Ezayíi 36 - MAWUXÓWÉMA

¹ Hwenu e Ezekiyási ɖo xwe wǒ-ɛnɛ bló wɛ ɖo zinkpo jí ɔ́, Senakelíbu Asilíi xɔ́sú ɔ́ wá tɔ́n ahwan Judáa toxo e è mɛ ahohó lɛ́ lɛ̌ dó lɛ́ɛ bǐ, bó yí.

² Asilíi xɔ́sú ɔ́, Lakíci wɛ é ɖe hwenɛ́nu; é nɔ Lakíci fínɛ́ bó sɛ́ ahwangán e nɔ kplá ɛ ɔ́ dó axɔ́sú Ezekiyási gɔ́n ɖo Jeluzalɛ́mu. Ahwangán ɔ́, sɔ́ja wɔ̌buwɔ́bú ɖé nu wɛ é zɔn yi Jeluzalɛ́mu. Ée ahwangán ɔ́ wá ɔ́, é nɔ te ɖo ali e è nɔ gbɔn yi avɔnyatɔ́ lɛ́ɛ gle mɛ ɔ́ jí, ɖo fí e sin nɔ tɔ́n gbɔn ɖo toxo ɔ́ sín taligbé é.

³ Énɛ́ ɔ́, Eliyakímu Ilukyahu ví e nɔ kpé nukún dó axɔ́sú ɔ́ sín dɔkun lɛ́ɛ wú ɔ́ yi gɔ̌n tɔn, é kpó Cevúna wěgbójínɔtɔ́ ɔ́ kpó, kpó Yoáxi Asáfu ví wěgbóhɛntɔ́ ɔ́ kpó.

⁴ Ahwangán e nɔ́ kplá Asilíi xɔ́sú ɔ́ ɖɔ nú yě ɖɔ: “Mi ɖɔ nú Ezekiyási ɖɔ nǔ e axɔ́sú ɖaxó Asilíi tɔn ɖɔ ɔ́ ɖíe: ‘Étɛ́wú gán jɛ wɛ a ka ɖe tawun?

⁵ È ja ahwan fun gbé ɔ́, wě tɔn wɛ è nɔ ɖe, bó nɔ́ ɖó akɔ́nkpinkpan. Hwɛ ka vɛdó ɖɔ xó kpowun wɛ nɔ fun ahwan sín. Mɛ̌ wú a ka ɖeji dó tawun bó fɔ́n gǔ dó jǐ ce?

⁶ É má nyí Ejípu wú wɛ a ɖeji dó a? Ejípu e nyí fántín lúlɔ́, bɔ mɛɖé gán jɛ wǔ tɔn ɔ́, é nɔ́ gbo alɔ nú mɛ ɔ́, bó nɔ́ byɔ́ lan tɔn mɛ ɔ́, é wú wɛ hwɛ ɖeji dó a? Mɔ̌ wɛ Ejípu xɔ́sú ɔ́ cí gbɔn nú mɛ e nɔ gán jɛ wǔ tɔn lɛ́ɛ bǐ.

⁷ A nǎ ɖɔ nú mì din ɖɔ Mawu Mavɔmavɔ, Mawu mitɔn wú wɛ mi gán jɛ. É má ká nyí hwi ɖésúnɔ wɛ gbɔn só jí só jí, bó gba vɔ̌sákpe lɛ́ɛ, bó ɖɔ nú Judáanu lɛ́ɛ kpó Jeluzalɛ́munu lɛ́ɛ kpó ɖɔ yě má sɔ́ jɛ kpo ɖo vɔ̌sákpe ɖěvo nukɔn zɛ Jeluzalɛ́mu tɔn wú ó a?’

⁸ Din ɔ́, nú a mɔ ɖɔ émí ná kpé nǔɖé wú hǔn, wǎ gbo gbě xá gǎn ce Asilíi xɔ́sú ɔ́. Nú a nǎ mɔ sɔ́xátɔ́ ɔ́, un ɖo gbesisɔ mɛ, bó ná ná we sɔ́ afɔwó (2.000).

⁹ A ka sixú kpé gǎn ce sín ahwangán lɛ́ɛ ɖěbǔ wú ǎ; mɛ gǔdo gúdo tɔn e ɖo yě mɛ ɔ́, a sixú kpé wǔ tɔn ǎ. A ɖo ji ɖe ɖó dó Ejípu wú wɛ ɖɔ émí ná mɔ ahwankɛkɛ́ví kpó sɔ́xátɔ́ kpó.

¹⁰ Nǔ e un ka ná kanbyɔ́ we lɔ ɔ́, Mawu Mavɔmavɔ ɔ́ mɛ vo wɛ un tɔ́n ahwan to élɔ́, bó ná gba wɛ a vɛdó a? Gbeɖé! Mawu Mavɔmavɔ ɖésú wɛ ɖɔ nú mì ɖɔ nyɛ ní wá tɔ́n ahwan to élɔ́ bó gba.”

