Tíntɔ́n 34 - MAWUXÓWÉMA

Awǐnnyatɛ yɔ̌yɔ́ lɛ́ɛ

¹ Mawu Mavɔmavɔ ɖɔ nú Mɔyízi ɖɔ: “Kpa awǐnnyatɛ we nú yě ní cí nukɔntɔn lɛ́ɛ ɖɔhun. Un ná wlán sɛ́n e ɖo nukɔntɔn e a hɛn gba lɛ́ɛ jí ɔ́ dó yě jí.

² Sɔ́ nǔ ɖ'ayǐ nú sɔ zǎnzǎn; a nǎ fɔ́n zǎn bó ná xá Sinayíi só ɔ́ jí, bó nɔ te kpɔ́n mì ɖo fínɛ́.

³ Mɛ ɖěbǔ ní má xwedó we ó, è ma ka mɔ mɛ ɖěbǔ ɖo só ɔ́ jí ó, è ma mɔ kanlin ɖěbǔ ɖo fínɛ́: gbɔ̌ kpó nyibú kpó ɖě ní má wá ɖu nǔ ɖo só ɔ́ kpá ó.”

⁴ Énɛ́ ɔ́, Mɔyízi kpa awǐnnyatɛ we nukɔntɔn lɛ́ɛ ɖɔhun, é fɔ́n zǎn bó xá Sinayíi só ɔ́ jí lě e Mawu Mavɔmavɔ ɖɔ gbɔn n'i é; é hɛn awǐnnyatɛ we lɛ́ɛ alɔ mɛ.

⁵ Mawu Mavɔmavɔ jɛ te ɖo akpɔ́kpɔ́ mɛ, bó wá nɔ te akpá tɔn, bó ɖɔ mɛ e é nyí ɔ́ nú Mɔyízi.

⁶ Mawu Mavɔmavɔ nɔ gbɔn Mɔyízi nukɔn, bó nɔ́ ɖɔ: “Un nyí Mawu Mavɔmavɔ, un nyí Mawu nǔbláwǔkúnúmɛtɔ́, Mawu xomɛfátɔ́, un nɔ yá wǔ sin xomɛ ǎ, un nyí Mawu xomɛnyɔ́tɔ́, un nyí Mawu gbejínɔtɔ́.

⁷ Un nɔ nyɔ́ xomɛ dó gbɛtɔ́ lɛ́ɛ wú káká yi jijimɛ afatɔ́n (1.000) jí, un nɔ sɔ́ nǔ nyanya e è wa lɛ́ɛ, tónú e è ma se ǎ lɛ́ɛ, kpódó hwɛ e è hu lɛ́ɛ kpó kɛ mɛ. Un ka nɔ mɔ mɛ e hu hwɛ ɔ́ dó mɔ hwɛjijɔnɔ ǎ. Hwɛ e vǐ tɔ́ lɛ́ɛ hu ɔ́ vǐ yětɔn lɛ́ɛ ná sún sin tɔn, vǐvú yětɔn lɛ́ɛ, vitikli yětɔn lɛ́ɛ kpó kpaba yětɔn lɛ́ɛ kpó ná sún sin tɔn.”

⁸ Ée Mɔyízi se xó énɛ́ lɛ́ɛ tlóló ɔ́, é jɛ kpo bo ɖe kɔ́,

⁹ bó ɖɔ: “Aklúnɔ, nú a nǎ fɛ́nú towe mì nǔgbó hǔn, kɛnklɛ́n bó wá nɔ tɛ́ntin mǐtɔn; togun élɔ́ ɔ́, tótlítɔ́ wɛ é nyí. Lo ɔ́, sɔ́ hwɛ e mǐ hu lɛ́ɛ kpódó nǔ e mǐ wa nyi do lɛ́ɛ kpó kɛ mǐ, bó yí mǐ dó yí togun towe.”

Mawu lɛ́ vɔ́ akɔ jɛ xá Izlayɛ́li ví lɛ́ɛ

¹⁰ Mawu Mavɔmavɔ ɖɔ nú Mɔyízi ɖɔ: “Đǒtó! Un ná jɛ akɔ xá mi; un ná bló nǔjíwǔ lɛ́ɛ ɖo togun ɔ́ bǐ nukún mɛ; nǔjíwǔ e è ma mɔ ɖo fí ɖěbǔ ɖo ayǐkúngban ɔ́ jí kpɔ́n gbeɖé ǎ, bó má ká mɔ ɖo akɔta ɖěbǔ mɛ kpɔ́n gbeɖé ǎ wɛ nǎ bló. Énɛ́ ɔ́, togun e tɛ́ntin a ɖe ɔ́ ná mɔ nyɛ Mawu Mavɔmavɔ ɔ́ sín nǔwiwa lɛ́ɛ; hwi jí wɛ un ka ná bló nǔdábaɖa lɛ́ɛ gbɔn.

