Ezayíi 23 - MAWUXÓWÉMA

¹ Xó e Mawu ɖɔ dó “Tíi” wú é ɖíe: “Tɔjíhún ɖaxó ɖaxó lɛ́ɛ mi, mi dó gbɛvíhan. Mi dó gbɛvíhan, ɖó è gba Tíi toxo ɔ́ bǐ; mi sɔ́ ɖó fí e mi ná nɔ́ yi glín ɖó é ǎ.” Hwenu e tɔjíhún lɛ́ɛ lɛ́ kɔ sín tɔtɛ́ntinto Cíplu tɔn mɛ wá ɔ́ wɛ yě se xó énɛ́.

² Mi mɛ e nɔ nɔ xutó xutó lɛ́ɛ mi, ahwi ní xo mi. Mi ajɔ̌watɔ́ Sidɔ́ɔn tɔn e nɔ sɛ́ mɛ

³ dó xu jí xu jí lɛ́ɛ mi, ahwi ní xo mi. Jinukún e è nɔ dó gbɔn Nilu tɔ ɔ́ tó káká yi lɛ́ɛ, ée è nɔ ya ɖo Nilu tɔ ɔ́ kpá lɛ́ɛ wɛ nɔ́ dó dɔkun nú Sidɔ́ɔn. Sidɔ́ɔn toxo ɔ́ húzú axi bɔ akɔta lɛ́ɛ bǐ nɔ́ xwlé.

⁴ Sidɔ́ɔn, winnyá ní hu we; ɖó xu ɖɔ, agbetawoyó ɖɔ: “Un cí mɛ ma yi ajidonu kpɔ́n ɖɔhun, un cí mɛ ma jǐ vǐ kpɔ́n ɖɔhun, un cí mɛ ma hɛn vǐ súnnu kpɔ́n ɖɔhun, un cí mɛ ma hɛn vǐ nyɔ̌nu kpɔ́n ɖɔhun .”

⁵ Hwenu e Ejípu ná se nǔ e gbo Sidɔ́ɔn ɔ́, é ná jɛ wǔvɛ́ mɔ jí. Nǔ e wa ɛ hwenu e é se ɖɔ Tíi gba é wɛ ná wa ɛ.

⁶ “Mi mɛ e nɔ nɔ xutó xutó lɛ́ɛ mi, mi gbɔn xu jí káká yi Taasísi, mi dó gbɛvíhan!

⁷ Toxo mitɔn e nɔ jɛ axi ɖɔhun ɖ'ayǐ é jɛ́n nɛ́ a? Toxo mitɔn e ko ɖo te sín xóxó hwenu ɔ́ jɛ́n nɛ́ a? Toxo mitɔn e nɔ sɛ́ mɛ dó to línlín mɛ bɔ yě nɔ́ yi wa ajɔ̌ é jɛ́n nɛ́ a?”

⁸ Tíi toxo ɔ́ wɛ nɔ sɔ́ axɔ́sú; mɛ e ɖo ajɔ̌ jí n'i lɛ́ɛ ɔ́, gǎn wɛ yě nyí; ajɔ̌watɔ́ tɔn lɛ́ɛ ɔ́, mɛ e mɛ bǐ nɔ́ sɔ́ su ɖo gbɛmɛ fí lɛ́ɛ mɛ wɛ yě ɖe. Mɛ̌ ka ɖɔ émí ná gba toxo énɛ́ hánnyá?

⁹ Mawu Mavɔmavɔ Nǔbǐwúkpétɔ́ ɔ́ wɛ; é wɛ ɖɔ mɔ̌, bó ná dó winnyá yě mɛ énɛ́ lɛ́ɛ e nɔ́ ɖo susu xɔ wɛ lɛ́ɛ bǐ; é ná kɔ́n wi sín ta nú yě mɛ énɛ́ lɛ́ɛ e mɛ bǐ nɔ́ sɔ́ su é.

