Ezayíi 50 - MAWUXÓWÉMA

¹ Xó e Mawu Mavɔmavɔ ɖɔ ɔ́ ɖíe: “Mi nɔ ɖɔ nyi nya nɔ émítɔn Jeluzalɛ́mu. É nyɔ́, mi bo xlɛ́ wěma e un wlán dó así n'i, bó gbɛ́ ɛ, lobo nya ɛ ɔ́ mì. Mi nɔ ɖɔ nyi sa émí kannumɔ ɖɔhun, bó ná sɔ́ akwɛ́ ɔ́ dó sú axɔ́ e un ɖu ɔ́ ná. É nyɔ́, mi bo ɖɔ mɛ e un sa mi xá ɔ́ nú mì. Ényí un sa mi hǔn, nǔ e mi wa nyi do lɛ́ɛ wú wɛ un sa mi; ényí un nya nɔ mitɔn hǔn, hwɛ e mi hu lɛ́ɛ wú wɛ un nya ɛ.

² Hwenu e un wá ɔ́, étɛ́ wú un ma ka mɔ mɛ ɖěbǔ ǎ? Hwenu e un ɖo mɛ ylɔ́ wɛ ɔ́, étɛ́ wú mɛɖé má ká sɔ nú mì ǎ? Alɔ ce hwe ga ná dó hwlɛ́n mi gán wɛ a? Un ɖó hlɔ̌nhlɔ́n e un ná dó hwlɛ́n mi é ǎ cé? Nyɛ mɛ e nɔ ɖɔ xó kpowun nú xu, bɔ xu nɔ mɛ é, xó kpowun wɛ un nɔ ɖɔ nú tɔsisa bɔ é nɔ́ xú, bɔ hweví lɛ́ɛ nɔ́ ba sin kpo bo nɔ kú, bó nɔ́ jɛ nyinyɔ jí.

³ Un hɛn ɔ́, un ná sɔ́ avɔ wiwi cyɔ́n nú jǐnukúnsin, nǔwamɛwu wɛ é dó ɖɔhun.” Xó lómílómí atɔngɔ́ ɔ́

Mɛsɛntɔ́ Mawu Mavɔmavɔ tɔn

Xó lómílómí atɔngɔ́ ɔ́

⁴ Aklúnɔ Mavɔmavɔ nɔ ɖɔ xó e un ná ɖɔ ɔ́ nú mì, é nɔ́ ɖɔ xó e un ná ɖɔ dó dó wǔsyɛ́n lanmɛ nú mɛ e ma sɔ́ ɖó hlɔ̌nhlɔ́n ǎ é nú mì. É su zǎnzǎn ɔ́, é nɔ́ fɔ́n mì, bónú má ɖótó e, ahwanvú ɖɔhun.

⁵ Aklúnɔ Mavɔmavɔ hun tó ce, énɛ́ ɔ́, nyi lɔ sɔ́ gbɛ́ ɖɔ un kún ná se xó tɔn ó ǎ; un sɔ́ ɖe afɔ dó gǔdo ǎ.

⁶ Un jó nɛgbé ce nú mɛ e ɖo xixo mì wɛ lɛ́ɛ, un jó gbakɔ ce nú mɛ e ɖo atán ce sun wɛ lɛ́ɛ. Un jó nukún mɛ ce nú mɛ e ɖo atán tún dó nukún mɛ nú mì wɛ lɛ́ɛ, un ka hɔn nú zun e zun mì wɛ è ɖe lɛ́ɛ ǎ.

⁷ Aklúnɔ Mavɔmavɔ nɔ wá gɔ́ alɔ nú mì; énɛ́ wú wɛ un ma nɔ mɔ ɖɔ è kó ɖu ɖo jǐ ce ǎ. Un bló nyiɖée ɖó bó syɛ́n awǐnnya ɖɔhun; un tunwun ɖɔ un kún ná ɖu winnyá gbeɖé ó.

⁸ Mawu Mavɔmavɔ ɖo akpá ce, é ná ɖɔ hwɛ ce jɔ. Mɛ̌ ká ná glá ylɔ́ hwɛ mì? Mɛ ɔ́ ní wá mǐ yi hwɛɖɔtɔ́ nukɔn. Mɛ̌ ká jló ná dó hwɛ mì? Mɛ ɔ́ ní wá.

⁹ Nǔgbó wɛ, Aklúnɔ Mavɔmavɔ wɛ nɔ wá gɔ́ alɔ nú mì. Mɛ̌ ká ná ɖó hwɛ nú mì? Kɛntɔ́ ce lɛ́ɛ bǐ wɛ ná gbi avɔ e kɔ́súkɔ́sú ɖu é ɖɔhun.

Mi ɖótó mɛsɛntɔ́ Mawu Mavɔmavɔ tɔn

¹⁰ Ényí mɛɖé ɖo mi mɛ, bó nɔ́ ɖó sísí nú Mawu Mavɔmavɔ hǔn, mɛ ɔ́ ní nɔ́ ɖótó mɛsɛntɔ́ tɔn. Ényí mɛ ɖé ɖo zɔnlin ɖi wɛ ɖo ablu mɛ, bó má mɔ nukúnnú ɖěbǔ ǎ hǔn, mɛ ɔ́ ní sɔ́ éɖée jó nú Mawu Mavɔmavɔ, é ní gán jɛ Mawu tɔn wú.

¹¹ Mi mɛ e ka flɔ́ myɔ, bó hɛn gǎ e nɔ́ dó nǔ zo lɛ́ɛ ɔ́, nǔ e ɖo te kpɔ́n mi ɔ́ ɖíe: myɔ e mi flɔ́ é kpó gǎ e mi hɛn lɛ́ɛ kpó wɛ Mawu sɔ́ ɖó te nú mi. Wǔvɛ́ mɛ wɛ mi ná kú dó.