Ezayíi 34 - MAWUXÓWÉMA

Mawu ɖó hwɛ nú Edɔ́mu

¹ Akɔta akɔta lɛ́ɛ mi, mi wá bó wá se! Togun lɛ́ɛ mi, mi ɖótó ganjí! Ayǐkúngban ɔ́ ní se, bónú nǔ e ɖo ayǐkúngban ɔ́ jí lɛ́ɛ bǐ ní se! Gbɛ ɔ́ ní se, bónú nǔ e ɖo gbɛ ɔ́ mɛ lɛ́ɛ bǐ ní se!

² Mawu Mavɔmavɔ sin xomɛ dó akɔta lɛ́ɛ bǐ, bó sin dó ahwankpá yětɔn lɛ́ɛ bǐ. É ɖó hwɛ nú yě ɖɔ kún yětɔn ná sú dó, é jó yě bɔ è hu yě bǐ.

³ Mɛ yětɔn e kú lɛ́ɛ kpé kɔ́ mɛ kɔ́ mɛ; cyɔ yětɔn ɖo wǎn lun wɛ, kanjɔ yětɔn ɖo tɔ sa wɛ gbɔn só jí só jí.

⁴ Sunví lɛ́ɛ bǐ bú, jǐnukúnsin mlá wěma ɖɔhun. Sunví lɛ́ɛ ɖo ayǐ kɔn nyi wɛ vǐwunma xúxú abǐ fígima xúxú ɖɔhun.

⁵ Hwǐ Mawu tɔn ɔ́ tɔ́n ɖo jǐxwé; é nɛ́ jɛ Edɔ́munu lɛ́ɛ wú nɛ́! Togun énɛ́ ɔ́, Mawu wɛ ɖó hwɛ n'i ɖɔ kún tɔn ná sú dó.

⁶ Kanjɔ kpé hwǐ Mawu Mavɔmavɔ tɔn wú vɛɛn, a nǎ ɖɔ lɛ̌ngbɔ́ví abǐ gbǎgbá sín kanjɔ wɛ; jǒ kpé hwǐ Mawu Mavɔmavɔ tɔn wú bǐ, a nǎ ɖɔ agbo sín ayi wɛ; ɖó Mawu Mavɔmavɔ sá vɔ̌ ɖaxó ɖokpó ɖo toxo Bosla tɔn mɛ. É hu mɛ vantankánnyá ɖo Edɔ́mu tomɛ.

⁷ Hwe énɛ́ nu ɖokpó ɔ́, agbo gbě tɔn lɛ́ɛ ná jɛ ayǐ; nyibúsú kpó nyibú asi kpó ná jɛ ayǐ. Ayǐkúngban ɔ́ ná nu hun bɔ é ná kpé e kpo; jǒ ná kpé kɔ nú ayǐkúngban ɔ́.

⁸ Hlɔn sín azǎn ɖé wɛ azǎn énɛ́ ɔ́ nyí nú Mawu Mavɔmavɔ; mɛ e nɔ nya xɛ ɖo Sinyɔ́ɔ jí ɔ́, nǔ e kɛntɔ́ wa nyi do nú togun tɔn ɔ́, é ná sú axɔ́ tɔn ɛ xwe énɛ́ xwe.

⁹ Tɔsisa e ɖo Edɔ́mu lɛ́ɛ ná húzú awɔn; ayǐkúngban ɔ́ ná húzú hwemí. Gle lɛ́ɛ bǐ ná húzú awɔn bɔ myɔ ná ɖ'é jí,

¹⁰ bó ná ɖo jiji wɛ zǎn kéze, bɔ azɔ tɔn ná ɖo jǐxwé yi wɛ hwebǐnu. To ɔ́ ná nɔ vɔ̌ káká sɔ́yi. Mɛ ɖě sɔ́ ná gbɔn fínɛ́ gbeɖé ǎ.

¹¹ To ɔ́ ná húzú kwlele lɛ́ɛ kpó ajijá lɛ́ɛ kpó tɔn, bó ná nyí agbigbi kpó avǔnsákɔwó kpó sín nɔtɛn. È nǎ dlɛ́n to gbigba kan ɔ́ dó to ɔ́ jí; è nǎ gbígbá to ɔ́ bǐ; é ná cí to ɖě nɔ fínɛ́ kpɔ́n gbeɖé ǎ ɖɔhun. Nǔ ɖěbǔ sɔ́ ná ɖo fínɛ́ ǎ.

¹² Gbɛtɔ́ nukúnɖéjí ɖě sɔ́ ná ɖo to ɔ́ mɛ, bó ná sɔ́ axɔ́sú ɖě ɖó to ɔ́ nu ǎ. Gǎn xó ɔ́ ná fó ɖó fínɛ́.

¹³ Wunkan wɛ ko wú gbɔn xwé ɖaxó ɖaxó lɛ́ɛ gbe; asangokan kpó atínkan wunnɔ lɛ́ɛ kpó vun blá ahohó lɛ́ɛ; avǔn gbě tɔn lɛ́ɛ xwé wɛ, gowungo lɛ́ɛ sín adɔ̌tɛn wɛ.

¹⁴ Awǐi gbě tɔn lɛ́ɛ nɔ́ wá kpé hla lɛ́ɛ ɖo fínɛ́. Fínɛ́ wɛ gbǎgbá lɛ́ɛ nɔ́ ɖó goxo ɖó. Fínɛ́ wɛ yɛ nyanya Lilíti nɔ wá nɔ, bó nɔ́ mɔ fí e é ná gbɔjɛ́ ɖe é.

¹⁵ Fínɛ́ ɖokpó ɔ́ wɛ dan nɔ xo do ɖó, bó nɔ́ ɖó azin d'é mɛ, bo nɔ́ cɔ́ hwenu e é ná flé dó é. Fínɛ́ wɛ aklasú lɛ́ɛ nɔ́ ɖó gɔnu ɖó.

¹⁶ Ényí mi ba ɖo Mawu Mavɔmavɔ sín wěma ɔ́ mɛ ɔ́, mi ná mɔ xa ɖɔ: Kanlin e è xa lɛ́ɛ ɖokpó kún gɔn ó, ɖokpó kún hwe ɖo fínɛ́ ó, ɖó Mawu kannu wɛ yě ɖe; Mawu ɖésú wɛ kplé yě.

¹⁷ É nyi akɔ bó kpɔ́n tɛnmɛ e ná nyí mɛ ɖokpó ɖokpó tɔn é, bó sɔ́ nǔjlɛ́kan tɔn, bó má to ɔ́ dó así nú kanlin lɛ́ɛ ɖokpó ɖokpó, bɔ é ná nyí yětɔn káká sɔ́yi, bɔ xwé yětɔn ná nɔ fínɛ́.