Ezayíi 17 - MAWUXÓWÉMA

¹ Xó e Mawu ɖɔ dó Damási jí é ɖíe: Zaanɖé din ɔ́, è sɔ́ ná xa Damási dó toxo lɛ́ɛ mɛ ǎ. É ná húzú awǐnnyaglo kɛ́ɖɛ́.

² Toxo Alowɛ́ɛ tɔn lɛ́ɛ ɔ́, è nǎ ɖe alɔ sín yě wǔ káká sɔ́yi. Toxo énɛ́ lɛ́ɛ ná húzú kanlin lɛ́ɛ tɔn; kanlin lɛ́ɛ ná nɔ́ wá dɔ́ toxo énɛ́ lɛ́ɛ mɛ, bɔ mɛ ɖěbǔ ná dó tagba nú yě ǎ.

³ Nǔ e wú axɔ́súɖuto Eflayímu tɔn gán jɛ lɛ́ɛ ɔ́, è nǎ yí sín así tɔn. È nǎ yí axɔ́súɖuɖu Damási tɔn lɔ. Nǔ e ná kpo nú Silíinu lɛ́ɛ ná hú éé kpo nú Izlayɛ́linu lɛ́ɛ é ǎ. Xó e Mawu Mavɔmavɔ Nǔbǐwúkpétɔ́ ɔ́ ɖɔ é nɛ́.

⁴ Gbe énɛ́ gbe ɔ́, Izlayɛ́li sɔ́ ná ɖó zin ɖěbǔ ǎ; é ná xú gǒ.

⁵ Izlayɛ́li to ɔ́ ná jɛ vɔ̌, lě e è nɔ ya nǔkún bɔ gle nɔ jɛ vɔ̌ é ɖɔhun; to ɔ́ ná jɛ vɔ̌ lě e è nɔ sɔ́ jinukún sín Hlafa ví lɛ́ɛ sín tɔdo mɛ bɔ é nɔ́ jɛ vɔ̌ é ɖɔhun.

⁶ Nǔ ɖokpó ɖokpó ɖé jɛ́n ná kpo ɖo Izlayɛ́li, bɔ è hɛn ɔ́, è nǎ cyán. É ná cí lě e è nɔ sɔ́ akpalá dó gbɛ olívu, bɔ é nɔ́ kpo we abǐ atɔn ɖo atín ɔ́ jí ɖo agǎn mɛ é ɖɔhun, abǐ é nɔ́ kpo olívu ɛnɛ abǐ atɔ́ɔ́n ɖo ala ɖé wú é ɖɔhun. Xó e Mawu Mavɔmavɔ, Mawu Izlayɛ́li tɔn ɖɔ é nɛ́.

⁷ Gbe énɛ́ gbe ɔ́, gbɛtɔ́ ná lílɛ́ bó kpan nukɔn mɛ e ɖó e ɔ́, bɔ nukún tɔn bǐ ná ɖo Mawu mímɛ́ Izlayɛ́li tɔn ɔ́ wú.

⁸ É ná ɖe nukún sín vodúnxɔ e é gbá lɛ́ɛ wú; é sɔ́ ná kpɔ́n vodún e é zé alɔví tɔn wǒ lɛ́ɛ dó bló é ǎ; é ná ɖe nukún sín vodún Acela lɛ́ɛ wú, bó ɖe nukún sín nǔ e mɛ è nɔ dó zǎlínkpɔ́n zo ɖe ɔ́ wú.

⁹ Gbe énɛ́ gbe ɔ́, è nǎ jó toxo e è mɛ ahohó lɛ́ lɛ̌ dó lɛ́ɛ bǐ dó. È nǎ jó toxo lɛ́ɛ dó bɔ yě ná cí toxo gbigba e è nɔ mɔ gbɔn zunkan tɛ́ntin lɛ́ɛ kpó ée è nɔ mɔ gbɔn só jí só jí lɛ́ɛ kpó é ɖɔhun. Mɛ e ɖo toxo énɛ́ lɛ́ɛ mɛ lɛ́ɛ jó toxo yětɔn dó hwenu e yě ɖo hinhɔn wɛ ɖo Izlayɛ́li ví lɛ́ɛ nukɔn é. Énɛ́ ɔ́, toxo e è mɛ ahohó lɛ́ lɛ̌ dó lɛ́ɛ ná cí gbětótló ɖɔhun.

¹⁰ Izlayɛ́li, a wɔn Mawu towe e hwlɛ́n we gán é, a sɔ́ flín Só e nyí ahohó towe é ǎ; énɛ́ wú wɛ a blǒ jikpá nú vodún e nɔ́ dɔn mɛ é, bó dó jinukún ɖó jikpá ɔ́ mɛ bó nɔ́ dó sɔ́ ɛ su.

¹¹ Gbe e gbe a dǒ jinukún ɔ́ jɛ́n é nɔ́ wú, bó nɔ́ jɛ susu jí bɔ a nɔ mɔ; nǔkún e a dǒ zǎnzǎn ɔ́ nɔ́ gba sɛ́ gbe ɖokpó ɔ́. Lo ɔ́, é jɛ hwenu e è nǎ ya nǔ e è dǒ é ɔ́, è nɔ mɔ jinukún ǎ, azɔn wɛ è nɔ mɔ ɖó tɛn tɔn mɛ, azɔn jɛ ma gbɔ.

Togun lɛ́ɛ ɖo adǎn jí

¹² Heelú! Étɛ́ ká ɖíe! Mi se zǐngídi e jí togun wɔ̌buwɔ́bú élɔ́ lɛ́ɛ ɖe é! Yě ɖo adǎn jí bɔ a nǎ ɖɔ xu wɛ ɖo zǐn xo wɛ. Akɔta lɛ́ɛ ɖo zǐngídi jí bɔ a nǎ ɖɔ xu ɖaxó ɖaxó lɛ́ɛ wɛ ɖo xixo wɛ kpó hlɔ̌nhlɔ́n kpó.

¹³ Yě ɖo zǐngídi jí bɔ a nǎ ɖɔ tɔsisa ɖaxó ɖaxó lɛ́ɛ wɛ ɖo adǎn jí. Lo ɔ́, hwenu e Mawu ná sí te dó yě jí ɔ́, yě ná hɔn yi zɔ nǔywɛ́ e mɛ jɔhɔn d'alɔ sín só jí bó sɔ́yi é ɖɔhun, yě ná yi zɔ afúntúntún e mɛ axásáxásá jɔhɔn d'alɔ é ɖɔhun.

¹⁴ Gbadanu ɔ́, yě ná ɖo adohu ɖó nú mɛ wɛ mɔ̌hunkɔtɔn. Cóbónú ayǐ ká ná hɔ́n ɔ́, yě ɖěbǔ sɔ́ ná kpo ǎ. Nǔ e ɖo te kpɔ́n mɛ e nɔ fɔ nǔ mǐtɔn lɛ́ɛ é nɛ́, mɛ e nɔ wá vɔ mǐ lɛ́ɛ ɔ́, nǔ e ná jɛ dó yě jí ɔ́ nɛ́.