Ezayíi 39 - MAWUXÓWÉMA

¹ Hwe énɛ́ ɔ́ nu ɖokpó ɔ́, Mɛlodaki-Baladáni, Baladáni ví Babilɔ́nu xɔ́sú ɔ́ sɛ́ wěma dó Ezekiyási, bó lɛ́ ná ɛ nǔ d'é ji, ɖó é se ɖɔ é jɛ azɔn bɔ azɔn ɔ́ gbɔ n'i.

² Ée mɛ lɛ́ɛ wá ɔ́, é víví nú Ezekiyási káká bɔ é kplá yě yi fí e nǔ xɔ akwɛ́ tɔn lɛ́ɛ ɖe é: kpatágan, siká, nǔhwɛ́nkún lɛ́ɛ, ami ɖagbe ɖagbe lɛ́ɛ, ahwanfunnú tɔn lɛ́ɛ, bó xlɛ́ dɔkun tɔn lɛ́ɛ bǐ yě. É kpo nǔɖé ɖo xwé tɔn gbe abǐ axɔ́súɖuto tɔn mɛ bɔ é má xlɛ́ yě ǎ.

³ Énɛ́ ɔ́ gúdo ɔ́, gbeyíɖɔ Mawu tɔn Ezayíi wá axɔ́sú Ezekiyási gɔ́n, bó kan byɔ́ ɛ ɖɔ: étɛ́ mɛ énɛ́ lɛ́ɛ ka wá ɖɔ nú we? Fí e yě ká gosín bó wá gɔ̌n towe lɔ? Bɔ Ezekiyási yí gbe n'i ɖɔ: Fí e yě gosín é lín; Babilɔ́nu wɛ yě gosín, bó wá gɔ̌n ce.

⁴ Ezayíi lɛ́ kanbyɔ́ ɛ ɖɔ: “Étɛ́ yě ká mɔ ɖo xwé towe gbe?” Ezekiyási ka yí gbe n'i ɖɔ: “Yě mɔ nǔ e ɖo xwé ce gbe lɛ́ɛ bǐ. Dɔkun ce ɖě kpo bɔ un ma xlɛ́ yě ǎ.”

⁵ Énɛ́ ɔ́, Ezayíi ɖɔ nú Ezekiyási ɖɔ: “Đǒtó xó e Mawu Mavɔmavɔ Nǔbǐwúkpétɔ́ ɔ́ ɖɔ é.

⁶ É ɖɔ: ‘Gbe ɖokpó ná wá su, bɔ è nǎ bɛ̌ nǔ e ɖo xwé towe gbe lɛ́ɛ bǐ yi Babilɔ́nu, bó ná bɛ́ nǔ e tɔ́gbó towe lɛ́ɛ ko wa ɖ'ayǐ káká wá jɛ égbé lɛ́ɛ bǐ yi Babilɔ́nu. É ná kpo ɖokpó ǎ. Mawu Mavɔmavɔ wɛ ɖɔ mɔ̌.

⁷ È nǎ kplá vǐ towe lɛ́ɛ ɖě; vǐ e a ji lɛ́ɛ ɖě, bɔ yě ná nyí agooɖojǐe ɖo Babilɔ́nu xɔ́sú ɔ́ sín hɔnmɛ.’ ”

⁸ Ezekiyási ka ɖɔ nú Ezayíi ɖɔ: “Xó e Mawu Mavɔmavɔ ɖɔ bɔ a ɖɔ ɔ́ nyɔ́.” Đó é tunwun dó xo tɔn mɛ ɖɔ: “Nú un ɖo gbɛ jɛ́n wɛ ɔ́, mǐ na mɔ fífá kpó ayi j'ayǐ kpó.”