Ezayíi 45 - MAWUXÓWÉMA

¹ Mawu Mavɔmavɔ ɖɔ nú Silúsi, axɔ́sú e é sɔ́ é ɖɔ : “Un ná ná gǎnjɛwú we, bó ná bɛ́ akɔta lɛ́ɛ dó acɛ towe glɔ́, un ná yí acɛ sín axɔ́sú lɛ́ɛ sí; un ná hun toxo lɛ́ɛ sín hɔntogbó e ɖo súsú lɛ́ɛ nú we.

² Nyi ɖésú ná ɖo zɔnlin ɖi wɛ ɖo nukɔn towe, un ná gbígbá kpó e ɖo nukɔn towe lɛ́ɛ, un ná gba ganvɔhɔn lɛ́ɛ, un ná fó gan e è dǒ sú yě ná lɛ́ɛ.

³ Un ná ná dɔkun e ɖo nǔglɔ́ lɛ́ɛ we; un ná ná dɔkun e ɖo hwlǎhwlá lɛ́ɛ we. Énɛ́ ɔ́, a nǎ tunwun ɖɔ nyi wɛ nyí Mawu Mavɔmavɔ; a na tunwun ɖɔ nyɛ Mawu Izlayɛ́li tɔn ɔ́ wɛ ylɔ́ we.

⁴ Un ylɔ́ we ɖó Izlayɛ́li, togun ce, mɛsɛntɔ́ ce un sɔ́ é wú. A tunwun mì ǎ, có un ka sɔ́ we su.

⁵ Nyɛ wɛ nyí Mawu Mavɔmavɔ; é sɔ́ kpo mɛ ɖěvo ǎ. Nyɛ mɛvo ɔ́, Mawu ɖě sɔ́ ɖe ǎ. A tunwun mì ǎ, amɔ̌, un zɔ́n azɔ̌ we.

⁶ Énɛ́ ɔ́, sín zǎnzǎnhwe jí káká yi gbadahwe jí ɔ́, mɛ bǐ ná tunwun ɖɔ nyɛ mɛvo ɔ́, Mawu ɖě kún sɔ́ ɖé ó. Nyɛ wɛ nyí Mawu Mavɔmavɔ ɔ́; é sɔ́ kpo mɛɖé ǎ.

⁷ Un nɔ bló wěziza, bó nɔ́ bló ablu, nyi wɛ nɔ ná nyɔ̌ná mɛ; nyi wɛ nɔ dɔn tagba wá. Nǔgbó wɛ, nyɛ Mawu Mavɔmavɔ wɛ nɔ bló nǔ énɛ́ lɛ́ɛ bǐ.

⁸ Jǐnukúnsin e, hwɛjijɔ towe ní gba fo ɖɔhun sín jǐxwé aga dɔ̌n; hwɛjijɔ towe ní ja jǐ ɖɔhun, bó sa tɔ; ayǐkúngban ní hun bónú hwlɛngán ní gba sɛ́, bónú hwɛjijɔ ní wú. Nyɛ Mawu Mavɔmavɔ wɛ bló nǔ énɛ́ lɛ́ɛ bǐ.”

Ko kpó zɛ̌nmɛtɔ́ kpó

⁹ Heelú gbɛtɔ́ e ɖo nǔ dɔ́n xá mɛ e bló e ɔ́ wɛ é; gbɛtɔ́ ɔ́, kogbán kpowun wɛ é nyí ɖo mɛ lɛ́ɛ tɛ́ntin. Ko nɔ kanbyɔ́ mɛ e ɖo nyinya ɛ wɛ é ɖɔ: “Ani wa wɛ a ka ɖe ɖo fínɛ́ nɛ́” a jí a? Zɛ̌n nɔ ɖɔ nú zɛ̌nmɛtɔ́ ɖɔ: “A nylá alɔvínu” a?

¹⁰ Heelú vǐ e ná ɖɔ nú tɔ́ tɔn ɖɔ: “Vǐ alɔkpa tɛ́ ká nyí énɛ́ bɔ a ji?” Heelú vǐ e ná ɖɔ nú nɔ tɔn ɖɔ: “Vǐ tɛ́ a ka ji nɛ́?”

