Ezayíi 31 - MAWUXÓWÉMA

¹ Heelú mɛ e nɔ ɖo alɔgɔ́ ba wɛ bó nɔ́ yi Ejípu lɛ́ɛ! Yě nɔ́ ɖeji dó sɔ́ e ɖo Ejípu lɛ́ɛ wú, bó nɔ́ gán jɛ ahwankɛkɛ́ví e ɖo dɔ̌n lɛ́ɛ wú, ɖó nǔ énɛ́ lɛ́ɛ sukpɔ́ ɖésú ɖo Ejípu. Sɔ́xátɔ́ yětɔn lɛ́ɛ lɔmɔ̌ syɛ́n ɖésú. Lo ɔ́, yě sɔ́ nɔ́ kpɔ́n Mɛ Mímɛ́ Izlayɛ́li tɔn ɔ́ sɛ́ dó ǎ; yě nɔ́ hɔn yi su Mawu Mavɔmavɔ ǎ.

² Mawu lɔ ka tunwun lě e é ná wa nǔ gbɔn é: é sɛ́ nǔ nyanya dó, nǔ e é ɖɔ émí ná wa lɛ́ɛ ɔ́, é gɔn ɖě wa ǎ. É sí te dó nǔnyanyawatɔ́ lɛ́ɛ jí, bó sí te dó mɛ e nɔ dó alɔ mɛdídá énɛ́ lɛ́ɛ jí,

³ ɖó gbɛtɔ́ kpowun jɛ́n Ejípunu lɛ́ɛ lɔ nyí, yě nyǐ Mawu ǎ. Sɔ́ yětɔn lɛ́ɛ ɔ́, sɔ́ kpowun jɛ́n yě nyí; yě ɖó nǔɖé hú sɔ́ ɖě lɛ́ɛ ǎ. Mawu Mavɔmavɔ vɛ́ kó dlɛ́n alɔ tɔn kpowun ɔ́, mɛ e ɖo mɛ hwlɛ́n gán wɛ ɔ́ ná klɛ́n afɔ, bɔ mɛ e hwlɛ́n gán wɛ è ɖe ɔ́ ná j'ayǐ, bɔ yě mɛ we lɛ́ɛ bǐ sín xó ná fó.

Mawu jɛ hun Jeluzalɛ́mu jí

⁴ Xó e Mawu Mavɔmavɔ ɖɔ nú mì ɔ́ ɖíe: “Nú kinnikínní abǐ kinnikínníví wlí lan, bó ɖo adǎn jí ɔ́, gbɔ̌nyitɔ́ lɛ́ɛ ná bó dó ahwan gbě bó ɖo xó sú dó jǐ tɔn wɛ ɔ́, xɛsi nɔ ɖi i ǎ; é nɔ́ jó lan ɔ́ dó ɖó zǐngídi e ɖú wɛ yě ɖe ɔ́ wú ǎ. Mɔ̌ wɛ nyɛ Mawu Mavɔmavɔ Nǔbǐwúkpétɔ́ ɔ́ ná bló gbɔn hwenu e un ná jɛ te Sinyɔ́ɔ só ta, bó ná yi fun ahwan é.”

⁵ Mawu Mavɔmavɔ Nǔbǐwúkpétɔ́ ɔ́ ná kɛ awa xɛ ɖɔhun, bó ná cyɔ́n Jeluzalɛ́mu jí, bó ná nya xɛ ɖo jǐ tɔn. Tɛn tɔn mɛ ɔ́, é ná hwlɛ́n ɛ gán, bó ná gló nǔ baɖabaɖa e ɖo nǎ gbo e wɛ é n'i.

⁶ Izlayɛ́li ví lɛ́ɛ mi, mi jó Mawu dó bǐ gbídígbídí; mi bo lɛ́ kɔ wá gɔ̌n tɔn lo!

⁷ Ayǐ ɖokpó ná wá hɔ́n, bɔ mi mɛ ɖokpó ɖokpó ná bɛ́ vodún mitɔn e mi zé kpatágan abǐ siká dó bló lɛ́ɛ nyi gbě; vodún énɛ́ lɛ́ɛ e mi zé alɔ mitɔn dó bló dó hu hwɛ dó Mawu ɔ́, mi ná bɛ́ nyi gbě.

⁸ È nǎ tɔ́n ahwan ɖé Asilíi, bɔ Asilíi ná j'ayǐ bǐ ɖo ahwan énɛ́ mɛ; ahwan énɛ́ ná gosín gbɛtɔ́ gɔ́n ǎ. Ahwan e ná gba Asilíi ɔ́ ná nyí gbɛtɔ́ sín ahwan ǎ. Asilíinu lɛ́ɛ ná hɔn ɖo ahwan ɔ́ nukɔn, bɔ ahwanfuntɔ́ syɛ́nsyɛ́n tɔn lɛ́ɛ ná húzú kannumɔ bó ná yi mɛɖe.

⁹ Mɛ e nyí sósyɛ́n yětɔn ɔ́ ná hɔn yi kpó ta kpó ɖo xɛsi nukɔn, bɔ awakanmɛ ná kú ahwangán lɛ́ɛ, bɔ yě ná hɔn jó asyá yětɔn dó. Mawu Mavɔmavɔ wɛ ɖɔ mɔ̌; Mawu e sín myɔ ɖo te ɖo Sinyɔ́ɔ é wɛ ɖɔ mɔ̌; myɔ ɖé wɛ bó ɖo jiji wɛ ɖo Jeluzalɛ́mu.