Ezayíi 30 - MAWUXÓWÉMA

¹ Mawu Mavɔmavɔ ɖɔ: “Heelú mi vǐ gǔfɔ́ntɔ́ lɛ́ɛ! Heelú mi mɛ e bló tito mitɔn lɛ́ɛ nyɛ mɛ vo lɛ́ɛ! Heelú mi mɛ e jɛ akɔ xá toxo ɖěvo jlǒ ce mɛ vo lɛ́ɛ! Hwɛ hu dó hwɛ jí wɛ mi nɔ ɖe gbɔn mɔ̌.

² Mi ɖɔ xó ɖé nú mì cóbó yi Ejípu ǎ. Mi yi hɔn hwlá cí Ejípu xɔ́sú ɔ́ glɔ́. Mi yi bɛ ta ɖo Ejípu.

³ Lo ɔ́, Ejípu xɔ́sú ɔ́ gɔ́n e mi hɔn yi cí ɔ́ ná nyí winnyá nú mi; Ejípu e mi yi bɛ ta ɖó ɔ́ ná nyí hɛ̌n nú mi.

⁴ Gǎn hɔn-yitɔ́ mitɔn lɛ́ɛ kó ɖo Sowáan, tofɔzéɖótetɔ́ mitɔn lɛ́ɛ lɔ ko hun káká yi Hanɛ́si ɖo Ejípu.

⁵ Lo ɔ́, togun énɛ́ ɔ́ ná dó winnyá yě, ɖó togun énɛ́ ɔ́ nɔ́ dó alɔ mɛɖé ǎ; é ná hwlɛ́n yě gán ǎ; é ná dó alɔ yě ǎ; togun ɔ́ ná dó winnyá yě, é ná kɔ́n wi yětɔn.”

Izlayɛ́li ba alɔdó Ejípu tɔn bo ba kpo

⁶ Xó e Mawu ɖɔ dó kanlin e ɖo gbětótló tofɔligbé tɔn mɛ lɛ́ɛ wú ɔ́ ɖíe: “To e mɛ gbɛwúvɛ́ kpó adohuhu kpó ɖe ɔ́, to e kinnikínní asú kpó asi kpó gɔ́ ɔ́, to e jakpata kpó dan ɖaxó e nɔ zɔn lɛ́ɛ kpó gɔ́ ɔ́, toví lɛ́ɛ dó dɔkun e ɖo to yětɔn mɛ lɛ́ɛ sín agban nú lǎkúnmí yětɔn lɛ́ɛ, lobo bɛ́ xweyǐgbe to e ma sixú kpé nǔɖé wú nú yě ǎ é mɛ.

⁷ Đó alɔdó Ejípu tɔn nyí nǔɖé ǎ, nǔ yǎyá kpowun wɛ. Énɛ́ ɔ́ wú wɛ un nɔ ɖɔ n'i ɖɔ: ‘Jojodántɔ́! Yǐ agbɔ̌n!’ ”

Xó ɖɔ dó nǔ e ná wá jɛ sɔ é wú ɖokpó ɖíe

⁸ Mawu ɖɔ nú Ezayíi ɖɔ: “Din ɔ́, yi wlán nǔ énɛ́ lɛ́ɛ ɖó atɛ jí ɖo Jeluzalɛ́munu lɛ́ɛ nukún mɛ. Wlǎn dó nǔ jí. Đó é ná wá nyí xlɛ́ ɖokpó nú yě sɔ; é ná nɔ ayǐ káká sɔ́yi.”

⁹ Đó gǔfɔ́ntɔ́ wɛ nú yě, vǐ masetɔ́gbe wɛ yě nyí. Vǐ ɖé wɛ yě nyí bó nɔ́ nyi Mawu Mavɔmavɔ sɛ́n ɔ́ ɖěbǔ ǎ.

¹⁰ Yě nɔ́ ɖɔ nú nǔmɔtɔ́ lɛ́ɛ ɖɔ: “Nǔ yǎyá wɛ nyí nǔ e mɔ wɛ mi ɖe lɛ́ɛ.” Yě nɔ́ ɖɔ nú gbeyíɖɔ lɛ́ɛ ɖɔ: “Mǐ ba ɖɔ mi ní ɖɔ xó nǔgbó nú mǐ ǎ. Mi ɖɔ xó víví nú mǐ, abǐ mi ba adlǔ ɖé bó dó nú mǐ, énɛ́ nyɔ́ hú.

¹¹ Mi jó ali e gbɔn wɛ mi ɖe ɔ́ dó, mi gosín ali énɛ́ jí; mi ɖe Mɛ Mímɛ́ Izlayɛ́li tɔn sín nukún mɛ nú mǐ.”

