Ezayíi 44 - MAWUXÓWÉMA

¹ Mawu ɖɔ: “Din ɔ́, Jakɔ́bu togun, mɛsɛntɔ́ ce, ɖǒtó; Izlayɛ́li, hwi mɛ e un sɔ́ é, ɖǒtó mì.

² Nyɛ Mawu Mavɔmavɔ wɛ ɖó we, nyɛ wɛ bló we dó nɔ towe xomɛ; nyɛ wɛ ja alɔ gɔ́ nú we gbé; xó e ɖɔ nú we wɛ un ɖe ɔ́ ɖíe: Jakɔ́bu togun, mɛsɛntɔ́ ce, Yeculunu , nyɛ wɛ sɔ́ we, ma ɖi xɛsi ó.

³ Đó un ná ná sin to e mɛ akú ɖó ɖe ɔ́, un ná ɖe gbe bɔ tɔsisa ná gbɔn ayǐkúngban xúxú jí. Un ná gba yɛ ce kɔn nyi vǐ towe lɛ́ɛ jí, bó ná gba nyɔ̌ná ce kɔn nyi vǐvú towe lɛ́ɛ bǐ jí.

⁴ Yě ná tɔ́n kun bó ná su fántín e ɖo tɔ mɛ é ɖɔhun, sólutín e ɖo tɔ kpá é ɖɔhun.

⁵ Mɛ ɖě ná ɖo yě mɛ bó ná ɖɔ: ‘Mawu Mavɔmavɔ tɔn wɛ un nyí.’ Mɛ ɖěvo ná ɖɔ: ‘Jakɔ́bu ví wɛ un nyí.’ Mɛ ɖěvo ná wlán dó alɔ ɖɔ: ‘Mawu Mavɔmavɔ tɔn’, bó ná sɔ́ Izlayɛ́li nyíkɔ ɔ́ dó yí go ná.”

Mavɔmavɔ hu tɛ́ nú vodún lɛ́ɛ

⁶ Mawu Mavɔmavɔ, Izlayɛ́li xɔ́sú ɔ́, Mɛhwlɛ́ngántɔ́ Izlayɛ́li tɔn ɔ́, Mawu Mavɔmavɔ Nǔbǐwúkpétɔ́ ɔ́, xó e é ɖɔ ɔ́ ɖíe: “Nyi wɛ nyí bǐbɛ́mɛ, bó lɛ́ nyí vivɔnu nǔ bǐ tɔn. Nyɛ mɛvo ɔ́, Mawu ɖě sɔ́ tíin ǎ.

⁷ Mɛ̌ wɛ sɔ ga mì? Mɛ ɔ́ ní sú xó bó ɖɔ; mɛ ɔ́ ní tínmɛ nú mì. Mɛ ɔ́ ní ɖɔ nǔ e ko jɛ sín hwenu un ɖó gbɛtɔ́ nukɔn tɔn lɛ́ɛ é; mɛ ɔ́ ní ɖɔ nǔ e ɖo nǎ wá jɛ wɛ lɛ́ɛ.

⁸ Togun ce e mi, mi ma ɖi xɛsi ó, ado ma hu mi ó; un ko ɖɔ nú mi, un ko ɖe xlɛ́ mi ɖ'ayǐ, mi ko tunwun ganjí, mi wɛ nyí kúnnuɖetɔ́ ce. Nyɛ mɛvo ɔ́, Mawu ɖěvo ɖe wɛ a? Gbeɖé, Só ɖěvo ɖe ǎ. Nyɛ sɔ́ mɔ ǎ.”

Bǒcyɔkpatɔ́ lɛ́ɛ

⁹ Bǒcyɔkpatɔ́ lɛ́ɛ ɔ́, nǔvɔ́nɔ wɛ yě nyǐ, nǔ e yě nɔ́ dó ɖó nǔgɛ́n é ɖě nyí nǔɖé wa nú ǎ. Bǒcyɔ énɛ́ lɛ́ɛ wɛ nɔ́ ɖe xlɛ́ ɖɔ bǒcyɔkpatɔ́ lɛ́ɛ nyí nǔvɔ́nɔ, ɖó bǒcyɔ nɔ́ mɔ nǔ ǎ; bǒcyɔ ká tunwun nǔɖé ǎ, winnyá wɛ é ná dó yě.

¹⁰ Gbɛtɔ́ nɔ lí vodún, gbɛtɔ́ nɔ́ kɔn bǒcyɔ; bǒcyɔ ɔ́ nǔ yǎyá ká wɛ; Lǔlú nɛ́ ǎ cé?

