Ezayíi 38 - MAWUXÓWÉMA

¹ Hwenɛ́nu ɔ́, Ezekiyási wlí azɔn, bó kó ɖo kú lixo, bɔ gbeyíɖɔ Mawu tɔn Ezayíi Amɔ̌si ví ɔ́ wá gɔ̌n tɔn, bó ɖɔ n'i ɖɔ: “Xó e Mawu Mavɔmavɔ ɖɔ ɔ́ ɖíe: É ɖɔ: Nǔ nǎ nɔ gbɔn ɖě hǔn, ɖɔ nú mɛ towe lɛ́ɛ, ɖó azɔn élɔ́ e a wlǐ din ɔ́, a ɖo nǎ gán ɖ'é mɛ wɛ ǎ.”

² Ée é ɖɔ mɔ̌ n'i ɔ́, Ezekiyási húzú kpan nukɔn dǒ, bó xo ɖɛ ɖɔ:

³ “Mawu Mavɔmavɔ, flín ɖɔ un nɔ gbejí ɖo nukɔn towe bo wa azɔ̌ kpó ayijlɔ́jlɔ́ kpó; un bló nǔ e nɔ nyɔ́ nukún towe mɛ lɛ́ɛ.” Ée é ɖɔ mɔ̌ n'i ɔ́, é wlí avǐ bó ya ɖasin hoho.

⁴ Énɛ́ ɔ́, Mawu Mavɔmavɔ ɖɔ nú Ezayíi ɖɔ

⁵ é ní ɖɔ nú Ezekiyási ɖɔ: “Nyɛ Mawu Mavɔmavɔ, Mawu tɔ́gbó tɔn Davídi tɔn ɔ́ ɖɔ: ‘Un se ɖɛ towe; un mɔ avǐ e ya wɛ a ɖe é; un ná dó xwe afɔtɔn xwe towe jí.

⁶ Un ná hwlɛ́n hwi kpó toxo élɔ́ kpó gán ɖo axɔ́sú Asilíi tɔn sí; un ná cyɔ́n alɔ toxo élɔ́ jí.’ ”

²¹ Énɛ́ ɔ́, Ezayíi ɖɔ : “Mi li fígi bó mlí, bó ɖó akpa ɔ́ mɛ n'i bónú azɔn tɔn ná gbɔ!”

²² Ée è blǒ mɔ̌ ɔ́, Ezekiyási kanbyɔ́ Ezayíi ɖɔ: “Étɛ́ ká ná ɖe xlɛ́ mì ɖɔ un ná lɛ́ yi Mawu Mavɔmavɔ xwé gbe?”

⁷ Ezayíi ɖɔ n'i ɖɔ: “Nǔ e ná ɖe xlɛ́ we ɖɔ Mawu Mavɔmavɔ ná gbɔ azɔn nú we ɔ́ ɖíe:

⁸ É ná dɔn yɛtɛn e ko jɛ Akázi sín kpekán jí ɔ́ dó gúdo nú afɔɖiɖe wǒ. Nǔgbó ɔ́, yɛtɛn ɔ́ wá yi gúdo ɖo kpekán ɔ́ jí nú afɔɖiɖe wǒ.”

Ezekiyási sín azɔn gbɔ bɔ é xo ɖɛ

⁹ Ée Ezekiyási Judáa xɔ́sú ɔ́ jɛ azɔn bɔ azɔn gbɔ n'i ɔ́, xó lómílómí e é ɖɔ ɔ́ ɖíe:

¹⁰ Un nɔ ɖɔ nú nyiɖée ɖɔ: un ma ka ko nɔ gbɛ ɖé nɛ́, bó ka ná kó ɖi dó sava din! Xwe e kpo bɔ un ná dó nɔ gbɛ ná ɔ́, un ná yi bló ɖo mɛ e ma sɔ́ ɖo fí ǎ lɛ́ɛ tɛ́ntin!

¹¹ Un nɔ lɛ́ ɖɔ nú nyiɖée ɖɔ: Nukún ce sɔ́ ná mɔ Mawu Mavɔmavɔ ɖě ɖo ayǐkúngban jí fí ǎ. Un ka sɔ́ ná mɔ gbɛtɔ́ e ɖo ayǐhínhɔ́n mɛ fí é ɖě ǎ.

¹² Agbaza ce e nyí goxɔ nú mì ɔ́, è tún bó sɔ́ xweyǐgbe, a nǎ ɖɔ lɛ̌ngbɔ́nyitɔ́ lɛ́ɛ sín goxɔ wɛ; gbɛ ce wá vivɔnu avɔ e è ko lɔn, bó sɛ́n kan ná, bó kó ɖo mlǎmlá wɛ é ɖɔhun; Mawu, cóbónú gbadanu ná su ɔ́, a nǎ ko ɖɔ xó ce gbo.

¹³ Cóbónú ayǐ ná hɔ́n ɔ́, kú ná kó wá sɔ́ mì. Mawu, a gba xú ce lɛ́ɛ kinnikínní ɖɔhun. Cóbónú gbadanu ná su ɔ́, a nǎ kó ɖɔ xó ce gbo.

¹⁴ Un ɖo xó ɖɔ wɛ ɖo kɔ gúdo azɔnxɛ ɖo finfan wɛ ɖɔhun; un ɖo azɔn wɛn wɛ xwelé ɖo finfan wɛ ɖɔhun. Un kpɔ́n jǐxwé káká bɔ nukún ce bo. Aklúnɔ, adǎn élɔ́ e ɖo gbigbo mì wɛ ɔ́, blǒ gbɔn ɖě nú mì.

¹⁵ Lo ɔ́, xó tɛ́ un ná ɖɔ n'i, bɔ é ná ɖɔ xó nú mì? É wɛ bló nǔ énɛ́ lɛ́ɛ bǐ. Un ɖo akpɔ mɔ wɛ káká bɔ adɔ̌ vɛ́ mì.

¹⁶ Aklúnɔ, nǔ e ɖo wiwa mì wɛ ɔ́, a tunwun. A fɔ́n mì sí te, bó lɛ́ ná hlɔ̌nhlɔ́n mì, bó hɛn mì ɖó gbɛ.

¹⁷ Din ɔ́, akpɔ e mɔ wɛ un ɖe ɔ́ húzú nǔkiko, ɖó a yǐ wǎn nú mì tawun, bó hwlɛ́n mì ɖo kú sí. A ɖe hwɛ e un hu lɛ́ɛ bǐ ɖó zɔ nú mì.

¹⁸ Kútomɛ ɔ́, mɛ ɖé ma ka nɔ́ mlá we nɛ́! Mɛkúkú lɛ́ɛ wɛ ná xo kpɛ́ nú we ǎ. Mɛ e yi yɔdo mɛ lɛ́ɛ sɔ́ sixú ɖó nukún gbejíninɔ towe ɖě ǎ.

¹⁹ Mɛ e ɖo gbɛ lɛ́ɛ kɛ́ɖɛ́ jɛ́n hɛn ɔ́, yě ná xo mlá we, lě e un ɖ'é wú gbɔn égbé din é. Mɛjitɔ́ lɛ́ɛ ɖɔ lě e a ɖo gbejí gbɔn é nú vǐ yětɔn lɛ́ɛ.

²⁰ Mawu Mavɔmavɔ, a hwlɛ̌n mì. Mawu Mavɔmavɔ, mǐ nǎ nɔ kpa susu nú we dó han mɛ, ɖo gbɛzán mǐtɔn bǐ mɛ, ɖo xwé towe gbe.