Ezayíi 26 - MAWUXÓWÉMA

¹ Gbe énɛ́ gbe ɔ́, è nǎ ji han élɔ́ ɖo Judáa to ɔ́ mɛ ɖɔ: “Mǐ ɖǒ toxo e è mɛ ahohó lɛ́ lɛ̌ dó é ɖokpó. Mawu wɛ mɛ ahohó we lɛ́ lɛ̌ dó toxo ɔ́, bónú mɛɖé ní má kpé nǔɖé wú bó wa nú mǐ ó.

² Mi hun hɔntogbó lɛ́ɛ kɛ́. Mi jó togun e se tónú nú Mawu bó ɖo gbejí n'i ɔ́ dó bónú é byɔ́ xwé gbe.

³ Mawu, mɛ e ɖeji dó wǔ we kpó ayi tɔn bǐ kpó, bó má nɔ́ húzú ǎ ɔ́, a nɔ ná ɛ ayi jɛ ayǐ.

⁴ Mi ɖeji dó Mawu Mavɔmavɔ wú kúgbe gbɛgbe. Mi ɖeji dó wǔ tɔn, só wɛ é nyí, é ɖo te tɛgbɛ.

⁵ Mawu Mavɔmavɔ zin mɛ e ɖo só ta lɛ́ɛ é dɛ́; é kpíkpé toxo e ɖo ji aga ɖéé ɔ́ wá dodomɛ, é sɔ́ ɛ xo dó kɔ́ mɛ, ɖo afúntúntún mɛ.

⁶ Mawu Mavɔmavɔ zin i dɛ́ bɔ wamamɔnɔ gbɛ̌dónánɔ lɛ́ɛ gbídí i ɖó afɔ wú.”

Hwenu gǔdo gúdo tɔn lɛ́ɛ sín ɖɛ

⁷ Hwɛjijɔnɔ sín ali ɔ́, ali jlɔ́jlɔ́ wɛ. Hwi mɛ e nɔ wa nǔ jlɔ́jlɔ́ ɔ́, a nɔ bló ali ɖó nú hwɛjijɔnɔ.

⁸ Mawu Mavɔmavɔ, mǐ ɖo nukún ɖó we wɛ ɖo ali e a ɖɔ mǐ ní gbɔn é jí. Mǐ nɔ́ flín we, bó nɔ́ ylɔ́ nyǐkɔ towe, nǔ e nɔ́ myá nukún nú mǐ é nɛ́.

⁹ Zǎn mɛ ɔ́, nyi lɔ nɔ ba ná mɔ we, ayi ce bǐ nɔ ɖo wǔ we. A dɔn tó nú gbɛtɔ́ lɛ́ɛ lě e a ɖɔ gbɔn é; mɛ bǐ nɔ́ mɔ ɖɔ émí ɖó ná zán gbɛ lě e é jɛ xá gbɔn é.

¹⁰ Lo ɔ́, ényí è kú nǔbláwǔ nú adǎkaxotɔ́ lɛ́ɛ ɔ́, ayi yětɔn nɔ́ mɔ nǔ ǎ, yě ná bó ɖo to e mɛ è nɔ wa nǔ ɖó sɛ́nxwi jí ɖe ɔ́ mɛ ɔ́, nǔ agɔ jɛ́n yě nɔ́ wa; Mawu Mavɔmavɔ, yě tunwun susu e a ɖǒ ɔ́ ǎ.

¹¹ Mawu Mavɔmavɔ, alɔ towe ɖo adǎn jí, yě ká mɔ ǎ. Yě ná mɔ lě e a nɔ jɛ hun dó togun towe jí kpó wǎn yíyí kpó gbɔn é, bɔ winnyá ná hu yě; zo e a zě ɖó te nú kɛntɔ́ towe lɛ́ɛ ní fyɔ́ yě.