¹⁰ “Tíinu lɛ́ɛ mi, mi yi lɛ ayǐkúngban mitɔn lɛ́ɛ! Đó fí ɖé sɔ́ ɖe bɔ tɔjíhún ná wá glín dó ǎ.”

¹¹ Mawu Mavɔmavɔ gblɔ́n adǎn nú xu, é dó xɛsi nú axɔ́súɖuto lɛ́ɛ; é ná gbe ɖɔ è nǐ gba ahohó Kanáa tɔn lɛ́ɛ.

¹² É ɖɔ: “Sidɔ́ɔnnu lɛ́ɛ mi, fí e mi j'awǎ jɛ ɔ́ kpé. Mi cí ɖyɔ̌vǐ e è hwlɛ̌n kan xá bó gbá avɔ ná é ɖɔhun. Mi na bo wlí ali bó gbɔn xu jí káká yi tɔtɛ́ntinto Cíplu tɔn mɛ ɔ́, mi ná mɔ agbɔ̌n ɖo dɔ̌n lɔmɔ̌ ǎ.

¹³ Mi kpɔ́n nǔ dó Babilɔ́nu to ɔ́ wú; togun énɛ́ sɔ́ ɖe ǎ. Asilíinu lɛ́ɛ sɔ́ to énɛ́ ɔ́ dó húzú gběkanlin to; Asilíinu lɛ́ɛ mɛ tocɔ́kpe ɖé lɛ́ɛ bó tɔ́n ahwan yě, yě gba hɔnmɛ e ɖo to ɔ́ mɛ lɛ́ɛ, yě zé to ɔ́ dó húzú awǐnnyaglo.

¹⁴ Tɔjíhún ɖaxó ɖaxó lɛ́ɛ mi! Mi dó gbɛvíhan. Mi dó gbɛvíhan, ɖó è gba fí e mi nɔ yi glín ɖe bɔ nǔɖé ma nɔ kpé mi wú ǎ é.”

¹⁵ É jɛ hwenɛ́nu ɔ́, è nǎ wɔn Tíi káká nú xwe kanɖé gban (70); xwe énɛ́ kó bló axɔ́sú ɖokpó sín jidɔ́. Xwe kanɖé gban (70) lɛ́ɛ wá yi ɔ́, han e è ji dó agalɛtɔ́ ɔ́ ná ɖi Tíi wú. Han ɔ́ ɖɔ:

¹⁶ Hwi nyɔ̌nu agalɛtɔ́ e mɛɖé ma sɔ́ flín ǎ é, zě kanhún towe, bó xo lɛ́ lɛ̌ dó toxo ɔ́; xo lě e a kpé wú gbɔn é. Đo han ji wɛ ɖo gbɛ mɛ, bónú gbɛtɔ́ lɛ́ɛ ná nɔ́ flín we.

¹⁷ Xwe kanɖé gban (70) lɛ́ɛ wá yi ɔ́, Mawu Mavɔmavɔ ná húzú kpan nukɔn Tíi. Mawu Mavɔmavɔ ná jó Tíi dó bɔ é ná lɛ́ jɛ azɔ̌ tɔn kwíji kwíji ɔ́ wa jí xá axɔ́súɖuto e ɖo gbɛ ɔ́ mɛ lɛ́ɛ bǐ, lobo ná mɔ akwɛ́.

¹⁸ Lo ɔ́, nǔ e é ná mɔ ɖ'é mɛ é, akwɛ́ e è nǎ nɔ́ sú i é bǐ wɛ è nǎ sɔ́ ɖó vo nú Mawu Mavɔmavɔ. È nǎ bɛ́ kplé ǎ, è nǎ hɛn ɖ'ayǐ ǎ; é wɛ è nǎ nɔ zé dó ná nǔɖuɖu mɛ e nɔ sɛn Mawu Mavɔmavɔ lɛ́ɛ, bɔ yě ná nɔ́ ɖu nǔ gɔ́ xo. É wɛ è nǎ nɔ́ zé dó tɔ nǔzínzán ɖagbe ɖagbe nú yě.