Lě e ahohó nɔ hɔ́ gbɔn é

¹² Énɛ́ ɔ́ wú wɛ Mɛ Mímɛ́ Izlayɛ́li tɔn ɖɔ: “Mi gbɛ́ xó énɛ́ ɔ́, bó kpo nú adǎkaxixo kpó ahizi kpó, lobo mɔ ɖɔ émí ɖo nǔ ganjí wa wɛ.

¹³ Din ɔ́, nǔ e ná gbo mi ɔ́ ná cí lě e ahohó nɔ́ zɛ, bó nɔ́ nya akɔ́n wɛn, bó nɔ́ hɔ́ viwun é ɖɔhun.

¹⁴ Ahohó ɔ́ ná gba hánnyá lě e kozɛ́n nɔ́ gba hánnyá, bɔ xwɛ tɔn ma sixú bɛ́ myɔkán ǎ, é má ka sixú wún sin ǎ é ɖɔhun.”

Mi fá xomɛ, bó ɖeji dó wǔ ce

¹⁵ Xó e Aklúnɔ Mavɔmavɔ, Mɛ Mímɛ́ Izlayɛ́li tɔn ɖɔ é ɖíe, é ɖɔ: “Gɔ̌n ce jɛ́n mi ná lɛ́ kɔ wá, cóbó ná mɔ hwlɛngán. Hlɔ̌nhlɔ́n ɖokpó e kpo nú mi ɔ́ wɛ nyí ɖɔ mi ná fá xomɛ, bó ná ɖeji dó wǔ ce; mi ka ba mɔ̌ ǎ.”

¹⁶ Mi nɔ ɖɔ: “Gbeɖé kpɔ́n! Mǐ ná xá sɔ́ bó hɔn yi!” Énɛ́ ɔ́ wú wɛ mi ná hɔn nǔgbó. Mi nɔ ɖɔ: “Mǐ nǎ zé sɔ́ e yá afɔ ganjí lɛ́ɛ.” Énɛ́ ɔ́ wú wɛ mɛ e ná nya mi lɛ́ɛ lɔmɔ̌ ná yá afɔ ganjí.

¹⁷ Kɛntɔ́ ɖokpó géé ná gblɔ́n adǎn nú mi, bɔ mi mɛ afatɔ́n (1.000) ná jɛ sísɔ́sísɔ́ jí; kɛntɔ́ atɔ́ɔ́n ná gblɔ́n adǎn nú mi, bɔ mi bǐ ná hɔn. Nǔ ná ɖo mɔ̌ nyi wɛ káká bɔ mɛ e ná kpo ɖo gbɛ ɖo mi mɛ lɛ́ɛ ná cí lě e è nɔ tun kpo gaga ɖokpó ɖó só ɖé jí é ɖɔhun, é ná cí asyá ɖo só kpɛví ɖé ta ɖɔhun.

Hwlɛngán hwenu

¹⁸ Nǔ ɖo mɔ̌ có, Mawu Mavɔmavɔ ɖó jlǒ bó ná wa ɖagbe nú mi. É ná sí te bó ná kú nǔbláwǔ nú mi, ɖó Mawu Mavɔmavɔ ɔ́, Mawu hwɛjijɔnɔ wɛ. Nǔ nyɔ́ nú mɛ e ɖo nukún ɖó e wɛ lɛ́ɛ bǐ.

¹⁹ Sinyɔ́ɔ togun e, hwi mɛ e nɔ nɔ Jeluzalɛ́mu é! A sɔ́ ná ya avǐ kpɔ́n gbeɖé ǎ. Hwenu e a nǎ sú xó ylɔ́ Mawu é ɔ́, é ná ɖo gbesisɔ mɛ bó ná ɖótó we. É se gbe towe lě tlóló ɔ́, é ná sɔ nú we.

²⁰ Aklúnɔ ná ná nǔɖuɖu we hwenu e adǎn ná gbo we é. É ná ná sin we hwenu e a nǎ ɖo aluwɛ mɛ é. Éyɛ́ mɛ e ɖo kplɔ́nkplɔ́n we wɛ ɔ́, a sɔ́ ná ba ɛ kpo ɖě ǎ; a nǎ mɔ ɛ ɖó nukún towe wú.

²¹ Hwenu e a ɖǒ ná yi aɖisíxwé abǐ amyɔxwé ɔ́, a nǎ se gbe ɖé ɖo gǔdo towe bɔ é ná ɖɔ: “Ali ɔ́ ɖíe, wlǐ bó ɖidó.”

²² Vodún towe e è kɔn kpatágan dó lɛ́ɛ, kpó bǒcyɔ towe e è kɔn siká dó lɛ́ɛ kpó ɔ́, a nǎ nɔ́ mɔ yě dó mɔ nǔ blíblí; a nǎ bɛ̌ yě nyi gbě nǔ e ko nyɔ é ɖɔhun, bó ná ɖɔ: “Cí”.

