Tíntɔ́n 4 - MAWUXÓWÉMA

Mawu ɖe hlɔ̌nhlɔ́n tɔn xlɛ́ Mɔyízi

¹ Mɔyízi ɖɔ nú Mawu Mavɔmavɔ ɖɔ: “Nú Izlayɛ́li ví lɛ́ɛ ma ka ɖi nǔ nú mì ǎ, nú yě ma ɖótó mì ǎ, bó ɖɔ Mawu Mavɔmavɔ kún tɔ́n dó jǐ ce ɖě ó ɔ́, nɛ̌ un ná wa nǔ gbɔn?”

² Mawu Mavɔmavɔ ká kanbyɔ́ ɛ ɖɔ: “Étɛ́ wɛ ɖo alɔ towe mɛ?” Bɔ é yí gbe ɖɔ: “Kpo wɛ.”

³ Mawu Mavɔmavɔ ɖɔ: “Sɔ́ nyi kɔ́ mɛ.” Bɔ é sɔ́ kpo ɔ́ nyi kɔ́ mɛ, bɔ é húzú dan, bɔ Mɔyízi lɔ́n jɛ zɔ.

⁴ Mawu Mavɔmavɔ lɛ́ ɖɔ nú Mɔyízi ɖɔ: “Dlɛ̌n alɔ bó hɛn dan ɔ́ sín avɔnu.” Mɔyízi ka dlɛ́n alɔ bó hɛn, bɔ é lɛ́ húzú kpo ɖo alɔ tɔn mɛ.

⁵ Bɔ Mawu Mavɔmavɔ ɖɔ: “Nǔ e a nǎ bló ɔ́ nɛ́, énɛ́ ɔ́, yě ná ɖi nǔ ɖɔ Mawu Mavɔmavɔ, Mawu e tɔ́gbó émítɔn lɛ́ɛ nɔ sɛn ɔ́, Mawu e Ablaxámu, Izáki, kpó Jakɔ́bu kpó nɔ sɛn ɔ́ wɛ tɔ́n dó jǐ towe nǔgbó.”

⁶ Mawu Mavɔmavɔ lɛ́ ɖɔ nú Mɔyízi ɖɔ é ní zé alɔ gbɔn awu tɔn mɛ, bó zé ɖó akɔ́nnu, bɔ é zé ɖó, bó ɖe síin. É ná mɔ nǔɖé ɔ́, gudu jɛ́n kpé alɔ tɔn, bó wé tété kɛ́njí ɖɔhun.

⁷ Bɔ Mawu Mavɔmavɔ ɖɔ: “Lɛ̌ zé alɔ towe ɖó akɔ́nnu.” Bɔ é lɛ́ zé ɖó, bó ɖe síin. É ná mɔ nǔɖé ɔ́, alɔ tɔn jɛ́n lɛ́ jɛ tɛn tɔn mɛ.

⁸ Mawu Mavɔmavɔ ká ɖɔ n'i ɖɔ: “Nú a blǒ nǔ nukɔntɔn ɔ́ bónú yě má ɖi nǔ nú we, bó ɖótó we ǎ ɔ́, a blǒ gǔdo tɔn ɔ́, yě ná ɖi.

⁹ Nú a ka bló nǔ we énɛ́ lɛ́ɛ, bónú yě má ɖi nǔ nú we bó ɖótó we ǎ jɛ́n wɛ ɔ́, a nǎ wún sin ɖo Nilu tɔ ɔ́ mɛ, bó ná kɔn nyi kɔ́ mɛ; sin e a wǔn ɖo tɔ ɔ́ mɛ ɔ́ ná húzú kanjɔ ɖo ayǐkúngban.”

Mawu sɔ́ Aalɔ́ɔn bɔ é xo kpó ɖó nú Mɔyízi

¹⁰ Mɔyízi ɖɔ nú Mawu Mavɔmavɔ ɖɔ: “Nǔ sixú nyí mɔ̌ ǎ Aklúnɔ, un ɖi ɖɛ̌ ǎ; un nyɔ́ xó ɖɔ sín do ǎ. Sín hwenu e a ɖo xó ɖɔ nú mì wɛ káká jɛ din ɔ́, lě e un ɖe ɔ́ jɛ́n un ɖe. Xóɖiɖɔ kó nɔ nyí tagba nú mì ɖ'ayǐ.”

