Tíntɔ́n 37 - MAWUXÓWÉMA

Akɔjijɛgbá ɔ́

¹ Besalɛli zé kasyatín dó bló gbǎ ɖokpó ná; ga tɔn ɖó mɛ̌tlu ɖokpó ɛnɛvlɔ́ɖó, bɔ gblǒ tɔn ɖó mɛ̌tlu ɖokpó é hwe ɛnɛvlɔ́ɖó jɛ jí, bɔ jǐ yiyi tɔn ɖó mɛ̌tlu ɖokpó é hwe ɛnɛvlɔ́ɖó.

² É kɔn siká akú dó; é kɔn siká gbɔn xomɛ kpó gǔdo kpó, bó kɔn gbɔn tó tɔn.

³ É bló sikálɔgan ɛnɛ, bó fɔ ɖó zwe ɛnɛ lɛ́ɛ jí ɖo do; we ɖo akpá ɖokpó xwé, bɔ we ɖo akpá ɖě ɔ́ xwé.

⁴ É kpa kasyatín sín kpo gaga we bó kɔn siká dó.

⁵ É zé kpo lɛ́ɛ gbɔn alɔgan lɛ́ɛ mɛ, ɖo gbǎ ɔ́ sín akpáxwé lɛ́ɛ, bó nɔ́ dó zé gbǎ ɔ́ ná.

⁶ É zé siká akú dó bló nusú bó sɔ́ ɖó gbǎ ɔ́ nu, ga tɔn ɖó mɛ̌tlu ɖokpó ɛnɛvlɔ́ɖó jɛ jí, bɔ gblǒ tɔn ɖó mɛ̌tlu ɖokpó é hwe ɛnɛvlɔ́ɖó.

⁷ É zé siká dó tun wɛnsagun susunɔ we ɖó nusú ɔ́ sín tó we jí ɖo gblǒ we lɛ́ɛ jí.

⁸ Wɛnsagun susunɔ we lɛ́ɛ kpó nusú ɔ́ kpó ɖo bǔ; wɛnsagun susunɔ ɔ́ ɖokpó ɖo gbǎ nusú ɔ́ jí ɖo gblǒ ɖokpó jí, bɔ wegɔ́ ɔ́ ɖo gblǒ ɖě ɔ́ jí.

⁹ Wɛnsagun susunɔ lɛ́ɛ kpan nukɔn yěɖée ɖo nusú ɔ́ ta nu, bó ɖo nusú ɔ́ kpɔ́n wɛ, bó kɛ awa yětɔn dó jɔ mɛ.

Távo e jí è nǎ nɔ́ bɛ́ wɔ̌xúxú e è nǎ Mawu lɛ́ɛ ɖó é

¹⁰ Besalɛli zé kasyatín dó bló távo ɖokpó ná; ga tɔn ɖó mɛ̌tlu ɖokpó, gblǒ tɔn ɖó mɛ̌tlu vlɔ́ bɔ jǐ yiyi tɔn ɖó mɛ̌tlu ɖokpó é hwe ɛnɛvlɔ́ɖó.

¹¹ É kɔn siká akú dó távo ɔ́ bǐ, bó zé siká akú dó bló tó ná lɛ́ɛ lɛ́ lɛ̌ dó bǐ.

¹² É bló tó n'i lɛ́ lɛ̌ dó, bɔ tó ɔ́ sín gblǒ nyí alɔví ɛnɛ sín gblǒ, bɔ é kɔn siká lɛ́ lɛ̌ dó bǐ.

¹³ É bló sikálɔgan ɛnɛ, bó fɔ ɖó távo ɔ́ sín zwe ɛnɛ lɛ́ɛ jí, ɖo afɔ tɔn ɛnɛ lɛ́ɛ wú.

¹⁴ Alɔgan lɛ́ɛ nɔ tó lɛ́ɛ kpá, bɔ è bɛ̌ kasyakpo we lɛ́ɛ d'é mɛ, bó nɔ́ dó zé távo ɔ́ ná.

¹⁵ É kpa kasyakpo lɛ́ɛ bó kɔn siká dó, bɔ è nɔ dó zé távo ɔ́ ná.

¹⁶ É bló nǔzínzán e è ɖǒ ná bɛ́ ɖó távo ɔ́ jí lɛ́ɛ: gannúgbɛ́jɛ́, kɔ́fu, zɛ̌n kpódó sinnugannú kpó, bɔ è nɔ zán ahan biba hwenu. Siká akú wɛ é sɔ́ dó bló nǔzínzán énɛ́ lɛ́ɛ ná.

