Ezayíi 14 - MAWUXÓWÉMA

¹ Mawu Mavɔmavɔ ná ɖe xlɛ́ ɖɔ émí yí wǎn nú Jakɔ́bu ví lɛ́ɛ. É ná lɛ́ vɔ́ ɖe xlɛ́ ɖɔ Izlayɛ́li to ɔ́ wɛ nyí to e émí sɔ́ é. É ná lɛ́ zé mɛ tɔn lɛ́ɛ ɖó tɛn yětɔn mɛ, ɖo ayǐkúngban yě ɖésú tɔn jí. Jǒnɔ e wá cí Izlayɛ́li lɛ́ɛ ná wá gɔ́ nú yě, bɔ yě bǐ ná jɛ kpɔ́ xá Jakɔ́bu ví lɛ́ɛ.

² Togun ɖěvo lɛ́ɛ ná dó alɔ yě, bó ná kplá yě wá Izlayɛ́li, to yětɔn mɛ. Yě ná nyí kannumɔ yětɔn súnnu, nyɔ̌nu, ɖo Mawu Mavɔmavɔ sín ayǐkúngban jí fínɛ́. Énɛ́ ɔ́, mɛ e Izlayɛ́li ko nyí gantɔ́ ná ɖ'ayǐ lɛ́ɛ ná húzú gantɔ́ tɔn. É ná nyí gǎn nú mɛ e ko kpa acɛ n'i ɖ'ayǐ lɛ́ɛ.

Babilɔ́nu xɔ́sú ɔ́ sín xó fó

³ Izlayɛ́li, a ɖo mɛ kannu, bó ɖo wǔvɛ́ mɔ wɛ, bɔ adǎn alɔkpa alɔkpa bǐ ɖo gbigbo we wɛ. Hwenu e nǔ énɛ́ bǐ ná fó, bɔ Mawu Mavɔmavɔ ná ɖe ayi towe ɖ'ayǐ, bɔ a nǎ vo ɔ́,

⁴ a nǎ ji han élɔ́ dó Babilɔ́nu xɔ́sú ɔ́: Nɛ̌ nǔ ká sixú cí mɔ̌ gbɔn? Gǎnhúmɛtɔ́, mɛtáfútɔ́ ɔ́ sín xó wɛ kó fó mɔ̌ a?

⁵ Mawu Mavɔmavɔ wɛ́n adǎkaxotɔ́ lɛ́ɛ sín kpo, é wɛ́n acɛgannaganna-kpanúmɛtɔ́ lɛ́ɛ sín makpo;

⁶ kpo e dó xo togun lɛ́ɛ wɛ yě nɔ́ ɖe kpó hlɔ̌nhlɔ́n kpó ma ɖ'alɔ te ɔ́, Mawu Mavɔmavɔ hɛn wɛ́n; kpo e dó kpa acɛ gannaganna nú akɔta lɛ́ɛ wɛ yě nɔ́ ɖe ɔ́, Mawu Mavɔmavɔ hɛn wɛ́n; kpo e dó dó ya nú akɔta lɛ́ɛ wɛ yě nɔ́ ɖe lě e é jló yě gbɔn ɔ́, é hɛn wɛ́n.

⁷ Mɛ e ɖo gbɛ ɔ́ mɛ lɛ́ɛ bǐ vo lo, bɔ ayi yětɔn jɛ ayǐ. Yě nɔ́ sú xó bó nɔ́ ji han ɔ́ kpó awǎjijɛ kpó.

⁸ Atín lɛ́ɛ lɔ ɖo awǎ jɛ wɛ, ɖó Babilɔ́nu xɔ́sú ɔ́, xó tɔn fó. Siplɛ́tín lɛ́ɛ kpó sɛ́dlutín Libáan tɔn lɛ́ɛ kpó nɔ́ ɖɔ: “Sín gbe e gbe a jɛ ayǐ ɔ́, mɛ ɖé sɔ́ nɔ́ wá gbo mǐ zindɛ́ ǎ.”

⁹ Babilɔ́nu xɔ́sú, ée a jǎwe bɔ kútomɛ se ɔ́, é xo zǐn, gbɛtɔ́ klogǎnklogǎn e kó kú lɛ́ɛ ɔ́, é fɔ́n yě bǐ sí te ɖó hwɛ wú, bónú yě ná yí jǒnɔ towe. É fɔ axɔ́sú akɔta akɔta lɛ́ɛ tɔn lɛ́ɛ sí te sín zinkpo yětɔn lɛ́ɛ jí.