¹¹ Mawu Mavɔmavɔ ká ɖɔ n'i ɖɔ: “Mɛ̌ wɛ ná nu gbɛtɔ́? Mɛ̌ wɛ nɔ́ zɔ́n bɔ ɖɛ̌ nɔ́ tɛ́? Mɛ̌ wɛ nɔ́ zɔ́n bɔ tó nɔ́ kú? Mɛ̌ wɛ nɔ́ zɔ́n bɔ è nɔ mɔ nukúnnú? Mɛ̌ wɛ nɔ́ zɔ́n bɔ nukún nɔ́ tɔ́n? Nyɛ Mawu Mavɔmavɔ ɔ́ wɛ ǎ cé?

¹² Hǔn bo yi. Nyi ɖésúnɔ ná ɖo kpɔ́ xá we. A ja xó ɖɔ gbé ɔ́, un ná ɖɔ xó e a ɖǒ ná ɖɔ ɔ́ nú we.”

¹³ Mɔyízi ka ɖɔ: “Óo! Aklúnɔ, kɛnklɛ́n bó sɛ́ mɛ ɖěvo dó!”

¹⁴ Énɛ́ ɔ́, Mawu Mavɔmavɔ sin xomɛ dó Mɔyízi bó ɖɔ: “Nɔví towe Aalɔ́ɔn Levíi ví ɔ́ ɖo fínɛ́ ǎ cé? Un tunwun ɖɔ éyɛ́ nyɔ́ xó ɖɔ. Kpɔ́n, é ɖésú nɛ́ ja gɔ̌n towe lɔ nɛ́; nú é wá mɔ we ɔ́, xomɛ ná hun i.

¹⁵ A nǎ ɖɔ xó n'i, a nǎ ɖɔ xó e é ɖó ná ɖɔ ɔ́ n'i. Bɔ nyɛ ɔ́, nú mi ɖo xó ɖɔ wɛ ɔ́, un ná ɖo kpɔ́ xá mi mɛ ɖokpó ɖokpó, bó ná ɖɔ nǔ e mi ɖó ná wa ɔ́ nú mi.

¹⁶ Éyɛ́ wɛ ná ɖɔ xó nú togun ɔ́ ɖó tɛn towe mɛ. É wɛ ná nyí gbeyíɖɔ towe, bɔ un ná nɔ ɖɔ xó e é ná nɔ́ ɖɔ lɛ́ɛ gbɔn jǐ towe.

¹⁷ A nǎ hɛn kpo towe élɔ́ alɔnu; é wɛ a nǎ nɔ́ dó bló nǔjíwǔ lɛ́ɛ ná.”

Mɔyízi lɛ́ kɔ yi togun tɔn mɛ

¹⁸ Mɔyízi lɛ́ kɔ yi Jetlo asi tɔn tɔ́ ɔ́ gɔ́n, bó ɖɔ n'i ɖɔ: “Kɛnklɛ́n ná gbe mì nú má lɛ́ kɔ yi nɔví ce lɛ́ɛ gɔ́n ɖo Ejípu, bó ná kpɔ́n ɖɔ yě kpo ɖo gbɛ a jí.” Jetlo ka ɖɔ nú Mɔyízi ɖɔ é ná yi ɖagbe.

¹⁹ Énɛ́ ɔ́, cóbónú Mɔyízi ná gosín Madiáani ɔ́, Mawu Mavɔmavɔ ɖɔ n'i ɖɔ: “Lɛ̌ kɔ yi Ejípu, ɖó mɛ e jló ná hu we lɛ́ɛ bǐ kó kú.”

²⁰ Ée Mɔyízi se mɔ̌ ɔ́, é kplá asi tɔn kpó vǐ tɔn lɛ́ɛ kpó, bó bɛ́ yě ɖó tócí jí bó ná lɛ́ kɔ yi Ejípu. É hɛn kpo Mawu tɔn ɔ́ alɔ mɛ.

