Ezayíi 8 - MAWUXÓWÉMA

¹ Mawu Mavɔmavɔ ɖɔ nú mì ɖɔ: zě tɛ gblogblo ɖokpó bó wlán xó élɔ́ d'é jí ní ɖi wun ganjí: “Dɔkun-jɛ-agba-Zɔnmɛ-bo-bɛ́”.

² Un zé tɛ ɔ́ xlɛ́ gbɛtɔ́ e wú è hɛn ɔ́, è nǎ ɖeji dó é we: vɔ̌sánú-xwlémawutɔ́ Wuliya kpó Zekaliyahu Yevelɛkiyahu ví ɔ́ kpó, bɔ yě ná nyí kúnnuɖetɔ́ ce.

³ Énɛ́ ɔ́ gúdo ɔ́, un ɖó xó xá asi ce; gbeyíɖɔ Mawu tɔn wɛ. É mɔ xo bó ji vǐ súnnu ɖokpó. Bɔ Mawu Mavɔmavɔ ɖɔ nú mì ɖɔ: “A nǎ sun nyǐ i ɖɔ: ‘Dɔkun-jɛ-agba-Zɔnmɛ-bo-bɛ́’.

⁴ Đó cóbónú vǐ ɔ́ ná ɖɔ ‘Daá’ abǐ ‘Nǎna’ ɔ́, è nǎ bɛ́ dɔkun e ɖo Damási lɛ́ɛ kpó nǔ e è fun ahwan bó bɛ́ sín Samalíi lɛ́ɛ kpó wá nú Asilíi xɔ́sú ɔ́.”

Tɔ gba Judáa to ɔ́

⁵ Mawu Mavɔmavɔ lɛ́ ɖɔ nú mì ɖɔ:

⁶ “Togun élɔ́ gbɛ́ wǎn nú sin Silowée tɔn, sin e nɔ́ sa dɛ̌dɛ̌ sín Silowée tɔ mɛ é, bɔ akɔ jɛ xá Hlesini kpó nyaví Hlemaliyahu ví ɔ́ kpó wɛ nɔ́ hun xomɛ n'i.

⁷ Énɛ́ ɔ́ wú wɛ un ná sɛ́ axɔ́sú Asilíi tɔn kpó acɛkpikpa tɔn bǐ kpó dó, bɔ yě ná wá tɔ́n ahwan Judáa to ɔ́; yě ná wa adǎn Efláti tɔ ɔ́ wɛ ɖi sin bó gba kpé ɖɔhun.

⁸ Yě ná húzú sin bó ɖi bú Judáa to ɔ́, bó ná fán ɛ dó káká kɔ; sin ná bú to ɔ́ bǐ. Emanuwɛ́li, sin ná bú ayǐkúngban e ɖo to towe mɛ é bǐ.”

Togun lɛ́ɛ ɖo wě ɖe wɛ dó wǔvɔ́

⁹ Togun lɛ́ɛ mi, mi na bo sɛ miɖée kplé gbɔn ɖěbǔ ɔ́ , nǔ baɖabaɖa wɛ ɖo te kpɔ́n mi. Ayi mitɔn ní ɖo te, mi mɛ e ɖo to línlín mɛ lɛ́ɛ. Mi sixú sɔ́ ahwannú gbɔn ɖěbǔ, nǔ baɖabaɖa ɖo te kpɔ́n mi; nǔgbó wɛ, mi sixú sɔ́ ahwannú gbɔn ɖěbǔ; nǔ baɖabaɖa ɖo te kpɔ́n mi.

¹⁰ Mi ɖe wě mitɔn lɛ́ɛ ganjí, bǐ wɛ ná gba hánnyá. Mi yi kpá lě e é jló mi gbɔn é, nǔ e mi to é ná nyí wiwa gbeɖé ǎ, ɖó Mawu ɖo kpɔ́ xá mǐ.

Só e wú è nɔ klɛ́n afɔ dó é

¹¹ Mawu Mavɔmavɔ sín hlɔ̌nhlɔ́n wá jǐ ce, bó gbɛ́ nú mì ɖɔ nyi ma wa nǔ togun élɔ́ ɖɔhun ó. Xó e é ɖɔ nú mì ɔ́ ɖíe:

¹² “Nǔ e togun élɔ́ nɔ́ ylɔ́ ɖɔ sébláblá ɔ́, mi ma ylɔ́ ɖěbǔ ɖɔ sébláblá ó; mi ná ɖi xɛsi nú nǔ e é nɔ́ ɖi xɛsi ná ɔ́ ǎ. Ado ma hu mi ó.”

¹³ Mi ná tunwun ganjí ɖɔ Mawu Mavɔmavɔ Nǔbǐwúkpétɔ́ ɔ́ wɛ nyí Mɛ Mímɛ́. É wɛ mi ná ɖi xɛsi ná; é wú wɛ ado ná hu mi dó.