¹² Mawu Mavɔmavɔ, a nǎ ayi jɛ ayǐ mǐ, ɖó mǐ sɔ́ nǔ ɖěbǔ bó ná bló ɔ́, hwi wɛ nɔ bló nú mǐ.

¹³ Mawu Mavɔmavɔ, Mawu mǐtɔn, gǎn ɖěvo ɖěvo lɛ́ɛ kó kpa acɛ dó mǐ nu kpɔ́n, lo ɔ́, hwi ɖokpó géé wɛ mǐ nɔ́ kpa susu ná.

¹⁴ Gǎn énɛ́ lɛ́ɛ kó kú bó sɔ́ ná lɛ́ fɔ́n ǎ; yě húzú nǔ kúkú, yě sixú fɔ́n sí te ǎ. Nǔgbó wɛ, a dɔn tó nú yě, lobo sú kún yětɔn dó; a ɖe nǔ e è nǎ mɔ bó ná dó flín yě lɛ́ɛ bǐ síin.

¹⁵ Mawu Mavɔmavɔ, a blǒ bɔ togun mǐtɔn ji d'é jí; énɛ́ ɔ́ wɛ sɔ́ we su. A blǒ bɔ togun mǐtɔn ji d'é jí, a sɛ to ɔ́ sín dogbó lɛ́ɛ bǐ dó gǔdo.

¹⁶ Mawu Mavɔmavɔ, adǎn ɖo gbigbo mǐ wɛ ɔ́, hwi wɛ mǐ nɔ́ hɔn wá su; a ɖo tó dɔn nú mǐ wɛ ɔ́, mǐ nɔ́ sa vo nú we dó ayi mɛ.

¹⁷ Mawu Mavɔmavɔ, mǐ mɔ wǔvɛ́ ɖo nukɔn towe nyɔ̌nu e ɖo ajidonu é ɖɔhun; nyɔ̌nu e ɖo ajidonu bó ɖo éɖée sló ɖo wǔvɛ́ nu wɛ, bó ɖo xó sú wɛ é ɖɔhun.

¹⁸ Kɛ́n jɛ mǐ wǔ, mǐ mɔ wǔvɛ́; lo ɔ́, jɔ kpowun wɛ mǐ ɖe. Mǐ bló nǔ e ná hwlɛ́n mɛ gán ɖo ayǐkúngban ɔ́ jí é ɖě ǎ. Mǐ ji vǐ ɖě dó gbɛ ɔ́ mɛ ǎ.

Mɛkúkú lɛ́ɛ ná fɔ́n Mawu ná dɔn hwɛ e è hu ɔ́ sín tó nú mɛ

¹⁹ Mawu Mavɔmavɔ, mɛ towe e kú lɛ́ɛ ná fɔ́n; togun ce sín mɛ e kú lɛ́ɛ ná fɔ́n. Mi mɛ e ɖo kɔ́ glɔ́ lɛ́ɛ mi, mi fɔ́n; mi j'awǎ, ɖó Mawu Mavɔmavɔ, a nǎ sɛ́ wěziza towe dó ahǔn ɖɔhun, bɔ ayǐkúngban ɔ́ nɔ́ ná gbɛ mɛ e kú lɛ́ɛ.

²⁰ Togun ce e mi, mi yi xɔ mitɔn lɛ́ɛ mɛ, mi dɔn hɔn mitɔn sú dó ta, bó nɔ fínɛ́ kpɛɖé, bónú xomɛsin Mawu tɔn ní wá yi.

²¹ Mawu Mavɔmavɔ ɖíe ɖo tíntɔ́n sín nɔtɛn tɔn ja wɛ e; é ɖo tó ná dɔ́n nú mɛ e ɖo ayǐkúngban jí lɛ́ɛ wɛ, ɖó nǔ nyanya e yě wa lɛ́ɛ wú. Ayǐkúngban ná tún kanjɔ e é nu é; ayǐkúngban ná jó mɛ e è hu, bó zé hwlá dó lan tɔn mɛ lɛ́ɛ.