Ezayíi 66 - MAWUXÓWÉMA

¹ Xó e Mawu Mavɔmavɔ ɖɔ ɔ́ ɖíe: “Jǐnukúnsin ɔ́, axɔ́súzinkpo ce wɛ, ayǐkúngban ka nyí afɔɖótɛn ce. Énɛ́ ɔ́, xwé alɔkpa tɛ́ mi ná sixú sá nú mì? Fítɛ́ mi ka sixú bló bɔ un ná nɔ?

² Nyi wɛ sɔ́ alɔ ce dó bló nǔ énɛ́ lɛ́ɛ bǐ, bɔ nǔ énɛ́ lɛ́ɛ bǐ tíin. Nyɛ ɔ́, mɛ e un nɔ sɔ́ nukún ɖagbe dó kpɔ́n é ɖíe: lelenɔ e awakanmɛ kú é, mɛ e nɔ se xó ce bó nɔ́ ɖó sísí ɖaxó ná é.

³ È ja vɔ̌ sá gbé ɔ́, mɛ lɛ́ɛ nɔ hu nyibú; hwenu e yě ɖo nyibú hu wɛ ɔ́, yě nɔ́ lɛ́ hu gbɛtɔ́. Yě nɔ́ lɛ́ hu gbɔ̌; hwenu e yě ɖo gbɔ̌ hu wɛ ɔ́, yě nɔ́ hu cukú. Yě nɔ́ hɛn vɔ̌sánú bó nɔ́ wá xwlé mì; hwenu e yě ɖo vɔ̌sánú xwlé mì wɛ ɔ́, yě nɔ́ lɛ́ ɖo aglǔza kanjɔ kɔn nyi ayǐ wɛ. Yě nɔ́ ɖo zǎlínkpɔ́n dó zo nú mì wɛ; hwenu e yě ɖo zǎlínkpɔ́n dó zo nú mì wɛ ɔ́, yě nɔ́ lɛ́ ɖo vodún xomlá wɛ. Mɛ énɛ́ lɛ́ɛ ɔ́, nǔ e jló yě lɛ́ɛ wa wɛ yě ɖe; nǔ baɖabaɖa énɛ́ lɛ́ɛ wiwa wɛ nɔ́ víví nú yě.

⁴ Ée é cí mɔ̌ din é ɔ́, nyi lɔmɔ̌ ɔ́, un ná jó yě dó, bɔ nǔ e ɖo tónúmase yětɔn mɛ ɔ́, yě ná mɔ. Nǔ e ná dó adohu nú yě ɔ́ wɛ un ná dɔn wá nú yě, ɖó un ylɔ́ yě, bɔ yě ɖě ká sɔ ǎ; un ɖɔ xó, yě ɖě ká ɖótó mì ǎ; nǔ e má nɔ́ nyɔ́ nukún ce mɛ ǎ lɛ́ɛ wɛ yě wa, bó sɔ́ ali e ma jló mì ǎ é.”

Xó gǔdo gúdo tɔn e Mawu ɖɔ é

⁵ Mi mɛ e se Mawu Mavɔmavɔ xó ɔ́, mi nɔ ɖó sísí ná lɛ́ɛ ɔ́, mi ɖótó xó e Mawu Mavɔmavɔ ɖɔ é: “Nɔví mitɔn e gbɛ́ wǎn nú mi ɖó nyǐkɔ ce wú, bó nɔ́ ɖo mi nya wɛ lɛ́ɛ nɔ́ ɖo slǎmɛ ɖɔ mi wú wɛ ɖɔ: ‘Mawu Mavɔmavɔ ní bó ɖe susu tɔn xlɛ́ bó! Énɛ́ ɔ́, nǔ ná víví nú mi bɔ mǐ ná mɔ.’ Amɔ̌, yě mɛ e ɖo mɔ̌ ɖɔ wɛ lɛ́ɛ ná ɖu winnyá.”

⁶ Mi ɖótó xó e sú wɛ è ɖe ɖo toxo ɔ́ mɛ é; xó e sú wɛ è ɖe sín Mawu xwé ɔ́ gbe é; Mawu Mavɔmavɔ wɛ ɖo nǔ e kɛntɔ́ tɔn lɛ́ɛ wa é sín axɔ́ sú yě wɛ.

⁷ Cóbónú Jeluzalɛ́mu ná jɛ flú mɛ ɔ́, é kó ji vǐ. Cóbónú vǐ nǔ ná jɛ wiwa ɛ jí ɔ́, é kó ji vǐ súnnu ɖokpó.

