɛ kpó yě kpó nɔ́ ɖo yiyi wɛ; yě sí te sín kɔ́ mɛ ɔ́, kɛkɛ́fɔ lɛ́ɛ lɔ nɔ sí te kpó yě kpó.

²⁰ Fí e jlǒ nǔɖogbɛ lɛ́ɛ tɔn yi ɔ́ wɛ kɛkɛ́fɔ lɛ́ɛ nɔ́ yi, bɔ kɛkɛ́fɔ lɛ́ɛ nɔ́ xwedó yě, ɖó jlǒ nǔɖogbɛ lɛ́ɛ tɔn kpó jlǒ kɛkɛ́fɔ lɛ́ɛ tɔn kpó ɔ́, nǔ ɖokpó ɔ́ wɛ.

²¹ Nǔɖogbɛ lɛ́ɛ sɛ tɛn ɔ́, kɛkɛ́fɔ lɛ́ɛ lɔ nɔ sɛ tɛn; yě nɔ te ɔ́, kɛkɛ́fɔ lɛ́ɛ lɔ nɔ nɔ te, yě sí te sín kɔ́ mɛ ɔ́, yě lɔ nɔ sí te sín kɔ́ mɛ; ɖó jlǒ nǔɖogbɛ lɛ́ɛ tɔn kpó jlǒ kɛkɛ́fɔ lɛ́ɛ tɔn kpó ɔ́, nǔ ɖokpó ɔ́ wɛ.

²² Nǔɖé wá ɖo jǐ ɖo nǔɖogbɛ lɛ́ɛ ta nu, bó cí jǐnukúnsin ɖɔhun; nǔ ɔ́ cí awǐnnya wěwé ɖagbe ɖagbe ɖé ɖɔhun bó nɔ́ kɔ́n.

²³ Yě dlɛ́n awa yětɔn we we gbánnáná, bɔ ɖě bɔ dó ɖě wú ɖo nǔ jǐnukúnsin ɖɔhun ɔ́ glɔ́, bɔ yě cyɔ́n awa yětɔn we we e kpo lɛ́ɛ.

²⁴ Yě ɖo yiyi wɛ ɔ́, awa yětɔn lɛ́ɛ nɔ́ ɖo nǔ ɖɔ wɛ bɔ un nɔ se. É nɔ́ cí xu wɛ ɖo adǎn jí abǐ jǐ wɛ ɖo gbe dó wɛ ɖɔhun; é cí ahwangɔnu ɖaxó ɖé sín zǐngídi ɖɔhun. Nú yě nɔ te ɔ́, yě nɔ́ bɔ awa yětɔn lɛ́ɛ dó.

²⁵ È nɔ se zǐngídi ɖé sín nǔ jǐnukúnsin ɖɔhun e ɖo ta yětɔn nu ɔ́ mɛ. Hwenu e yě nɔ te bó bɔ awa yětɔn lɛ́ɛ dó ɔ́ wɛ un nɔ se zǐngídi ɔ́.

²⁶ È nɔ mɔ nǔɖé ɖo fínɛ́ axɔ́súzinkpo ɖɔhun, bɔ é cí awǐnnya xɔ akwɛ́ safíi wɛ è dǒ bló ɖɔhun. Nǔ gbɛtɔ́ ɖɔhun ɖé ɖo axɔ́súzinkpo ɔ́ jí ɖo aga dɔ̌n.

²⁷ Un lɛ́ mɔ ɖɔ nǔ ɔ́ ɖo kínkɔ́n wɛ gan e è ɖǐɖí wǔ ná ɔ́ ɖɔhun; é cí myɔ wɛ lɛ́ lɛ̌ dó ɖɔhun; un mɔ nǔ myɔ ɖɔhun ɖé bɔ é za wě sín alinkan káká yi ta, bó lɛ́ za wě sín alinkan káká yi do.

²⁸ Wěziza ɔ́ cí lě e jǐ nɔ ja bɔ nyǐ nɔ ɖi ɔ́ ɖɔhun. Susu Mawu Mavɔmavɔ tɔn sín xlɛ̌ wɛ. Ée un mɔ mɔ̌ ɔ́, un xwe agbɔ̌nnusú do; énɛ́ ɔ́, un se mɛ ɖé ɖo xó ɖɔ nú mì wɛ.