²³ Énɛ́ ɔ́, Mawu ná ná jǐ dó gle towe mɛ, bɔ jinukún e ayǐkúngban ɔ́ ná ná ɔ́ ná nyɔ́ bó ná sukpɔ́ ɖésú. Hwenɛ́nu ɔ́, kanlin towe lɛ́ɛ ná mɔ gběhan faɖaɖa, bó ná byɔ́ mɛ bó ɖu ama.

²⁴ Nyibú kpó tócí kpó e è nɔ dó lɛ gle ná lɛ́ɛ ná mɔ jinukún sín ama ɖagbe bo ɖu; jinukún sín ama e è fún jinukún bɔ é kpé fí bǐ é.

²⁵ Azǎn e gbe tocɔ́kpe kɛntɔ́ towe lɛ́ɛ tɔn lɛ́ɛ ná mu, bɔ è nǎ hu yě tɛ́ ɔ́, sin ná sa sín só ɖaxó ɖaxó lɛ́ɛ bǐ jǐ, bó ná sa sín só kpɛví kpɛví lɛ́ɛ bǐ jí.

²⁶ Azǎn e gbe Mawu Mavɔmavɔ ná blá akpa nú togun tɔn ɔ́, hwenu e akpa tɔn lɛ́ɛ ná kú é ɔ́, sun ná za wě hwe ɖɔhun, hwe ná za wě lě e é nɔ́ za gbɔn ɔ́ donu tɛ́nwe.

Mawu ná wá dɔn tó nú Asilíi

²⁷ Mawu Mavɔmavɔ ɖésúnɔ ɖíe jǎwe sín zɔ dɔ̌n e; xomɛsin ɖaxó jí wɛ é ɖe, xomɛsin ɔ́ syɛ́n ɖésú; Mawu Mavɔmavɔ ɖo adǎn jí; xó e ɖo tíntɔ́n sín nu tɔn mɛ wɛ é cí myɔ ɖaxó ɖé ɖɔhun.

²⁸ Funfún e ɖo tíntɔ́n sín nu tɔn mɛ wɛ ɔ́ cí tɔ e ɖi sin, bó gba wu bó yi jǐ káká bó hɛn mɛ dó kɔ é ɖɔhun. É wá dó jɔwunkɔ́ nú akɔta lɛ́ɛ, bɔ awě xo yě gbɔn ɖisí amyɔ. É dó gan nu nú togun lɛ́ɛ sɔ́ ɖɔhun, bó ná dɔn yě yi fí e má jló yě ǎ é.

²⁹ Jeluzalɛ́munu lɛ́ɛ mi, midɛɛ lɛ́ɛ ɔ́, mi ná ɖo han ji wɛ è ɖo xwe dlɔ̌ wɛ ɖɔhun. Xomɛ ná ɖo mi hun wɛ è ɖo kpete kún xwe Mawu Mavɔmavɔ só jí, Mawu e nyí Izlayɛ́li Só ɔ́ gɔ́n é ɖɔhun.

³⁰ Mawu Mavɔmavɔ ná dó gbe; é ná ɖe lě e é nɔ́ dlɛ́n alɔ bó nɔ́ xo mɛ gbɔn ɔ́ xlɛ́. É ná ɖe xomɛsin tɔn xlɛ́ ɖo myɔ ɖaxó ɖ'é mɛ, ɖo jǐ kpó jɔhɔn kpó, kpó kɛ́njí kpó tɛ́ntin; nǔɖé nɔ́ nɔ te xomɛsin tɔn nukɔn ǎ.

³¹ Énɛ́ ɔ́, Asilíi se Mawu Mavɔmavɔ sín gbe lě tlóló ɔ́, é ná jɛ sísɔ́sísɔ́ jí. Mawu Mavɔmavɔ ná ɖó kpo n'i.

³² Mawu Mavɔmavɔ ná ɖo kpo ɖó n'i wɛ, bɔ è nǎ ɖo hǔn kpó kanhún kpó xo d'é mɛ wɛ. Mawu Mavɔmavɔ ná gblɔ́n adǎn nú Asilíi, bó ná fun ahwan xá ɛ.

³³ Fí e è nǎ dó axɔ́sú ɔ́ zo ɖe ɔ́, è blǒ ɖ'ayǐ din ɔ́, é kó lín; fí ɔ́ gbló bó gɔ́ngɔ́n bɔ è to nakí d'é mɛ. Mawu Mavɔmavɔ sín funfún ná dó nakí ɔ́ zo, bɔ é ná ji hɛhɛ hwemí ɖɔhun.