⁸ Mɛ̌ ká se xó mɔ̌hun kpɔ́n gbeɖé? Mɛ̌ ká mɔ nǔ mɔ̌hun kpɔ́n gbeɖé? To nɔ sɔ́ azǎn ɖokpó ɖó te, bó nɔ jɔ wɛ a? Akɔta ɖokpó ɔ́, gbe ɖokpó wɛ é nɔ́ jɔ a? Lě e Jeluzalɛ́mu ka wa nǔ gbɔn ɔ́ nɛ́: káká e Jeluzalɛ́mu ná jɛ flú mɛ ɔ́, é kó ji vǐ tɔn lɛ́ɛ.

⁹ Mawu Mavɔmavɔ ɖɔ: “Un ná hɛn xoxónɔ káká bɔ vǐ ji hwenu tɔn ná su, bó ná gɔn blǒbló bɔ é ná ji vǐ ɔ́ wɛ a?” Mawu towe ɖɔ: “Nyɛ mɛ e nɔ ná gbɛ mɛ ɔ́, è nǎ ja gbɛ wá gbé, bɔ un ná lɛ́ gbɛ́ a?”

¹⁰ Mi j'awǎ xá Jeluzalɛ́mu. Mi mɛ e yí wǎn n'i lɛ́ɛ, xomɛ ní hun mi bǐ dó wǔ tɔn. Mi mɛ e ko nɔ aluwɛ mɛ xá ɛ lɛ́ɛ ɔ́, mi bǐ ní j'awǎ xá ɛ.

¹¹ Énɛ́ ɔ́, é ná ná akɔ́nkpinkpan mi; mi ná gɔ́ xo, lě e vǐnɔ sín anɔ̌ nɔ́ só ganjí, bɔ vǐ yɛ̌yɛ́ nɔ́ nɔ́ kpó awǎjijɛ kpó é ɖɔhun.

¹² Mawu Mavɔmavɔ ɖɔ: “É ɖíe, un ná sɛ́ nyɔ̌ná dó Jeluzalɛ́mu, bɔ é ná sukpɔ́ káká bó ná sa yi gɔ̌n tɔn tɔsisa ɖɔhun; dɔkun akɔta lɛ́ɛ tɔn ná sukpɔ́ ɖo así tɔn káká bó túnflá tɔ ɖi sin ɖɔhun. Un ná kpé nukún dó mi wú vǐnɔ ɖɔhun; un ná dó anɔ̌ nú mi, un ná sɔ́ mi dó nɛgbé, un ná sɔ́ mi ɖó akɔn bó xwe mì dó amlɔ mɛ.

¹³ Un ná dó gbɔ nú mi vǐnɔ ɖo gbɔ dó nú vǐ tɔn wɛ ɖɔhun. Un ná dó gbɔ nú mi ɖo Jeluzalɛ́mu.

¹⁴ Mi ɖésúnɔ ná mɔ bɔ xomɛ ná hun mi; gbɛ ná wá mi wú, jǐhwenugběhan ɖɔhun.” Mawu Mavɔmavɔ ná sɔ́ hlɔ̌nhlɔ́n tɔn dó wa ɖagbe nú mɛsɛntɔ́ tɔn lɛ́ɛ, bó ká ná sin xomɛ dó kɛntɔ́ tɔn lɛ́ɛ.

¹⁵ Đó Mawu Mavɔmavɔ ná zɔn myɔ mɛ wá; ahwankɛkɛ́ví tɔn lɛ́ɛ ná wá kpó hlɔ̌nhlɔ́n kpó jɔhɔn ɖaxó ɖé ɖɔhun; Mawu Mavɔmavɔ ná kɔn xomɛsin tɔn kɔn nyi ayǐ kpó adǎn kpó, é ná zɔn myɔ mɛ bó wá bló nǔ e sín adǎn é gblɔ́n é.

¹⁶ Myɔ kpó hwǐ kpó wɛ Mawu Mavɔmavɔ ná dó ɖɔ hwɛ xá gbɛtɔ́ lɛ́ɛ bǐ. Mɛ e Mawu Mavɔmavɔ ná hu lɛ́ɛ ná sukpɔ́.

¹⁷ Mɛ e nɔ slá wǔ ɖó vodúnzun mɛ ná yi wú lɛ́ɛ xó ɖɔ wɛ un ɖe ɖo fí. Yě nɔ́ kplé bó nɔ́ cí mɛ e ɖo tɛ́ntin ɔ́ gúdo; yě nɔ́ ɖu aglǔza, yě nɔ́ ɖu ajaka, yě nɔ́ ɖu kanlin baɖabaɖa lɛ́ɛ; yě bǐ wɛ ná kú zɛ̌ɛ́n. Xó e Mawu Mavɔmavɔ ɖɔ ɔ́ nɛ́.