¹¹ Mɛ e ko ɖó alɔ ɖ'é mɛ lɛ́ɛ bǐ wɛ ná ɖu winnyá; alɔnuzɔ́watɔ́ e nɔ́ kpa bǒcyɔ énɛ́ lɛ́ɛ ɔ́, gbɛtɔ́ kpowun wɛ yě nyí. Yě ní sɛ yěɖée kplé bó wá hwɛ nukɔn; yě bǐ wɛ ná ɖi xɛsi, yě bǐ wɛ ná ɖu winnyá.

¹² Fletuntɔ́ nɔ́ sɔ́ gan dó ado mɛ, bó nɔ́ xo zo dó; é nɔ́ sɔ́ zǔnkpé, bó nɔ́ dó hlɔ̌nhlɔ́n e ɖo lan tɔn mɛ é bǐ d'é wú, bó nɔ tun bǒcyɔ. Lo ɔ́, xovɛ́ sin i lě tlóló ɔ́, gǎn ɖě sɔ́ nɔ ɖo wǔ tɔn ǎ. Ényí é má nu sin kpɛɖé ǎ ɔ́, nǔ nɔ cikɔ n'i bǐ.

¹³ Bǒcyɔkpatɔ́ ɔ́, kan wɛ é nɔ́ dó jlɛ́ kpo e é ná zé dó kpa bǒcyɔ ɔ́ ná, é nɔ́ sɔ́ hwě mlímlí bó nɔ́ dó ɖe bǒcyɔ ɔ́ ɖó kpo ɔ́ wú, bó nɔ́ sɔ́ hanví dó kpa, lobo nɔ zé akutɛ dó ɖíɖí wǔ ná. Bǒcyɔkpatɔ́ ɔ́ nɔ́ sɔ́ atín ɔ́ dó kpa gbɛtɔ́, bó nɔ́ bló nukún tɔn mɛ ɖó, bɔ é nɔ́ nyɔ́ ɖɛkpɛ, lobɔ è nɔ sɔ́ ɖó xwé gbe.

¹⁴ È nɔ xásá sɛ́dlutín ɖé ɖó bó ná wa gbo, abǐ è nɔ kpɔ́n cɛ́nitín ɖé abǐ telebɛ́ntitín ɖé, bó nɔ́ jó e dó nyi zunkan ɔ́ tɛ́ntin bɔ é nɔ́ su, abǐ è nɔ tun pɛ́ɛntín, bɔ jǐ nɔ ja bɔ é nɔ́ su.

¹⁵ Atín nɛ́ ɔ́, è nɔ dó nakí tɔn zo, è nɔ sɔ́ nakí énɛ́ dó bɔ myɔ bó nɔ́ xú, è nɔ lɛ́ dó ɖa nǔ ná. É gló ɔ́, è nɔ sɔ́ dó ɖó vodún, bó nɔ jɛ kpo ɖo nukɔn tɔn. È nɔ sɔ́ dó kpa bǒcyɔ, bó nɔ́ yi xo ɖɛ ɖo asá tɔn mɛ.

¹⁶ Énɛ́ ɔ́, è nɔ dó atín e è sɛ́n ɔ́ vlɔ̌ zo, è nɔ dó mɛ lan bó nɔ́ ɖu, abǐ è nɔ dó bɔ myɔ bó nɔ́ xú bó nɔ́ ɖɔ: “Éénɛ́! Un xú myɔ bɔ é jɛ mɛ nú mì. Myɔ nyɔ́ mɛ!”

¹⁷ Atín e kpo ɔ́, yě nɔ́ dó kpa bǒcyɔ, bó nɔ́ sɔ́ dó ɖó vodún; yě nɔ́ jɛ kpo ɖo nukɔn tɔn, bɔ mɛ ɖokpó ɖokpó nɔ́ xo ɖɛ bó nɔ́ ɖɔ: “Vodún, hwi wɛ un nɔ sɛn; hwlɛ̌n mì gán.”

¹⁸ Mɛ énɛ́ lɛ́ɛ ɔ́, nǔɖé ɖo ta yětɔn mɛ ǎ; yě tunwun nǔ ɖěbǔ ǎ. Nukún yětɔn ɖo myɔ̌myɔ́, yě mɔ nǔɖé ǎ; ayǐ yětɔn ká nɔ́ mɔ nǔ, bónú yě ná mɔ nukúnnú jɛ nǔɖé wǔ ǎ.

¹⁹ Yě ɖě nɔ́ lin tamɛ kpɔ́n ǎ; ayi yě ɖě tɔn ɖo te ǎ; yě ɖě ká ɖó nǔnywɛ́ bó ná ɖɔ: “Un dó atín e un sɛ́n ɔ́ vlɔ̌ zo, bó ɖa nǔ e un ɖu ɔ́ ɖo akán tɔn jí, un mɛ lan ɖ'é jí bó ɖu. Atín e kpo ɔ́ un sɔ́ dó kpa bǒcyɔ ná, bǒcyɔ suɖunú ná. Atín yǎyá kpowun nukɔn wɛ un nɔ jɛ kpo ɖe din.”