²¹ Mawu Mavɔmavɔ ka lɛ́ ɖɔ n'i ɖɔ: “A lɛ̌ kɔ yi Ejípu hǔn, ɖǒ ayi nǔjíwǔ e un ná we bɔ a nǎ bló lɛ́ɛ bǐ jí. A nǎ jlɛ́ nǔ énɛ́ lɛ́ɛ ɖo axɔ́sú Ejípu tɔn ɔ́ nukún mɛ. Nyɛ ka ná zɔ́n bɔ é ná tlí tó, bó ná jó togun ɔ́ dó bɔ é ná yi ǎ.

²² Énɛ́ ɔ́, a nǎ ɖɔ n'i ɖɔ: Xó e Mawu Mavɔmavɔ ɖɔ ɔ́ ɖíe; é ɖɔ: ‘Togun Izlayɛ́li tɔn ɔ́, vǐ súnnu ce wɛ é nyí; nukɔngbéví ce wɛ.

²³ Jǒ vǐ súnnu ce dó ní yi, bó ná yi sɛn mì; é ɖó ɖɔ a gbɛ̌ ǎ. Nú a gbɛ̌ ɖɔ é kún ná yi ó ɔ́, un ná hu vǐ súnnu towe nukɔngbéví towe ɔ́.’ ”

²⁴ Hwenu e Mɔyízi jɛ ali bó ɖo yiyi wɛ ɔ́, é dɔ́ fí ɖé, bɔ Mawu Mavɔmavɔ zɔn jǐ tɔn bó ja huhu i gbé.

²⁵ Sipɔ́la ka zé awǐnnya ɖíɖá ɖé bó dó sɛ́n vǐ tɔn sín atɔtɔ, bó zé sɔ́ Mɔyízi sín súnnuxwé bó ɖɔ: “Asú hun mɛ tɔn wɛ a nyǐ nú mì ɖó adagbigbo ɔ́ wú.”

²⁶ Énɛ́ ɔ́, Mawu Mavɔmavɔ jó Mɔyízi dó, bɔ Sipɔ́la ɖɔ: “Asú hun mɛ tɔn wɛ a nyǐ nú mì.”

²⁷ Mawu Mavɔmavɔ ɖɔ nú Aalɔ́ɔn ɖó adagbigbo ɔ́ wú ɖɔ: “Yi kpé Mɔyízi ɖo gbětótló mɛ.” Ée Aalɔ́ɔn se mɔ̌ ɔ́, é yi nǔgbó, bó yi kpé Mɔyízi ɖo Mawu sín só ɔ́ kɔn, bó zunfán ɛ, bó kí si n'i.

²⁸ Énɛ́ ɔ́, Mɔyízi ɖɔ xó e Mawu Mavɔmavɔ e sɛ́ ɛ dó ɔ́ ɖɔ n'i lɛ́ɛ bǐ nú Aalɔ́ɔn, bó lɛ́ ɖɔ nǔjíwǔ e Mawu Mavɔmavɔ ɖɔ é ní bló lɛ́ɛ bǐ n'i.

²⁹ Bɔ Mɔyízi kpó Aalɔ́ɔn kpó wlí ali bó ɖidó. Ée yě yi ɔ́, yě kplé tomɛxó Izlayɛ́li tɔn lɛ́ɛ bǐ.

³⁰ Aalɔ́ɔn ka ɖɔ xó e Mawu Mavɔmavɔ ɖɔ nú Mɔyízi lɛ́ɛ bǐ nú yě, bɔ Mɔyízi bló nǔjíwǔ lɛ́ɛ ɖo togun ɔ́ nukún mɛ.

³¹ Bɔ togun ɔ́ ɖi nǔ ná. Yě mɔ nǔ jɛ wú ɖɔ Mawu Mavɔmavɔ mɔ lě e è ɖo ya dó nú émí mɛ Izlayɛ́li ví lɛ́ɛ gbɔn wɛ ɔ́, bó wá ba yě kpɔ́n, bó ná hwlɛ́n yě gán. Énɛ́ ɔ́, yě jɛ kpo bó ɖe kɔ́ nú Mawu Mavɔmavɔ.