Ɛsitɛ́ɛ 5 - MAWUXÓWÉMA

Ɛsitɛ́ɛ yi axɔ́sú ɔ́ gɔ́n

¹ Ée azǎn atɔn e yě sɔ́ ɖó te dó blá nu ɔ́ vɔ ɔ́, Ɛsitɛ́ɛ dó axɔ́si wu tɔn lɛ́ɛ, bó yi fí e axɔ́sú nɔ́ nɔ ɖo hɔn ɔ́ mɛ é, bó nɔ te ɖo kɔ́xota, ɖo axɔ́sú ɔ́ sín xɔ nukɔn. Axɔ́sú ɔ́ ká ɖo ayǐjínjɔ́n ɖo axɔ́súzinkpo tɔn jí ɖo xɔ mɛ, bó kpan nukɔn xɔli ɔ́.

² Ée é mɔ Ɛsitɛ́ɛ ɖo te ɖo kɔ́xota ɔ́, xomɛ hun i, bɔ é dlɛ́n sikákpogɛ e ɖo alɔ tɔn mɛ ɔ́ dó e. Ɛsitɛ́ɛ sɛkpɔ́ sikákpogɛ ɔ́, bo ɖó alɔ nuvínu tɔn.

³ Axɔ́sú ɔ́ kanbyɔ́ ɛ ɖɔ: “Nɛ̌ ká gbɔn nú we axɔ́si Ɛsitɛ́ɛ? Étɛ́ wɛ jló we? É ná bó nyí axɔ́súɖuto ce sín vlɔ̌ɖówe wɛ jló we ɔ́, un ná ná we.”

⁴ Ɛsitɛ́ɛ ka yí gbe n'i ɖɔ: “Sɛ́mɛɖó! Un ylɔ́ agɔ̌ ɖokpó dó mɛ ta mɛ; é ká jló mì ɖɔ hwi kpó Hamáa kpó ní wá.”

⁵ Ée Ɛsitɛ́ɛ ɖɔ mɔ̌ ɔ́, axɔ́sú ɔ́ ɖɔ: “Mi yi kplá Hamáa wá din tlóló lě e Ɛsitɛ́ɛ byɔ́ gbɔn é.” Ée Hamáa wá ɔ́, axɔ́sú ɔ́ kpó é kpó zɔn yi agɔ̌ ɔ́ tɛnmɛ.

⁶ Hwenu e yě ɖo vɛ̌ɛn nu wɛ ɔ́, axɔ́sú ɔ́ ɖɔ nú Ɛsitɛ́ɛ ɖɔ: “Étɛ́ a jlǒ ná byɔ́ mì? A byɔ́ nǔɖé ɔ́, un ná ná we. Étɛ́ wɛ jló we? É ná bó nyí axɔ́súɖuto ce sín vlɔ̌ɖówe wɛ jló we ɔ́, un ná ná we.”

⁷ Ɛsitɛ́ɛ yí gbe n'i ɖɔ: “Nǔ e un jló ná byɔ́ mɛ ɔ́ ɖíe:

⁸ Sɛ́mɛɖó, ényí é jló mɛ, bónú mɛ nǎ jɔwǔ mì, bó bló nǔ e ba wɛ un ɖe ɔ́ nú mì hǔn, mɛ kpó Hamáa kpó ní lɛ́ wá agɔ̌ e un ylɔ́ dó ta mitɔn mɛ sɔ ɔ́ tɛnmɛ; énɛ́ ɔ́, nǔ e kanbyɔ́ mì wɛ mɛ ɖe ɔ́, un ná ná sin tɔn mɛ.”

Hamáa ɖo Maadocée ba ná hu wɛ

⁹ Gbe nɛ́ ɔ́ gbe ɔ́, Hamáa tɔ́n sín Ɛsitɛ́ɛ xwé gbe kpó xomɛhunhun kpó, ayi tɔn jɛ ayǐ. Lo ɔ́, ée é jɛ axɔ́sú ɔ́ sín hɔn jí, bó mɔ ɖɔ Maadocée kún sí te ó, é kún ká kpɔ́n jɛ émítɔn jí ó ɔ́, xomɛ sin i dó wǔ tɔn tlala.

¹⁰ Xomɛ sin i mɔ̌ có é ká ɖe xlɛ́ ǎ, bó yi xwé tɔn gbe, bó dó wɛn sɛ́ dó xɔ́ntɔn tɔn lɛ́ɛ kpó asi tɔn Zelɛ́ci kpó ɖɔ yě nǐ wá.

¹¹ Ée yě wá ɔ́, é jɛ lě e dɔkun tɔn lɛ́ɛ sukpɔ́ sɔ ɔ́, lě e vǐ tɔn lɛ́ɛ sukpɔ́ sɔ ɔ́ ɖó hǎ nú yě jí; é ɖó lě e axɔ́sú ɔ́ sɔ́ ɛ ɖó tɛn ɖaxó mɛ gbɔn ɔ́, lě e é sɔ́ ɛ ɖó nukɔn nú azɔ̌watɔ́ lɛ́ɛ kpó azaglɔ́gán lɛ́ɛ bǐ kpó gbɔn, bó dó sɔ́ ɛ su ɔ́ hǎ nú yě.

¹² É lɛ́ ɖɔ nú yě ɖɔ: “Nyɛ ɖokpónɔ géé wɛ nyí mɛ e Ɛsitɛ́ɛ ylɔ́ bɔ un xwedó axɔ́sú ɔ́ yi xwé tɔn gbe, bó yi ɖu agɔ̌ égbé é; é ká kó lɛ́ ylɔ́ mì, bɔ nyɛ kpó axɔ́sú ɔ́ kpó ná yi xwé tɔn gbe.

¹³ Amɔ̌, ényí un kpo ɖo Maadocée, nya Jwifu énɛ́ ɔ́ mɔ wɛ ɖo azɔ̌ tɔn jí ɖo axɔ́sú ɔ́ sín hɔn jí jɛ́n wɛ ɔ́, nǔ énɛ́ lɛ́ɛ ɖěbǔ ná hun xomɛ nú mì ǎ.”

¹⁴ Énɛ́ ɔ́, asi tɔn Zelɛ́ci kpó xɔ́ntɔn tɔn lɛ́ɛ bǐ kpó ɖɔ n'i ɖɔ: “A nǎ kpa kpo ɖokpó bɔ ga tɔn ná yi mɛ̌tlu koatɔ́n (25), bɔ sɔ zǎnzǎn ɔ́, a nǎ byɔ̌ axɔ́sú ɔ́ ɖɔ è nǐ dó kan kɔ nú Maadocée, bó sɔ́ sin dó kpo ɔ́ wú. Énɛ́ ɔ́ gúdo ɔ́, a nǎ yi agɔ̌ ɔ́ tɛnmɛ kpó xomɛhunhun kpó, hwi kpó axɔ́sú ɔ́ kpó.” Xó énɛ́ ɔ́ nyɔ́ Hamáa nukún mɛ bɔ é zɔ́n kpo ɔ́ kpa.