Ezayíi 3 - MAWUXÓWÉMA

¹ Mi kpɔ́n! Aklúnɔ, Mawu Mavɔmavɔ Nǔbǐwúkpétɔ́ ɔ́ ɖo nǔɖuɖu kpó sin kpó ná yí sín nu nú Jeluzalɛ́mu toxo wɛ; é ɖo nǔɖuɖu kpó sin kpó ná yí sín nu nú axɔ́súɖuto Judáa tɔn wɛ. É ná yí nǔ e wú yě nɔ́ gán jɛ lɛ́ɛ bǐ sín yě sí:

² é ná yí ahwanfuntɔ́ syɛ́nsyɛ́n kpó ahwanfuntɔ́ kpaa kpó sín yě sí, é ná yí hwɛɖɔtɔ́ kpó gbeyíɖɔ tɔn kpó sín yě sí, é ná yí nǔkantɔ́ kpó tomɛxó kpó sín yě sí,

³ é ná yí ahwangán kpó tonukún kpó sín yě sí, é ná yí azaglɔ́gán kpó majíkiblótɔ́ kpó, kpódó azěgán kpó sín yě sí.

⁴ Mawu ɖɔ: “Un ná cyán yɔkpɔ́vú lɛ́ɛ ɖó yě nu, bɔ yě ná kpa acɛ nú yě lě e jló yě gbɔn é.”

⁵ Mɛ ɖé gbo mɛɖé ɖo togun ɔ́ mɛ ɔ́, é ná nɔ́ táfú, mɛ ɖokpó ɖokpó ná nɔ́ táfú nɔzo tɔn, yɔkpɔ́vú ná nɔ́ kpɔ́n mɛxó nukún mɛ, bɔ mɛ ma nyí mɛɖé ná nɔ́ kpɔ́n mɛjɔmɛ nukún mɛ.

⁶ Mɛ ɖě ná yi daá tɔn xwé, bó ná ɖɔ nú nɔví tɔn ɖě ɖɔ: “Hwɛ ɔ́, awu gaga ɖaxó ɖokpó kpo ɖo hwɛ sí, wǎ nyǐ gǎn ɖo mǐ nu, kpa acɛ nú nǔ élɔ́ lɛ́ɛ e ɖo gblěgblé wɛ lɛ́ɛ.”

⁷ Nɔví tɔn ɔ́ ká ná sú xó bó ɖɔ: “Un sixú kpé nǔ ɖěbǔ wǔ bó wa nú mi ǎ, un ɖó nǔɖuɖu ǎ, un ɖó awu ǎ. Mi ma sɔ́ gǎn mì ó.”

⁸ Jeluzalɛ́mu klɛ́n afɔ, Judáa jɛ ayǐ; yě nɔ́ fɔ́n gǔ dó susu Mawu Mavɔmavɔ tɔn jí, gbɔn xóɖiɖɔ mɛ, gbɔn nǔwiwa mɛ.

⁹ Gbɛtɔ́ jí e yě nɔ́ nɔ ɔ́ wɛ ɖe xlɛ́ ɖɔ yě ɖo nǔ wa nyi do wɛ . Sodɔ́munu lɛ́ɛ ɖɔhun wɛ yě ɖe, yě ja nǔ nyanya e yě nɔ́ dó sin lɛ́ɛ ɖɔ dó to gbé ɔ́, é nɔ́ nyí nǔɖé nú yě ǎ. Heelú yě! Yěɖée nú wa wɛ yě ɖe.

¹⁰ Mi hɛn ɔ́, mi ná ɖɔ: nǔ bǐ nɔ́ yi linsinlinsin nú nǔjlɔ́jlɔ́watɔ́ lɛ́ɛ. Nǔ e yě wa ɔ́, yě nɔ́ ɖu.

¹¹ Amɔ̌, heelú adǎkaxotɔ́ lɛ́ɛ! Nǔɖé nɔ́ nyɔ́ nú yě ǎ, nǔ e yě nɔ́ wa ɔ́ sín bǎ wɛ nɔ xo yě.

¹² Mawu ɖɔ: “Áo togun ce! Yɔkpɔ́vú kpɛví kpɛví ɖé lɛ́ɛ wɛ ɖo acɛ kpa nú we wɛ; nyɔ̌nu lɛ́ɛ wɛ ɖo gǎn ɖu wɛ. Áo togun ce! Nukɔntɔ́ towe lɛ́ɛ nɔ́ ɖo dindɔn we bú wɛ. Fí e kplá we yi wɛ yě ɖe ɔ́ nyɔ́ ǎ.”

Mawu ɖɔ hwɛ xá tomɛxó lɛ́ɛ

¹³ Mawu Mavɔmavɔ ja hwɛ ɖɔ xá togun lɛ́ɛ gbé, é ɖo te, bó ná ɖó hwɛ nú togun lɛ́ɛ.