Kplé ɖaxó gǔdo gúdo tɔn ɔ́

¹⁸ Mawu ɖɔ: “Un tunwun nǔ e yě nɔ́ wa ɔ́, bó tunwun nǔ e yě nɔ́ lin ɔ́. Un ná wá bó ná kplé togun e nɔ dó gbe tɛnmɛ tɛnmɛ lɛ́ɛ bǐ; yě bǐ ná wá bó ná mɔ susu ce.

¹⁹ Un ná sɔ́ wuntun ɖé ɖó tɛ́ntin yětɔn. Mɛ e ná gán ɖo hwɛ e un ná ɖɔ xá yě ɔ́ mɛ lɛ́ɛ ɔ́, un nǎ sɛ́ yě dó togun Taasísi tɔn mɛ, un nǎ sɛ́ yě dó togun Púti tɔn mɛ, bó ná sɛ́ yě dó togun Lǔdi tɔn mɛ. Mɛ énɛ́ lɛ́ɛ nyɔ́ gǎ da mɔ̌hunkɔtɔn. Un ná sɛ́ yě dó mɛ e ɖo Tubalu lɛ́ɛ gɔ́n, un nǎ sɛ́ yě dó mɛ e ɖo Glɛ̌si lɛ́ɛ gɔ́n, bó ná sɛ́ yě dó tɔtɛ́ntinto e ɖo to ɖé má yá to ɖé mɛ, bó má se xó ce kpɔ́n gbeɖé ǎ lɛ́ɛ gɔ́n; è mɔ susu ce ɖo fí énɛ́ lɛ́ɛ gbeɖé ǎ; yě ná ɖe susu ce xlɛ́ togun énɛ́ lɛ́ɛ.

²⁰ Énɛ́ ɔ́, mɛ énɛ́ lɛ́ɛ ná kplá nɔví mitɔn e ɖo yě gɔ́n lɛ́ɛ bǐ wá nú mì nǔníná ɖɔhun; è nǎ bɛ́ yě ɖó sɔ́ jí; è nǎ bɛ́ yě dó ahwankɛkɛ́ví mɛ; è nǎ bɛ́ yě ɖó kɛkɛ́ví e è cyɔ́n nǔ ta ná é mɛ; è nǎ bɛ́ yě ɖó tócí abǐ lǎkúnmí jí, bó ná kplá yě káká wá só mímɛ́ ɔ́ kɔn, ɖo Jeluzalɛ́mu. É ná nyí nǔníná bɔ yě ná hɛn wá nú mì, bɔ un ná yí, nǔníná e Izlayɛ́li ví lɛ́ɛ nɔ hɛn dó agbǎn mímɛ́ mɛ wá nú mì é ɖɔhun.

²¹ Un ná fɔ mɛ ɖé lɛ́ɛ ɖo yě mɛ dó ɖó vɔ̌sánú-xwlémawutɔ́ kpó Levíi ví kpó. Xó e nyɛ Mawu Mavɔmavɔ ɖɔ ɔ́ nɛ́.”

²² Mawu Mavɔmavɔ ɖɔ: “Lě e jǐnukúnsin yɔ̌yɔ́ e un ná bló é, kpó ayǐkúngban yɔ̌yɔ́ e un ná bló é kpó ná nɔ te káká sɔ́yi ɔ́, mɔ̌ ɖokpó ɔ́ wɛ vǐ mitɔn lɛ́ɛ kpó nyǐkɔ mitɔn lɛ́ɛ kpó ná nɔ te káká sɔ́yi.

²³ Énɛ́ ɔ́, sun wá jǐ tɛgbɛ ɔ́, gbɛtɔ́ lɛ́ɛ bǐ ná nɔ́ wá ɖe kɔ́ nú mì. Gbɔjɛzán gbe tɛgbɛ ɔ́, gbɛtɔ́ lɛ́ɛ bǐ ná nɔ́ wá ɖe kɔ́ nú mì.

²⁴ Nú è tɔ́n sín Jeluzalɛ́mu toxo ɔ́ mɛ ɔ́, è nǎ nɔ́ mɔ mɛ e fɔ́n gǔ dó jǐ ce lɛ́ɛ sín cyɔ; wě e ná ɖo yě ɖu wɛ lɛ́ɛ ná kú gbeɖé ǎ; myɔ e mɛ yě ká ná ɖe ɔ́ ná cí gbeɖé ǎ. Nǔ baɖabaɖa wɛ é ná nyí nú gbɛtɔ́ lɛ́ɛ bǐ.”