Ezayíi 46 - MAWUXÓWÉMA

¹ Mawu ɖɔ: “Vodún Bɛ́lu ɖíe ɖo tɔ́tɔ́ e; vodún Nɛbo ɖíe jɛ ayǐ e. È dǒ bǒcyɔ yětɔn lɛ́ɛ sín agban nú nyibú lɛ́ɛ; ɖ'ayǐ ɔ́, è sɔ́ yě kɛɛ ɖo nǔwiwa lɛ́ɛ hwenu, amɔ̌, din ɔ́, agban kpinkpɛn ɖé wɛ yě nyǐ bɔ è dǒ nú kanlin e nǔ ko cikɔ ná lɛ́ɛ.

² Vodún lɛ́ɛ ɖo tɔ́tɔ́, yě bǐ wɛ jɛ ayǐ ɖó kpɔ́; yě sixú hwlɛ́n bǒcyɔ yětɔn lɛ́ɛ gán ǎ, bɔ è wlǐ yě lɔ xwe kannumɔgbénu.

³ Izlayɛ́li ví e mi, mi togun Jakɔ́bu tɔn e kpo lɛ́ɛ, mi mɛ e nu un ɖe sín hwenu e è ko ji mi ɔ́, mi mɛ e un hɛn sín gbe e gbe è ko ji mi ɔ́, mi ɖótó mì.

⁴ Lě e un ɖe é jɛ́n un ná nɔ káká yi kpikpo hwenu mitɔn. Un ná hɛn mi káká bɔ ɖa mitɔn ná wé. Nyɛ wɛ bló mi, nyɛ wɛ ná hɛn mi. Nǔgbó wɛ, un ná kpé nukún dó mi wú, bó ná hwlɛ́n mi gán.

⁵ Mɛ̌ wú mi ka ná jlɛ́ mì dó? Mɛ̌ kpó nyi kpó ká nyí gbɛ̌? Mɛ̌ kpó nyi kpó mi ka ná sɔ́ ɖó hǎ, bó jlɛ́ ɖě dó ɖě wǔ?

⁶ Mi kpɔ́n mɛ e nɔ zán dɔkun yětɔn bǐ, bó nɔ́ da kpatágan, bó nɔ́ da siká, bó nɔ́ yí nǔtuntɔ́ ɖokpó bɔ é nɔ́ bló nǔmɛsɛn nú yě, bɔ yě nɔ́ jɛ kpo ɖo asá tɔn mɛ, bó nɔ́ sɛn ɛ lɛ́ɛ.

⁷ Énɛ́ ɔ́, yě nɔ́ ɖíɖá nǔmɛsɛn yětɔn ɖó abɔ̌ta, bó nɔ́ sɔ́ yi ɖó tɛn tɔn mɛ, bɔ é nɔ́ nɔ fínɛ́, é sɔ́ ná sɛ tɛn gbeɖé ǎ. È ylɔ̌ ɛ ɔ́, é nɔ́ kɛ nu ǎ; adǎn ká ná gbo mɛ ɖé bɔ é ná hwlɛ́n ɛ gán ǎ.”

Hwlɛngán ɔ́ sɔ́ ɖo zɔ ǎ

⁸ Mawu ɖɔ: “Gbejímánɔtɔ́ lɛ́ɛ mi, mi flín nǔ élɔ́ ganjí. Mi byɔ́ miɖée mɛ bó lin tamɛ.

⁹ Mi flín nǔ nukɔn nukɔntɔn e jɛ ɖ'ayǐ xóxó lɛ́ɛ. Nyɛ wɛ nyí Mawu, é sɔ́ kpo mɛɖé ǎ. Mawu nyi ɖɔhun ɖě tíin ǎ.

¹⁰ Un ko ɖɔ nǔ e ná wa wɛ un ɖe ɔ́ sín do. Nǔ e má kó jɛ ǎ, bó ká ná wá jɛ ɔ́, un ko ɖɔ ɖ'ayǐ sín tɛgbɛ. Un ɖɔ: nǔ e ná bló wɛ un ɖe ɔ́ ɖíe, bɔ é ká ná jɛ. Nǔ e jló mì lɛ́ɛ ɔ́, un nɔ bló bǐ.

¹¹ Un ylɔ́ nǔsáxɛ ɖokpó sín fí e hwe nɔ tɔ́n sín é; Mɛ e ná bló nǔ e un lɛ́n ɔ́ wɛ; un ylɔ́ ɛ sín to línlín ɖé mɛ; un ɖɔ xó lě tlóló ɔ́, tlóló jɛ́n nǔ e un ɖɔ ɔ́ nɔ́ nyí wiwa. Un lɛ́n nǔɖé bó ná wa ɔ́, un nɔ wa.

¹² Gbɛtɔ́ ayisyɛ́nsyɛ́nnɔ lɛ́ɛ mi, mi ɖótó mì. Mi mɛ énɛ́ lɛ́ɛ e ɖo zɔ ɖésú nú hwɛjijɔ lɛ́ɛ ɔ́, mi ɖótó mì.

¹³ Un sɛ́ hwɛjijɔ ce dó bɔ é ja; é kó sɛkpɔ́ bǐ kɛ́nnɛ́kɛ́nnɛ́ wɛ lɔ; hwlɛngán ɔ́ ná lín có bó wá ǎ, nyi ɖésú wɛ ná hɛn wá Sinyɔ́ɔ. Nǔgbó wɛ, un hɛn nǔ ɖagbe ɖagbe ɖé já nú Izlayɛ́li.”