¹⁰ Yě bǐ nɔ́ yí xó bó nɔ́ ɖɔ: “Hwi lɔ nɛ́ ba hlɔ̌nhlɔ́n kpo bó cí mǐ ɖɔhun nɛ́. Din ɔ́, mǐ kpó hwi kpó wɛ nyí nǔ ɖokpó ɔ́.”

¹¹ È kpíkpé susu towe kpó kanhún towe lɛ́ɛ sín gbe kpó dó kútomɛ. Wě wɛ nyí zan bɔ a nɔ mlɔ̌ jí, bó nyí avɔ bɔ a nɔ cyɔ́n.

¹² Nɛ̌ nǔ ká sixú cí mɔ̌ gbɔn? Hwi mɛ e nyí sunví zǎnzǎn tɔn é! Sunví zǎnzǎn tɔn e nɔ́ kɛn é; hwi ɖíe sún sín jǐxwé bó wá jɛ kɔ́ mɛ e! Hwi wɛ ka ɖu ɖo akɔta lɛ́ɛ bǐ jǐ nɛ́!

¹³ A nɔ ɖɔ dó ayi mɛ ɖɔ: “Un ná hun káká yi jǐnukúnsin; un ná sɔ́ axɔ́súzinkpo ce dó jǐ, bɔ é ná nɔ aga nú sunví Mawu tɔn lɛ́ɛ. Un ná kpa acɛ dó só e ta vodún lɛ́ɛ nɔ́ yi kplé ɖe é ɖo totaligbé aga dɔ̌n.

¹⁴ Un ná yi akpɔ́kpɔ́ lɛ́ɛ ta, un ná nɔ Mawu Ajalɔ̌nlɔn ɔ́ há.”

¹⁵ Lo ɔ́, do gɔngɔn mɛ wɛ a wǎ tɔ́n ɖe ɖo kútomɛ.

¹⁶ Mɛ e mɔ we jǎwe lɛ́ɛ ɖo kpínkpɔ́n we wɛ ganjí, yě bɔ nukún nyi wǔ we bó nɔ́ ɖɔ: “Nya e nɔ dán ayǐkúngban ɔ́ bǐ, bó nɔ́ dán axɔ́súɖuto lɛ́ɛ é jɛ́n ɖíe a?

¹⁷ Nya e nɔ́ zé gbɛ ɔ́ dó húzú gbětótló, bó nɔ́ gba toxo lɛ́ɛ, bó nɔ́ gbɛ́ gantɔ́ e é wlí lɛ́ɛ ɖe nyi te ɔ́, nya ɔ́ jɛ́n ɖíe a?”

¹⁸ Axɔ́sú akɔta akɔta lɛ́ɛ tɔn lɛ́ɛ bǐ wɛ ɖo fí e è sá xwé nú yě ɖó é; yě bǐ wɛ ɖo ayǐmlɔ́mlɔ́ kpó yɛ̌yi kpó ɖo xwé yětɔn yětɔn gbe.

¹⁹ Amɔ̌, hwɛ ɔ́, è sɔ́ we nyi dó gbě, è sɔ́ we nyi dó zɔ nú yɔdo e è kun nú we é; è sɔ́ we nyi dó gbě atínla e ma nyɔ́ kpɔ́n ǎ é ɖɔhun. A cí cyɔ e è gbǐdí ɖó afɔ wú é ɖɔhun, è bɛ̌ hwi kpó mɛ e kú ɖo ahwangbénu lɛ́ɛ kpó dó yɔdo ɖokpó ɔ́ mɛ; yě gɔ́ yɔdo ɔ́ sín azan tɔn jí, bó bú we avɔ ɖɔhun.

²⁰ Hwɛ ɔ́, è nǎ ɖi we lě e è ɖi axɔ́sú ɖě lɛ́ɛ gbɔn é ǎ, ɖó a gba to towe, a hu togun towe. Mɛ ɖé sɔ́ ná ɖo yiyi wɛ, bó ylɔ́ kún baɖabaɖa e mɛ a tɔ́n sín ɔ́ sín nyǐkɔ gbeɖé kpɔ́n ǎ.

²¹ È nǐ sɔ́ nǔ bó hu vǐ lɛ́ɛ, ɖó nǔ baɖabaɖa e tɔ́ yětɔn lɛ́ɛ dó sin ɔ́ wú. È nǐ hu yě, é má nyí mɔ̌ ǎ ɔ́, yě ná wá fɔ́n gǔ, bó ná yí gbɛ ɔ́, bó ná ɖó toxo ayǐ gbɔn ayǐkúngban ɔ́ bǐ jí.