²⁰ Linlin yětɔn nɔ́ nɔ nǔ e nyí afín kpowun é jí. Ayi yětɔn e kó flú ɔ́ nɔ́ zɔ́n, bɔ yě nɔ́ ɖɔ gblǒ; vodún yětɔn lɛ́ɛ nɔ́ hwlɛ́n yě gán ǎ; lo ɔ́, yě ɖésúnɔ nɔ́ mɔ ɖɔ nǔ e émí zunfán ɔ́, xɛblɛ́nú kpowun wɛ ǎ.

Mɛsɛntɔ́ ce wɛ a nyǐ, ma wɔn ó

²¹ Mawu ɖɔ: “Izlayɛ́li, togun Jakɔ́bu tɔn, flín nǔ élɔ́ ganjí: Hwi wɛ nyí mɛsɛntɔ́ ce, un bló we bónú a nǎ wa azɔ̌ nú mì. Izlayɛ́li, un wɔn we ǎ.

²² Un ko dɔn nǔ gbɔn gǔ e a fɔ́n dó jǐ ce ɔ́ jí, un dɔn nǔ gbɔn hwɛ e a hu dó mì lɛ́ɛ jí. Bǐ wɛ kó súnsún, bǐ wɛ kó wá yi akpɔ́kpɔ́ ɖɔhun. Un ko hwlɛ́n we gán, lɛ̌ kɔ wá gɔ̌n ce.”

²³ Jǐnukúnsin e, j'awǎ, ɖó Mawu Mavɔmavɔ wɛ wa nǔ; nǔ e ɖo ayǐkúngban ɔ́ glɔ́ lɛ́ɛ mi, mi kpa awǒbóbó n'i; só lɛ́ɛ mi, atín lɛ́ɛ mi, zungbó lɛ́ɛ mi, mi hun xomɛ bó sú xó. Mi hun xomɛ bó sú xó, ɖó Mawu Mavɔmavɔ hwlɛ́n togun tɔn gán, é ɖe susu tɔn xlɛ́ ɖo Izlayɛ́li.

Gbɛɖótɔ́ ɔ́ wɛ bló nǔ bǐ

²⁴ Izlayɛ́li, Mawu Mavɔmavɔ, Mɛhwlɛ́ngántɔ́ towe e bló we dó nɔ towe xomɛ ɔ́, xó e é ɖɔ ɔ́ ɖíe: “Nyɛ Mawu Mavɔmavɔ ɔ́, nyɛ wɛ bló nǔ bǐ. Nyɛ ɖokpó géé wɛ vlɔ́n jǐxwé. Nyɛ ɖokpó géé wɛ tɛ́ ayǐkúngban ɔ́. Mɛ ɖěbǔ dó alɔ mì ǎ.

²⁵ Din ɔ́, nǔ e ná wá jɛ bɔ nǔkantɔ́ lɛ́ɛ nɔ́ ɖɔ lɛ́ɛ ɔ́, un sɔ́ bǐ dó húzú nǔ yǎyá. Nǔmɔtɔ́ lɛ́ɛ ɔ́, un sɔ́ yě dó húzú xlonɔ; un nya nǔnywɛ́tɔ́ lɛ́ɛ dó gbě, un sɔ́ nǔnywɛ́ yětɔn dó húzú gblǒ.

²⁶ Amɔ̌, nǔ e mɛsɛntɔ́ ce lɛ́ɛ ɖɔ ɔ́, un nɔ bló, xó e mɛsɛ́dó ce lɛ́ɛ ɖɔ lɛ́ɛ ɔ́, un nɔ bló bɔ bǐ nɔ́ nyí wiwa. Un ɖɔ dó Jeluzalɛ́mu wú ɖɔ: ‘É ná vɔ́ ji gba. È nǎ bló nǔ e gblé lɛ́ɛ bǐ ɖó.’ Un ɖɔ dó toxo Judáa tɔn lɛ́ɛ wú ɖɔ: ‘È nǎ vɔ̌ toxo lɛ́ɛ gbá.’

²⁷ Un ɖe gbe dó xu lɛ́ɛ bó ɖɔ: ‘Xu, mi bǐ ní mɛ. Un ná ɖe gbe dó tɔ e nɔ sa kɔn dó mi mɛ lɛ́ɛ, bɔ bǐ ná mɛ.’

²⁸ Un ɖɔ dó Silúsi wú ɖɔ: ‘É wɛ nyí lɛ̌ngbɔ́nyitɔ́ e un sɔ́ é; é ná bló bɔ nǔ e jló mì lɛ́ɛ bǐ ná nyí wiwa. É ná ná gbe bɔ è nǎ vɔ́ Jeluzalɛ́mu gbá, bó ná vɔ́ xwé ce sá.’ ”