Ezayíi 55 - MAWUXÓWÉMA

¹ Mawu ɖɔ: “Mi mɛ e kɔ xú lɛ́ɛ mi, sin ɖíe, mi bǐ ní wá! Mi na bo ma ɖó akwɛ́ ǎ hǔn, mi wá. Mi wá yí nǔɖuɖu; vɔ̌nu wɛ. Mi wá yí vɛ̌ɛn kpó nyibúnɔ́sin kpó. É byɔ́ ɖɔ mi na hɛn akwɛ́ ǎ, é ká byɔ́ ɖɔ mi ná sú axɔ́ ǎ.

² Étɛ́wú mi ka nɔ zán akwɛ́ mitɔn dó nǔ e má nyí nǔɖuɖu ǎ é mɛ? Étɛ́wú mi ka nɔ jɛ tagba dó nǔ e má nɔ gɔ́ xo ǎ é tamɛ? Mi bo ɖótó mì ganjí, énɛ́ ɔ́, mi ná mɔ nǔ ɖagbe ɖu; mi ná ɖu nǔɖuɖu e víví ganjí é.

³ Mi ɖótó te, mi wá gɔ̌n ce. Mi ɖótó mì, bó ná nɔ gbɛ.” Mawu ɖɔ: “Un ná jɛ akɔ mavɔ mavɔ ɖokpó xá mi; un ná bló mɔ̌, bó ná dó hɛn ɖagbe e sín akpá un dó nú Davídi é ɖó te káká sɔ́yi.

⁴ Đó Davídi wɛ un sɔ́, bɔ é nyí acɛkpikpa ce sín kpɔ́ndéwú nú togun lɛ́ɛ; é wɛ un sɔ́ bɔ é nyí gǎn, bó kpa acɛ nú togun lɛ́ɛ.

⁵ Izlayɛ́li, a nǎ ylɔ́ akɔta e a ma tunwun ǎ ɔ́, bɔ akɔta e ma tunwun we ǎ ɔ́ ná bɛ́ wezun wá gɔ̌n towe. É ná wá ɖó nyɛ Mawu Mavɔmavɔ, Mawu towe wútu, é ná wá ɖó nyɛ Mɛ mímɛ́ Izlayɛ́li tɔn e nɔ sɔ́ we su ɔ́ wú.”

Mawu dó akpá ɔ́, é nɔ́ ɖe

⁶ Mi ba Mawu Mavɔmavɔ din e è hɛn ɔ́, è nǎ mɔ ɛ é. Mi ylɔ́ ɛ din e é yá dó mi é.

⁷ Mɛdídá lɛ́ɛ ní jó walɔ nyanya dó, mɛ nyanya lɛ́ɛ ní jó linlin baɖabaɖa dó. Yě bǐ ní lɛ́ kɔ wá Mawu Mavɔmavɔ gɔ́n, ɖó é ná kú nǔbláwǔ nú yě. Yě bǐ ní wá Mawu mǐtɔn gɔ́n, ɖó Mawu mǐtɔn ɔ́, hwɛsɔ́kɛmɛ nɔ cikɔ n'i ǎ.

⁸ Mawu Mavɔmavɔ ɖɔ: “Linlin mitɔn lɛ́ɛ nyí linlin ce lɛ́ɛ ǎ. Walɔ mitɔn lɛ́ɛ nyí walɔ ce lɛ́ɛ ǎ.

⁹ Lě e jǐxwé yi jǐ hú ayǐkúngban sɔ ɔ́, mɔ̌ wɛ walɔ ce lɛ́ɛ yi jǐ hú walɔ mitɔn lɛ́ɛ sɔ. Mɔ̌ ɖokpó ɔ́ wɛ linlin ce lɛ́ɛ yi jǐ hú linlin mitɔn lɛ́ɛ sɔ.

¹⁰ Jǐ nɔ́ ja sín jǐxwé, laglási linfín nɔ́ ja sín jǐxwé; yě ɖě ká nɔ́ lɛ́ lɛ́ kɔ yi ma wa nǔ e gbé yě tɔ́n é ǎ: yě nɔ́ hú sin nú ayǐkúngban ɔ́ bɔ nǔ nɔ́ nyɔ́ ɖ'é jí; énɛ́ ɔ́, è nɔ mɔ jinukún bó nɔ́ dó, bó nɔ́ mɔ nǔ bó nɔ́ ɖu.

¹¹ Mɔ̌ ɖokpó ɔ́, xó e nɔ́ tɔ́n sín nu ce mɛ ɔ́ nɔ́ lɛ́ kɔ wá gɔ̌n ce agba ǎ; é nɔ́ bló nǔ e un lɛ́n é, é nɔ́ bló nǔ e gbé un sɛ́ ɛ dó é.”

¹² Awǎjijɛ mɛ wɛ mi ná gosín Babilɔ́nu, vivo mɛ wɛ è nǎ kplá mi wá to mitɔn mɛ. Mi ɖo dǐndín wɛ ɔ́, só ɖaxó ɖaxó lɛ́ɛ kpó kpɛví kpɛví lɛ́ɛ kpó ná nɔ́ ɖo awǎ jɛ wɛ. Atín e ɖo gběhan mɛ lɛ́ɛ bǐ ná nɔ́ xo kpɛ́ nú mi.

¹³ Énɛ́ ɔ́, fí e wunkan ɖe ɔ́, siplɛ́tín ná wú ɖo fínɛ́. Fí e atín wunnɔ ɖe ɔ́, ama wǎnɖagbenɔ ná wú ɖo fínɛ́; nǔ énɛ́ lɛ́ɛ bǐ ná jɛ bɔ è nǎ sɔ́ Mawu Mavɔmavɔ sín nyǐkɔ su; é ná nyí wuntun ɖé bó ná súnsún gbeɖé ǎ.