²² Mawu Mavɔmavɔ Nǔbǐwúkpétɔ́ ɔ́ ɖɔ: “Un ná húzú kpan nukɔn Babilɔ́nunu lɛ́ɛ, bó ná gbídí Babilɔ́nu sín nyǐkɔ, bó gbídí toví tɔn lɛ́ɛ, bó gbídí vǐ e yě ná ji lɛ́ɛ sín nyǐkɔ.

²³ Un ná zé to ɔ́ dó húzú tɔgba fí e aɖɔwé lɛ́ɛ ná nɔ́ nɔ é. Un ná zé akíza e nɔ́ hɛn nǔ gblé ɔ́ dó za yě.”

Mawu ná flí acɛkpikpa Asilíinu lɛ́ɛ tɔn xwe

²⁴ Mawu Mavɔmavɔ Nǔbǐwúkpétɔ́ ɔ́ zin alɔ dó akɔ́n bó ɖɔ: “Un zin alɔ dó akɔ́n, bó ɖɔ nǔ e un lin ɔ́, nǔ ɔ́ wɛ ná jɛ. Nǔ e un jló ɖɔ é ná jɛ é wɛ ná jɛ.

²⁵ Un ná gba acɛkpikpa Asilíi tɔn hánnyá ɖo to ce mɛ. Un ná flí i xwe ɖo só ce lɛ́ɛ ta. É nɔ́ hú gǎn mɛ ce lɛ́ɛ; din ɔ́, un ná bú i. É dó agban kpinkpɛn ɖó ta nú yě, din ɔ́, un ná zlɔ́n agban énɛ́ yě.”

²⁶ Nǔ e Mawu ɖɔ émí ná wa gbɔn ayǐkúngban ɔ́ bǐ jí é nɛ́; alɔ e é sɔ́ dó jǐ bó ná wa nǔ xá akɔta lɛ́ɛ bǐ é nɛ́.

²⁷ Nǔ e Mawu Mavɔmavɔ Nǔbǐwúkpétɔ́ ɔ́ ɖɔ é ná jɛ ɔ́, mɛ̌ ká ná gbɛ́? É dlɛ́n alɔ dó mɛ ɖé ɔ́, mɛ̌ ká ná wún alɔ tɔn?

Mawu gblɔ́n adǎn nú Filisitɛ́ɛn lɛ́ɛ

²⁸ Xwe e xwe axɔ́sú Akázi zán kú ɔ́, wɛ è sɛ́ wɛn élɔ́ dó:

²⁹ Filisitɛ́ɛn lɛ́ɛ e mi, è wɛ̌n kpo e è nɔ dó xo mi ná lɛ́ɛ é có, xomɛ ní má hun mi ɖó mɔ̌ wú ó, ɖó dan ɖěvo ná tɔ́n sín dan kúkú ɔ́ sín xomɛ, bó ná lɛ́ ɖó aɖǐvɛ́ hú ɖě ɔ́, bɔ dan ɖaxó e nɔ zɔn é ná tɔ́n sín azin e é ɖó ɔ́ mɛ.

³⁰ Énɛ́ ɔ́, mɛ e nyí wamamɔnɔ gǔdo tɔn ɔ́ ná mɔ nǔ ɖu kanlin e ɖo amagbo mɛ é ɖɔhun. Mɛ e ma ɖó mɛɖé ǎ lɛ́ɛ sín ayi ná jɛ ayǐ bɔ yě ná vo. Amɔ̌, mi Filisitɛ́ɛn lɛ́ɛ ɔ́, un ná sɔ́ adɔ dó vɔ donu mitɔn bǐ, mɛ mitɔn e ná kpo ɖo gbɛ lɛ́ɛ ɔ́, un ná hu yě bǐ.

³¹ Toxo e è mɛ ahohó lɛ́ lɛ̌ dó lɛ́ɛ e mi, mi dó nǔwamɛhan, bó sú xó bó ji. Filisitíi to ɔ́ bǐ sín ayi gba dó: Akpɔ́kpɔ́ ɖé sí te sín totaligbé, bó jǎwe azizɔ ɖɔhun. Mɛ ɖěbǔ ɖo kɛntɔ́ ɔ́ sín ahwan mɛ bó gɔn kplé wá ǎ.

³² Xó tɛ́ mǐ ká ná ɖɔ nú mɛsɛ́dó Filisitíi tɔn lɛ́ɛ? Mǐ nǎ ɖɔ sɛ́ dó yě ɖɔ: “Mawu Mavɔmavɔ ɖésú wɛ ɖó Sinyɔ́ɔ toxo ɔ́ ayǐ, fínɛ́ wɛ wamamɔnɔ e ɖo togun tɔn mɛ lɛ́ɛ ná mɔ gǎnjɛwú syɛ́nsyɛ́n ɔ́ ɖe.”