Ezayíi 10 - MAWUXÓWÉMA

¹ Heelú yě mɛ e nɔ ɖe gbetakɛ́n nyanya tɔ́n lɛ́ɛ é; heelú yě mɛ e nɔ wlán sɛ́n e nɔ́ dɔn toví dó ya mɛ é dó wěma mɛ lɛ́ɛ é!

² Yě nɔ́ dó sɛ́n énɛ́ lɛ́ɛ dó sú ali dó mɛmaɖómɛɖé, nú é má yi ylɔ́ hwɛ bó byɔ́ nǔ e é ɖó acɛ ná é ó; yě gba acɛ wamamɔnɔ e ɖo togun ce mɛ lɛ́ɛ wú. Yě nɔ́ táfú asúkúsi, yě nɔ́ yí nǔ e nyí tɔ́cyɔvǐ tɔn lɛ́ɛ sín así tɔn.

³ Hwenu e Mawu ká ná dɔn tó nú mɛ ɔ́, hwenu e jɔhɔn ná sí te sín zɔ kpó zǐngídi kpó jǎwe ɔ́, nɛ̌ mi nǎ wa nǔ gbɔn? Mɛ̌ xwé mi ná hɔn yi hwlá cí bɔ é ná dó alɔ mi? Fítɛ́ mi ná bɛ́ dɔkun mitɔn lɛ́ɛ ɖó?

⁴ Gantɔ́ lɛ́ɛ tɛ́ntin jɛ́n mi na gbɔ bó sɔ́ miɖée yi kɔn nyi ayǐ ɖe; é gló ɔ́, mi ná j'ayǐ kɔ́ mɛ, ɖo mɛ e è hu lɛ́ɛ tɛ́ntin. Nǔ énɛ́ lɛ́ɛ bǐ ná bó jɛ ɔ́, xomɛ Mawu tɔn ná ko fá ǎ; alɔ tɔn ná kpo ɖo dlɛ̌ndlɛ́n, bó ná xo togun tɔn.

Mawu sin xomɛ dó Asilíi

⁵ Mawu ɖɔ: “Heelú Asilíi, bǎ e un dó ɖe xomɛsin ce xlɛ́ é! Kpo e ɖo alɔ mɛ nú Asilíi é wɛ nyí xomɛsin ce.

⁶ Un sɛ́ ɛ dó akɔta gbejímánɔtɔ́ ɖokpó, un zɔ́n ɛ ɖɔ é ní fun ahwan xá togun e ɖo xomɛsin dó nú mì wɛ é, bó bɛ́ nǔ tɔn lɛ́ɛ bǐ wá yi xwé bó má, lobo gbídí togun ɔ́ ɖó afɔ wú babá e ɖo ali jí é ɖɔhun.

⁷ Nǔ e myá nukún nú éyɛ́ é ká nɛ́ ǎ, lě e é ná wa gbɔn bó sú akɔta gěgé sín kún dó, bó gba to yětɔn é wɛ ɖo ayi mɛ n'i.

⁸ Asilíi xɔ́sú ɔ́ nɔ́ ɖo ajɔ̌ jlá wɛ bó nɔ́ ɖɔ: ‘Ahwangán ce lɛ́ɛ ɔ́, axɔ́sú wɛ yě nyí; mɛ̌ ká ná dɔn xá mì?

⁹ É má ká nyí nǔ e xá Kaakemíci toxo é jɛ́n ká xá Kalunɔ́ toxo ɔ́ ǎ cé? Lě e un wa Aapadu toxo ɔ́ nú gbɔn ɔ́, jɛ́n un wa Hamáti toxo ɔ́ nú gbɔn ǎ cé? Lě e un wa Damási toxo ɔ́ nú gbɔn ɔ́, jɛ́n un wa Samalíi toxo ɔ́ nú gbɔn ǎ cé?

¹⁰ Un yí axɔ́súɖuto e syɛ́n ɖo vodún mɛ hú Jeluzalɛ́mu, abǐ Samalíi lɛ́ɛ é.

¹¹ Un hɛn ɔ́, un ná wa nǔ xá Jeluzalɛ́mu kpó vodún tɔn lɛ́ɛ kpó lě e un wa nǔ xá Samalíi kpó vodún tɔn lɛ́ɛ kpó gbɔn é ǎ cé? Un ɖó hlɔ̌nhlɔ́n mɔ̌hun ǎ wɛ a?’ ”

¹² Hwenu e Aklúnɔ ná fó azɔ̌ tɔn bǐ ɖo Sinyɔ́ɔ só ɔ́ jí, bó fó ɖo Jeluzalɛ́mu ɔ́, é ná sí te dó axɔ́sú Asilíi tɔn jí; axɔ́sú énɛ́ ɔ́ nɔ́ yí go, bɔ mɛ ma sí ɖo nukún tɔn ta.

