Ezayíi 57 - MAWUXÓWÉMA

¹ Mɛ e nɔ wa nǔ jlɔ́jlɔ́ ɔ́ nɔ kú, mɛɖé ká nɔ́ kanbyɔ́ ǎ. Mɛ e nɔ wa nǔ ɖó sɛ́nxwi jí ɔ́, è nɔ ɖe e síin; mɛdídá lɛ́ɛ nǔwiwa nɛ́.

² Lo ɔ́, fífá ná wá, bɔ mɛ e nɔ wa nǔ jlɔ́jlɔ́ ɔ́ ná dɔ́ amlɔ tɔn ɖo vivo mɛ.

Mawu kɛ nu dó nǔ wú nú togun vodúnsɛntɔ́ ɔ́

³ Mawu ɖɔ: “Midɛɛ lɛ́ɛ ɔ́, mi wá fí; azětɔ́ ví e mi, afɔdógbětɔ́ e mi, agalɛtɔ́ e mi, mi wá fí.

⁴ Mɛ̌ ko wɛ mi ka ɖe? Mɛ̌ kɛ nu gblogblo ná wɛ mi ka ɖe? Mɛ̌ sín ɖɛ̌ dɔn wɛ mi ka ɖe? Vǐ e ma se tónú ǎ é wɛ mi nyí; adingban gbɛ́ wɛ mi dó.

⁵ Mi nɔ ɖo he ɖó wɛ gbɔn atín ɖaxó ɖaxó lɛ́ɛ sá, mi nɔ ɖo he ɖó wɛ gbɔn atín e ko dó ama lɛ́ɛ bǐ sá. Mi nɔ hu yɔkpɔ́vú lɛ́ɛ dó sá vɔ̌ gbɔn tɔkpá tɔkpá, mi nɔ hu dó sá vɔ̌ gbɔn sóxo mɛ sóxo mɛ.

⁶ Izlayɛ́li, awǐnnya wǔ ɖíɖí e gbɔn tɔdo mɛ tɔdo mɛ lɛ́ɛ wɛ nyí nǔ e hwɛ sɔ́ bó ná nɔ́ sɛn é. Yě jí wɛ a nɔ kɔn vɛ̌ɛn dó; yě wɛ a nɔ ná nǔ. Nǔ énɛ́ lɛ́ɛ má ná nyɔ́ nyɛ Mawu nukún mɛ a?

⁷ A nɔ ɖó zan gbɔn só e yi jǐ lɛ́ɛ bǐ jí; fí énɛ́ lɛ́ɛ ɖokpó ɔ́ wɛ a nɔ yi sá vɔ̌ ɖe.

⁸ A dǒ vodún kan ɖó hɔn towe gúdo, a dǒ kan ɖó agba towe wú. A hɔn bú dó mì, bó ɖe nǔ bó xá zan towe gblogblo ɔ́ jí. A gblǒ ada nú zan towe, bó nɔ ɖɔ xá súnnu lɛ́ɛ bɔ hwi kpó yě kpó nɔ́ mlɔ́ ayǐ, bɔ mɛ̌ yětɔn mimɔ nɔ́ víví nú we.

⁹ A sɛ́ ami kpó célu kpó dó vodún Mɔlɛ́ki, bó sɛ́ mɛ dó to línlín mɛ. Énɛ́ ɔ́, a j'ayǐ bǐ; a j'ayǐ káká bó yi kú tomɛ.

¹⁰ Ée a ɖo zɔnlin nu, bó ɖo énɛ́ gbé mɛ ɔ́, nǔ wá cikɔ nú we. A ka sixú ɖɔ: ‘Ée nǔ cí mɔ̌ din é ɔ́, un ná gbɔ bó gbɔjɛ́’ ǎ. Hlɔ̌nhlɔ́n lɛ́ wá nú we. Énɛ́ ɔ́, a sɔ́ flín nǔcikɔnúmɛ ǎ.

¹¹ Nǔmɛsɛn tɛ́ lɛ́ɛ ká ɖo xɛsi dó nú we wɛ sɔ mɔ̌? Nǔmɛsɛn tɛ́ wɛ ɖo xɛsi dó nú we wɛ káká bɔ a ɖǒ adingban nú mì, bó wɔn mì bǐ gbídígbídí? Ée un cí xwíí bó má ɖo nu kɛ wɛ ǎ wú wɛ a ma sɔ́ nɔ́ sí mì a?