¹¹ “Mi xwedó nǔ e ɖɔ nú mi wɛ un ɖe égbé ɔ́ ganjí ɔ́, un ná nya Amɔliti lɛ́ɛ, Kanáa ví lɛ́ɛ, Hitíti lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó ɖo nukɔn mitɔn.

¹² Mi cɔ́ miɖée, bó má jɛ akɔ xá to e mɛ ná byɔ́ wɛ mi ɖe ɔ́ mɛ nu lɛ́ɛ ó, yě táá wá nyí mɔ nú mi.

¹³ É nyɔ́ wa ɔ́, mi ná flí vɔ̌sákpe yětɔn lɛ́ɛ xwe, mi ná gba awǐnnya e yě tun te bó nɔ sɛn lɛ́ɛ, bó ná sɛ́n vodún Acela yětɔn lɛ́ɛ.

¹⁴ Mi ná ɖe kɔ́ nú vodún ɖě ǎ, ɖó nyɛ Mawu Mavɔmavɔ sín nyǐkɔ nyí ‘Wǔhwinhwan’ , un jló ɖɔ mɛ e nyí ce lɛ́ɛ ní sɛn nǔ ɖěvo ǎ.

¹⁵ Mi cɔ́ miɖée, bó má jɛ akɔ xá to ɔ́ mɛ nu lɛ́ɛ ó, yě táá wá dɔn mi bɔ mi ná ɖidó vodún yětɔn lɛ́ɛ sɛn gbé, bó ná nɔ́ xwlé vɔ̌sánú vodún yětɔn lɛ́ɛ, bó ná nɔ́ ɖu kanlin e yě hu nú vodún lɛ́ɛ sín lan.

¹⁶ Mi táá wá da vǐ yětɔn nyɔ̌nu lɛ́ɛ nú vǐ mitɔn súnnu lɛ́ɛ, bɔ nú vǐ yětɔn nyɔ̌nu lɛ́ɛ ɖo vodún yětɔn lɛ́ɛ sɛn wɛ ɔ́, yě ná dɔn vǐ mitɔn súnnu lɛ́ɛ, bɔ yě ná sɛn vodún yětɔn lɛ́ɛ xá yě.

¹⁷ “Mi ma sínsín gan dó bló vodún ɖě ná bó sɛn ó.

¹⁸ “Mi ná ɖu wɔ̌xúxú e mɛ è ma dó tɔ́n ǎ é sín xwe. Azǎn tɛ́nwe wɛ è sɔ́ ɖó te ɖo Abibu sun ɔ́ mɛ bɔ mi ná ɖu xwe ɔ́ ná ɔ́. Mi ná ɖu wɔ̌xúxú e mɛ è ma dó tɔ́n ǎ é lě e un ɖɔ gbɔn nú mi é. Đó Abibu sun ɔ́ mɛ wɛ mi tɔ́n sín Ejípu.

¹⁹ “Nukɔngbéví súnnu lɛ́ɛ bǐ wɛ nyí ce; nukɔngbéví asú kanlin mitɔn lɛ́ɛ tɔn lɔ ɖ'é mɛ; nyibú, gbɔ̌ abǐ lɛ̌ngbɔ́ sín nukɔngbéví asú lɛ́ɛ bǐ wɛ è nǎ sɔ́ ɖó vo nú mì.

²⁰ Nú é ká nyí tócí sín nukɔngbéví wɛ ɔ́, mi ná zé gbɔ̌ví dó ɖyɔ́ ná, nú mi ma ka ɖyɔ́ ǎ ɔ́, mi ná gba zogúdo n'i, bó hu i, nukɔngbéví súnnu e ɖo mi mɛ lɛ́ɛ ɔ́, mi ná xɔ gbɛ nú yě. “Mi ná zɔn asígbá alɔgbá wá gɔ̌n ce ǎ.

²¹ “Mi ná nɔ wa azɔ̌ nú azǎn ayizɛ́n, amɔ̌, azǎn tɛ́nwegɔ́ ɔ́ gbe ɔ́, mi ná gbɔjɛ́. É ná bó nyí gle hwenu, abǐ nǔkún-yiya hwenu ɔ́, mi ná gbɔjɛ́.

²² “Mi ná ɖu Pantekótuxwe ɔ́ ɖo blěe nukɔntɔn ɔ́ yiya hwenu, bɔ xwe fífó ɔ́, mi ná ɖu nǔkún-yiya sín xwe.

²³ “Xwewú xwewú ɔ́, súnnu e ɖo togun ɔ́ mɛ lɛ́ɛ bǐ ná nɔ wá nyɛ Mawu Mavɔmavɔ, Mawu Izlayɛ́li tɔn ɔ́ nukɔn azɔn atɔn.

