Ezayíi 18 - MAWUXÓWÉMA

¹ Heelú to e mɛ nǔvínúví awanɔ gɔ́ é! To ɔ́ gbɔn Etiopíi tɔ lɛ́ɛ tó káká yi.

² É nɔ́ sɛ́ tofɔzéɖótetɔ́ lɛ́ɛ dó, bɔ yě nɔ́ dó akló e è zě fɛ́n dó bló é, lobo nɔ gbɔn Nilu tɔ ɔ́ jí yi to mɛ. Wɛnsagun e mi, mi mɛ e xwe fí ɖé ɔ́ mi nɔ yá wǔ yi lɛ́ɛ e mi, mi lɛ́ kɔ yi mɛ mitɔn lɛ́ɛ gɔ́n, mɛ mitɔn sakasaka, wǔtu ɖíɖíɖíɖí énɛ́ lɛ́ɛ gɔ́n. Togun énɛ́ ɔ́ nɔ́ dó adohu nú mɛ e ɖo gbɛ ɔ́ mɛ lɛ́ɛ bǐ. Mi yi togun mitɔn syɛ́nsyɛ́n énɛ́ e nɔ́ ɖo kɛntɔ́ tɔn lɛ́ɛ nyínyɛ́ wɛ é gɔ́n. Mi lɛ́ kɔ yi to mitɔn e tɔ ɖo mǐmá wɛ é mɛ.

³ Midɛɛ lɛ́ɛ ɔ́, mi mɛ e ɖo gbɛ ɔ́ mɛ lɛ́ɛ ɔ́, mi mɛ e ɖo ayǐkúngban ɔ́ jí lɛ́ɛ ɔ́, mi kpɔ́n asyá e è nǎ zé tun te ɖó só lɛ́ɛ ta é, lobo ɖo tó ɖó hwenu e lanzo ɔ́ ná ɖɔ nǔ dó é wɛ.

⁴ Đó Mawu Mavɔmavɔ ɖɔ nú mì ɖɔ: “Un ɖo xwé ce gbe aga dɔ̌n, bó ɖo cúɖúɖú hwe ɖo hwǎn ɖɔhun; bó ɖo nǔ e ɖo jijɛ wɛ é bǐ mɔ wɛ; Un ɖo cúɖúɖú amǔ e sú nǔkún-yahwenu é ɖɔhun bó ɖo nǔ e ɖo jijɛ wɛ ɔ́ kpɔ́n sɛ́ dó wɛ.”

⁵ Hwenu e nǔkún nɔ́ jɛ nyǐnyɔ́ jí ɔ́, hwenu e vǐwun ko gba sɛ́ fó, bɔ sɛ́ lɛ́ɛ kó ná sínsɛ́n bó jɛ zinzin jí ɔ́, è nǎ zé jǐví dó ɖe ala e ma ɖó sínsɛ́n ǎ lɛ́ɛ síin, bó ná ɖe ama e ɖo zǐnzɔ́n wɛ lɛ́ɛ síin.

⁶ Mɔ̌ wɛ è nǎ jó kɛntɔ́ lɛ́ɛ sín cyɔ dó, bɔ aklasú e ɖo zunkan mɛ lɛ́ɛ kpó gběkanlin lɛ́ɛ kpó ná ɖu; è nǎ jó yě dó bɔ aklasú e è nɔ mɔ nǔkún-yiya hwenu lɛ́ɛ, kpó gběkanlin e è nɔ mɔ avivɔ hwenu lɛ́ɛ kpó ná ɖu.

⁷ É jɛ hwenɛ́nu lo ɔ́, è nǎ hɛn nǔ, bó wá ná Mawu Mavɔmavɔ Nǔbǐwúkpétɔ́ ɔ́ dó togun énɛ́ tamɛ: togun e mɛ gbɛtɔ́ sakasaka wǔtu ɖíɖíɖíɖí lɛ́ɛ ɖe ɔ́, togun énɛ́ e nɔ́ dó adohu nú gbɛtɔ́ e ɖo gbɛ ɔ́ mɛ lɛ́ɛ bǐ é, togun syɛ́nsyɛ́n énɛ́ e nɔ ɖo kɛntɔ́ tɔn lɛ́ɛ nyínyɛ́ wɛ é, togun énɛ́ e tɔ ɖo to yětɔn má wɛ é. È nǎ hɛn nǔ énɛ́ lɛ́ɛ wá fí e Mawu Mavɔmavɔ Nǔbǐwúkpétɔ́ ɔ́ nɔ́ nɔ ɖo Sinyɔ́ɔ só ta é.