¹² Amɔ̌ nyɛ ɔ́, nǔ e hwɛjijɔ towe nyí ɔ́, un ná ɖɔ bɔ mɛ bǐ ná se, bɔ nǔ e wa wɛ a ɖe lɛ́ɛ ɔ́, nǔɖé ná nyɔ́ nú we ɖ'é mɛ ǎ.

¹³ Adǎn gbo we bónú a sú xó hǔn, nǔmɛsɛn towe e a kplé lɛ́ɛ ní hwlɛ́n we gán bó! Nǔmɛsɛn towe énɛ́ lɛ́ɛ ɔ́, jɔhɔn wɛ ná bɛ́ yě bǐ; jɔhɔn wɛ́lɛ́wɛ́lɛ́ ɖé wɛ ná za yě bǐ. Mɛ e ká ná bɛ yɛ ɖo nyɛ gɔ́n lɛ́ɛ ná yí ayǐkúngban ɔ́, bɔ só mímɛ́ ce ná nyí yětɔn.”

Azɔn gbɔ nú togun Mawu tɔn

¹⁴ Mawu ɖɔ: “Mi bló ali ɖó. Mi yá wǔ, mi ɖe ali ɖokpó; mi ɖe afɔklɛ́nnú e ɖo ali ɔ́ jí lɛ́ɛ bǐ síin nú togun ce.”

¹⁵ Mawu mímɛ́ ɔ́, éyɛ́ mɛ e hú gǎn nǔ bǐ, bɔ nɔtɛn tɔn ɖo te káká sɔ́yi é ɔ́, xó e é ɖɔ ɔ́ ɖíe: “Nyɛ Mawu mímɛ́ ɔ́, jǐxwé aga wɛ un nɔ nɔ. Amɔ̌, un ɖo kpɔ́ xá mɛ e nǔ cikɔ ná lɛ́ɛ, mɛ e sɔ́ yěɖée hwe lɛ́ɛ; un ɖo kpɔ́ xá mɛ e sɔ́ yěɖée hwe lɛ́ɛ bó ná ná gbɛ yě; un ɖo kpɔ́ xá mɛ e nǔ cikɔ ná lɛ́ɛ bó ná ná gbɛ yě.

¹⁶ Đó un ná ɖo nǔ gbɛ́ nú mɛ wɛ magbokɔ ǎ; un ná ɖo xomɛsin jí hwebǐnu ǎ; é má nyí mɔ̌ ǎ ɔ́, mɛ e un bló lɛ́ɛ bǐ sín gbɔjɛ ná xwɛ.

¹⁷ Izlayɛ́li togun ɔ́ nɔ́ dó nukúnkɛn ɖésú. Nǔ énɛ́ sin xomɛ nú mì, bɔ un ɖo xomɛsin jí bó dɔn tó n'i; un sɔ́ jló ná mɔ ɛ ɖě ǎ; có é nɔ́ ti tamɛ; nǔ e jló e ɔ́ wɛ é nɔ́ wa.

¹⁸ Un mɔ nǔ e wa wɛ é ɖe lɛ́ɛ ganjí, amɔ̌, un ná gbɔ azɔn n'i. Un ná ɖe e ɖó ali jí, un ná ná ɛ akɔ́nkpinkpan. Un ná dó gbɔ n'i; bó dó gbɔ nú mɛ e kpó é kpó ɖo aluwɛ mɛ lɛ́ɛ.

¹⁹ Un ná sɔ́ awǎjijɛ han dó nu nú yě.” Mawu Mavɔmavɔ ɖɔ: “Fífá ní tíin nú mɛ e ɖo zɔ nú mì lɛ́ɛ, fífá ní tíin nú mɛ e sɛkpɔ́ mì lɛ́ɛ. Nǔgbó wɛ, un ná gbɔ azɔn nú togun ce.”

²⁰ Lo ɔ́, mɛdídá lɛ́ɛ ɔ́, xu ɖɔhun wɛ yě cí; xu nɔ ɖo xixo wɛ bó nɔ́ sixú nɔ te ǎ, xu ɖo xixo wɛ ɔ́ é nɔ́ ɖo nǔ kwíji kwíji lɛ́ɛ ɖe tɔ́n wɛ.

²¹ Mawu ce ɖɔ: “Fífá ɖě ɖe nú mɛdídá lɛ́ɛ ǎ.”