Ezayíi 19 - MAWUXÓWÉMA

¹ Xó e Mawu ɖɔ dó Ejípu jí é ɖíe: Mawu Mavɔmavɔ ɖíe zɔn akpɔ́kpɔ́ ɖé jí ja Ejípu e! Akpɔ́kpɔ́ e jí é ɖe é ɖo wezun jí. Vodún Ejípu tɔn lɛ́ɛ ɖo sísɔ́sísɔ́ wɛ ɖo nukɔn tɔn, bɔ awakanmɛ kú Ejípunu lɛ́ɛ bǐ.

² Mawu ɖɔ: “Un ná dɔn Ejípunu ɖě dó ɖě jí, bɔ yě ná wlí yěɖée ɖu; yě mɛ we ná kpé ta bó ná xo hun, toxo ɖě ná sí te dó ɖě jǐ, axɔ́súɖuto ɖě ná sí te dó ɖě jǐ.

³ Ejípunu lɛ́ɛ sín hǔn ná gbadó, bɔ un ná hɛn tito yětɔn bǐ dó agudu. Un bló mɔ̌ lo ɔ́, yě ná yi mɔ vodún yětɔn lɛ́ɛ, bokantɔ́ lɛ́ɛ kpódó bokɔ́nɔ lɛ́ɛ kpó, bó ná kan nǔ ɖo yě gɔ́n.

⁴ Un ná jó Ejípu nú gǎn e syɛ́n ganjí é ɖokpó, un ná jó e nú axɔ́sú hunnylámɔnɔ ɖokpó, bɔ é na kpa acɛ dó nu tɔn.” Xó e Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ é nɛ́.

⁵ Nilu tɔ ɔ́ ná mɛ; é ná xú bǐ sésé.

⁶ Fí e Nilu tɔ sín ala gbɔn lɛ́ɛ bǐ ná nɔ́ lun wǎn; Ejípu tɔ ɔ́ sín ala lɛ́ɛ sín hlɔ̌nhlɔ́n ná ɖe kpo bɔ yě ná mɛ. Fɛ́n lɛ́ɛ kpó fántín lɛ́ɛ kpó ná mlú;

⁷ è sɔ́ ná mɔ gběhan ɖě gbɔn Nilu tɔ ɔ́ tó ǎ; nǔ e è dǒ gbɔn Nilu tɔ ɔ́ kpá lɛ́ɛ bǐ ná fyɔ́, jɔhɔn ná nyi bó ná za bǐ, bɔ nǔ ɖěbǔ sɔ́ ná kpo ǎ.

⁸ Đɔnyitɔ́ lɛ́ɛ ɖo azɔn wɛn wɛ, mɛ e nɔ nyi mlɛ ɖo Nilu tɔ ɔ́ mɛ lɛ́ɛ bǐ ná nɔ aluwɛ mɛ, yě mɛ e nɔ nyi ɖɔ ɖo tɔ ɔ́ jí lɛ́ɛ bǐ ná blá wǔ.

⁹ É ná vɛ́ nú yě mɛ e nɔ wa lɛ̌ɛnkan sín azɔ̌ lɛ́ɛ káká: nyɔ̌nu e nɔ́ tɛ́n lɛ̌ɛnkan lɛ́ɛ, kpó súnnu e nɔ́ lɔn lɛ̌ɛnvɔ lɛ́ɛ kpó bǐ ná wlí azɔn dó te, yě ná byɔ́ linkpɔ́n mɛ.

¹⁰ Nǔ jɛ́n gbo avɔlɔntɔ́ lɛ́ɛ. Awakanmɛ ná kú yě mɛ e nɔ wa azɔ̌ énɛ́ lɛ́ɛ có bó nɔ́ mɔ nǔ ɖu lɛ́ɛ é bǐ.

¹¹ Gǎn Sowáan tɔn lɛ́ɛ bí ɖěbǔ ǎ; toxóɖɔtɔ́ Ejípu xɔ́sú ɔ́ tɔn lɛ́ɛ sín gbɛ̌ta jɔ xlo ɖésú. Nɛ̌ ká gbɔn bɔ mi ná yi mɔ Ejípu xɔ́sú ɔ́, bó ná ɖɔ n'i ɖɔ: “Nyɛ ɔ́, toxóɖɔtɔ́ ví wɛ nú mì, axɔ́sú ɖ'ayǐ tɔn lɛ́ɛ sín vǐ wɛ un nyí.” Nɛ̌ mi ná ɖɔ mɔ̌ gbɔn?

¹² Ejípu xɔ́sú, fítɛ́ toxóɖɔtɔ́ towe lɛ́ɛ ɖe? Yě ní ɖɔ nǔ e ná sɔ́ Ejípu to ɔ́ dó wa wɛ Mawu Mavɔmavɔ Nǔbǐwúkpétɔ́ ɔ́ ɖe ɔ́ nú we, yě ní ɖɔ nú we bónú a tunwun!

¹³ Gǎn Sowáan tɔn lɛ́ɛ húzú xlonɔ, Mɛfísi sín gǎn lɛ́ɛ sín ayi sɔ́ ɖo nǔ mɔ wɛ ganjí ǎ. Yě wɛ nyí tokpɔnlagán e ɖo Ejípu dɔn bú wɛ é.