¹¹ Énɛ́ ɔ́, Eliyakímu, Cevúna kpó Yoáxi kpó ɖɔ nú ahwangán ɔ́ ɖɔ: “Kɛnklɛ́n, dǒ alamugbe nú mǐ; mǐ se gbe énɛ́ ɔ́ ganjí. Ma sɔ́ dó Ebléegbe ɖě nú mǐ ó; é má nyí mɔ̌ ǎ ɔ́, mɛ e ɖo ahohó ɔ́ ta lɛ́ɛ bǐ ɖo tó ɖó mǐ wɛ.”

¹² Lo ɔ́, ahwangán ɔ́ yí gbe nú yě ɖɔ: “Axɔ́sú mitɔn kpó midɛɛ lɛ́ɛ kpó wɛ gǎn ce ɖɔ xó énɛ́ lɛ́ɛ sɛ́ dó wɛ mi vɛdó a? Yě mɛ énɛ́ lɛ́ɛ e ɖo ahohó ɔ́ ta fínɛ́, bɔ zaanɖé din ɔ́, yě ná nɔ nyɛ mǐ bó ná nɔ ɖu, bó ná nɔ ɖɔ́ aɖɔ̌ bó ná nɔ sɔ́ nu lɛ́ɛ, é má nyí yě wɛ gǎn ce ɖɔ xó énɛ́ lɛ́ɛ sɛ́ dó a?”

¹³ Ée ahwangán ɔ́ ɖɔ mɔ̌ ɔ́, é jlɔ́ bó sú xó, bó ɖɔ dó Ebléegbe mɛ ɖɔ: “Mi ɖótó xó e Axɔ́sú ɖaxó, axɔ́sú Asilíi tɔn ɔ́ ɖɔ é:

¹⁴ É ɖɔ: ‘Mi ma jó miɖée dó nú Ezekiyási flú mi ó, ɖó é sixú hwlɛ́n mi sín fɛn ce mɛ ǎ.

¹⁵ É nɔ ɖɔ mi ní ɖeji dó Mawu Mavɔmavɔ wú, ɖɔ é ná hwlɛ́n mi dandan, é kún ná lɔn nú nyɛ Asilíi xɔ́sú ɔ́ ná yí to mitɔn ó.

¹⁶ Mi ma ɖótó Ezekiyási ó; xó e nyɛ axɔ́sú Asilíi tɔn ɖɔ é wɛ mi ná ɖótó; un ɖɔ: Mi gɔn nǔ xwe, bó wá jó ta nú mì; énɛ́ ɔ́, mɛ ɖokpó ɖokpó ná ɖu vǐwun tɔn, bó ná ɖu fígi tɔn, bó ná nu sin e ɖo tɔ tɔn mɛ é.

¹⁷ Mi ná ɖ'é wú mɔ̌ káká bɔ un ná wá kplá mi yi to e cí to mitɔn ɖɔhun é mɛ, to e mɛ blěe kpó vɛ̌ɛn kpó ɖe é; to e mɛ wɔ̌xúxú kpó vǐwun kpó ɖe é mɛ.

¹⁸ Mi má jó miɖée dó nú Ezekiyási flú mi ó; ɖó é ɖɔ nú mi ɖɔ: Mawu Mavɔmavɔ ná hwlɛ́n mi gán. Akɔta lɛ́ɛ ɖě sín nǔmɛsɛn gbɛ́ nú nyɛ axɔ́sú Asilíi tɔn, ɖɔ nyɛ kún ná yí to yětɔn lɛ́ɛ ɖě ó a?

¹⁹ Fítɛ́ vodún Hamáti tɔn kpó Aapadu tɔn ɔ́ kpó ká yi? Fítɛ́ vodún Sefáawayímu tɔn lɛ́ɛ ká yi? Yě kpé wú bó gbɛ́ nú mì bɔ un gɔn Samalíi toxo ɔ́ yí a?

²⁰ Vodún to énɛ́ lɛ́ɛ tɔn ɖě tɛ́ ká gbɛ́ nú mì ɖɔ nyɛ ní má yí to yětɔn ó, bɔ é ná nyí Mawu Mavɔmavɔ wɛ ná wá gbɛ́ nú mì ɖɔ nyɛ ní má yí Jeluzalɛ́mu toxo ɔ́ ó?’ ”

²¹ Ée é ɖɔ mɔ̌ ɔ́, yě bǐ nɔ tóó; yě ɖɔ xó ɖokpó géé lě ǎ, ɖó axɔ́sú ɔ́ kó ɖɔ nú yě ɖɔ: “Mi ma kɛ nu d'é mɛ n'i ó.”

²² Bɔ Eliyakímu Ilukyahu ví hɔnmɛgán ɔ́, é kpó Cevúna wěgbójínɔtɔ́ ɔ́ kpó, kpó Yoáxi Asáfu ví wěgbóhɛntɔ́ ɔ́ kpó vún awu dó kɔ nú yěɖée bó wá yi Ezekiyási gɔ́n, bó ɖɔ xó e ahwangán Asilíi xɔ́sú ɔ́ tɔn ɖɔ lɛ́ɛ n'i.