Ezayíi 49 - MAWUXÓWÉMA

¹ Togun e ɖo to línlín mɛ lɛ́ɛ e mi, mi ɖótó mì. Mi mɛ e ɖo zɔga lɛ́ɛ mi, mi wlí tó xó ce wú. Cóbónú un ná jɔ ɔ́, Mawu Mavɔmavɔ ko ylɔ́ mì; un kpo ɖo nɔ ce xo mɛ hwenu e é ylɔ́ nyǐkɔ ce é.

² É sɔ́ nu ce dó húzú hwǐ ɖíɖá, é cyɔ́n alɔ jǐ ce. É sɔ́ mì dó húzú gǎ nuxwíɖíxwíɖí, bó sɔ́ dó gǎgo tɔn mɛ.

³ É ɖɔ nú mì ɖɔ: “Izlayɛ́li, hwi wɛ nyí mɛsɛntɔ́ ce; hwi wɛ un nɔ sɔ́ dó ɖe susu ce xlɛ́.”

⁴ Nyɛ ka ko mɔ ɖɔ tagba yǎyá wɛ un jɛ, un zán hlɔ̌nhlɔ́n ce dó wǔvɔ́, bó wa nǔ dó jɔhɔn mɛ kpowun. Lo ɔ́, Mawu Mavɔmavɔ ná sɔ́ nǔ e nyí ce ɔ́ nú mì; ajɔ ce ɖo Mawu ce lɔ mɛ.

⁵ Amɔ̌, din ɔ́, Mawu Mavɔmavɔ ɖɔ nú mì ɖɔ émí kó bló nyi bónú nyi ná nyí mɛsɛntɔ́ émí tɔn có nyi wá jɔ. É jló ɖɔ nyi ní kplá Jakɔ́bu ví lɛ́ɛ wá nú émí; é jló ɖɔ nyi ní kplá Izlayɛ́li togun ɔ́ wá nú émí. Mawu Mavɔmavɔ tunwun akwɛ́ e nǔ e wa wɛ un ɖe ɔ́ xɔ é; Mawu ce wɛ nyí hlɔ̌nhlɔ́n ce.

⁶ É ɖɔ nú mì ɖɔ: “Azɔ̌ e wa nú mì wɛ a ɖe, bó ɖo akɔta Jakɔ́bu tɔn lɛ́ɛ sɔ́ sí te wɛ, bó ɖo mɛ e kpo ɖo Izlayɛ́li lɛ́ɛ kplá wá wɛ ɔ́, azɔ̌ énɛ́ ɔ́ kɛ́ɖɛ́ kpé ǎ. Un lɛ́ sɔ́ we dó ɖó wěziza nú akɔta ɖě lɛ́ɛ, bónú hwlɛngán ce ná yi káká fí e gbɛ ɔ́ kponu ɖó é.”

Izlayɛ́li ví lɛ́ɛ ná lɛ́ kɔ wá xwé

⁷ Mawu Mavɔmavɔ ɖo xó ɖɔ nú we wɛ; é mɛ e hwlɛ́n togun tɔn gán ɔ́, é mɛ e nyí Mɛ Mímɛ́ Izlayɛ́li tɔn ɔ́ ɖo xó ɖɔ nú we wɛ; é ɖo xó ɖɔ nú hwi mɛ e è hu tɛ́ ná, bɔ mɛ lɛ́ɛ gbɛ́ wǎn ná é wɛ, é ɖo xó ɖɔ nú hwi mɛ e nyí kannumɔ acɛgannaganna-kpanúmɛtɔ́ lɛ́ɛ tɔn ɔ́ wɛ; é ɖɔ: “Ényí axɔ́sú lɛ́ɛ mɔ we ɔ́, yě ná sí te sín zinkpo yětɔn jí. Gǎn lɛ́ɛ mɔ we jǎwe ɔ́, yě ná ɖe kɔ́.” Yě ná bló mɔ̌ dó ɖe xlɛ́ ɖɔ émí ɖó sísí nú Mawu Mavɔmavɔ, Mawu Mavɔmavɔ wɛ nɔ́ nɔ gbejí nú xó e é ɖɔ é; yě nɔ́ bló mɔ̌ nú Mɛ mímɛ́ Izlayɛ́li tɔn; é wɛ sɔ́ we.

