Ezayíi 60 - MAWUXÓWÉMA

¹ Jeluzalɛ́mu, sí te, kɔ́n hwe ɖɔhun, ɖó wěziza towe wá, susu Mawu Mavɔmavɔ tɔn tɔ́n dó jǐ towe.

² Kpɔ́n, zǐnflú ɖíe cyɔ́n ayǐkúngban ɔ́, bɔ ablu cyɔ́n togun lɛ́ɛ e. Amɔ̌, hwɛ ɔ́ Mawu Mavɔmavɔ tɔ́n dó jǐ towe hwe ɖɔhun, bɔ susu tɔn ná wěziza we.

³ Énɛ́ ɔ́, akɔta lɛ́ɛ ɖo zɔnlin jí ja zogbɛ́n towe nu, bɔ axɔ́sú lɛ́ɛ ɖo zɔnlin jí ja wěziza e hɔ́n dó jǐ towe ɔ́ nu.

⁴ Jeluzalɛ́mu, jlɔ̌ kɔ bó kpɔ́n nǔ lɛ́ lɛ̌ dó hwiɖée; vǐ towe lɛ́ɛ ja, yě kplé bó ja gɔ̌n towe: vǐ towe súnnu lɛ́ɛ jǎwe sín to ma yá to ɖé mɛ, bɔ vǐ towe nyɔ̌nu lɛ́ɛ ɔ́, è hɛn yě awa mɛ jǎwe.

⁵ A mɔ yě ɔ́, xomɛ ná hun we, nǔ ná víví nú we mɔ̌hunkɔtɔn, a nǎ j'awǎ; ɖó è nǎ bɛ́ xu mɛ dɔkun lɛ́ɛ wá gɔ̌n towe, dɔkun akɔta lɛ́ɛ tɔn ná wá gɔ̌n towe.

⁶ Lǎkúnmí ná gbɔn fí bǐ ɖo to towe mɛ, lǎkúnmí wínnyáwínnyá Madiáani tɔn lɛ́ɛ kpó Eyifa tɔn lɛ́ɛ kpó ná gosín Saba wá. Sabanu lɛ́ɛ ná dó siká kpó zǎlínkpɔ́n kpó sín agban bó wá. Yě wɛ ná wá ji han dó kpa susu nú Mawu Mavɔmavɔ ɖo mɛ bǐ nukɔn.

⁷ Mawu ɖɔ: “Gbɔ̌ Kedáa togun ɔ́ tɔn lɛ́ɛ bǐ ná wá gɔ̌n towe. Agbo Nɛbayɔ́ti togun ɔ́ tɔn lɛ́ɛ bǐ ná ɖo te nú we. È nǎ fɔ yě bǐ dó sá vɔ̌ nú mì ɖo vɔ̌sákpe ce jí, bɔ é ná nyí vɔ̌ ɖé bó ná nyɔ́ nukún ce mɛ; énɛ́ ɔ́, un ná ɖe susu xwé ce tɔn xlɛ́.

⁸ Mɛ̌ e mɛ̌ e ká ja nɛ́? É cí akpɔ́kpɔ́ wɛ ja ɖɔhun, é cí ahwannɛ́ lɛ́ kɔ xwe awǎjí ɖɔhun.

⁹ To e ɖo zɔ lɛ́ɛ xo yěɖée kplé bó ɖo nukún ɖó mì wɛ, tɔjíhún lɛ́ɛ ja, tɔjíhún ɖaxó ɖaxó lɛ́ɛ wɛ ɖo yě nu, bó ná kplá vǐ towe lɛ́ɛ sín to línlín mɛ wá. Yě ná hɛn siká, bó ná hɛn kpatágan, bó ná dó sɔ́ nyɛ Mawu Mavɔmavɔ, Mawu towe su. Nyɛ Mɛ mímɛ́ Izlayɛ́li tɔn ɔ́ su, ɖó nyɛ wɛ ɖo hwi togun ce ɔ́ sɔ́ su wɛ mɔ̌.”

¹⁰ Mawu ɖɔ nú Jeluzalɛ́mu ɖɔ: “Toɖévomɛnu lɛ́ɛ ná vɔ́ dǒ towe lɛ́ɛ mɛ, bɔ axɔ́sú yětɔn lɛ́ɛ ná wa azɔ̌ nú we. Đó xomɛsin jí wɛ un ɖe, bó dɔn tó nú we. Amɔ̌, ɖo xomɛnyínyɔ́ ce mɛ ɔ́, un ná ɖe wǎn yíyí ce xlɛ́ we.

¹¹ Hɔntogbó towe lɛ́ɛ ná ɖo nuvo hwebǐnu. È nǎ sú hɔntogbó towe lɛ́ɛ zǎn mɛ ǎ, è ka ná sú kéze ǎ, bónú è nǎ bɛ́ dɔkun akɔta lɛ́ɛ tɔn wá nú we, axɔ́sú yětɔn lɛ́ɛ ná zɔn jí bó wá.

¹² “Ényí akɔta ɖé abǐ axɔ́súɖuto ɖé gbɛ́ ɖɔ émí kún ná wa azɔ̌ nú we ó ɔ́, è nǎ sú kún tɔn dó bǐ gbídígbídí.

