Tíntɔ́n 40 - MAWUXÓWÉMA

Mawu Mavɔmavɔ ná gbe ɖɔ è nǐ bló goxɔ e mɛ émí ná nɔ́ kpé togun ɔ́ ɖe ɔ́, bó sɔ́ ɖó vo nú émí

¹ Énɛ́ ɔ́ gúdo ɔ́, Mawu Mavɔmavɔ ɖɔ nú Mɔyízi ɖɔ:

² “Sun nukɔntɔn ɔ́ sín azǎn nukɔntɔn ɔ́ gbe ɔ́, a nǎ blǒ goxɔ e mɛ un ná nɔ wá kpé togun ɔ́ ɖe ɔ́, nɔtɛn ce ɔ́.

³ A nǎ zě gbǎ e mɛ akɔjijɛwéma ɔ́ ɖe ɔ́ d'é mɛ, bó ná sɔ́ ɖó xɔmɛgbovɔ ɔ́ gúdo, bónú mɛɖé ní má mɔ ó.

⁴ A nǎ zé távo ɔ́ wá, bó ná to wɔ̌xúxú e è nǎ mì lɛ́ɛ ɖ'é jí, a nǎ zé zogbɛ́nhɛnnú ɔ́ wá, bó ná to zogbɛ́n lɛ́ɛ ɖ'é jí.

⁵ A nǎ zé vɔ̌sákpe e è sɔ́ siká dó bló ná bó ná nɔ́ dó zǎlínkpɔ́n zo ɖ'é jí ɔ́ ɖó gbǎ e mɛ akɔjijɛwéma ɔ́ ɖe ɔ́ nukɔn, ɖo xɔmɛgbovɔ ɔ́ gúdo; a nǎ dǒ avɔ ɖó goxɔ ɔ́ sín ali nu.

⁶ A nǎ zě vɔ̌sákpe e jí è nɔ dó vɔ̌ zo ɖe ɔ́ ɖó goxɔ ɔ́ sín alihɛ́nnu.

⁷ A nǎ zě ganzɛ́n ɔ́ ɖó nɔtɛn Mawu Mavɔmavɔ tɔn ɔ́ kpó vɔ̌sákpe énɛ́ ɔ́ kpó tɛ́ntin, bó ná kɔn sin d'é mɛ.

⁸ A nǎ zé avɔ dó xá kɔ́xota ɔ́ lɛ́ dó goxɔ ɔ́, bó ná dó avɔ ɖó xwé ɔ́ sín hɔntogbó nu.

⁹ “A nǎ zě ami mímɛ́ ɔ́, bó ná sá dó goxɔ ɔ́ kpó nǔ e ɖ'é mɛ lɛ́ɛ bǐ kpó wú, bó ná dó ɖe yě ɖó vo nú mì.

¹⁰ A nǎ sá ami mímɛ́ ɔ́ dó vɔ̌sákpe e jí è nɔ dó vɔ̌ zo ɖe ɔ́ kpó nǔ e è nǎ zán ɖ'é jí lɛ́ɛ bǐ kpó wú, bó ná ɖe vɔ̌sákpe ɔ́ ɖó vo nú mì; bɔ é ná nyí nǔ mímɛ́ titewungbe.

¹¹ A nǎ sá ami dó ganzɛ́n ɔ́ kpó afɔ e jí è nɔ sɔ́ ganzɛ́n ɖó ɔ́ kpó, bó ná dó sɔ́ ganzɛ́n ɔ́ ɖó vo nú mì.

¹² “A nǎ kplá Aalɔ́ɔn kpó vǐ tɔn lɛ́ɛ kpó yi goxɔ ce lihɛ́nnu, bó ná zé sin dó slá wǔ nú yě.

¹³ A nǎ fɔ vɔ̌sánú-xwlémawutɔ́ sín awu dó nú Aalɔ́ɔn, bó ná kɔn ami dó ta n'i, bó dó ɖe e ɖó vo bɔ é ná wa vɔ̌sánú-xwlémawutɔ́ sín azɔ̌ nú mì.

¹⁴ A nǎ ylɔ́ Aalɔ́ɔn ví lɛ́ɛ bɔ yě ná sɛkpɔ́ we bɔ a nǎ dó awu gaga lɛ́ɛ nú yě.

¹⁵ A nǎ kɔn ami dó ta nú yě lě e a kɔn dó ta nú tɔ́ yětɔn gbɔn é, bɔ yě ná nɔ wa vɔ̌sánú-xwlémawutɔ́zɔ́ nú mì. Ami énɛ́ ɔ́ e a nǎ kɔn dó ta nú yě ɔ́ ná zɔ́n bɔ yě kpó vǐ yětɔn lɛ́ɛ kpó ná nyí vɔ̌sánú-xwlémawutɔ́ nú mì káká sɔ́yi.”

Mɔyízi ján Mawu xwé ɔ́

¹⁶ Mɔyízi bló nǔ e Mawu Mavɔmavɔ ɖɔ n'i lɛ́ɛ bǐ tɛ́nwínlɛnwín:

¹⁷ Yě gosín Ejípu ɔ́, é bló xwe ɖokpó, bɔ sun nukɔntɔn e ɖo xwe énɛ́ ɔ́ mɛ ɔ́ sín azǎn nukɔntɔn ɔ́ gbe ɔ́, è blǒ goxɔ ɔ́.

¹⁸ Mɔyízi ján xwé ɔ́; é dó afɔ lɛ́ɛ do, é ká xwlɛ lɛ́ɛ, bó ɖó wɛ̌n lɛ́ɛ, lobo dó dotín lɛ́ɛ do.

