Ezayíi 61 - MAWUXÓWÉMA

¹ Yɛ Aklúnɔ Mavɔmavɔ tɔn ɖo jǐ ce, ɖó Mawu Mavɔmavɔ wɛ sɔ́ mì ɖó vo; é sɛ́ mì dó ɖɔ má yi dó wɛn ɖagbe ɖé wamamɔnɔ lɛ́ɛ, má yi hɛn sɔ mɛ e ɖo wǔvɛ́ mɔ wɛ ɖo ayi mɛ lɛ́ɛ, má yi ɖɔ nú kannumɔ lɛ́ɛ ɖɔ yě jɛ yěɖée sí, má yi ɖɔ nú gantɔ́ lɛ́ɛ ɖɔ è jó yě.

² É sɛ́ mì dó ɖɔ má yi ɖɔ nú mɛ bǐ ɖɔ xwe e mɛ Mawu Mavɔmavɔ ná jɔwǔ mɛ é wá, má yi ɖɔ nú mɛ bǐ ɖɔ azǎn e gbe Mawu mǐtɔn ná ba hlɔn kɛntɔ́ tɔn lɛ́ɛ wú é wá, má yi dó wǔsyɛ́n lanmɛ nú mɛ e ɖo aluwɛ mɛ lɛ́ɛ.

³ Sinyɔ́ɔ wú wɛ yě ɖo aluwɛ mɛ; lo ɔ́, azɔ̌ e Mawu Mavɔmavɔ zɔ́n mì ɔ́ wɛ nyí ɖɔ má zé aluwɛ e mɛ yě ɖe ɔ́ dó húzú xomɛhunhun nú yě: un nǎ zé afín e yě lɛ dó ta ɔ́ dó húzú tablá ɖagbe ɖagbe ɖé. Un ná kɔn ami wǎnɖagbenɔ ɖé dó ta nú yě, bɔ é ná nyí awǎjijɛ sín wuntun, é sɔ́ ná nyí aluwɛ sín wuntun ǎ. Acɔ́wu wɛ un ná dó nú yě, ɖó awakanmɛ e kú yě ɔ́ tɛnmɛ. Énɛ́ ɔ́, è nǎ nɔ́ ylɔ́ yě ɖɔ hwɛjijɔtín ɖaxó ɖaxó e Mawu tun, bɔ yě nɔ́ ɖe susu tɔn xlɛ́ lɛ́ɛ; è nǎ nɔ́ zé yě jlɛ́ dó jikpá e nɔ ɖe susu Mawu Mavɔmavɔ tɔn xlɛ́ é wú.

⁴ Dǒ e kó mu sín xóxó hwenu lɛ́ɛ ɔ́, yě ná vɔ́ mɛ. Xwé e è ko gba bɔ é ko lín lɛ́ɛ ɔ́, yě ná bló ɖó. Toxo e è ko gba bɔ yě ɖo mɔ̌ sín tɔ́gbó tɔgbo yětɔn lɛ́ɛ hwenu ɔ́, yě ná vɔ́ bló ɖó.

⁵ Jǒnɔ lɛ́ɛ ná wá, bó ná nɔ́ kplá kanlin mitɔn lɛ́ɛ yi ama gbo mɛ. To ɖěvo mɛ nu lɛ́ɛ wɛ ná nɔ́ lɛ gle nú mi, bó ná nɔ́ kpé nukún dó vǐwungbo mitɔn lɛ́ɛ wú.

⁶ Amɔ̌, midɛɛ lɛ́ɛ ɔ́, è nǎ nɔ́ ylɔ́ mi ɖɔ “Vɔ̌sánú-xwlémawutɔ́.” È nǎ nɔ́ ylɔ́ mi ɖɔ “Mɛsɛntɔ́ Mawu Mavɔmavɔ tɔn.” Dɔkun akɔta lɛ́ɛ tɔn ná nyí mitɔn. Mi ná nɔ́ gó, ɖó dɔkun yětɔn ɔ́, mitɔn wɛ.

⁷ Mawu ɖɔ: “É sɔ́ ná nyí winnyá wɛ mi ná ɖu ǎ, susu ɖě ɖo ɖě jí wɛ mi ná xɔ; é sɔ́ ná nyí hɛ̌n wɛ mi ná ɖu ǎ, mi ná nɔ́ ɖo xó sú wɛ kpó awǎjijɛ kpó, ɖó kanta e ná nyí mitɔn é wú; énɛ́ ɔ́, ɖo to mitɔn mɛ ɔ́, nǔ e ɖó ná nyí mitɔn ɔ́ mɔ̌hunkɔ donu we wɛ è nǎ ná mi; awǎjijɛ mavɔ mavɔ wɛ ná nyí mitɔn.

⁸ Đó nyɛ Mawu Mavɔmavɔ ɔ́, nǔjlɔ́jlɔ́wiwa wɛ un nɔ ba; un gbɛ́ wǎn nú ajogbomɛ. Énɛ́ ɔ́ wú ɔ́, un ná sú nǔ mitɔn e yě fin é sín axɔ́ mi, bó ná jɛ akɔ mavɔ mavɔ ɖé xá mi.”

⁹ Akɔta lɛ́ɛ bǐ wɛ ná tunwun vǐ mitɔn lɛ́ɛ; gbɛtɔ́ nukúnɖéjí wɛ yě ná nyí gbɔn akɔta lɛ́ɛ bǐ mɛ; mɛɖé mɔ yě ɔ́, è na tunwun ɖɔ togun e jí Mawu Mavɔmavɔ xo ɖɛ dó é ɖíe.

Kú dó nú Mawu sín han

¹⁰ Un ɖo awǎjijɛ mɛ ɖě ɖo ɖě jí ɖó Mawu Mavɔmavɔ wútu. Xomɛ ɖo hunhun mì wɛ ɖó Mawu ce wú. Nǔgbó wɛ, é hwlɛ́n mì gán, bó sɔ́ hwlɛngán tɔn dó nú mì awu ɖaxó ɖé ɖɔhun; é sɔ́ ɖuɖéjí tɔn cyɔ́n nú mì avɔ ɖɔhun; un cí dɔ̌nkpɛvú e da asi yɔ̌yɔ́, bó sɔ́ tablá ɖagbe ɖagbe ɖé ɖó ta ɔ́ ɖɔhun; un cí ɖyɔ̌vǐ e da asú yɔ̌yɔ́, bó dó sikánú yɛɖɛɖɛ ɔ́ ɖɔhun.

¹¹ Lě e atín nɔ́ tɔ́n sín ayǐkúngban lanmɛ gbɔn, bɔ nǔ e è hǔ ɖó jikpá mɛ ɔ́ nɔ́ wú gbɔn ɔ́, mɔ̌ wɛ Aklúnɔ Mavɔmavɔ ná ɖe ɖuɖéjí tɔn kpó susu tɔn kpó xlɛ́ ɖo akɔta lɛ́ɛ bǐ nukɔn.