¹⁴ Mawu Mavɔmavɔ hɛn taglo mɛ yětɔn wlú, bɔ yě bló nǔ ɖěbǔ ɔ́, yě nɔ́ dɔn toví lɛ́ɛ bú ali. Énɛ́ ɔ́, Ejípu to ɔ́ ná cí mɛ e nu ahan mú, bó slú lobo ɖo nǔ ɖíɖí ɖ'é mɛ wɛ é ɖɔhun.

¹⁵ Mɛ ɖěbǔ ɖo toví lɛ́ɛ mɛ, bó ná zé nǔɖé bó wa bɔ é ná yi ta ǎ; gbɛtɔ́ nukúnɖéjí kpó gbɛtɔ́ kpaa kpó, dɔkunnɔ kpó wamamɔnɔ kpó ɖě sɔ́ nɔ́ wa nǔɖé bɔ é nɔ́ yi ta ǎ.

Nǔ e ɖo te kpɔ́n Ejípu to ɔ́ é

¹⁶ Ayǐ ɖokpó ná wá hɔ́n, bɔ Ejípunu lɛ́ɛ ná cí nyɔ̌nu ɖɔhun; yě ná sísɔ́ hwenu e Mawu Mavɔmavɔ ná zé alɔ, bó ná ja nǔ wa xá yě gbé é.

¹⁷ Judáa yíkúngban ná ɖó adohu nú yě. È ɖɔ xó tɔn ɖo yě gɔ́n gbeɖé ɔ́, xɛsi ná jɛ yě jǐ, ɖó nǔ e Mawu Mavɔmavɔ Nǔbǐwúkpétɔ́ ɔ́ ɖɔ émí ná wa xá yě ɔ́ wú.

¹⁸ Ayǐ ɖokpó ná wá hɔ́n, bɔ è nǎ mɔ toxo e mɛ è nɔ dó Ebléegbe ɖe ɔ́ atɔ́ɔ́n ɖo Ejípu, bɔ toxo énɛ́ lɛ́ɛ bǐ ná zin alɔ dó akɔ́n ɖɔ émí nyí Mawu Mavɔmavɔ Nǔbǐwúkpétɔ́ ɔ́ tɔn. È nǎ ylɔ́ toxo énɛ́ lɛ́ɛ ɖokpó ɖɔ Hwesivɔ́-Toxo.

¹⁹ Ayǐ ɖokpó ná wá hɔ́n, bɔ è nǎ mɛ vɔ̌sákpe ɖokpó nú Mawu Mavɔmavɔ ɖó Ejípu to ɔ́ tɛ́ntin, bó ná dó awǐnnya ɖokpó do ɖó to ɔ́ sín dogbó jí, bó ná dó zé Mawu Mavɔmavɔ su.

²⁰ Énɛ́ ná xlɛ́ ɖɔ Mawu Mavɔmavɔ Nǔbǐwúkpétɔ́ ɔ́ ɖo Ejípu to ɔ́ mɛ. Hwenu e Ejípunu lɛ́ɛ ná sú xó ylɔ́ Mawu Mavɔmavɔ ɖɔ é ní wá hwlɛ́n émí ɖo mɛ e ɖo émí táfú wɛ lɛ́ɛ sí ɔ́, Mawu Mavɔmavɔ ná sɛ́ mɛhwlɛ́ngántɔ́ dó yě, bɔ é ná wá jɛ ahwan yě jí bó hwlɛ́n yě.

²¹ Hwenɛ́nu lo ɔ́, Mawu Mavɔmavɔ ná ɖe éɖée xlɛ́ Ejípunu lɛ́ɛ, bɔ yě ná tunwun i, bó ná nɔ́ sɛn ɛ kpó vɔ̌ yětɔn lɛ́ɛ kpó nǔníná yětɔn lɛ́ɛ kpó. Yě ná nɔ́ dó akpá n'i, bó ná nɔ́ ɖe.

²² Mawu Mavɔmavɔ gblé wǔ Ejípunu lɛ́ɛ ɔ́, é ná lɛ́ gbɔ azɔn nú yě; yě ɖésú ná lɛ́ kɔ wá Mawu Mavɔmavɔ gɔ́n, bɔ é ná yí gbe nú nǔ e byɔ́ ɛ wɛ yě ɖe lɛ́ɛ, bó ná gbɔ azɔn nú yě.

²³ Ayǐ ɖokpó ná wá hɔ́n, bɔ è nǎ bló agbǎsa ɖokpó sín Ejípu yi Asilíi, bɔ Asilíinu lɛ́ɛ ná nɔ́ wá Ejípu, bɔ Ejípunu lɛ́ɛ ná nɔ́ yi Asilíi. Yě bǐ ná nɔ́ nɔ kpɔ́, bó ná nɔ́ sɛn Mawu Mavɔmavɔ.

²⁴ Ayǐ ɖokpó ná wá hɔ́n, bɔ Izlayɛ́li ná xo kpó ɖó nú Ejípu kpó Asilíi kpó. É ná nyí kpɔ́ndéwú gbɛɖe ɖɛ ɖagbe e Mawu ná xo dó gbɛ ɔ́ jí é tɔn.

²⁵ Mawu Mavɔmavɔ ná dó acɛ gbɛ ɔ́ jí, bó ná ɖɔ: “Un dó acɛ togun ce Ejípu jí; un dó acɛ Asilíi e un zé alɔ ce dó bló ná é jí, un dó acɛ Izlayɛ́li e nyí nǔ ce ɔ́ jí.”