Ezayíi 16 - MAWUXÓWÉMA

¹ Mɔwabu sín gǎn lɛ́ɛ ɖɔ: “Mi sɛ́ lɛ̌ngbɔ́ví dó Judáa xɔ́sú ɔ́ ɖo Sinyɔ́ɔ só ɔ́ jí; mi sɛ́ lɛ̌ngbɔ́ví dó e sín awǐnnya gidigbája gbětótló mɛ tɔn ɔ́ kɔn.”

² Mɔwabu nyɔ̌nu lɛ́ɛ ɖo flúflú wɛ xɛ e è nya sín adɔ̌ mɛ é ɖɔhun; yě ɖo flúflú wɛ ɖo fí e è nɔ zɔn afɔ gbɔn Aanɔ́ni tɔ ɔ́ mɛ ɖe é.

³ Mɔwabunu lɛ́ɛ ɖɔ nú Jeluzalɛ́mu ɖɔ: “Đɔ nǔ e mǐ ná wa é nú mǐ. Đe gbeta ɖokpó tɔ́n. Cyɔ́n alɔ mǐ jí hwemɛ cíɖíɖí lě e zǎn kú ɔ́ ablu nɔ cyɔ́n nǔ bǐ é ɖɔhun; kɛnklɛ́n zé mɛ mǐtɔn e ɖo hinhɔn wɛ lɛ́ɛ hwlá. Ma ɖe yě gba ó.

⁴ Kɛnklɛ́n ba tɛn nú mɛ mǐtɔn e ɖo hinhɔn wɛ lɛ́ɛ, nú yě ní nɔ gɔ̌n towe. Nǎ fí e yě ná bɛ yɛ ɖe ɔ́ yě, bónú nǔhɛngblétɔ́ ɔ́ má kpé yě wú ó. Hwenu e mɛ táfú táfú bǐ ná fó ɔ́, hwenu e adǎnúwiwa bǐ nǎ nɔ te ɔ́, hwenu e mɛ e ɖo afɔ tɛ mǐ jí wɛ ɔ́ ná tɔ́n sín to mǐtɔn mɛ ɔ́,

⁵ hwenɛ́nu wɛ axɔ́sú towe sín acɛkpikpa ná jínjɔ́n ayǐ ganjí; acɛkpikpa tɔn ná jínjɔ́n xomɛnyínyɔ́ tɔn jí; axɔ́sú ɔ́ ná nyí Davídi ví, bó ná nɔ gbejí. É ná nyí hwɛɖɔtɔ́, é ná nɔ́ nyi sɛ́n, bɔ nǔjlɔ́jlɔ́wiwa ná nɔ́ myá nukún n'i.”

Jeluzalɛ́mu sixú dó alɔ Mɔwabu ǎ

⁶ Mǐ se lě do Mɔwabu nɔ yí go sɔ é, lě do é nɔ́ tɛ afɔ ayǐ sɔ é, lě do é nɔ́ ɖɔ mɛjɔmɛ sɔ é, lě do é nɔ́ dó nukúnkɛn sɔ é, lě do é nɔ́ flé nu sɔ é.

⁷ Amɔ̌, égbé din ɔ́, Mɔwabunu lɛ́ɛ ɖésú sín nǔ blá wǔ nú yěɖée, bɔ yě ɖo alě ná wɛ, mɛ bǐ ɖo gbɛvíhan ji wɛ dó vǐwun xúxú mlímlí e è nɔ mɔ ɖo Kíi-Alɛsɛ́ti é tamɛ. É vɛ́ nú yě káká, bɔ yě nɔ́ ɖo alě ná wɛ.

⁸ Jikpá e gbɔn só jí só jí ɖo Hɛcibɔ́ni lɛ́ɛ bǐ wɛ fyɔ́. Vǐwungbo e ɖo Sivuma lɛ́ɛ lɔ fyɔ́; vǐwunhan Sivuma tɔn wɛ gǎn gǎn lɛ́ɛ nɔ́ nu mú ɖ'ayǐ, gǎn e gbɔn akɔta akɔta lɛ́ɛ mɛ lɛ́ɛ. Vǐwungbo énɛ́ lɛ́ɛ wɛ zɔn mɔ̌ káká yi Yazɛ́ɛ, bó lɛ́ zɔn mɔ̌ káká yi bú ɖo gbětótló mɛ; vǐwuntín lɛ́ɛ dlɛ́n ala káká yi Xu Kúkú ɔ́ gúdo.

⁹ Nǔ énɛ́ wú wɛ un ɖo avǐ ya xá Yazɛ́ɛnu lɛ́ɛ wɛ ɖó vǐwungbo Sivuma tɔn e fyɔ́ é tamɛ. Hɛcibɔ́ni, Eleale, un ya avǐ, bɔ ɖasin sa tɔ ɖó ta mitɔn mɛ, ɖó ahwan dó tagba nú vǐwun gbigbɛ kpó nǔkúnsísɔ́ mitɔn kpó.

¹⁰ Mɛ ɖé sɔ́ ɖo awǎ jɛ wɛ ɖo atínsínsɛ́ngbo mitɔn lɛ́ɛ mɛ ǎ, xomɛ sɔ́ hun mɛɖé ǎ. Han e ji wɛ è nɔ ɖe, bó nɔ́ ɖo kpɛ́ xo wɛ ɖo vǐwungbo lɛ́ɛ mɛ é bǐ fó; vǐwungbɛtɔ́ lɛ́ɛ sɔ́ nɔ́ li vǐwun ɖě ɖo vǐwundo lɛ́ɛ mɛ ǎ. Xó e sú wɛ yě nɔ́ ɖe kpó awǎjijɛ kpó ɔ́, bǐ nɔ te.

¹¹ Énɛ́ ɔ́ wú wɛ un blá wǔ sín ta káká yi afɔ ɖó Mɔwabu wú; un ɖo alě ná wɛ ɖó Kíi-Ɛlɛ́si wú.

¹² È nǎ mɔ Mɔwabu ɖo gǎn dó wɛ, bó xwe só jí ɖo vodún tɔn xwé, bó ná sa vo nú vodún tɔn; é ká ná mɔ nǔɖé nu ǎ.

¹³ Xó e Mawu Mavɔmavɔ ko ɖɔ dó Mɔwabu wú ɖ'ayǐ ɔ́ nɛ́.

¹⁴ Amɔ̌, din ɔ́, Mawu Mavɔmavɔ ɖɔ: “Káká nú è nǎ xa xwe atɔn ɔ́, azǎn ɖě má hwe, ɖě má jɛ jí ɔ́, gbɛtɔ́ nukúnɖéjí Mɔwabu tɔn lɛ́ɛ, kpó toví tɔn wɔ̌buwɔ́bú lɛ́ɛ kpó sɔ́ ná nyí nǔɖé wa nú ǎ. Mɛ e ná kpo n'i ɔ́ sɔ́ ná su vo ǎ; mɛ kpɛví ɖé jɛ́n ná nyí.”