Ezayíi 33 - MAWUXÓWÉMA

¹ Heelú we, hwi mɛ e nɔ hɛn nǔ bǐ gblé, bɔ mɛ ɖé má ka nɔ hɛn hwɛ gblé ǎ é. Heelú we, hwi mɛ e nɔ flú mɛ, bɔ mɛ ɖé ma ka nɔ́ flú hwɛ ǎ é. Ényí a ko hɛn nǔ gblé fó ɔ́, è nǎ wá hɛn hwi lɔ gblé. A ko flú mɛ fó ɔ́, è nǎ wá flú hwi lɔmɔ̌.

² Mawu Mavɔmavɔ, kú nǔbláwǔ mǐtɔn. Mǐ ɖo nukún ɖó we wɛ. Nyǐ hlɔ̌nhlɔ́n mǐtɔn zǎnzǎn tɛgbɛ, bó nyí mɛhwlɛ́ngántɔ́ mǐtɔn adǎngbomɛ hwenu.

³ A ɖɔ xó lě ɔ́, togun lɛ́ɛ nɔ́ hɔn; a sí te ɔ́, akɔta lɛ́ɛ nɔ́ gbadó.

⁴ Énɛ́ ɔ́, è nɔ zɔn dɔkun kɛntɔ́ tɔn mɛ bó nɔ́ wlá, wɛn kɔn nyi gběhan jí ɖɔhun. È nɔ vun blá dɔkun yětɔn bɔkle vun blá gle ɖɔhun.

⁵ Mawu Mavɔmavɔ hú gǎn nǔ bǐ; jǐ aga wɛ é nɔ́ nɔ. É sɔ́ hwɛjijɔ kpó nǔ jlɔ́jlɔ́ kpó ɖó ayǐ gbɔn Jeluzalɛ́mu toxo ɔ́ bǐ mɛ.

⁶ Din ɔ́, hwi mɛ e nyí togun Mawu Mavɔmavɔ tɔn ɔ́, a nǎ nɔ vivo mɛ ɖo to towe mɛ. È ɖǒ nǔnywɛ́ bó tunwun Mawu wɛ nyí dɔkun e nɔ hwlɛ́n mɛ gán é. Sísí ɖó nú Mawu Mavɔmavɔ wɛ nyí dɔkun.

Mawu sí te

⁷ Aliɛ́linu lɛ́ɛ ɖíe tɔ́n jɛ ali jí bó ɖo xó sú wɛ e! Fífáwɛndótɔ́ lɛ́ɛ lɛ́ kɔ jǎwe kpó avǐ kpó, ɖasin hoho.

⁸ Ali lɛ́ɛ bǐ wɛ wɛ́n; mɛ ɖé sɔ́ ɖo ali lɛ́ɛ jí ǎ. Acɛgannaganna-kpanúmɛtɔ́ ɔ́ da alɛ; é gba akɔ e é jɛ ɖo kúnnuɖetɔ́ nukɔn é; é hu tɛ́ nú mɛ bǐ.

⁹ To ɔ́ ɖo aluwɛ mɛ; sin ɖo vivɔ sín to ɔ́ mɛ wɛ. Akú hɛn Libáan só ɔ́, bɔ winnyá hu i. Calɔ́ni gbé ɔ́ jí bǐ ba sin kpo bó cí gbětótló ɖé ɖɔhun. Atín e ɖo Basáni só ɔ́ jí lɛ́ɛ kpó ée ɖo Kaamɛ́li só ɔ́ jí lɛ́ɛ kpó bǐ ɖo ɖa lúnlún wɛ.

¹⁰ Mawu Mavɔmavɔ ɖɔ: “Din ɔ́, un ná sí te; din ɔ́, un ná ɖe hlɔ̌nhlɔ́n ce xlɛ́.

¹¹ Nǔ e lin wɛ mi ɖe bɔ é nyí xo bɔ mi mɔ ɔ́, hankán kpowun wɛ; mi ja jiji gbé ɔ́, nǔywɛ́ kpowun wɛ mi ná ji, bɔ funfún mi ɖésúnɔ tɔn ná dó nǔnywɛ́ ɔ́ zo myɔ ɖɔhun.

¹² È nǎ dó togun lɛ́ɛ zo bɔ yě ná ji kɔn afín; yě ná ji zo gběhan e è xo é ɖɔhun.

¹³ Mi mɛ e ɖo zɔ lɛ́ɛ ɔ́, mi ɖótó nǔ e wá é! Mi mɛ e sɛkpɔ́ mì lɛ́ɛ ɔ́, mi ní tunwun ɖɔ un ɖó hlɔ̌nhlɔ́n.”

¹⁴ Xɛsi jɛ hwɛhutɔ́ e ɖo Sinyɔ́ɔ lɛ́ɛ jí. Mɛ e ma ɖo gbejí ǎ lɛ́ɛ ɖo sísɔ́sísɔ́ wɛ. Yě nɔ́ ɖɔ: “Mɛ̌ wɛ ɖo mǐ mɛ bó ná sixú nɔ myɔ hɛhɛ ɔ́ kpá? Mɛ̌ ká ɖo mǐ mɛ bó ná sixú nɔ zojimací ɔ́ kpá?”

