Ezayíi 13 - MAWUXÓWÉMA

¹ Wɛn e Ezayíi, Amɔ̌si ví ɔ́ yí ɖo Mawu sí dó Babilɔ́nu jí ɔ́ ɖíe:

² Mawu ɖɔ: “Mi tun ahwansyá ɖokpó te ɖó só e jí nǔ ɖěbǔ má ɖe ǎ é. Mi sú xó bó ɖɔ sɛ́ dó ahwanfuntɔ́ lɛ́ɛ. Mi bló alɔ nú yě bónú yě ní gbɔn gǎn lɛ́ɛ sín hɔntogbó wá.

³ Nyi ɖésú wɛ ɖe gbe nú mɛ e un sɔ́ ɖó vo nú nyiɖée lɛ́ɛ; un ylɔ́ ahwanfuntɔ́ syɛ́nsyɛ́n ce lɛ́ɛ lɔ, yě mɛ e un xɔ susu ɔ́ yě nɔ́ j'awǎ lɛ́ɛ, un ylɔ́ yě bó ná ɖe xomɛsin ce xlɛ́.”

⁴ Mi ɖótó xósúsú e ɖo só lɛ́ɛ jí é, é cí ahwan wǒkógo ɖé wɛ ɖo xó sú wɛ ɖɔhun. Mi ɖótó zǐn e xo wɛ axɔ́súɖuto lɛ́ɛ ɖe é, zǐngídi e ɖú wɛ akɔta e kplé lɛ́ɛ ɖe é. Mawu Mavɔmavɔ Nǔbǐwúkpétɔ́ ɔ́ wɛ ɖo ahwangɔnu e xwe ahwan fun gbé ɔ́ kpɔ́n wɛ ɖɔ é ɖo gbesisɔ mɛ a jí.

⁵ Káká to línlín mɛ, fí e gbɛ ɔ́ kponu ɖó ɔ́ wɛ sɔ́ja énɛ́ lɛ́ɛ gosín, bó ja to ɔ́ bǐ gba gbé: Mawu Mavɔmavɔ kpó mɛ e é nɔ́ zé dó ɖe xomɛsin tɔn xlɛ́ lɛ́ɛ kpó wɛ.

⁶ Mi dó nǔwamɛhan ɖokpó, ɖó Mawu Mavɔmavɔ sín azǎn ɔ́ kó sɛkpɔ́. Azǎn ɔ́ ná wá lě e awě ɖaxó ɖé nɔ́ gosín Mawu Nǔbǐwúkpétɔ́ ɔ́ gɔ́n, bó nɔ́ xo mɛ é ɖɔhun.

⁷ Énɛ́ ɔ́ wú wɛ awakanmɛ kú mɛ bǐ, mɛɖé sɔ́ sixú xo nǔ ɖo wǔ ǎ.

⁸ Yě ɖíe zun sofin e, lanmɛ yětɔn bǐ vɛ̌, wǔtu yětɔn bǐ ján, yě ɖo wǔvɛ́ mɔ wɛ nyɔ̌nu e ɖo ajidonu é ɖɔhun. Yě bǐ cí jɛjɛɛ, bó jɛ yěɖée kpɔ́n jí. Nukún yětɔn bǐ húzú ɖo ta wú.

⁹ Mawu Mavɔmavɔ sín azǎn ɔ́ ɖíe ja e, azǎn e gbe mɛ ɖé nú má ná blá wǔ nú Mawu ǎ é wɛ. Mawu ná ɖe xomɛsin tɔn xlɛ́; é ná gba to ɔ́ bǐ, bó ná sú hwɛhutɔ́ lɛ́ɛ sín kún dó.

¹⁰ Sunví lɛ́ɛ kpó sunví e sɛ kplé lɛ́ɛ kpó ɖě sɔ́ ná kɛn ǎ. Hwe tɔ́n lě tlóló ɔ́, é ná nɔ́ dó zǐnflú. Sun sɔ́ ná za wě ǎ.

¹¹ Mawu ɖɔ: “Un ná dɔn tó nú gbɛ ɔ́ ɖó dǎkaxixo tɔn wú, un ná dɔn tó nú mɛ nyanya lɛ́ɛ, ɖó nǔ baɖabaɖa e yě dó sin lɛ́ɛ wú. Jimakplɔ́n e nɔ ɖo go yí wɛ lɛ́ɛ ɔ́, un ná sú kún yětɔn dó, acɛgannaganna-kpanúmɛtɔ́ e nɔ ɖo afɔ tɛ ayǐ wɛ lɛ́ɛ ɔ́, un ná zin yě dɛ́.

