Tíntɔ́n 25 - MAWUXÓWÉMA

MAWU ĐƆ LĚ E È NǍ SÁ XWÉ TƆN GBƆN É ( 25—31 ) Nǔ e Izlayɛ́li ví lɛ́ɛ ná ná, bɔ è nǎ dó gbá goxɔ ɔ́ ná lɛ́ɛ é

¹ Mawu Mavɔmavɔ ɖɔ nú Mɔyízi ɖɔ:

² “Đɔ nú Izlayɛ́li ví lɛ́ɛ ɖɔ yě ní hɛn nǔ wá ná mì. Mɛ e ɖó jlǒ bó hɛn nǔ wá nú mì lɛ́ɛ sí wɛ mi ná yí ɖe.

³ Nǔ e mi ná yí ɖo yě sí lɛ́ɛ ɖíe: siká, kpatágan, ganvɔ,

⁴ avɔ kwlésinnɔ, avɔ vɔvɔ, avɔ vɔvɔ cɛ́cɛ́, lɛ̌ɛnkanvɔ ɖagbe ɖagbe kpódó gbɔ̌fúnvɔ kpó.

⁵ Mi ná yí agbonyú e è sá nǔ vɔvɔ dó ɔ́, anyǔ tlitli, kasyatín,

⁶ ami e è nǎ dó tá zogbɛ́n ná ɔ́, nǔhwɛ́nkún e è nǎ nɔ kɔn dó nǔsáwǔ e è nɔ ɖó ta nú mɛ é, kpódó ée è nǎ nɔ́ kɔn dó célu mɛ ɔ́ kpó ɖo yě sí.

⁷ Mi ná yí awǐnnya ɖagbe ɖagbe e è nɔ ylɔ́ ɖɔ Onísi ɔ́ kpódó awǐnnya ɖagbe ɖagbe ɖěvo lɛ́ɛ kpó ɖo yě sí. Awǐnnya énɛ́ lɛ́ɛ wɛ è nǎ nɔ́ dó ɖó acɔ́ nú vɔ̌sánú-xwlémawutɔ́ ɖaxó ɔ́ sín awu kpódó awu e é nɔ dó ɖó akɔ́nnu ɔ́ kpó.

⁸ Yě ná bló goxɔ ɖokpó nú mì, bɔ un ná nɔ yě mɛ.

⁹ Yě ná bló goxɔ ɔ́ kpódó nǔ e ná nɔ mɛ lɛ́ɛ bǐ kpó, bɔ é ná sɔgbe xá ée un ná xlɛ́ we é.”

Akɔjijɛgbá Mawu tɔn

¹⁰ “Izlayɛ́li ví lɛ́ɛ ná zé kasyatín dó bló gbǎ ɖokpó ná; gbǎ ɔ́ ga tɔn ná ɖó mɛ̌tlu ɖokpó ɛnɛvlɔ́ɖó jɛ jí, bɔ gblǒ tɔn ná ɖó mɛ̌tlu ɖokpó é hwe ɛnɛvlɔ́ɖó, bɔ jǐ yiyi tɔn ná ɖó mɛ̌tlu ɖokpó é hwe ɛnɛvlɔ́ɖó.

¹¹ A nǎ kɔn siká akú dó; a nǎ kɔn siká gbɔn xomɛ kpódó gǔdo kpó, bó ná kɔn gbɔn tó tɔn.

¹² A nǎ blǒ sikálɔgan ɛnɛ, bó ná fɔ ɖó zwe ɛnɛ lɛ́ɛ jí ɖo do; we ná nɔ akpá ɖokpó xwé, bɔ we ná nɔ akpá ɖě ɔ́ xwé.

¹³ A nǎ kpa kasyatín sín kpo gaga we, bó ná kɔn siká dó.

¹⁴ A nǎ zě kpo lɛ́ɛ gbɔn alɔgan lɛ́ɛ mɛ ɖo gbǎ ɔ́ sín akpá xwé lɛ́ɛ, bɔ è nǎ nɔ dó zé.