¹³ É nɔ́ ɖɔ: “Nǔ e un wa lɛ́ɛ bǐ ɔ́, hlɔ̌nhlɔ́n ce kpó nǔnywɛ́ ce kpó wɛ un dó bló yě ná, ɖó un bí. Un ɖe dogbó ɖěɖě e ɖo togun lɛ́ɛ tɛ́ntin lɛ́ɛ sín, un gba agɔ̌ yětɔn lɛ́ɛ, un fɛ́ zinkpo sín axɔ́sú lɛ́ɛ glɔ́.

¹⁴ Un bɛ́ dɔkun e ɖo togun lɛ́ɛ sí é, lě e è nɔ fɔ xɛdɔ́ gbɔn é. Un fɔ nǔ e ɖo ayǐkúngban jí lɛ́ɛ bǐ, lě e xɛ nɔ́ jó azin dó, bɔ è nɔ yi bɛ́ é ɖɔhun. Mɛ ɖěbǔ ká glá bó dán wǔ ǎ; mɛ ɖěbǔ kɛ nu ǎ, xɛ ɖɔ hwǐ ǎ.”

¹⁵ Asyɔ́ nɔ́ yí go mɛ e lɔ mɛ é ɖe ɔ́ wú wɛ a? Sá nɔ́ ɖɔ nyɛ wɛ sɔ lě ɖo mɛ e ɖo zǐnzán ɛ é lɔ mɛ wɛ a? É wá cí ɖɔ kpo wɛ ɖo mɛ e lɔ mɛ é ɖe ɔ́ zán wɛ ɖɔhun, abǐ makpo wɛ ɖo mɛ e hɛn é sɔ́ dó jǐ wɛ ɖɔhun.

¹⁶ Énɛ́ ɔ́ wú wɛ Aklúnɔ, Mawu Mavɔmavɔ Nǔbǐwúkpétɔ́ ɔ́ ná ɖe lan sín tókɔ nú yě, bɔ yě ná xú gǒ; myɔ ɖé ná wlí ɖo nǔ e ɖo susu ná yě wɛ lɛ́ɛ mɛ, sin ɖa nǔ ɖɔhun.

¹⁷ Mawu e nyí wěziza Izlayɛ́li tɔn é ná húzú myɔ, Mawu Mɛ mímɛ́ Izlayɛ́li tɔn ɔ́ ná húzú myɔɖɛ́, bó ná dó wun kpó kpɔvɛwun kpó zo, bɔ bǐ ná ji kɔn afín gbe ɖokpó.

¹⁸ É ná fyɔ́ zungbó ɖɛkpɛ ɖɛkpɛ lɛ́ɛ, kpó atínkan lɛ́ɛ kpó káká dó ɖɔ. È mɔ zungbó ɔ́, é ná cí ɖi gbɛtɔ́ e azɔn ɖo ya dó ná wɛ é mɔ wɛ è ɖe ɖɔhun.

¹⁹ É sɔ́ ná kpo atín nabí ɖé ɖo zungbó Asilíi tɔn ɔ́ mɛ ǎ; atín e ná kpo ɔ́ ná hwe káká bɔ yɔkpɔ́vú kpɛví hɛn ɔ́, é ná xa.

Izlayɛ́li ví e kpo ɖo gbɛ lɛ́ɛ

²⁰ Gbe énɛ́ gbe ɔ́, mɛ e ná kpo ɖo gbɛ ɖo Izlayɛ́li ví lɛ́ɛ mɛ lɛ́ɛ ɔ́, mɛ e ná kpo ɖo gbɛ ɖo Jakɔ́bu ví lɛ́ɛ mɛ lɛ́ɛ sɔ́ ná yí gbe bó ná gán jɛ mɛ e nɔ xo yě lɛ́ɛ wú ǎ. Lo ɔ́, yě bǐ ná gán jɛ Mawu Mavɔmavɔ Mɛ mímɛ́ Izlayɛ́li tɔn ɔ́ wú bǐ gbídígbídí.

²¹ Mɛ e kpo ɖo gbɛ lɛ́ɛ ná lɛ́ kɔ wá, Jakɔ́bu ví e kpo lɛ́ɛ ná lɛ́ kɔ wá Mawu hlɔ̌nhlɔ́nnɔ ɔ́ gɔ́n.