¹² Hwenu e un ná bló mɔ̌ é ɔ́, gbɛtɔ́ ná hán hú siká akú; yě ná hán hú siká e nɔ gosín Ofíi é.

¹³ Gbe e gbe un ná sin xomɛ bó má ná se vɛ ǎ ɔ́, un ná húnhún jǐnukúnsin ɔ́, bɔ ayǐkúngban ná nɔ tɛn ɖokpó mɛ bó ná nɔ́ lɔ́n yi jǐ.”

¹⁴ Jǒnɔ e ɖo Babilɔ́nu tomɛ lɛ́ɛ bǐ ná ɖo wezun jí tɛ́ e jí è zun dó é ɖɔhun; yě ná gbadó gbɔ̌ e mɛɖé má kplá ǎ lɛ́ɛ é ɖɔhun. Mɛ ɖokpó ɖokpó ná yi togun tɔn mɛ; mɛ ɖokpó ɖokpó ná hɔn yi to tɔn mɛ.

¹⁵ Mɛ e è nǎ mɔ lɛ́ɛ bǐ wɛ è nǎ da gǎ dó; mɛ e è nǎ wlí lɛ́ɛ bǐ wɛ è na hu kpó hwǐ kpó.

¹⁶ È nǎ sɔ́ vǐ yětɔn lɛ́ɛ xo dó só wú ɖo nukún yětɔn mɛ; è nǎ bɛ́ nǔ e ɖo xwé yětɔn gbe lɛ́ɛ, è nǎ ɖó xó xá asi yětɔn lɛ́ɛ.

¹⁷ Éɖíe, un ná fɔ́n Mɛdinu lɛ́ɛ dó jǐ nú yě; akwɛ́ nyí nǔ ɖěbǔ nú yě ǎ, siká ká nɔ́ jló yě ǎ.

¹⁸ Yě ná da gǎ dó hu dɔ̌nkpɛvú lɛ́ɛ; yě ná jó vǐ yɛ̌yɛ́ lɛ́ɛ dó nyi gbɛ ǎ, yɔkpɔ́vú lɛ́ɛ sín nǔ ká ná blá wǔ nú yě ǎ.

¹⁹ Mawu ná gba Babilɔ́nu e nyɔ́ ɖɛkpɛ hú axɔ́súɖuto lɛ́ɛ bǐ é; Babilɔ́nu e Kaludéenu lɛ́ɛ nɔ́ dó yí go é. É ná gba Babilɔ́nu lě e é bló gbɔn nú Sodɔ́mu kpó Gomɔ́ɔ kpó é.

²⁰ Mɛ ɖěbǔ sɔ́ ná nɔ to énɛ́ mɛ kpɔ́n gbeɖé ǎ; to ɔ́ ná nɔ vɔ̌ káká sɔ́yi. Alabíinu lɛ́ɛ sɔ́ ná ɖó gɔnu ɖó fínɛ́ kpɔ́n ǎ; lɛ̌ngbɔ́nyitɔ́ lɛ́ɛ sɔ́ ná xwe kanlin yětɔn lɛ́ɛ dó xɔ ɖo fínɛ́ kpɔ́n gbeɖé ǎ.

²¹ Kanlin e ɖo gbětótló mɛ lɛ́ɛ ná wa xwé nyi fínɛ́. Kwlele lɛ́ɛ ná gɔ́ xwé lɛ́ɛ bǐ, gowungo lɛ́ɛ ná nɔ́ nɔ xwé lɛ́ɛ gbe. Gbǎgbá lɛ́ɛ ná nɔ́ ɖú agbojlaka ɖo xwé lɛ́ɛ gbe.

²² Gběkanlin lɛ́ɛ ná nɔ́ hó asúkúsi e ɖo to ɔ́ mɛ lɛ́ɛ, bɔ cukú gbě tɔn lɛ́ɛ ná nɔ́ hó nǔ ɖo axɔ́sú lɛ́ɛ sín hɔnmɛ, hɔn yětɔn ɖagbe ɖagbe e ɖo to ɔ́ mɛ lɛ́ɛ mɛ. Hwenu e Babilɔ́nu ná gba ɔ́, gan tɔn ɔ́, xo wɛ é kó xo; azǎn tɔn lɛ́ɛ ɖě sɔ́ ɖo nǎ jɛ jí wɛ ǎ.