¹⁵ Kpo lɛ́ɛ ná nɔ alɔgan lɛ́ɛ mɛ; è nǎ nɔ́ ɖe yě síin ǎ.

¹⁶ Un ná ná we atɛ we e jí sɛ́n e un dó jɛ akɔ xá mi lɛ́ɛ ɖe é, bɔ a nǎ bɛ́ dó gbǎ ɔ́ mɛ.

¹⁷ “A nǎ zé siká akú dó bló nusú dó gbǎ ɔ́ nu, nusú ɔ́, ga tɔn ná ɖó mɛ̌tlu ɖokpó ɛnɛvlɔ́ɖó jɛ jí, bɔ gblǒ tɔn ná ɖó mɛ̌tlu ɖokpó é hwe ɛnɛvlɔ́ɖó.

¹⁸ A nǎ zé siká dó tun wɛnsagun susunɔ we ɖó nusú ɔ́ sín tó we jí, ɖo gblǒ we lɛ́ɛ jí.

¹⁹ Wɛnsagun susunɔ ɔ́ ɖokpó ná ɖo gbǎnusú ɔ́ jí ɖo gblǒ ɖokpó jí, bɔ wegɔ́ ɔ́ ná ɖo gblǒ ɖě ɔ́ jí.

²⁰ Wɛnsagun susunɔ lɛ́ɛ ná kpan nukɔn yěɖée, ɖo nusú ɔ́ ta nu bó ná ɖo nusú ɔ́ kpɔ́n wɛ, bó ná kɛ awa yětɔn lɛ́ɛ ɖó jɔ mɛ.

²¹ Un ná ná we atɛ we e jí sɛ́n e un dó jɛ akɔ xá mi lɛ́ɛ ɖe é, bɔ a nǎ bɛ́ dó gbǎ ɔ́ mɛ, bó ná sɔ́ nusú ɔ́ ɖ'é nu.

²² Fínɛ́ wɛ un ná nɔ́ kpé we ɖe, ɖo gbǎ ɔ́ sín nusú jí, ɖo wɛnsagun we lɛ́ɛ tɛ́ntin. Sɛ́n e a nǎ dó nú Izlayɛ́li ví lɛ́ɛ ɔ́, fínɛ́ wɛ un ná ɖɔ bǐ sɛ́ dó we sín.”

Távo e jí è nǎ nɔ bɛ́ wɔ̌xúxú e è nǎ Mawu lɛ́ɛ ɖó é

²³ “A nǎ zě kasyatín dó bló távo ɖokpó ná. Ga tɔn ná ɖó mɛ̌tlu ɖokpó, gblǒ tɔn ná ɖó mɛ̌tlu vlɔ́, bɔ jǐ yiyi tɔn ná ɖó mɛ̌tlu ɖokpó é hwe ɛnɛvlɔ́ɖó.

²⁴ A nǎ kɔn siká akú dó távo ɔ́ bǐ, bó ná zé siká akú dó ɖótó ná lɛ́ lɛ̌ dó bǐ.

²⁵ A nǎ ɖótó n'i lɛ́ lɛ̌ dó, bɔ tó ɔ́ sín gblǒ ná nyí alɔví ɛnɛ sín gblǒ, bɔ a nǎ kɔn siká lɛ́ lɛ̌ dó bǐ.

²⁶ A nǎ bló sikálɔgan ɛnɛ, bó ná fɔ ɖó távo ɔ́ sín zwe ɛnɛ lɛ́ɛ jí ɖo afɔ tɔn ɛnɛ lɛ́ɛ wú.

²⁷ Alɔgan lɛ́ɛ ná nɔ tó lɛ́ɛ kpá, bɔ è nǎ bɛ́ kasyakpo gaga we d'é mɛ, bó ná nɔ dó zé távo ɔ́ ná.

²⁸ A nǎ kpa kasyakpo lɛ́ɛ, bó ná kɔn siká dó, bɔ è nǎ nɔ́ dó zé távo ɔ́ ná.