¹⁹ É fɔ avɔ cyɔ́n dó goxɔ ɔ́, bó zé anyǔ cyɔ́n jí, lě e Mawu Mavɔmavɔ ɖɔ n'i gbɔn é.

²⁰ É zé awǐnnyatɛ lɛ́ɛ dó gbǎ ɔ́ mɛ; é fɔ kpo gaga e è nɔ dó zé gbǎ ɔ́ ná ɔ́ dó alɔgan e ɖo gbǎ ɔ́ wú lɛ́ɛ mɛ, bó zé gbǎ ɔ́ sín nusú ɖ'é nu.

²¹ É zé gbǎ ɔ́ wá goxɔ ɔ́ mɛ; é dó xɔmɛgbovɔ ɔ́, dó gbo fí e gbǎ e mɛ awǐnnyatɛ lɛ́ɛ ɔ́ ɖe ɔ́ ɖó vo, bónú mɛɖé má mɔ ó, lě e Mawu Mavɔmavɔ kó ɖɔ n'i gbɔn é.

²² É zé távo ɔ́ ɖó goxɔ ɔ́ mɛ, ɖo goxɔ ɔ́ sín taligbé, ɖo xɔmɛgbovɔ ɔ́ nukɔn.

²³ Bó to wɔ̌xúxú lɛ́ɛ ɖó távo ɔ́ jí, ɖo Mawu Mavɔmavɔ nukɔn, lě e Mawu Mavɔmavɔ kó ɖɔ n'i gbɔn é.

²⁴ É zé zogbɛ́nhɛnnú ɔ́ ɖó goxɔ ɔ́ mɛ, ɖo távo ɔ́ nukɔn, bɔ é ɖo Tɛn mímɛ́ ɔ́ sín afɔligbé.

²⁵ É tá zogbɛ́n lɛ́ɛ ɖ'é jí, ɖo Mawu Mavɔmavɔ nukɔn, lě e Mawu Mavɔmavɔ kó ɖɔ n'i gbɔn é.

²⁶ É zé vɔ̌sákpe e è sɔ́ siká dó bló ná ɔ́ ɖó goxɔ ɔ́ mɛ, ɖo xɔmɛgbovɔ ɔ́ nukɔn,

²⁷ bó dó atínkɛn wǎnɖagbenɔ zo ɖ'é jí, lě e Mawu Mavɔmavɔ kó ɖɔ n'i gbɔn é.

²⁸ É dó avɔ ɖó goxɔ ɔ́ sín ali nu.

²⁹ É zé vɔ̌sákpe e jí è nɔ dó vɔ̌ zo ɖe ɔ́ ɖó goxɔ ɔ́ sín alihɛ́nnu; é sá vɔ̌ e è nɔ dó zo ɔ́ kpó jinukúnvɔ́ kpó ɖ'é jí, lě e Mawu Mavɔmavɔ kó ɖɔ n'i gbɔn ɖ'ayǐ é.

³⁰ É zé ganzɛ́n ɔ́ ɖó goxɔ ɔ́ kpó vɔ̌sákpe ɔ́ kpó tɛ́ntin, bó kɔn sin d'é mɛ bónú è nǎ nɔ́ dó slá wǔ ná.

³¹ Mɔyízi kpó Aalɔ́ɔn kpó, kpó Aalɔ́ɔn ví lɛ́ɛ kpó nɔ́ dó klɔ́ afɔ kpó alɔ kpó.

³² Hǔn, yě ja goxɔ ɔ́ mɛ byɔ́ gbé, abǐ yě ná yi vɔ̌sákpe e jí è nɔ dó vɔ̌ zo ɖe ɔ́ kɔn hweɖěbǔnu ɔ́, yě nɔ́ slá wǔ, lě e Mawu Mavɔmavɔ kó ɖɔ nú Mɔyízi gbɔn é.

³³ Mɔyízi dó avɔ dó xá kɔ́xota ɔ́ lɛ́ dó goxɔ kpó vɔ̌sákpe ɔ́ kpó, bó dó avɔ ɖó hɔntogbó ɔ́ nu. Lě e Mɔyízi fó azɔ̌ ɔ́ gbɔn ɔ́ nɛ́.

Susu Mawu tɔn gɔ́ goxɔ ɔ́

³⁴ Hwenɛ́nu ɔ́, akpɔ́kpɔ́ cyɔ́n goxɔ ɔ́, bɔ susu Mawu Mavɔmavɔ tɔn gɔ́ goxɔ ɔ́,

³⁵ káká bɔ Mɔyízi sɔ́ sixú byɔ́ goxɔ ɔ́ mɛ ǎ.

³⁶ Cóbónú Izlayɛ́li ví lɛ́ɛ ná jɛ ali ɔ́, akpɔ́kpɔ́ ɔ́ jɛ́n nɔ́ sí te sín goxɔ ɔ́ jí cóbɔ yě nɔ́ ɖidó.

³⁷ Ényí akpɔ́kpɔ́ ɔ́ má sí te ǎ ɔ́, yě nɔ́ yi ǎ; yě nɔ́ nɔ te káká jɛ gbe e gbe é ná sí te é.

³⁸ Akpɔ́kpɔ́ Mawu Mavɔmavɔ tɔn ɔ́ nɔ́ nɔ goxɔ ɔ́ ta kéze, bɔ myɔ nɔ ɖo akpɔ́kpɔ́ ɔ́ mɛ zǎn mɛ, bɔ Izlayɛ́li ví lɛ́ɛ bǐ nɔ ɖo mimɔ wɛ, gbɔn fí e yě nɔ́ lɛ́ɛ bǐ.