Ezayíi 4 - MAWUXÓWÉMA

¹ Hwenɛ́nu ɔ́, nyɔ̌nu tɛ́nwe ná jɛ kɔ nú súnnu ɖokpó géé, bó ná ɖɔ n'i ɖɔ: “Mǐ nǎ nɔ́ ná nǔɖuɖu mǐɖée, mǐ nǎ nɔ́ xɔ avɔ nú mǐɖée; vɛ̌ kó nyí asú nú mǐ bó ɖe winnyá nú mǐ kpowun.”

Mɛ e kpo ɖo gbɛ ɖo Jeluzalɛ́mu lɛ́ɛ

² Ayǐ ɖokpó ná hɔ́n, bɔ nǔ e Mawu Mavɔmavɔ ná nyí tɔn bɔ é ná wú ɖo to ɔ́ mɛ ɔ́, ná nyí wi kpó susu kpó nú mɛ e kpo ɖo gbɛ ɖo Jeluzalɛ́mu lɛ́ɛ. Sínsɛ́n e ná tɔ́n ɖo to ɔ́ mɛ lɛ́ɛ ná sɔ́ yě su, bó ná wlí yɛ̌yi nú yě.

³ Énɛ́ ɔ́, mɛ e kpo ɖo Jeluzalɛ́mu lɛ́ɛ ɔ́, mɛ e kpo ɖo gbɛ ɖo Sinyɔ́ɔ lɛ́ɛ ɔ́, è nǎ nɔ́ ylɔ́ yě ɖɔ: “Mɛɖeɖóvo Mawu tɔn.” Yě mɛ énɛ́ lɛ́ɛ wɛ nyí mɛ e Mawu wlán nyǐkɔ yětɔn, bɔ yě ná nɔ gbɛ ɖo Jeluzalɛ́mu lɛ́ɛ é.

⁴ Aklúnɔ ná sɛ́ hwɛjijɔ kpó wǔsláslá kpó sín jɔhɔn dó. É ná klɔ́ nǔ kwíji sín Jeluzalɛ́mu nyɔ̌nu lɛ́ɛ wú, é ná klɔ́ kanjɔ e Sinyɔ́ɔnu lɛ́ɛ kɔn nyi ayǐ ɖo to ɔ́ mɛ é sín yě wú.

⁵ Kéze ɔ́, Mawu Mavɔmavɔ ná bló akpɔ́kpɔ́ ɖó Sinyɔ́ɔ só ɔ́ bǐ ta nu, bó ná bló ɖó mɛ e kplé ɖo Sinyɔ́ɔ só ɔ́ jí é bǐ ta nu; é su zǎn mɛ ɔ́, é ná bló myɔ kpó azizɔ kpó ɖó ta yětɔn nu. Mawu Mavɔmavɔ ná nyí goxɔ ɖaxó ɖé ɖo nǔ e nɔ ná susu Jeluzalɛ́mu lɛ́ɛ é bǐ ta nu.

⁶ É ná nyí azava bó ná nɔ́ ná yɛtɛn hwesivɔ́ mɛ, bónú jǐ ɖo jija wɛ ɔ́, è nǎ nɔ́ bɛ yɛ ɖo fínɛ́; jɔhɔn ɖo nyinyi wɛ ɔ́, è nǎ nɔ́ bɛ yɛ ɖo fínɛ́.