Ɛsitɛ́ɛ 4 - MAWUXÓWÉMA

Maadocée ɖɔ nú Ɛsitɛ́ɛ ɖɔ ní mɔ axɔ́sú ɔ́ dó xó ɔ́ wú

¹ Ée Maadocée se nǔ e jɛ lɛ́ɛ bǐ ɔ́, é vún awu dó kɔ nú éɖée, bó sɔ́ caki dó, bó sá afín, bó byɔ́ toxo ɔ́ mɛ kpó avǐ kpó xósúsú kpó.

² Ée é zɔn mɔ̌ káká wá axɔ́sú ɔ́ sín hɔn nukɔn ɔ́, é nɔ te, ɖó mɛ ɖěbǔ ɖó acɛ e zɔn caki mɛ byɔ́ hɔn ɔ́ mɛ é ǎ.

³ Fí ɖěbǔ e axɔ́sú ɔ́ sín gbeta gbɔn ɖo tokpɔn ɖokpó ɖokpó mɛ ɔ́, Jwifu lɛ́ɛ bǐ nɔ́ byɔ́ aluwɛ ɖaxó mɛ; yě nɔ́ ɖo nu blá wɛ, bó nɔ́ ɖo avǐ ya wɛ, bó nɔ́ ɖo alě ná wɛ; yě mɛ gěgé nɔ́ fɔ caki dó, bó nɔ́ mlɔ́ afín mɛ.

⁴ Mɛsɛntɔ́ Ɛsitɛ́ɛ tɔn lɛ́ɛ kpódó agooɖojǐe tɔn lɛ́ɛ kpó wá ɖɔ nǔ e ɖo jijɛ wɛ ɔ́ nú Ɛsitɛ́ɛ bɔ xɛsi ɖaxó ɖé jɛ jǐ tɔn. É sɛ́ awu dó Maadocée ɖɔ é ní ɖe caki nyi ayǐ, bó dó awu énɛ́ lɛ́ɛ, Maadocée ka gbɛ́.

⁵ Énɛ́ ɔ́, Ɛsitɛ́ɛ ylɔ́ agooɖojǐe e axɔ́sú ɔ́ sɔ́ ɖó gɔ̌n tɔn lɛ́ɛ ɖokpó; è nɔ ylɔ́ ɛ ɖɔ Hatáki; é ɖɔ n'i ɖɔ ní yi kan nǔ e ɖo jijɛ wɛ ɔ́ byɔ́ Maadocée, bó kan nǔ e wú é ɖo mɔ̌ wa wɛ ɔ́ byɔ́ ɛ.

⁶ Hatáki yi Maadocée gɔ́n ɖo fí e é ɖe ɖo axɔ́sú ɔ́ sín hɔn nukɔn é.

⁷ Maadocée ɖɔ nǔ e jɛ lɛ́ɛ bǐ n'i. Đo ta jí ɔ́, é ɖɔ akwɛ́ nabí e Hamáa ɖɔ nú è hu Jwifu lɛ́ɛ bǐ ɔ́, émí ná kɔn dó axɔ́sú ɔ́ sín gbǎ mɛ ɔ́ n'i.

⁸ É lɛ́ zé wěma e mɛ è wlǎn gbeta e ɖɔ è nǐ sú Jwifu lɛ́ɛ sín kún dó, bɔ è jlǎ ɖo Súzi é ɖokpó n'i; é ɖɔ è nǐ sɔ́ yi xlɛ́ Ɛsitɛ́ɛ, bo tín nǔ lɛ́ɛ bǐ mɛ n'i. É lɛ́ ɖɔ nú Hatáki ɖɔ é ní ɖɔ nú Ɛsitɛ́ɛ ɖɔ é ní yi sa vo nú axɔ́sú ɔ́ dó Jwifu lɛ́ɛ tamɛ.

⁹ Hatáki yi dó wɛn e Maadocée dó ɔ́ Ɛsitɛ́ɛ.

¹⁰ Ɛsitɛ́ɛ lɛ́ sɛ́ Hatáki dó Maadocée gɔ́n ɖɔ é ní yi ɖɔ n'i ɖɔ:

¹¹ “Mɛ bǐ wɛ tunwun sɛ́n élɔ́, bɛ́ sín mɛsɛntɔ́ axɔ́sú ɔ́ tɔn lɛ́ɛ jí káká yi jɛ mɛ e ɖo tokpɔn axɔ́sú ɔ́ tɔn mɛ lɛ́ɛ jí ɖɔ axɔ́sú ɔ́ má ylɔ́ mɛɖé ǎ, bónú mɛ ɔ́ yi axɔ́sú ɔ́ sín xwéta ɖo hɔn ɔ́ mɛ ɔ́, hu jɛ́n è nɔ hu i; é sixú nyí súnnu, é sixú nyí nyɔ̌nu; có nú è nǎ gɔn mɛ énɛ́ ɔ́ hu ɔ́, axɔ́sú ɔ́ jɛ́n ná dlɛ́n sikákpogɛ tɔn dó e; nyɛ ɔ́, axɔ́sú ɔ́ ma ka sɔ́ ylɔ́ mì din ǎ ɔ́, azǎn gban (30) ɖíe.”

¹² È yi ɖɔ xó e Ɛsitɛ́ɛ ɖɔ ɔ́ nú Maadocée,

¹³ bɔ Maadocée ɖɔ è nǐ yi ɖɔ nú Ɛsitɛ́ɛ ɖɔ: “Ma vɛdó ɖɔ éé émí ko ɖo axɔ́sú ɔ́ sín xwé gbe kpowun ɔ́, émí ɖokpónɔ ná gán ɖ'é mɛ sín ó.

¹⁴ Ényí nǔ élɔ́ lɛ́ɛ ɖo jijɛ wɛ din nú a tin dó ɔ́, alɔgɔ́númɛtɔ́ kpó mɛhwlɛ́ngántɔ́ kpó ná gosín fí ɖěvo wá nú Jwifu lɛ́ɛ, bɔ yě ná gán. Lo ɔ́, hwɛ ɔ́ a nǎ kú, bɔ tɔ́ towe sín kún ná sú dó. Mɛ̌ ká tunwun nú nǔ élɔ́ e ɖo nǎ jɛ wɛ ɔ́ wú wɛ è sɔ́ we axɔ́si?”

¹⁵ Énɛ́ ɔ́, Ɛsitɛ́ɛ ɖɔ sɛ́ dó Maadocée ɖɔ:

¹⁶ “Yi, bo kplé Jwifu e ɖo Súzi tomɛ lɛ́ɛ bǐ bónú mi blá nu dó ta ce mɛ. Mi ma ɖu nǔ ó, mi ma nu sin ó káká nú kéze atɔn zǎn atɔn; nyɛ kpó mɛsɛntɔ́ ce lɛ́ɛ kpó ɔ́, mi lɔ na blá nu; énɛ́ ɔ́ gúdo ɔ́, sɛ́n ɔ́ ná ɖo te có un ná yi axɔ́sú ɔ́ gɔ́n. Nú é byɔ́ ɖɔ má kú ɔ́, un ná kú.”

¹⁷ Énɛ́ ɔ́, Maadocée ɖidó, bó bló nǔ e Ɛsitɛ́ɛ ɖɔ n'i lɛ́ɛ bǐ.