⁸ Xó e Mawu Mavɔmavɔ ɖɔ ɔ́ ɖíe: “Ée hwenu e nyɔ́ bɔ un ná sɔ ylɔ̌ nú we ɔ́ su ɔ́, ée hwlɛngánzán gbe su ɔ́, un wá gɔ́ alɔ nú we; nyi wɛ bló we, bó ná sɔ́ we dó jɛ akɔ xá togun ɔ́; un ná sɔ́ to ɔ́ sí te, bó ná má ayǐkúngban ɔ́ mɛtɔn mɛtɔn nú mɛ. Égbé din ɔ́, nǔ e ɖo ayǐkúngban énɛ́ jí ɔ́ bǐ wɛ è ka hɛn gblé.

⁹ Un ɖɔ nú gantɔ́ lɛ́ɛ, mɛ e ɖo ablu mɛ lɛ́ɛ ɖɔ: ‘Mi tɔ́n, mi wá wěziza nu.’ Énɛ́ ɔ́, yě ná cí kanlin hwan e nɔ ɖo ama ɖu wɛ gbɔn ali kpá ali kpá, bó nɔ́ mɔ nǔɖuɖu yětɔn gbɔn só jí só jí lɛ́ɛ ɖɔhun.

¹⁰ Yě sɔ́ ná ji nǔɖuɖu ya ɖě ǎ; yě ká sɔ́ ná ji sin ya ɖě ǎ; jɔhɔn e nɔ dó ya nú yě ɖo akúgbéjí ɔ́ sɔ́ ná dó ya ɖě nú yě ǎ; hwesivɔ́ ɖě ká sɔ́ ná hun dó ta yětɔn ǎ. Un nǎ kplá yě kpó wǎn yíyí kpó, bɔ yě ná nɔ́ fá kɔ ɖo tɔjɔtɛn.

¹¹ Un na sɔ́ fí e só ɖe lɛ́ɛ bǐ dó húzú ali, bɔ yě ná nɔ́ gbɔn; un ná bló ali lɛ́ɛ bǐ ɖó.

¹² Kpɔ́n, yě nɛ́! Yě gosín to línlín mɛ ja: mɛ ɖě gosín totaligbé, mɛ ɖě gosín gbadahwe jí bó gbɔn xu jí, mɛ ɖě gosín tofɔligbé, ɖo Ejípu tomɛ.”

¹³ Jǐxwé, j'awǎ! Ayǐkúngban, xomɛ ní hun we! Só lɛ́ɛ mi, mi kpa awǒbóbó, ɖó Mawu Mavɔmavɔ ɖo wǔsyɛ́n dó lanmɛ nú togun tɔn wɛ; é nɔ́ ɖe wǎn yíyí tɔn xlɛ́ mɛ e sɔ́ yěɖée hwe lɛ́ɛ.

Nyɛ ɔ́, un wɔn we ǎ

¹⁴ Jeluzalɛ́mu nɔ ɖɔ: “Mawu Mavɔmavɔ jó mì dó, Aklúnɔ ce wɔn mì.”

¹⁵ Mawu ka ɖɔ n'i ɖɔ: “Nyɔ̌nu nɔ́ wɔn vǐ e ɖo anɔ̌ nɔ́ wɛ ɖo akɔ́n tɔn mɛ ɔ́ a? É nɔ́ gbɛ́ wǎn nú vǐ e é hɛn xo tɔn ɔ́ a? É ná bó ká nɔ wɔn ɛ ɔ́, nyɛ ɔ́, nyɛ ná wɔn we ǎ.

¹⁶ Éɖíe kpɔ́n! Nyǐkɔ towe ɔ́, alɔkpákpá ce mɛ wɛ un wlán dó. Un gɔn ahohó e è mɛ lɛ́ lɛ̌ dó we ɔ́ flín gbeɖé ǎ.

¹⁷ Jeluzalɛ́mu, mɛ e ná vɔ́ we bló ɖó lɛ́ɛ kó ja; yě ɖo hwlɛndó jí ja; mɛ e gba we, bó bɛ́ nǔ e a ɖǒ lɛ́ɛ ɔ́, yědɛɛ lɛ́ɛ ɖo zɔ sɛ yi wɛ.

¹⁸ Kpɔ́n gǔdo bó kpɔ́n nukɔn, kpɔ́n aɖisí bó kpɔ́n amyɔ: vǐ towe lɛ́ɛ bǐ ɖo yěɖée sɛ kplé wɛ bó ja gɔ̌n towe. Nyɛ Mawu Mavɔmavɔ ɖɔ: Un xwlé nyiɖée nú we: jɛ̌ wɛ vǐ towe lɛ́ɛ ná nyí ɖo kɔ nú we; sɔ́nyijí e nyɔ̌nu e xwe asúxwé yɔ̌yɔ́ é nɔ́ gbá é wɛ yě ná nyí ɖo alin nú we.