¹⁴ É dó hwɛ tomɛxó e ɖo togun tɔn mɛ lɛ́ɛ kpó gǎn e ɖo togun tɔn nu lɛ́ɛ kpó ɖɔ: “Mi wɛ hɛn vǐwuntín lɛ́ɛ gblé. Wamamɔnɔ lɛ́ɛ sín nǔ e mi fin lɛ́ɛ ɖo xwé mitɔn lɛ́ɛ gbe.

¹⁵ Acɛ tɛ́ mi ka ɖó bó ɖo togun ce gbídí ɖó afɔ wú wɛ, bó ɖo asú fán wamamɔnɔ lɛ́ɛ wɛ?” Xó e Aklúnɔ, Mawu Mavɔmavɔ Nǔbǐwúkpétɔ́ ɔ́ kanbyɔ́ yě ɔ́ nɛ́.

Nyɔ̌nu ɖagbe ɖagbe Jeluzalɛ́mu tɔn lɛ́ɛ

¹⁶ Mawu Mavɔmavɔ ɖɔ: “Nyɔ̌nu Jeluzalɛ́mu tɔn lɛ́ɛ nɔ mɔ yěɖée dódó; yě ɖo yiyi wɛ ɔ́, yě nɔ́ ɖo kɔ xo wɛ, bó nɔ́ ɖo nukún bló nú mɛ wɛ; bó nɔ́ ɖo afɔ kpɔ́n ɖe wɛ dɛ̌dɛ̌ dɛ̌dɛ̌, bó nɔ́ ɖo gan e yě dó afɔ lɛ́ɛ xúxú wɛ.”

¹⁷ Énɛ́ ɔ́ wú wɛ Aklúnɔ ná mɔ́ ta nú yě, bó ná ɖe yě nyi mɛ̌.

¹⁸ Gbe énɛ́ gbe ɔ́, Aklúnɔ ná ɖe nǔ e yě nɔ́ dó ba acɔ́ ná lɛ́ɛ bǐ sín yě wǔ: gan e yě nɔ́ dó afɔgókɔ lɛ́ɛ, ɖɔ e yě nɔ́ dó hɛn ɖa ná é, tógbé e nɔ cí sun wá jǐ ɖɔhun lɛ́ɛ,

¹⁹ tógbé lɛ́ɛ, alɔgan lɛ́ɛ, sɛ́da e yě nɔ́ cyɔ́n ta é,

²⁰ tablá lɛ́ɛ, wlɔ e yě nɔ́ dó afɔ lɛ́ɛ, anyǔkan lɛ́ɛ, tíla lɛ́ɛ, bǒ lɛ́ɛ,

²¹ alɔkɛ́ lɛ́ɛ, ganví e yě nɔ́ dó awɔntín lɛ́ɛ,

²² awu ɖagbe ɖagbe lɛ́ɛ, awu gaga lɛ́ɛ, tablánú lɛ́ɛ, alɔnuglo lɛ́ɛ,

²³ wěkpɛ́n lɛ́ɛ, awu fɛ́ɖɛ́fɛ́ɖɛ́ lɛ́ɛ, avɔxwɛ e yě nɔ́ lɛ́ dó ta é, dǔkwi e yě nɔ́ zé nyi kɔlivla mɛ é. Nǔ énɛ́ lɛ́ɛ bǐ wɛ Mawu Mavɔmavɔ ná yí sín yě sí.

²⁴ Hwe énɛ́ ɔ́ nu ɔ́, nǔ e lun wǎn é wɛ ná nɔ célu tɛn mɛ, kan wɛ ná nɔ anyǔkan tɛn mɛ. Ta xwlɛ́xwlɛ́ wɛ è nǎ mɔ ɖo ɖa bláblá ɖagbe ɖagbe tɛn mɛ, ati wɛ ná nɔ akwɛ́núvɔ tɛn mɛ, wuntun e è nǎ sɔ́ gan dó ɖó yě ɔ́ wɛ ná nɔ ɖɛkpɛ tɛn mɛ nú yě.

Asúkúsi Jeluzalɛ́mu tɔn lɛ́ɛ

²⁵ Jeluzalɛ́mu, súnnu e ɖo toxo towe mɛ lɛ́ɛ ná kú ɖo ahwangbénu, sɔ́ja towe lɛ́ɛ ná cí ahwan.

²⁶ Énɛ́ ɔ́, mɛ e ɖo toxo ɔ́ mɛ lɛ́ɛ bǐ ná sa vo, bó ná ya gbɛvíhan. Toxo ɔ́ ná cí nyɔ̌nu e nǔ tɔn bǐ dɔn, bɔ é jínjɔ́n kɔ́ mɛ é ɖɔhun.