Ezayíi 29 - MAWUXÓWÉMA

¹ Mawu ɖɔ: “Heelú we Aliɛ́li ! Aliɛ́li, heelú we! Jeluzalɛ́mu toxo e Davídi ɖó gɔnu lɛ́ lɛ̌ dó bó yí é, heelú we! A nǎ bo nɔ nyi xwezán lɛ́ɛ xwe mɛ xwe mɛ lě e é jɛ xá gbɔn é ɔ́,

² un ná dó ya nú we. Adǎn ná nɔ ɖo gbigbo we wɛ, bɔ a nǎ nɔ ɖo alě ná wɛ; un ná sɔ́ we dó húzú vɔ̌sákpe e jí è nɔ dó vɔ̌ zo ɖe é.

³ Nyi lɔmɔ̌ ná ɖó gɔnu lɛ́ lɛ̌ dó we; sɔ́ja ce lɛ́ɛ ná sú ali dó we bɔ a nǎ sixú tɔ́n ǎ; un ná kplé kɔ́ bó cí gúdo, bó ná tɔ́n ahwan we.

⁴ A nǎ jɛ ayǐ bó ná yi do bǐ; gbe towe ná cí mɛ e ɖo kɔ́ glɔ́ é sín gbe ɖɔhun; è nǎ nɔ́ xɔ́ tó ɖésú cóbó ná nɔ́ se. É ná cí mɛkúkú wɛ ɖo xó ɖɔ wɛ sín ayǐkúngban glɔ́ ɖɔhun, è nǎ nɔ́ se nǔ jɛ mɛ ǎ.

⁵ Kɛntɔ́ towe lɛ́ɛ ná sukpɔ́; amɔ̌, afúntúntún ɖɔhun wɛ yě ná cí. Yě ná cí nǔywɛ́ e mɛ jɔhɔn dó alɔ é ɖɔhun. Nukún xwixwe ɖokpó mɛ wɛ nǔ énɛ́ lɛ́ɛ ná jɛ.”

⁶ Mawu Mavɔmavɔ Nǔbǐwúkpétɔ́ ɔ́ wɛ ja kpínkpɔ́n we gbé; é ná wá kpó zǐngídi ɖaxó ɖé kpó; jǐ ná ɖo gbe dó wɛ, ayǐkúngban ná ɖo wǔ dán wɛ, jǐ ɖaxó ɖé ná ɖo jija wɛ kpó jɔhɔn ɖaxó ɖé kpó, myɔ ná ɖo jiji wɛ hɛhɛhɛ.

⁷ Aliɛ́li, akɔta wɔ̌buwɔ́bú e ɖo ahwan fun xá we wɛ lɛ́ɛ, yě mɛ e ɖo ahwan tɔ́n we wɛ lɛ́ɛ: yě mɛ énɛ́ lɛ́ɛ e sín sɔ́ja sú ali dó we, bó ɖo ya dó nú we wɛ lɛ́ɛ ɔ́, yě bǐ nǎ bú nǔ e è mɔ ɖo dlɔ̌ mɛ ɔ́ ɖɔhun, yě bǐ nǎ bú nǔ e è mɔ ɖo amlɔ mɛ zǎn mɛ ɔ́ ɖɔhun.

⁸ Xovɛ́ sin nya ɖé bɔ é kú dlɔ̌ ɖɔ émí ɖo nǔ ɖu wɛ; ée é ká fɔ́n ɔ́, adɔgo tɔn kpo ɖo vɔ̌. Kɔ xú nya ɖé bɔ é kú dlɔ̌ ɖɔ émí ɖo sin nu wɛ; ée é ká fɔ́n ɔ́, nǔ ci kɔ n'i, bɔ kɔ kpo ɖo xúxú i wɛ. Mɔ̌ wɛ é ná cí nú akɔta wɔ̌buwɔ́bú e ɖo ahwan fun xá Sinyɔ́ɔ só ɔ́ wɛ lɛ́ɛ.

Mawu xwé nǔ dó gbeyíɖɔ lɛ́ɛ sín ayi nu

⁹ Mi cí jɛjɛɛ bónú nukikɛ ní gló mi; mi ní nyí nukúntíntɔ́nnɔ, bó má mɔ nǔɖé ó; mi nu vɛ̌ɛn ǎ bɔ vɛ̌ɛn ka mú mi; mi nu ahan ǎ bó ka ɖo sa fún wɛ,

¹⁰ ɖó Mawu Mavɔmavɔ xwé nǔ dó ayi mitɔn nu; é blá nukún mɛ nú mi. Nukún mitɔn lɛ́ɛ wɛ nyí gbeyíɖɔ Mawu tɔn lɛ́ɛ. Mawu Mavɔmavɔ cyɔ́n nǔ dó ta nú mi; ta mitɔn lɛ́ɛ wɛ nyí nǔmɔtɔ́ lɛ́ɛ.

¹¹ Nǔɖexlɛ́mɛ énɛ́ lɛ́ɛ ɔ́, mi tunwun ǎ; é cí wěma e è wlǎn bó sú, bó ɖó wuntun é ɖɔhun. È zě nú mɛ e nyɔ́ nǔ xa ɔ́ ɖokpó bó ɖɔ: “Xa” bɔ é ɖɔ: “Un sixú xa ǎ, sú wɛ è sú bó ɖó wuntun.”

¹² È zě wěma ɖokpó énɛ́ ɔ́ nú mɛ e ma nyɔ́ nǔ xa ǎ é ɖokpó, bó ɖɔ: “Xa”. Lo ɔ́, é ɖɔ: “Un nyɔ́ nǔ xa ǎ”.