¹¹ Mawu Mavɔmavɔ, Mɛ mímɛ́ Izlayɛ́li tɔn ɔ́, éyɛ́ mɛ e bló togun tɔn ɔ́, xó e é ɖɔ ɔ́ ɖíe: “Mi ná syɛ́n ta káká bó ná kan nǔ byɔ́ mì dó nǔ e ná wá jɛ sɔ ɔ́ wú wɛ a? Abǐ mi wɛ ná ɖɔ lě e un ná wa nǔ gbɔn xá vǐ ce lɛ́ɛ ɔ́ nú mì a? Abǐ mi wɛ ná kan nǔ byɔ́ mì dó nǔ e un sɔ́ alɔ ce dó bló ná lɛ́ɛ wú a?

¹² Nyɛ wɛ ɖó ayǐkúngban ɔ́, nyɛ wɛ ɖó gbɛtɔ́ e ɖ'é jí lɛ́ɛ. Nyɛ wɛ vlɔ́n jǐxwé, bó nɔ́ ɖe gbe dó nǔ e ɖo jǐxwé lɛ́ɛ bǐ.

¹³ Nyɛ wɛ sɛ́ nya é nɛ́ e mi tunwun ɔ́ dó, bɔ é jɛ ali, ɖó un ɖo gbejí nú xó e un ɖɔ é. É sɔ́ nǔɖé bó ná wa ɔ́, un ná hun ali tɔn n'i. É wɛ ná vɔ́ toxo ce Jeluzalɛ́mu ɔ́ gbá, bó ná jó mɛ e nyí ce bɔ ahwan wlí yi to ɖěvo mɛ lɛ́ɛ dó, bɔ yě ná yi. É ná byɔ́ nǔ ɖěbǔ ǎ. Nyɛ Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌.”

Izlayɛ́li, Mawu ɖo akpá towe

¹⁴ Izlayɛ́li, Mawu Mavɔmavɔ ɖɔ nú we ɖɔ: Ejípunu lɛ́ɛ ɔ́, nǔ e tɔ́n ɖo azɔ̌ yětɔn mɛ lɛ́ɛ, nǔ e nyí Etiopíinu lɛ́ɛ tɔn lɛ́ɛ kpó éé nyí Sevanu lɛ́ɛ tɔn kpó lɛ́ɛ ɔ́, yě ná bó d'agba gbɔn ɖěbǔ ɔ́, nǔ yětɔn lɛ́ɛ bǐ ná wá to towe mɛ; nǔ yětɔn bǐ ná húzú towe. Mɛ énɛ́ lɛ́ɛ ná nɔ wɔlɔ mɛ, bó ná xwedó we; yě ná jɛ kpo ɖo nukɔn towe, bó ná nɔ sa vo nú we ɖɔ: “Hwi ɖokpónɔ gɔ́n jɛ́n Mawu ɖe, Mawu ɖěvo tíin ǎ.”

¹⁵ Mawu Izlayɛ́li tɔn, hwi mɛ e nɔ hwlɛ́n mɛ gán ɔ́, Mawu wɛ a nyǐ bó ɖo hwlǎhwlá nǔgbó.

¹⁶ Kpɔ́n, bǒcyɔkpatɔ́ lɛ́ɛ ɖu winnyá, wi yětɔn bǐ kɔ́n; yě bǐ dó kɔ do bó ɖo yiyi wɛ.

¹⁷ Amɔ̌, Izlayɛ́li togun ɔ́, Mawu Mavɔmavɔ hwlɛ́n ɛ gán káká sɔ́yi. Mi mɛ e nyí togun tɔn ɔ́, mi sɔ́ ná ɖu winnyá gbeɖé ǎ, wi mitɔn ɖě sɔ́ ná kɔ́n gbeɖé ǎ.

Mawu ɖɔ hwlɛngánxó sɔ́ nyi wɛn

¹⁸ Mawu Mavɔmavɔ wɛ bló jǐnukúnsin. É wɛ nyí Mawu; é wɛ ɖó ayǐkúngban ɔ́. É wɛ bló ayǐkúngban ɔ́ ɖó alɔ tɔn wú, bó bló bɔ é syɛ́n; é ká ɖó e sɔ́ nyí vɔ̌ ǎ. Lo ɔ́, é bló bɔ è nǎ nɔ jí wɛ. Din ɔ́, xó e é ɖɔ ɔ́ ɖíe: “Nyɛ wɛ nyí Mawu Mavɔmavɔ ɔ́, ɖěvo sɔ́ ɖe ǎ.