²⁴ Un ná yí ayǐkúngban sín akɔta e lɛ́ dó mi lɛ́ɛ sí, bɔ to mitɔn ná gbló ada. Azɔn atɔn e mi ná wá gɔ̌n ce ɖo xwe ɖokpó mɛ ɔ́, mɛ ɖěbǔ ná glá ɖɔ émí ná klá jɛ to mitɔn nu hwe énɛ́ ɔ́ nu ǎ.

²⁵ “Mi ná zé wɔ̌xúxú e mɛ è dǒ tɔ́n é gɔ́ nú kanlin e è hu nú mì ɔ́ sín hun, bó ná xwlé mì ǎ. Ayǐ ná hɔ́n dó kanlin e è hu dó sá vɔ̌ nú mì ɖó Dǐndínwáyixwe ɔ́ tamɛ ɔ́ sín lan ǎ.

²⁶ Mi ná zé nǔ nukɔntɔn e gle mitɔn lɛ́ɛ ná ɔ́ wá nyɛ Mawu Mavɔmavɔ, Mawu mitɔn xwé gbe. Mi ka ná ɖa gbɔ̌ví ɖo nɔ tɔn sín anɔ̌sin mɛ ǎ.”

²⁷ Mawu Mavɔmavɔ lɛ́ ɖɔ nú Mɔyízi ɖɔ: “Wlǎn xó énɛ́ lɛ́ɛ, ɖó xó énɛ́ lɛ́ɛ wɛ un ná xwedó bó ná jɛ akɔ xá hwi kpódó Izlayɛ́li togun ɔ́ kpó.”

²⁸ Mɔyízi nɔ fínɛ́ kpódó Mawu Mavɔmavɔ kpó xɔ kéze kanɖé (40) zǎn kanɖé (40). É ɖu nǔ ǎ, é ká nu sin ǎ. Mawu Mavɔmavɔ wlán sɛ́n wǒ lɛ́ɛ ɖó awǐnnyatɛ lɛ́ɛ jí. Nǔ e jí akɔjijɛ ɔ́ jínjɔ́n lɛ́ɛ nɛ́.

Mɔyízi lɛ́ kɔ sín só ɔ́ jí

²⁹ Mɔyízi jɛ te sín Sinayíi só ɔ́ jí, bó hɛn awǐnnyatɛ akɔjijɛ tɔn lɛ́ɛ alɔ mɛ. Ée é ɖɔ xó xá Mawu ɔ́, nukún mɛ tɔn ɖo kínkɔ́n wɛ, é ká tunwun ǎ.

³⁰ Aalɔ́ɔn kpódó Izlayɛ́li ví lɛ́ɛ bǐ kpó mɔ ɖɔ Mɔyízi sín nukún mɛ ɖo kínkɔ́n wɛ; énɛ́ ɔ́ wú wɛ yě ma sɛkpɔ́ ɛ ǎ.

³¹ Lo ɔ́, Mɔyízi ylɔ́ yě, bɔ Aalɔ́ɔn kpódó gǎn e ɖo togun ɔ́ nu lɛ́ɛ bǐ kpó yi gɔ̌n tɔn, bɔ é ɖɔ xó nú yě.

³² Énɛ́ ɔ́ gúdo ɔ́, Izlayɛ́li ví ɖě lɛ́ɛ bǐ sɛkpɔ́ ɛ, bɔ é ɖɔ nǔ e Mawu Mavɔmavɔ ɖɔ n'i ɖo Sinayíi só jí lɛ́ɛ bǐ nú yě.

³³ Ée Mɔyízi ɖɔ xó nú yě fó ɔ́, é sɔ́ avɔ bo cyɔ́n nukún mɛ.

³⁴ Bɛ́ sín hwenɛ́nu ɔ́, nú Mɔyízi xwe Mawu Mavɔmavɔ gɔ́n, bó ná ɖɔ xó xá ɛ ɔ́, é nɔ́ ɖe avɔ ɔ́ sín nukún mɛ. Nú é lɛ́ kɔ sín Mawu Mavɔmavɔ gɔ́n bó ɖo nǔ e Mawu Mavɔmavɔ ɖɔ yě ní wa ɔ́ wlí ɖɔ nú Izlayɛ́li ví lɛ́ɛ wɛ ɔ́,

³⁵ yě nɔ́ ɖo kɔ́n e kɔ́n wɛ nukún mɛ tɔn ɖe ɔ́ kpɔ́n wɛ. Énɛ́ ɔ́ gúdo ɔ́, é nɔ́ sɔ́ avɔ ɔ́ cyɔ́n nukún mɛ, bó nɔ́ nɔ mɔ̌ káká jɛ gbe e gbe é ná lɛ́ kɔ yi ɖɔ xó xá Mawu Mavɔmavɔ é.