Zogbɛ́nhɛnnú alatɛ́nwenɔ

¹⁷ Besalɛli zé siká akú dó bló zogbɛ́nhɛnnú ɖokpó ná, bɔ é ɖó ala tɛ́nwe; é ɖó cícá ǎ, bǐ ɖo bǔte bɔ afɔ tɔn, ala tɔn, folówa tɔn lɛ́ɛ, nǔ e mɛ folówa nɔ tɔ́n sín lɛ́ɛ, folówa tɔn lɛ́ɛ kpódó folówa e ma tɔ́n ǎ lɛ́ɛ kpó bǐ ɖo bǔte.

¹⁸ Ala ayizɛ́n gosín zogbɛ́nhɛnnú dodó ɔ́ wú; atɔn ɖo akpá ɖokpó xwé, bɔ atɔn ɖo akpá ɖě ɔ́ xwé.

¹⁹ Nǔ e mɛ folówa nɔ tɔ́n sín lɛ́ɛ atɔn kpó folówa e ma tɔ́n ǎ lɛ́ɛ kpó, kpó folówa lɛ́ɛ kpó nɔ ala lɛ́ɛ ɖokpó ɖokpó jí. Nǔ e mɛ folówa tɔ́n sín lɛ́ɛ cí atínsínsɛ́n e è nɔ ylɔ́ ɖɔ amadi ɔ́ ɖɔhun.

²⁰ Folówa ɛnɛ cí atínsínsɛ́n e è nɔ ylɔ́ ɖɔ amadi ɔ́ ɖɔhun, bó ɖo zogbɛ́nhɛnnú dodó ɔ́ wú, bɔ nǔ e mɛ folówa nɔ tɔ́n sín lɛ́ɛ kpó folówa tɔn lɛ́ɛ kpó ɖo yě wú.

²¹ Nǔ e mɛ folówa nɔ tɔ́n sín ɔ́ ɖokpó ɖokpó nɔ ala ayizɛ́n e tɔ́n sín zogbɛ́nhɛnnú dodó ɔ́ wú lɛ́ɛ ɖokpó ɖokpó glɔ́.

²² Nǔ e mɛ folówa nɔ tɔ́n sín lɛ́ɛ kpó ala lɛ́ɛ kpó ɖo bǔte; siká akú wɛ è dǒ tun bǐ ná.

²³ É zé siká akú dó bló zogbɛ́nhɛnnú ɔ́ sín zogbɛ́n tɛ́nwe lɛ́ɛ kpó nǔ e è nɔ dó bló myɔ ɔ́ ɖó ná lɛ́ɛ kpó, kpódó nǔ e mɛ afín nɔ kɔn nyi lɛ́ɛ kpó.

²⁴ Siká akú kilóo gban wɛ é dó bló zogbɛ́nhɛnnú ɔ́ kpódó nǔ e ɖ'é wú lɛ́ɛ bǐ kpó.

Vɔ̌sákpe e jí è nɔ dó atínkɛn wǎnnɔ zo ɖe é

²⁵ Besalɛli zé kasyatín dó bló vɔ̌sákpe ɖokpó, bó nɔ́ dó zǎlínkpɔ́n zo ɖ'é jí. Akpáxwé tɔn lɛ́ɛ bǐ ɖó jlɛ̌ ɖokpó ɔ́; ɖokpó ɖokpó sín ga nyí mɛ̌tlu vlɔ́; vɔ̌sákpe ɔ́ sín jǐ yiyi nyí mɛ̌tlu ɖokpó; zo tɔn ɛnɛ lɛ́ɛ tɔ́n ganjí, bɔ zo lɛ́ɛ kpó vɔ̌sákpe ɔ́ kpó ɖo bǔ.

²⁶ É kɔn siká akú dó gbɔn fí bǐ; é kɔn dó tó tɔn ɖo aga, bó kɔn dó zo tɔn e tɔ́n lɛ́ɛ, bó kɔn dó akpáxwé tɔn ɛnɛ lɛ́ɛ lɛ́ dó. É kɔn siká dó tó n'i lɛ́ lɛ̌ dó.

²⁷ É bló sikálɔgan we we ɖó ɖisí amyɔ nú vɔ̌sákpe ɔ́, ɖo do. É fɔ kpo gaga gbɔn alɔgan lɛ́ɛ mɛ, bɔ è nɔ dó zé vɔ̌sákpe ɔ́ ná.

²⁸ Kasyatín wɛ é kpa dó bló kpo gaga lɛ́ɛ ná, bó kɔn siká dó.

²⁹ É ɖa ami e è nɔ sá nú mɛ dó ɖe mɛ ɖó vo nú Mawu ɔ́ kpódó nǔsáwǔ wǎnɖagbenɔ akú kpó; é ɖa lě e céluɖatɔ́ nɔ́ ɖa célu gbɔn é.