¹⁴ Đó é ná húzú tɛn mímɛ́ ɖé nú axɔ́súɖuto Izlayɛ́li tɔn we lɛ́ɛ. É ná nyí awǐnnya e wú è nǎ klɛ́n afɔ dó é, só e ná zin mɛ dɛ́ é. É ná nyí fɛ́ca ɖé nú Jeluzalɛ́munu lɛ́ɛ.

¹⁵ Mɛ gěgé ná klɛ́n afɔ dó wǔ tɔn, bó ná jɛ ayǐ bó ná gba hánnyá. Yě ná sɔ́ fɛ́ca bó ná ján cí mɛ, bɔ ɖiɖe tɔ́n ná gló.

Ezayíi ɖo te kpɔ́n Mawu

¹⁶ Un sɔ́ xó élɔ́ ɖó fí e é ná nɔ ganjí ɖe é; un sɔ́ kplɔ́n élɔ́ ɖó fí e nǔɖé ma ná wa ɛ ɖe ǎ é; ahwanvú ce lɛ́ɛ kɛ́ɖɛ́ jɛ́n se.

¹⁷ Un ɖo te kpɔ́n Mawu Mavɔmavɔ; amɔ̌, din ɔ́, é tó dó gǔdo Jakɔ́bu ví lɛ́ɛ hwɛ̌; lo ɔ́, un ɖo nukún ɖó e wɛ ɖésú.

¹⁸ Nyi ɖésúnɔ kpó vǐ e Mawu Mavɔmavɔ ná mì lɛ́ɛ kpó ɔ́, wuntun wɛ mǐ nyí bó nyí xlɛ̌ ɖo Izlayɛ́li, ɖo Mawu Mavɔmavɔ Nǔbǐwúkpétɔ́ e nɔtɛn tɔn ɖo Sinyɔ́ɔ só ɔ́ jí ɔ́ nyǐkɔ mɛ.

¹⁹ Mɛ ɖé lɛ́ɛ nɔ́ ɖɔ: “Mi yi kan nǔ ɖo bokantɔ́ lɛ́ɛ gɔ́n; yě wɛ nɔ́ ɖo xó ɖɔ dó vɛ̌go mɛ wɛ bó nɔ́ ɖo awɔntín mɛ gbe dó wɛ, bó nɔ́ ɖo nǔ e ná jɛ sɔ lɛ́ɛ ɖɔ wɛ. É nyɔ́ nú togun ɖokpó ɖokpó ní yi kan nǔ byɔ́ nǔmɛsɛn tɔn lɛ́ɛ; togun ɖokpó ɖokpó ní yi ɖɔ xó xá mɛkúkú dó mɛ e ɖo gbɛ lɛ́ɛ ta mɛ.” Nú yě ɖɔ mɔ̌ nú mi hǔn,

²⁰ mi ɖɔ nú yě ɖɔ: “Kplɔ́n Mawu tɔn lɛ́ɛ kpó wɛn tɔn lɛ́ɛ kpó wɛ è nǎ xwedó.” Mɛ e ma ná ɖɔ mɔ̌ ǎ ɔ́, ayǐ ná hɔ́n dó e ǎ.

Ablu gɔngɔn

²¹ Toví lɛ́ɛ ná ɖo to ɔ́ mɛ gbɔn wɛ, wǔ ná kú yě bǐ, xovɛ́ ná sin yě. Xovɛ́ ná sin yě káká bɔ yě ná sin xomɛ; yě ná dó nu axɔ́sú yětɔn bó dó nu Mawu yětɔn. Yě ná kpɔ́n jǐ,

²² bó kpɔ́n do; yě ká ná mɔ nǔɖé zɛ aluwɛ wú ǎ; fí bǐ ná dó ablu, xɛsi ná ɖo to ɔ́ jí mɔ̌hunkɔtɔn, ablu ná dó bó vɛ́ jlɛ́.

È ji vǐ ɖokpó nú mǐ

²³ Lo ɔ́, to e ko ɖo aluwɛ mɛ ɖ'ayǐ ɔ́ ná nɔ zǐnflú mɛ káká sɔ́yi ǎ. Xóxó hwenu ɔ́, Mawu kɔ́n wi nú Zabulɔ́ɔn gbé ɔ́ kpó Nɛfutali gbé ɔ́ kpó. É ká wá yá ɔ́, é ná ná susu ali e gbɔn xutó é, bó ná ná susu to e ɖo zǎnzǎnhwe jí nú Judɛ́ɛn tɔ ɔ́ é, bó ná ná susu Galilée e nyí jǒnɔ lɛ́ɛ sín tokpɔnla é.