¹³ È nǎ hɛn atín ɖagbe ɖagbe e nɔ sɔ́ Libáan to ɔ́ su lɛ́ɛ wá nú we Jeluzalɛ́mu. È nǎ hɛn siplɛ́tín, pɛ́ɛntín kpó bwisitín kpó wá, bó ná dó bló xwé ce ɖó, bɔ un ná sɔ́ fí e un nɔ nɔ ɔ́ su.

¹⁴ Mɛ e dó ya nú we ɖ'ayǐ lɛ́ɛ ɔ́, vǐ yětɔn lɛ́ɛ ná wá dó kɔ do ɖo gɔ̌n towe; mɛ e hu tɛ́ nú we ɖ'ayǐ lɛ́ɛ bǐ ná wá jɛ kpo ɖo akɔ́n towe mɛ, bó ná nɔ́ ylɔ́ we ɖɔ: ‘Toxo Mawu Mavɔmavɔ tɔn’, ‘Sinyɔ́ɔ mɛ mímɛ́ Izlayɛ́li tɔn ɔ́ tɔn.’

¹⁵ Đ'ayǐ ɔ́, mɛ bǐ wɛ jó we dó, mɛ bǐ wɛ gbɛ́ wǎn nú we; mɛɖé nɔ́ wá gɔ̌n towe ǎ. Amɔ̌, din ɔ́, un ná sɔ́ we dó húzú nǔ ɖagbe ɖagbe ɖé, bɔ è mɔ we ɔ́, xomɛ ná nɔ́ hun mɛ, bɔ é ná nɔ mɔ̌ káká sɔ́yi.

¹⁶ Akɔta ɖě lɛ́ɛ wɛ ná nɔ́ wa nǔ nú we bɔ a nǎ nɔ́ ɖu; nǔ e nyí axɔ́sú yětɔn lɛ́ɛ tɔn ɔ́ wɛ ná nɔ́ dó dɔkun nú we. Énɛ́ ɔ́, a nǎ tunwun ɖɔ nyɛ Mawu Mavɔmavɔ wɛ nyí mɛhwlɛ́ngántɔ́ towe, nyɛ wɛ nyí Mawu hlɔ̌nhlɔ́nnɔ Jakɔ́bu togun ɔ́ tɔn.

¹⁷ Siká wɛ un ná hɛn wá nú we ɖó ganvɔ tɛnmɛ; kpatágan wɛ un ná hɛn wá nú we ɖó gan tɛnmɛ; ganvɔ wɛ un ná hɛn wá nú we ɖó atín tɛnmɛ; gan wɛ un ná hɛn wá nú we ɖó awǐnnya tɛnmɛ. Un ná sɔ́ fífá ɖó to ɔ́ nu, bɔ hwɛjijɔ ná kpa acɛ ɖo to ɔ́ mɛ.

¹⁸ È sɔ́ ná se dǎka xó ɖě ɖo to towe mɛ gbeɖé ǎ. È ka sɔ́ ná se nǔhɛngblé kpó nǔ nyanya dó sin kpó xó ɖě ɖo dogbó towe jí gbeɖé ǎ. A nǎ nɔ́ ylɔ́ ahohó towe lɛ́ɛ ɖɔ ‘Hwlɛngán’, bó ná nɔ́ ylɔ́ hɔntogbó towe lɛ́ɛ ɖɔ ‘Susu nú Mawu’.

¹⁹ Ényí a nǎ mɔ nukúnnú ɔ́, é sɔ́ ná nyí hwe wɛ ná tɔ́n cóbɔ a nǎ mɔ nukúnnú kéze ǎ; é ká sɔ́ ná nyí sun wɛ ná tɔ́n cóbɔ a nǎ mɔ nukúnnú zǎn mɛ ǎ; nyɛ Mawu Mavɔmavɔ, Mawu towe wɛ ná nyí zogbɛ́n nú we hwebǐnu, wěziza ce bǐ ná hɔ́n dó jǐ we.

²⁰ Hwe towe sɔ́ ná yi xɔ gbeɖé ǎ; sun towe ka sɔ́ ná kú gbeɖé ǎ. Nyɛ Mawu Mavɔmavɔ towe ná nyí zogbɛ́n nú we káká sɔ́yi. Aluwɛ e mɛ a ɖe ɔ́ ná vɔ.

²¹ Mɛ e ɖo togun towe mɛ lɛ́ɛ bǐ ná nɔ́ se tónú nú mì. To élɔ́ ná nyí yětɔn káká sɔ́yi; nyi wɛ sɔ́ alɔ ce dó bló yě bónú yě ná ɖe susu ce xlɛ́; yě cí atín e nyi ɖésúnɔ tun é ɖɔhun.

²² Xwéta e hwe hú xwéta lɛ́ɛ bǐ ɔ́ ná ɖó gbɛtɔ́ afatɔ́n (1.000); xwéta e ma ka ɖó gǎn ɖěbǔ ǎ ɖo xwéta lɛ́ɛ mɛ ɔ́ ná húzú togun syɛ́nsyɛ́n. Nyɛ Mawu Mavɔmavɔ ɔ́, é jɛ hwe tɔn nu ɔ́, un ná bló nǔ énɛ́ bléwún.”