¹⁵ Mɛ e sixú nɔ zo mɔ̌hun kpá é ɖíe: mɛ e nɔ ɖi zɔnlin gbɔn hwɛjijɔ li jí é, mɛ e nɔ ɖɔ xó e sɔgbe é, mɛ e ma nɔ fán asú mɛ ǎ é, mɛ e ma nɔ ɖu nǔ ɖo nǔ mɛ ǎ é, mɛ e ma nɔ lɔn bó nɔ́ se xó nyanya dó tó mɛ ǎ é, mɛ e ma nɔ lɔn nú nukún tɔn nɔ́ mɔ nǔ nyanya ǎ ɔ́, mɛ ɔ́ wɛ.

¹⁶ Mɛ mɔ̌hun ná nɔ só jí aga ɖéé, só e jí mɛɖé má sixú wa nǔɖé nú mɛ ɖe ǎ é wɛ ná nyí nɔtɛn tɔn. È nǎ ná ɛ nǔɖuɖu, bɔ sin ná ɖo gɔ̌n tɔn tɛgbɛ.

Mawu ná hwlɛ́n Jeluzalɛ́mu gán

¹⁷ Nukún towe ná mɔ axɔ́sú ɔ́ kpó susu tɔn bǐ kpó. A nǎ gbɔn to ɔ́ bǐ mɛ, bó ná ná nǔɖuɖu nukún.

¹⁸ Énɛ́ ɔ́, ayi towe ná wá flín nǔ baɖabaɖa e ko jɛ wá yi lɛ́ɛ, bɔ a nǎ kanbyɔ́ ɖɔ: “Fítɛ́ wěgbójínɔtɔ́ e nɔ́ kpɔ́n ɖɔ mɛ bǐ ná nǔjɔ é ká ɖe? Fítɛ́ mɛ e nɔ yí nǔjɔ lɛ́ɛ bó nɔ́ da kpɔ́n é ká ɖe? Mɛ e nɔ kpɔ́n ɖɔ ahohó ɔ́ ɖo ganjí a jí ɔ́, fítɛ́ é ka ɖe?”

¹⁹ Énɛ́ ɔ́, a sɔ́ ná mɔ togun tonuklájɛtɔ́ ɔ́ ɖě ǎ. Togun e nɔ́ dó gbe hízíhízí ɖé, bɔ mɛɖé má nɔ́ se ǎ é; Togun e nɔ ɖo gbe flán wɛ, bɔ è ma nɔ mɔ nǔ jɛ mɛ ǎ ɔ́, a sɔ́ ná mɔ ɛ ɖě ǎ.

²⁰ Nú a kpɔ́n Jeluzalɛ́mu toxo ɔ́, nú a kpɔ́n Sinyɔ́ɔ, toxo e mɛ mǐ nɔ́ ɖu xwe mǐtɔn lɛ́ɛ ɖe ɔ́, a nǎ mɔ bɔ é ná nyí bibɛtɛn ɖé ɖo nukún towe mɛ; é ná nyí goxɔ ɖé, bó ná ɖo te tɛgbɛ; è sɔ́ ná hɔn dotín tɔn lɛ́ɛ ɖě ǎ; è ka sɔ́ ná wɛ́n kan e è dǒ kpɛ́n ná lɛ́ɛ ɖě ǎ.

²¹ Fínɛ́ wɛ Mawu Mavɔmavɔ ná xlɛ́ susu tɔn mǐ ɖe; tɔsisa kpɛví kpɛví lɛ́ɛ ná ɖo fínɛ́, tɔsisa ɖaxó ɖaxó lɛ́ɛ ná ɖo fínɛ́, bɔ ahwanhún e nɔ gbɔn tɔ jí é ɖě ká ná gbɔn jí ǎ. Tɔjíhún ɖaxó ɖě ká ná gbɔn jí ǎ.

²² Mawu Mavɔmavɔ wɛ nyí gǎn mǐtɔn; Mawu Mavɔmavɔ wɛ nyí alixlɛ́mɛtɔ́ mǐtɔn; Mawu Mavɔmavɔ wɛ nyí axɔ́sú mǐtɔn. É wɛ nyí mɛhwlɛ́ngántɔ́ mǐtɔn.

²³ Tɔjíhún kɛntɔ́ mǐtɔn lɛ́ɛ tɔn ɔ́, kan tɔn lɛ́ɛ túntún; yě sɔ́ hɛn asyákpo ɔ́ ɖó te ǎ; kan lɛ́ɛ ka sɔ́ nɔ́ dɔn avɔ e è dǒ nú tɔjíhún ɔ́ é ǎ. Énɛ́ ɔ́ wú wɛ mǐ nǎ zɔn dɔkun mɛ bó wlá; afɔtɔ́nɔ lɛ́ɛ lɔ ná mɔ yětɔn ɖ'é mɛ.

²⁴ Toví ɖé sɔ́ ná ɖɔ: “Un ɖo azɔn jɛ wɛ” ǎ. Togun Jeluzalɛ́mu tɔn ɔ́, Mawu ná sɔ́ hwɛ tɔn kɛ ɛ.