²² Izlayɛ́li, togun towe ná bó sukpɔ́ nyɛ̌kɛ́n e ɖo xutó ɔ́ ɖɔhun ɔ́, mɛ ywɛywɛ ɖé jɛ́n ná kpo, bó ná lɛ́ kɔ wá Mawu gɔ́n. Nǔ hɛn gblé sín te wɛ è ko sí, bɔ hwɛɖiɖɔ ɖó sɛ́nxwi jí ná kpé tókɔ awɔnkɔ tɔ ɖi sin ɖɔhun.

²³ Nǔgbó wɛ, Aklúnɔ, Mawu Mavɔmavɔ Nǔbǐwúkpétɔ́ ɔ́ ná hɛn nǔ gblé gbɔn to ɔ́ bǐ mɛ lě e é ko ɖɔ gbɔn é.

Mi ma ɖi xɛsi nú Asilíi ó

²⁴ Énɛ́ ɔ́ wú ɔ́, mi ɖótó xó e Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ é; é ɖɔ: “Togun ce, hwi mɛ e ɖo Sinyɔ́ɔ é, ma ɖi xɛsi ɖěbǔ nú Asilíi e zé bǎ bó ɖo xixo we wɛ é ó; ma ɖi xɛsi nú Asilíi e zé kpo dó jǐ we, lě e Ejípunu lɛ́ɛ bló gbɔn xóxó hwenu ɔ́ ó,

²⁵ ɖó kpɛɖé jɛ́n kpo din bɔ tó e dɔn nú mi wɛ un ɖe ɔ́ ná fó, bɔ xomɛsin ce ná húzú kpan nukɔn ɛ, bɔ un ná sú kún tɔn dó.”

²⁶ Mawu Mavɔmavɔ Nǔbǐwúkpétɔ́ ɔ́ ná zé lanbá tɔn, bó ná xo Asilíi lě e é bló gbɔn xá Madiáani ví lɛ́ɛ, ɖo Awǐnnya Olɛ́vu tɔn kɔn é. É ná dlɛ́n kpo tɔn dó xu jí lě e é bló gbɔn xá Ejípunu lɛ́ɛ é.

²⁷ Gbe énɛ́ ɔ́ gbe ɔ́, é ná zlɔ́n we agban e ɖo abɔ̌ towe ta, bó ɖo kpinkpɛn we wɛ é; é ná ɖe agban kpinkpɛn énɛ́ e ɖo kɔ jí nú we ɔ́ síin, bó ná zé nyɔ̌ná ɖó tɛn tɔn mɛ.

Kɛntɔ́ ɔ́ sɛkpɔ́ Jeluzalɛ́mu

²⁸ Kɛntɔ́ ɔ́ sɛkpɔ́ Ayati. É gbɔn Miglɔni bó jó agban tɔn lɛ́ɛ dó nyi Mikumasi.

²⁹ Sónufɛ́nu we tɛ́ntin wɛ é gbɔn dín, bó ɖɔ: “Mi wá mǐ ní ɖó gɔnu ɖó Gɛva.” Hlamanu lɛ́ɛ ɖi xɛsi bó nɔ́ sísɔ́. Mɛ e ɖo Giveya Sawúlu sín toxo ɔ́ mɛ lɛ́ɛ bǐ hɔn.

³⁰ Galímunu lɛ́ɛ e mi, mi sú xó! Layicanu e mi, mi ɖo tó jí! Anatɔ́tinu e mi, heelú mi!

³¹ Madumɛnanu lɛ́ɛ bǐ gbadó. Gevímunu lɛ́ɛ ɖo fí e yě ná hɔn hwlá cí é ba wɛ.

³² Gbe énɛ́ gbe ɖokpó ɔ́, kɛntɔ́ ɔ́ ɖó gɔnu ɖó Nɔvu. É myɔ́ akpotokwín bó ná dó Sinyɔ́ɔ, Jeluzalɛ́mu só ɔ́.

³³ Aklúnɔ, Mawu Mavɔmavɔ Nǔbǐwúkpétɔ́ ɔ́ ná sɛ́n atínla lɛ́ɛ kpó zǐngídi kpó. È nǎ gbo atín ɖaxó ɖaxó lɛ́ɛ, è nǎ mu atín e yi jǐ lɛ́ɛ.

³⁴ È nǎ gbo atín kpɛví kpɛví e ɖo zungbó ɔ́ mɛ lɛ́ɛ ɖó asyɔ́ wú. Sɛ́dlutín ɖaxó gɛnnyigɛnnyi Libáan tɔn lɛ́ɛ jɛ ayǐ ɖo Mawu aditi ɔ́ nukɔn.