Ezayíi 21 - MAWUXÓWÉMA

¹ Xó e Mawu ɖɔ dó gbětótló e ɖo xutó é jí é ɖíe: Kɛntɔ́ gosín gbětótló mɛ ja, é gosín to dó xɛsi ɖé mɛ ja, é ja axásáxásá jɔhɔn ɖo Nɛgɛ́vu dín gbɔn wɛ ɖɔhun.

² Nǔ baɖabaɖa ɖé wɛ Mawu hun xlɛ́ mì. Mɛ e kpó mɛ kpó jɛ akɔ ɔ́ húzú mɛsaɖutɔ́. Nǔhɛngblétɔ́ ɔ́ ná hɛn nǔ gblé. Mawu ɖɔ: “Elámunu lɛ́ɛ e mi, mi yi fun ahwan. Mɛdinu lɛ́ɛ e mi, mi yi xá to ɔ́. Un ná ɖó wǔvɛ́ bǐ te.”

³ Énɛ́ ɔ́ wú wɛ alin ce ɖo ɖuɖu wɛ. Un ɖo wǔvɛ́ mɔ wɛ nyɔ̌nu ɖo ajidonu ɖɔhun. Nǔ e se wɛ un ɖe ɔ́ ɖo ayi gbadó nú mì wɛ. Nǔ e mɔ wɛ un ɖe ɔ́ ɖo xɛsi dó nú mì wɛ.

⁴ Ayi ce j'ayǐ ǎ, xɛsi ɖo jǐ ce. Un ɖo nukún ɖó zǎn wɛ ɖɔ ní kú bónú ayi ce ná jɛ ayǐ; é ká cí nukún ce mɛ ɖɔ xɛsi zán wɛ ɖo nǎ kú nú mì wɛ ɖɔhun.

⁵ È tɛ́ nǔɖuɖu, bó tɛ́ nǔ gbɔn kɔ́ mɛ. È ɖu nǔ, bó nu ahan... Zaanɖé kpowun ɔ́, mɛɖé sú xó bó ɖɔ: “Sɔ́jagán lɛ́ɛ e mi! Mi sí te bó fɔ ahwanfunnú mitɔn lɛ́ɛ!”

⁶ Xó e Aklúnɔ ɖɔ nú mì é ɖíe: “Sɛ́ mɛcɔ́tɔ́ ɖokpó dó fí e è nɔ cɔ́ mɛ ɖe é; bónú é ní ɖo nǔ e ɖo jijɛ wɛ ɔ́ ɖɔ wɛ.

⁷ Ényí é mɔ ahwankɛkɛ́ví bónú yě slɛ́ dó, bɔ sɔ́ ɖo dindɔn wɛ, tócí abǐ lǎkúnmí ɖo dindɔn wɛ hǔn, é ní cɔ́ éɖée, é ní cɔ́ éɖée ɖésú!”

⁸ Nǔgbó ɔ́, mɛcɔ́tɔ́ ɔ́ sú xó bó ɖɔ: “Gǎn e, un nɔ ahohó ɔ́ jí kéze káká bɔ zǎn kú; un nɔ azɔ̌ jí zǎn mɛ káká bɔ ayǐ hɔ́n, bó ɖo nǔ e ɖo nǎ jɛ wɛ é cɔ́ wɛ.

⁹ Un ná mɔ nǔɖé kpowun ɔ́, un mɔ dǎwe ɖokpó ɖo ahwankɛkɛ́ví mɛ, bɔ sɔ́ ɖo dindɔn wɛ. Nya ɔ́ kɛ nu, bó sú xó bó ɖɔ: ‘Babilɔ́nu jɛ ayǐ! Babilɔ́nu jɛ ayǐ! Vodún tɔn lɛ́ɛ bǐ sín bǒcyɔ jɛ ayǐ bó gba hánnyá!’ ”

¹⁰ Togun ce, hwi mɛ e è só lě e è nɔ só jinukún ɖo kɔ́xota gbɔn ɔ́, nǔ e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɔ́ ɖɔ bɔ un se ɔ́ nɛ́. Xó e un hɛn wá nú we ɔ́ nɛ́.

Étɛ́ ná jɛ zǎn mɛ?

¹¹ Xó e Mawu ɖɔ dó Duma jí é ɖíe: “Un se gbe ɖé sín Seyíi, bɔ é ɖɔ nú mì ɖɔ: ‘Mɛcɔ́tɔ́, zǎn ká ko sɛ yi kpɛɖé din a?’ ”

¹² Bɔ mɛcɔ́tɔ́ ɔ́ yí gbe, bó ɖɔ: “Ayǐ nǎ hɔ́n, zǎn ká ná lɛ́ kú. Ényí mi jló ná lɛ́ kan nǔ byɔ́ hǔn, mi kanbyɔ́ bó yi bó wá hweɖévonu.”

Mɛ e hɔn sín Dedáni kpó Kedáa kpó lɛ́ɛ

¹³ Xó e Mawu ɖɔ dó Alabíi jí é ɖíe: Mi Dedáninu e dó ahwan gbě lɛ́ɛ e mi! Mi yi dɔ́ gběhan Alabíi tɔn lɛ́ɛ mɛ.

¹⁴ Mi mɛ e ɖo Téma lɛ́ɛ e mi! Mi hɛn sin bó yi kpé mɛ e vɛ̌ ɖo xúxú wɛ lɛ́ɛ é. Mi hɛn nǔɖuɖu yi jó nú mɛ e ɖo hinhɔn wɛ lɛ́ɛ.

¹⁵ Đó yě ɖo hinhɔn nú hwǐ wɛ; yě ɖo hinhɔn nú hwǐ e nǔɖé má nɔ́ hɛn ɖó te ǎ é wɛ. Yě ɖo hinhɔn nú gǎ e è sɔ́ dó yě jí ɔ́ wɛ. Yě ɖo hinhɔn nú ahwan e è tɔ́n yě ɔ́ wɛ.

¹⁶ Xó e Aklúnɔ ka ɖɔ nú mì é ɖíe: “Káká nú mǐ ná mɔ xwe ɖokpó kpíkpé lě ɔ́, susu Kedáa tɔn ná xo kɔ́ bǐ.

¹⁷ Gǎdatɔ́ tɔn lɛ́ɛ kpó sɔ́ja tɔn syɛ́nsyɛ́n lɛ́ɛ kpó sɔ́ ná kpo gěgé ɖé ǎ. Yě mɛ kpɛɖé jɛ́n ná kpo.” Xó e Mawu Mavɔmavɔ, Mawu Izlayɛ́li tɔn ɖɔ é nɛ́.