Ezayíi 2 - MAWUXÓWÉMA

¹ Xó e Mawu ɖɔ nú Ezayíi Amɔ̌si ví ɔ́ ɖo nǔmimɔ mɛ dó Judáa kpó Jeluzalɛ́mu kpó wú é ɖíe.

Akɔta lɛ́ɛ bǐ ná nyi ahwan wá Jeluzalɛ́mu

² Gbe ɖokpó ná wá su, bɔ só e jí Mawu Mavɔmavɔ xwé ɔ́ ɖe ɔ́ ná hú ga só kpɛví kpɛví lɛ́ɛ, é ná yi jǐ hú só ɖě lɛ́ɛ bǐ. Énɛ́ ɔ́, akɔta lɛ́ɛ bǐ ná nyi ahwan wá gɔ̌n tɔn.

³ Akɔta gěgé ná jɛ ali ɖidó dɔ̌n bó ná ɖɔ: “Mi wá mǐ yi Mawu Mavɔmavɔ só ɔ́ ta, mi wá mǐ yi Mawu Jakɔ́bu tɔn xwé. É ná kplɔ́n nǔ e é jló ɖɔ mǐ nǎ wa é mǐ, bɔ mǐ nǎ xwedó ali e é ɖe nú mǐ é.” Nǔgbó ɔ́, Sinyɔ́ɔ wɛ Mawu Mavɔmavɔ sɛ́n ɔ́ ná gosín, Jeluzalɛ́mu wɛ Mawu Mavɔmavɔ xó ɔ́ ná gosín wá nú mǐ.

⁴ É ná ɖɔ hwɛ xá akɔta lɛ́ɛ, é wɛ ná dó hwɛ gbo nú togun lɛ́ɛ bǐ. Énɛ́ ɔ́, yě ná zé hwǐ yětɔn lɛ́ɛ dó tun alǐn ná, bó ná zé gǎ yětɔn lɛ́ɛ dó tun aɖǎ ná. Akɔta ɖě sɔ́ ná tɔ́n ahwan ɖě ǎ. Mɛ ɖé sɔ́ ná kplɔ́n lě e è nɔ fun ahwan gbɔn é ǎ.

⁵ Jakɔ́bu ví lɛ́ɛ mi! Mi wá mǐ ní ɖi zɔnlin ɖo Mawu Mavɔmavɔ sín wěziza nu.

Azǎn e gbe Mawu ná ɖó hwɛ nú mɛ é

⁶ Mawu Mavɔmavɔ, a jǒ togun towe Jakɔ́bu ví lɛ́ɛ dó, ɖó nǔkantɔ́ zǎnzǎnhwe jí tɔn lɛ́ɛ ɖo yě mɛ kpɔ́ gégé; yě nɔ́ bló majíki Filisitɛ́ɛn lɛ́ɛ ɖɔhun, bó nɔ́ dó toɖévomɛnu lɛ́ɛ sín gbɛ̌.

⁷ Kpatágan kpó siká kpó ɖo to yětɔn mɛ kpɔ́ gégé, dɔkun ɖo yě sí bó vɛ́ jlɛ́, sɔ́ ɖo to yětɔn mɛ kpɔ́ gégé, ahwankɛkɛ́ví e ɖo yě sí lɛ́ɛ ɔ́, è sixú xa ǎ.

⁸ Mɔ̌ ɖokpó ɔ́, vodún wɛ gɔ́ to yětɔn; yě nɔ́ ɖe kɔ́ nú nǔ e yě ɖésúnɔ bló lɛ́ɛ, nǔ e yě ɖésúnɔ zé alɔ yětɔn dó bló lɛ́ɛ wɛ yě nɔ́ sɛn.

⁹ Énɛ́ ɔ́, yě j'ayǐ, yě sɔ́ yěɖée xo kɔ́. Mawu, ma sɔ́ hwɛ kɛ yě ó.