Nǔfyánmɛ lɛ́ɛ ko vɔ ǎ

¹³ Aklúnɔ ɖɔ dó togun élɔ́ wú ɖɔ: “Togun élɔ́ ɔ́, nu kɛ́ɖɛ́ jɛ́n é nɔ́ víví nú mì; nu jɛ́n é nɔ́ sɔ́ mì su ɖe; ayi tɔn ɖo wǔ ce ǎ. Sísí e ɖó nú mì wɛ é ɖe bó ɖɔ ɔ́, nǔdówá gbɛtɔ́ tɔn wɛ; nǔ wɛ é nyí bɔ è kplɔ́n dó ta mɛ kpowun.

¹⁴ Énɛ́ ɔ́ wú wɛ un ná nɔ́ ɖo nǔ jlɛ́ wɛ bɔ ado ná hu i. Nǔnywɛ́tɔ́ tɔn lɛ́ɛ sín nǔnywɛ́ ná nɔ́ xo akpó. Gbɛtɔ́ bíbí tɔn lɛ́ɛ sín bǐbí bǐ ná húzú nǔ yǎyá.”

Mɛ̌ mi ka sɔ́ Mawu dó mɔ?

¹⁵ Heelú mɛ énɛ́ lɛ́ɛ e nɔ ɖo nǔ wa dó nǔglɔ́ wɛ lɛ́ɛ; yě mɛ e nɔ hwlá tito yětɔn lɛ́ɛ dó Mawu Mavɔmavɔ, bó nɔ́ ɖo nǔ wa dó nǔglɔ́ wɛ lɛ́ɛ ɔ́, heelú yě. Yě nɔ́ lin ɖɔ mɛ ɖé kún sixú mɔ émí ó; mɛɖé kún sixú tunwun nǔ e wa wɛ émí ɖe ɔ́ ó.

¹⁶ Xlo jɛ́n mi jɔ sɔ mɔ̌ a? È sixú zé ko kpó zɛ̌nmɛtɔ́ kpó ɖó hǎ ɖokpó ɔ́ jí a? Nǔ e è zě alɔ dó bló ɔ́ sixú ɖɔ nú mɛ e bló e ɔ́ ɖɔ é kún nyí é wɛ bló émí ó a? Zɛ̌n sixú ɖɔ nú zɛ̌nmɛtɔ́ ɖɔ é kún nyɔ́ zɛ̌n mɛ ó a?

Nǔ bǐ ná húzú

¹⁷ Hwenu kpɛɖé jɛ́n kpo din, bɔ Libáan zungbó ɔ́ ná húzú atínsínsɛ́ngbo, bɔ atínsínsɛ́ngbo ná húzú zungbó.

¹⁸ Gbe nɛ́ gbe ɔ́, mɛ e kú tó lɛ́ɛ ná se nǔ e è wlán dó wěma ɔ́ mɛ é, bɔ mɛ e tɔ́n nukún lɛ́ɛ ná tɔ́n sín zǐnflú mɛ, bó ná jɛ nǔ mɔ jí.

¹⁹ Mɛ e nɔ sɔ́ yěɖée hwe lɛ́ɛ ɔ́, yě ná nɔ́ ɖo awǎ jɛ dó awǎ jí wɛ ɖó Mawu Mavɔmavɔ wú. Wamamɔnɔ gǔdo gúdo tɔn lɛ́ɛ ɔ́, xomɛ ɖaxó ɖé ná nɔ́ hun yě ɖó Mɛ Mímɛ́ Izlayɛ́li tɔn ɔ́ wú.

²⁰ Đó acɛgannaganna-kpanúmɛtɔ́ lɛ́ɛ sín xó ná fó; è nǎ sú mɛ e ma nɔ sí mɛ ǎ lɛ́ɛ sín kún dó; è nǎ sú mɛ e nɔ wa nǔ nyanya dó mɛ wú lɛ́ɛ sín kún dó.

²¹ Yě wɛ nɔ ɖó nǔvú dó mɛ nu, ɖɔ è wa nǔ nyanya; yě wɛ nɔ́ ɖó xómɔ nú hwɛɖɔtɔ́ lɛ́ɛ, yě wɛ nɔ́ ɖó hwɛ nú xomɛvɔ́nɔ.

²² Énɛ́ wú ɔ́, xó e Mawu Mavɔmavɔ, mɛhwlɛ́ngántɔ́ Ablaxámu tɔn ɔ́ ɖɔ nú togun Jakɔ́bu tɔn ɔ́ ɖíe: “Bɛ́ sín din ɔ́, mɛɖé sɔ́ ná kɔ́n Jakɔ́bu togun ɔ́ sín wi ǎ; é sɔ́ ná ɖu winnyá ɖě ǎ.

²³ Đó hwenu e yědɛɛ lɛ́ɛ, abǐ vǐ yětɔn lɛ́ɛ ná jɛ nǔ e bló wɛ un ɖe ɖo tɛ́ntin yětɔn lɛ́ɛ mɔ jí é ɔ́, yě ná tunwun mɛ e nyɛ Mawu Mɛ Mímɛ́ Jakɔ́bu tɔn nyí é; yě sɔ́ ná nɔ́ glá bó nɔ wa nǔ e má nyɔ́ nyɛ Mawu Izlayɛ́li tɔn nukún mɛ lɛ́ɛ ǎ.

²⁴ Yě mɛ e ma sɔ́ tunwun nǔ e wa wɛ yě ɖe ɔ́ ǎ lɛ́ɛ ɔ́, yě ná jɛ tɛn ce mɛ tunwun nú mì jí. Yě mɛ e nɔ fɔ́n, bó nɔ́ ɖo nǔ hlún ɖɔ wɛ lɛ́ɛ ná yí gbe bó yí kplɔ́n.”