¹⁹ Xó e ɖɔ wɛ un ɖe ɔ́, un ɖɔ ɖo nǔglɔ́, ɖo ablu mɛ fí ɖé ǎ. Un ɖɔ nú Jakɔ́bu ví lɛ́ɛ ɖɔ yě yi ba mì ɖo fí e nǔ ɖěbǔ má ɖe é ǎ. Nyɛ Mawu Mavɔmavɔ ɔ́, xó e sɔgbe ɔ́ wɛ un nɔ ɖɔ; xó nǔgbó wɛ un nɔ ɖɔ.”

Akɔta lɛ́ɛ vɔ́ jɔ

²⁰ Mawu ɖɔ: “Mi mɛ e kpo ɖo gbɛ ɖo akɔta lɛ́ɛ mɛ lɛ́ɛ mi, mi sɛ miɖée kplé, bó wá; mi zɔn kpɔ́ bó wá. Yě mɛ e nɔ zé bǒcyɔ yětɔn lɛ́ɛ dó jǐ, bó nɔ́ ɖo nǔ e má sixú hwlɛ́n yě ǎ lɛ́ɛ xomlá wɛ lɛ́ɛ ɔ́, yě tunwun nǔɖé ǎ.

²¹ Mi wá ɖɔ nǔ e lin wɛ mi ɖe lɛ́ɛ, bó ɖe xlɛ́ ɖɔ nǔgbó wɛ; É jló mi hǔn, mi nɔ kpɔ́ bó kplɔ́n nǔ miɖée. Nǔ e ɖo jijɛ wɛ égbé din ɔ́, mɛ̌ ká ɖɔ ɖ'ayǐ sín do? Mɛ̌ kó ɖɔ ɖ'ayǐ ɖɔ yě ná jɛ? É má nyí nyɛ Mawu Mavɔmavɔ ɔ́ wɛ a? Nyɛ mɛvo ɔ́, Mawu ɖě sɔ́ ɖe ǎ. Nyɛ wɛ nyí Mawu, nyi wɛ nɔ wa nǔ ɖó sɛ́nxwi jí, nyi wɛ nɔ hwlɛ́n mɛ gán, mɛ ɖě sɔ́ ɖe zɛ nyɛ wú ǎ.

²² Mi mɛ e ɖo wɛ̌kɛ́ ɔ́ mɛ lɛ́ɛ bǐ ní wá gɔ̌n ce; énɛ́ ɔ́, un ná hwlɛ́n mi gán. Đó nyi wɛ nyí Mawu; é sɔ́ kpo mɛɖé ǎ.

²³ Nyɛ wɛ nyí Mawu nǔgbó; énɛ́ wú ɔ́, un xwlé nyɛ ɖésú nú mi; xó e tɔ́n sín nu ce mɛ lɛ́ɛ bǐ wɛ nyí xó nǔgbó; xó ɖokpó ɖíe, bɔ un ná húzú ǎ: gbɛtɔ́ e ɖo ayǐkúngban ɔ́ jí lɛ́ɛ bǐ ná jɛ kpo ɖo nukɔn ce, bó ná xwlé nǔ bó ɖɔ:

²⁴ ‘Mawu Mavɔmavɔ kɛ́ɖɛ́ gɔ́n wɛ è nɔ mɔ nǔ wa ɖó sɛ́nxwi jí ɖe, é gɔ́n wɛ è nɔ mɔ hlɔ̌nhlɔ́n ɖe.’ Mɛ e tɔ́n ahwan mì lɛ́ɛ bǐ wɛ ná wá gɔ̌n ce, bɔ winnyá ná hú yě.

²⁵ Amɔ̌, Izlayɛ́li ví lɛ́ɛ bǐ ná mɔ hwɛjijɔ ɖo gɔ̌n ce bɔ é ná víví nú yě.”