¹⁰ Mi hɔn hwlá cí só lɛ́ɛ glɔ́, mi byɔ́ kɔ́ glɔ́ bó ná hɔn nú xɛsi e dó mi wɛ Mawu Mavɔmavɔ ɖe é, bó ná hɔn nú susu tɔn e nɔ kɔ́n lánlánlán é.

¹¹ Mɛ e nɔ́ ɖo éɖée mɔ wɛ ɔ́, è nǎ sɔ́ ɛ hwe, mɛ e nɔ ɖo go yí wɛ ɔ́ ná ɖu winnyá. Mawu Mavɔmavɔ kɛ́ɖɛ́ wɛ è nǎ sɔ́ su gbe énɛ́ gbe.

¹² Mawu Mavɔmavɔ Nǔbǐwúkpétɔ́ ɔ́ zé azǎn ɖokpó ɖó te, bó ná ɖó hwɛ nú mɛ e nɔ mɔ éɖée é, mɛ e nɔ yí go é, mɛ e nɔ zé éɖée su é bó ná sɔ́ ɛ hwe.

¹³ Mawu Mavɔmavɔ ná ɖó hwɛ nú sɛ́dlutín Libáan tɔn e yi jǐ hú atín bǐ lɛ́ɛ. É ná ɖó hwɛ nú cɛ́nitín Basáni tɔn lɛ́ɛ bǐ.

¹⁴ É na ɖó hwɛ nú só ɖaxó ɖaxó lɛ́ɛ; é ná ɖó hwɛ nú só kpɛví kpɛví lɛ́ɛ bǐ.

¹⁵ Mawu Mavɔmavɔ ná ɖó hwɛ nú kpe gaga e jí mɛcɔ́tɔ́ lɛ́ɛ nɔ́ nɔ lɛ́ɛ bǐ. É ná ɖó hwɛ nú ahohó e è ma sixú fán ǎ lɛ́ɛ bǐ.

¹⁶ É ná ɖó hwɛ nú tɔjíhún ɖaxó ɖaxó lɛ́ɛ bǐ, bó ná ɖó hwɛ nú tɔjíhún ɖɛkpɛ ɖɛkpɛ lɛ́ɛ bǐ.

¹⁷ Mɛ e nɔ mɔ éɖée ɔ́, è nǎ sɔ́ ɛ hwe, mɛ e nɔ yí go ɔ́ ná ɖu winnyá. Mawu Mavɔmavɔ kɛ́ɖɛ́ wɛ è nǎ sɔ́ su gbe énɛ́ gbe.

¹⁸ Vodún lɛ́ɛ bǐ ná sú kún dó.

¹⁹ Hwenu e Mawu Mavɔmavɔ ná sí te bó dó xɛsi gbɛ ɔ́ é ɔ́, è nǎ byɔ́ sóxo mɛ, è nǎ byɔ́ do mɛ ɖo kɔ́ glɔ́ bó ná yi do bǐ, bó ná hɔn nú xɛsi e dó mɛ wɛ é ɖe é, bó ná hɔn nú susu tɔn e nɔ kɔ́n lánlánlán é.

²⁰ Gbe énɛ́ gbe ɔ́, gbɛtɔ́ lɛ́ɛ ná bɛ́ vodún e yě zé kpatágan abǐ siká dó bló, bó nɔ́ sɛn lɛ́ɛ nyi dó acú lɛ́ɛ kpó afluiflui lɛ́ɛ kpó.

²¹ Hwenu e Mawu Mavɔmavɔ ná sí te bó ná dó xɛsi gbɛ ɔ́ é ɔ́, è nǎ byɔ́ só vla lɛ́ɛ mɛ, è nǎ byɔ́ sónu lɛ́ɛ mɛ, bó ná hɔn nú xɛsi e dó mɛ wɛ Mawu Mavɔmavɔ ɖe é, bó ná hɔn nú susu tɔn e nɔ kɔ́n lánlánlán é.

²² Mi ma ɖó gbɛ nú gbɛtɔ́ ó, gbɛ tɔn ɔ́, funfún kpowun wɛ. Gbɛtɔ́ nyí nǔɖé ǎ.