Ɛsitɛ́ɛ 8 - MAWUXÓWÉMA

¹ Gbe énɛ́ gbe ɖokpó ɔ́, axɔ́sú Zɛ̌ɛzɛsi sɔ́ Hamáa, kɛntɔ́ Jwifu lɛ́ɛ tɔn sín xwé ná axɔ́si Ɛsitɛ́ɛ. Ɛsitɛ́ɛ ɖɔ nú axɔ́sú ɔ́ ɖɔ Maadocée ɔ́, mɛ émítɔn wɛ, bɔ axɔ́sú ɔ́ ylɔ́ ɛ bɔ é wá.

² Ée é wá ɔ́, axɔ́sú ɔ́ ɖe alɔgan tɔn e é yí sín Hamáa sí ɔ́ sín alɔ, bo sɔ́ dó nú Maadocée. Ɛsitɛ́ɛ ka sɔ́ Maadocée ɖó Hamáa sín xwé nu.

Axɔ́sú ɔ́ ɖe gbeta ɖé tɔ́n nú ɖagbe Jwifu lɛ́ɛ tɔn

³ Énɛ́ ɔ́ gúdo ɔ́, Ɛsitɛ́ɛ jɛ kpo ɖo axɔ́sú ɔ́ sá mɛ kpó avǐ kpó, bó sa vo n'i ɖɔ é ní gbɛ́ tito baɖabaɖa e Hamáa e tɔ́n sín Agagi kún mɛ ɔ́ ɖó ayǐ bó ná dó sú Jwifu lɛ́ɛ sín kún dó é.

⁴ Đěe é ɖɔ mɔ̌ ɔ́, axɔ́sú ɔ́ dlɛ́n sikákpogɛ tɔn dó e,

⁵ bɔ Ɛsitɛ́ɛ sí te bo ɖɔ n'i ɖɔ: “Sɛ́mɛɖó, nú é jló mɛ ɔ́, nú è nyɔ́ xomɛ dó wǔ ce hǔn, nú è mɔ ɖɔ é sɔgbe nukún mɛtɔn mɛ hǔn, nú è yí wǎn nú mì hǔn, è nǐ wlǎn wěma ɖokpó bó dó gbɛ́ nǔ e Hamáa Hamumɛdata ví e tɔ́n sín Agagi kún mɛ ɔ́ wlán é; wěma e é wlán bó ɖɔ è nǐ sú Jwifu e gbɔn tokpɔn mɛtɔn mɛ lɛ́ɛ bǐ sín kún dó é.

⁶ Nú awě mɔ̌hunkɔtɔn xo togun ce ɔ́, nɛ̌ un ná sixú ɖó akɔ́n nu gbɔn? Nɛ̌ un ka sixú ɖo te bɔ è nǎ sú togun ce sín kún dó gbɔn?”

⁷ Énɛ́ ɔ́, axɔ́sú ɔ́ ɖɔ nú Ɛsitɛ́ɛ kpó Maadocée kpó ɖɔ: “Mi ɖótó. Un zɔ́n bɔ è dó kan kɔ nú Hamáa bo hu, ɖó é ɖo kúdán gblɔ́n nú Jwifu lɛ́ɛ wɛ, bó sɔ́ xwé tɔn dó alɔ mɛ nu we, Ɛsitɛ́ɛ.

⁸ Amɔ̌, wěma e è wlǎn dó nyǐkɔ ce mɛ bó sɔ́ alɔgan ce sín wuntun tɛ jí ɔ́, un sɔ́ sixú húzú gbeɖé ǎ. É ká ɖo mɔ̌ có midɛɛ ɔ́, mi sixú wlán wěma ɖokpó lě e é jló mi gbɔn ɔ́ nú ɖagbe Jwifu lɛ́ɛ tɔn. Mi wlán wěma ɔ́ dó nyǐkɔ ce mɛ, bó sɔ́ alɔgan ce sín wuntun tɛ ji.”

⁹ Gbe nɛ́ gbe e ɖo azǎn ko-nukún-atɔngɔ́ ɔ́ nyí wɛ ɖo sun atɔngɔ́ ɔ́ e è nɔ ylɔ́ ɖɔ Siwáni-sun ɔ́ mɛ ɔ́, è ylɔ̌ wěgbójínɔtɔ́ axɔ́sú ɔ́ tɔn lɛ́ɛ bɔ yě wlǎn wěma lě e Maadocée ɖɔ gbɔn nú yě é. É sɛ́ wěma ɔ́ dó Jwifu lɛ́ɛ, bó sɛ́ dó tokpɔngán lɛ́ɛ kpó gǎn hɔn-yitɔ́ lɛ́ɛ kpó gbɔn tokpɔn kantɔn tɛ́nwe (127) e ɖo axɔ́súɖuto ɔ́ mɛ lɛ́ɛ mɛ, bɛ́ sín Ɛndu káká yi Etiopíi. È wlǎn wěma lɛ́ɛ lě e tokpɔn ɖokpó ɖokpó nɔ́ wlán nǔ gbɔn é, bó wlán dó gbe e togun ɖokpó ɖokpó nɔ́ dó ɖo axɔ́súɖuto ɔ́ mɛ é mɛ, bó wlán dó gbe e Jwifu lɛ́ɛ nɔ́ dó é mɛ, bó wlán lě e yě nɔ́ wlán nǔ gbɔn é.