¹⁹ Din ɔ́, a ɖo awǐnnyaglo lɛ́ɛ tɛ́ntin, è gba slá towe lɛ́ɛ bǐ, mɛ ɖé sɔ́ ɖo to towe mɛ ǎ. Amɔ̌, din zaanɖé ɔ́, to ɔ́ ná hwe dó toví towe lɛ́ɛ, bɔ mɛ e ɖo gbɛ gblé dó nú we wɛ lɛ́ɛ ná hɔn yi zɔ nú we.

²⁰ A mɔ ɖɔ émí kún sɔ́ ɖó vǐ ɖě ó. Amɔ̌, a nǎ se din bɔ vǐ towe lɛ́ɛ ná ɖo vo sa wɛ ɖɔ: ‘Un mɔ tɛn mɛ ǎ, sɛ kpɛɖé nú má nɔ fí.’

²¹ Énɛ́ ɔ́, a nǎ nɔ́ kanbyɔ́ hwiɖée ɖɔ: ‘Mɛ̌ ká ná vǐ élɔ́ lɛ́ɛ bǐ mì? Un ma ka sɔ́ ɖó vǐ ɖě nɛ́? Un sɔ́ ɖó nukún ɖɔ un ná mɔ vǐ ɖě gbeɖé ǎ. È ko ɖe mì sín tomɛ fí, bó sɔ́ mì ɖó vo; bɔ vǐ énɛ́ lɛ́ɛ ɔ́, mɛ̌ ká hɛn yě? Nyi ɖokpónɔ géé wɛ ká kpo ɖ'ayǐ hǔn! Mɛ énɛ́ lɛ́ɛ ɔ́, fítɛ́ yě ká ɖe ɖ'ayǐ?’

²² Xó e Aklúnɔ Mavɔmavɔ ɖɔ ɔ́ ɖíe: ‘Un ná bló alɔ nú akɔta ɖě lɛ́ɛ, un ná sɔ́ nǔ ɖe xlɛ́ togun lɛ́ɛ; énɛ́ ɔ́, yě ná bɛ́ vǐ towe súnnu lɛ́ɛ dó awa mɛ wá nú we, yě ná fɔ vǐ towe nyɔ̌nu lɛ́ɛ ɖó abɔ̌ta wá nú we.

²³ Axɔ́ví nyɔ̌nu lɛ́ɛ wɛ ná nɔ́ ná nǔɖuɖu vǐ towe lɛ́ɛ, bɔ axɔ́sú lɛ́ɛ na nɔ kplɔ́n nǔ yě. Yě ná nɔ́ jɛ kpo ɖo nukɔn towe, bó ná nɔ́ ɖe kɔ́, bó ná nɔ́ ɖíɖɔ́ afúntúntún e ɖo afɔ nú we lɛ́ɛ. Énɛ́ ɔ́, a nǎ tunwun ɖɔ nyi wɛ nyí Mawu Mavɔmavɔ, ɖɔ mɛ e nɔ gán jɛ wǔ ce lɛ́ɛ kún nɔ ɖu winnyá gbeɖé ó.’

²⁴ Ahwanfuntɔ́ e hɛn nǔɖé sín ahwangbénu wá ɔ́, è sixú yí sín así tɔn a? Mɛ ɖé sixú yí kannumɔ sín gǎnhúnǔtɔ́ sí a?

²⁵ Mawu Mavɔmavɔ ka ɖɔ: ‘Mɛ ɖé sixú yí ǎ. Nyɛ ka ná yí mɛ e ahwanfuntɔ́ hɛn sín ahwangbénu é sín así tɔn, un ná yí kannumɔ sín gǎnhúnǔtɔ́ sí. Jeluzalɛ́mu, nyi ɖésú wɛ ná tɔ́n ahwan kɛntɔ́ towe lɛ́ɛ, bó ná hwlɛ́n vǐ towe lɛ́ɛ gán.

²⁶ Un ná hú gǎn mɛ e ɖo tagba dó nú we wɛ lɛ́ɛ, bɔ yě ná ɖu lan yě ɖésúnɔ tɔn; yě ná nu kanjɔ yě ɖésúnɔ tɔn bɔ é ná mú yě vɛ̌ɛn yɔ̌yɔ́ ɖɔhun. Énɛ́ ɔ́, mɛ e ɖo gbɛ ɔ́ mɛ lɛ́ɛ bǐ ná mɔ ɖɔ nyɛ wɛ nyí Mawu Mavɔmavɔ, nyɛ wɛ nyí mɛhwlɛ́ngántɔ́ towe; nyɛ wɛ xɔ gbɛ nú we; nyɛ wɛ nyí Mawu hlɔ̌nhlɔ́nnɔ Jakɔ́bu togun ɔ́ tɔn.’ ”