²⁹ A nǎ zé siká akú dó bló nǔ e è nǎ nɔ́ zán ɖo távo ɔ́ jí lɛ́ɛ: gannúgbɛ́jɛ́, kɔ́fu, zɛ̌n, kpódó sinnugannú kpó, bɔ è nǎ nɔ́ zán yě ahan biba hwenu.

³⁰ A nǎ nɔ́ bɛ́ wɔ̌xúxú e è nɔ ná mì lɛ́ɛ ɖó távo ɔ́ jí; wɔ̌xúxú ná nɔ́ hán ɖo távo ɔ́ jí gbeɖé ǎ.”

Zogbɛ́nhɛnnú alatɛ́nwenɔ

³¹ “A nǎ zě siká akú dó bló zogbɛ́nhɛnnú ɖokpó ná, bɔ é ná ɖó ala tɛ́nwe. É ná ɖó cícá ǎ, bǐ ná ɖo bǔte; afɔ tɔn, ala tɔn lɛ́ɛ, folówa tɔn lɛ́ɛ, nǔ e mɛ folówa nɔ tɔ́n sín lɛ́ɛ kpódó folówa e ma tɔ́n ǎ lɛ́ɛ kpó bǐ ná ɖo bǔte.

³² Ala ayizɛ́n ná gosín zogbɛ́nhɛnnú dodó ɔ́ wú; atɔn ná ɖo akpá ɖokpó xwé, bɔ atɔn ná ɖo akpá ɖě ɔ́ xwé.

³³ Nǔ e mɛ folówa nɔ tɔ́n sín lɛ́ɛ atɔn, kpódó folówa e ma tɔ́n ǎ lɛ́ɛ kpó, kpódó folówa lɛ́ɛ kpó ná nɔ ala lɛ́ɛ ɖokpó ɖokpó jí. Nǔ e mɛ folówa nɔ tɔ́n sín lɛ́ɛ ná cí atínsínsɛ́n e è nɔ ylɔ́ ɖɔ amadi ɔ́ ɖɔhun.

³⁴ Folówa ɛnɛ ná cí atínsínsɛ́n e è nɔ ylɔ́ ɖɔ amadi ɔ́ ɖɔhun, bó ná ɖo zogbɛ́nhɛnnú dodó ɔ́ wú, bɔ nǔ e mɛ folówa nɔ tɔ́n sín lɛ́ɛ kpó folówa tɔn lɛ́ɛ kpó ná ɖo yě wú.

³⁵ Nǔ e mɛ folówa nɔ tɔ́n sín ɔ́ ɖokpó ɖokpó ná nɔ ala ayizɛ́n e tɔ́n sín zogbɛ́nhɛnnú dodó ɔ́ wú lɛ́ɛ ɖokpó ɖokpó glɔ́.

³⁶ Nǔ e mɛ folówa nɔ tɔ́n sín lɛ́ɛ kpó ala lɛ́ɛ kpó ná ɖo bǔte. Siká akú wɛ è nǎ dó tun bǐ ná.

³⁷ A nǎ bló zogbɛ́n tɛ́nwe, bɔ è nǎ bɛ́ yě ɖó zogbɛ́nhɛnnú ɔ́ jí; è nǎ tá zogbɛ́n lɛ́ɛ bɔ yě ná nɔ́ ɖi ɖɛ̌ dó nukɔn.

³⁸ Nǔ e è nɔ dó bló myɔ ɔ́ ɖó ná lɛ́ɛ kpódó nǔ e mɛ afín nɔ kɔn nyi lɛ́ɛ kpó bǐ wɛ è nǎ sɔ́ siká akú dó bló.

³⁹ Siká akú kilóo gban wɛ è nǎ dó bló zogbɛ́nhɛnnú ɔ́, kpódó nǔ e ɖ'é wú lɛ́ɛ bǐ kpó.

⁴⁰ Mɔyízi, kpɔ́n ganjí bó bló, bónú é sɔgbe xá ée un xlɛ́ we ɖo só jí fí din é.”