¹⁰ È wlǎn wěma ɔ́ dó axɔ́sú Zɛ̌ɛzɛsi sín nyǐkɔ mɛ, bó sɔ́ alɔgan tɔn sín wuntun tɛ jí. È bɛ̌ wěma lɛ́ɛ nú sɔ́xátɔ́ lɛ́ɛ bɔ yě xá sɔ́ e yě bɛ̌ sín axɔ́sú ɔ́ sín sɔ́kpó mɛ lɛ́ɛ jí, bó yi má wěma lɛ́ɛ.

¹¹ È wlǎn dó wěma lɛ́ɛ mɛ ɖɔ: “Axɔ́sú ɔ́ ná gbe Jwifu e ɖo toxo ɖokpó ɖokpó mɛ ɖo axɔ́súɖuto ɔ́ mɛ lɛ́ɛ bǐ, ɖɔ yě ní kplé bó hwlɛ́n gbɛ yětɔn. É ná gbe yě ɖɔ mɛ e ná hɛn alǐnnyánú bó ná tɔ́n ahwan yě lɛ́ɛ ɔ́, yě ná bó nyí akɔta ɖěbǔ nu hǔn; è nǐ gbo gbe yě, è nǐ hu yě gbɔn tokpɔn e ko sixú ɖo axɔ́súɖuto ɔ́ mɛ lɛ́ɛ bǐ mɛ. Yě sixú hu asi yětɔn lɛ́ɛ kpódó vǐ yětɔn lɛ́ɛ kpó bó bɛ́ dɔkun yětɔn lɛ́ɛ bǐ lɔ.

¹² Azǎn ɖokpó wɛ yě ná sɔ́ ɖó te tawun bó dó bló nǔ énɛ́ ɔ́ gbɔn tokpɔn axɔ́sú Zɛ̌ɛzɛsi tɔn lɛ́ɛ bǐ mɛ. Azǎn ɔ́ wɛ nyí azǎn wǒ-atɔngɔ́ ɔ́ ɖo sun wěwegɔ́ e è nɔ ylɔ́ ɖɔ Adáa ɔ́ mɛ é.

¹³ Gbeta e è ɖo nǎ jlá gbɔn tokpɔn ɖokpó ɖokpó mɛ ɔ́ wɛ ɖo wěma ɔ́ mɛ, bó ɖo ɖiɖɔ nú togun lɛ́ɛ bǐ wɛ ɖɔ Jwifu lɛ́ɛ ná ɖo gbesisɔ mɛ azǎn énɛ́ ɔ́ gbe bó ná fun ahwan xá kɛntɔ́ yětɔn lɛ́ɛ.”

¹⁴ Sɔ́xátɔ́ lɛ́ɛ yá wǔ hwlɛ́ndó lě e axɔ́sú ɔ́ ɖɔ gbɔn ɔ́ bó yi má wěma lɛ́ɛ, bɔ è jlǎ gbeta ɔ́ gbɔn Súzi tota ɔ́ bǐ mɛ.

¹⁵ Maadocée tɔ́n sín hɔn ɔ́ mɛ, bó dó axɔ́sú wu; awu ɔ́ ɖó hwɛkan fɛ́sinnɔ kpó wěwé kpó, bɔ axɔ́súgbákún e è sɔ́ siká dó bló ná ɔ́ ɖaxó ɖé ɖo ta tɔn. É dó awu ɖaxó ɖé, lɛ̌ɛnkanvɔ vɔvɔ cɛ́cɛ́ ɖé wɛ è dǒ tɔ awu ɔ́ ná. Ée mɛ e ɖo to ɔ́ mɛ lɛ́ɛ mɔ ɛ ɔ́, yě j'awǎ jɛ jí kpó xósúsú kpó.

¹⁶ Jwifu lɛ́ɛ ɔ́, nyɔ̌ná, xomɛhunhun kpó ɖuɖéjí kpó kɛ́ɖɛ́ mɛ yě ɖe.

¹⁷ Fí ɖěbǔ e gbeta axɔ́sú ɔ́ tɔn gbɔn ɖo tokpɔn ɖěbǔ mɛ ɖo toxo ɖěbǔ mɛ é ɔ́, Jwifu lɛ́ɛ bǐ nɔ j'awǎ; yě nɔ́ ylɔ́ agɔ̌ bó nɔ́ ɖu xwe; mɛ gěgé ɖo togun ɖé lɛ́ɛ mɛ, bó húzú Jwifu ɖó yě ɖo xɛsi ɖi nú Jwifu lɛ́ɛ wɛ.