Ezayíi 56 - MAWUXÓWÉMA

AKPÁXWÉ ATƆNGƆ́ Ɔ́ ( 56—66 ) Mawu ɖe mɛ ɖé kpo ǎ

¹ Xó e Mawu Mavɔmavɔ ɖɔ ɔ́ ɖíe: “Mi bló nǔ e sɔgbe é, bó nɔ́ xwedó hwɛjijɔ, ɖó hwlɛngán e ná hɛn wá wɛ un ɖe ɔ́ kó sɛ yá. Hwɛjijɔ ce ko ɖo kɛ́nnɛ́kɛ́nnɛ́ bó ná ɖe éɖée xlɛ́.

² Nǔ nyɔ́ nú mɛ e nɔ wa nǔ e un ɖɔ é, mɛ e nɔ ɖó kan d'é wú bó nɔ́ wa é; nǔ nyɔ́ nú mɛ e nɔ nyi gbɔjɛzán ɔ́ ganjí é, mɛ e ma nɔ lɔn bo nɔ wa nǔ nyanya ɖěbǔ ǎ é.”

³ Mɛ e nyí akɔta ɖěvo, bó xwedó Mawu Mavɔmavɔ ɔ́ má lɛ́n ɖɔ Mawu Mavɔmavɔ ná ɖe émí sín togun tɔn mɛ jɛ́n wɛ ó. Mɛ e nyí agooɖojǐe ɔ́ má ká ɖɔ: “Nyɛ ɔ́, atín xúxú ɖé kpowun wɛ un nyí” ó.

⁴ Đó xó e Mawu Mavɔmavɔ ɖɔ ɔ́ ɖíe: “Agooɖojǐe e nɔ nyi gbɔjɛzán ce lɛ́ɛ ganjí, bó nɔ́ wa nǔ e nɔ́ nyɔ́ nukún ce mɛ lɛ́ɛ, bó sɔgbe xá akɔ e un jɛ xá togun ce ɔ́,

⁵ un ná tun awǐnnya ɖokpó te ɖo xwé ce gbe, bó ná wlán nyǐkɔ yětɔn d'é wú; énɛ́ ɔ́ ná xɔ akwɛ́ nú yě hú vǐ súnnu kpó nyɔ̌nu kpó. Nyǐkɔ e un ná ná yě ɔ́ ná nɔ te káká sɔ́yi, é ná súnsún gbeɖé ǎ.”

⁶ Jǒnɔ ɖé lɛ́ɛ tíin bó xwedó Mawu Mavɔmavɔ; yě nɔ́ sɔ́ ɛ su, yě yí wǎn n'i, mɛsɛntɔ́ tɔn wɛ yě nyí; mɛ énɛ́ lɛ́ɛ ɔ́, xó e Mawu Mavɔmavɔ ɖɔ dó yě wú ɔ́ ɖíe: “Mɛ e nɔ nyi gbɔjɛzán ɔ́ ganjí lɛ́ɛ ɔ́, mɛ e sɔgbe xá akɔ e un jɛ xá togun ɔ́ lɛ́ɛ ɔ́,

⁷ un ná kplá yě bǐ wá só mímɛ́ ce jí; un ná ná awǎjijɛ ɖaxó ɖé yě ɖo xwé ce gbe, fí e è nɔ xo ɖɛ ɖe é. Un ná yí vɔ̌ e yě ná sá nú mì ɖo vɔ̌sákpe ce jí lɛ́ɛ, kpódó nǔ e yě ná ná mì lɛ́ɛ kpó. Đó xwé ce ɔ́, è nǎ ylɔ́ ɖɔ: ‘Đɛxwé togun lɛ́ɛ bǐ tɔn.’ ”

⁸ Aklúnɔ Mavɔmavɔ e kplé Izlayɛ́li ví e gbadó gbɔn to ɖěvo mɛ to ɖěvo mɛ lɛ́ɛ ɔ́ ɖɔ: “Un ko kplé mɛ ɖé lɛ́ɛ gɔ́ nú yě, un ka ná lɛ́ kplé mɛ ɖěvo lɛ́ɛ gɔ́ nú yě.”

Nukɔntɔ́ e má tunwun azɔ̌ yětɔn ǎ lɛ́ɛ

⁹ Mi gběkanlin lɛ́ɛ mi, mi bǐ ní wá, mi kanlin e ɖo zunkan mɛ lɛ́ɛ mi, mi wá ba nǔ ɖu.

¹⁰ Mɛ e ɖo Izlayɛ́li cɔ́ wɛ lɛ́ɛ ɔ́, yě bǐ wɛ nyí wunvanɔ; yě nɔ́ tunwun nǔɖé gbeɖé ǎ. Cukú e ma nɔ hun nu ǎ é wɛ nú yě; yě nɔ́ sixú hó nǔ ǎ. Ayǐ wɛ yě nɔ́ mlɔ́ bó nɔ́ ɖo dlɔ̌ kú wɛ; kɔmlɔgɔ́ wɛ yě yí wǎn ná, bó nɔ́ sa.

¹¹ Cukú wɛ nú yě; nǔ e yě mɔ ɔ́ bǐ wɛ yě nɔ́ vún ɖu; nǔɖuɖu nɔ́ kpé yě gbeɖé ǎ. Nǔ ɖo mɔ̌ bɔ yě ká ɖo togun ce nu; yě tunwun ɖagbe ɖo nyanya mɛ ǎ; nǔ e jló yě lɛ́ɛ kɛ́ɖɛ́ wɛ yě nɔ́ bló; mɛ ɖokpó ɖokpó nɔ́ ɖo ɖagbe é ɖésúnɔ tɔn ba wɛ; yě ɖě hwe ɖ'é mɛ ǎ.

¹² Yě nɔ́ ɖɔ: “Mi wá mǐ nǎ yi nya vɛ̌ɛn gbé, mǐ ná nu ahan syɛ́nsyɛ́n. Lě e égbé tɔn cí ɔ́, mɔ̌ jɛ́n sɔ tɔn ná cí. É kpo ahan kpɔ́ gégé.”