Ɛsitɛ́ɛ 2 - MAWUXÓWÉMA

Ɛsitɛ́ɛ húzú axɔ́si

¹ Ée nǔ énɛ́ lɛ́ɛ jɛ wá yi gúdo ɔ́, xomɛ e axɔ́sú Zɛ̌ɛzɛsi sin ɔ́ wá fá, bɔ é flín Vasitíi, bo flín nǔ e é wa ɔ́ kpó gbeta e è ɖe tɔ́n dó wǔ tɔn ɔ́ kpó.

² Énɛ́ ɔ́, mɛ e nɔ sɛn axɔ́sú ɔ́ lɛ́ɛ ɖɔ n'i ɖɔ: “È ɖǒ ná ba ɖyɔ̌vǐ e nyɔ́ ɖɛkpɛ titewungbe lɛ́ɛ nú we.

³ Axɔ́sú ɔ́ ní ɖe mɛ bónú yě nǐ yi tokpɔn lɛ́ɛ bǐ mɛ, bó yi kplá ɖyɔ̌vǐ e nyɔ́ ɖɛkpɛ lɛ́ɛ bǐ wá. È nǎ kplé yě ɖó nyɔ̌nu lɛ́ɛ sín xwé gbe ɖo axɔ́sú ɔ́ sín hɔnmɛ, ɖo Súzi, tota ɔ́ mɛ, bónú agooɖojǐe Hegée e nɔ kpɔ́n nyɔ̌nu lɛ́ɛ jí ɔ́, ná kpé nukún dó yě wǔ.

⁴ Đyɔ̌vǐ e ná nyɔ́ axɔ́sú ɔ́ nukún mɛ ɔ́ ná húzú axɔ́si, bó ná jɛ Vasitíi sín tɛnmɛ.” Xó énɛ́ e è ɖɔ ɔ́ nyɔ́ axɔ́sú ɔ́ nukún mɛ, bɔ è blǒ gbɔn mɔ̌.

⁵ Nya ɖé ká tíin, bó ɖo ahohó Súzi tɔn ɔ́ mɛ fínɛ́ bɔ è nɔ ylɔ́ ɛ ɖɔ Maadocée. Yayíi ví wɛ é nyí, bó nyí Cimɛ́yi ví, bó nyí Kícu ví. Bɛnjamɛ́ɛ sín akɔta mɛ wɛ é jɔ ɖe.

⁶ É ɖo mɛ e ahwan wlí kannumɔ yětɔn sín Jeluzalɛ́mu lɛ́ɛ mɛ; yě kpó axɔ́sú Judáa tɔn Yoyakini kpó wɛ è wlǐ. Axɔ́sú Babilɔ́nu tɔn Nabukodonɔzɔ́ɔ wɛ wlí kannumɔ yětɔn.

⁷ Maadocée wɛ hɛn tɔ́ tɔn nɔví Hadasa e è nɔ lɛ́ ylɔ́ ɖɔ Ɛsitɛ́ɛ é; ɖó tɔ́cyɔvǐ nɔcyɔvǐ wɛ Ɛsitɛ́ɛ nyí. Vǐ mɛbámɛ ɖé wɛ, é nyɔ́ ɖɛkpɛ ɖésú. Ée tɔ́ tɔn kpó nɔ tɔn kpo kú ɔ́, Maadocée yí i dó ɖó vǐ.

⁸ Ée axɔ́sú ɔ́ ɖe gbeta énɛ́ ɔ́ tɔ́n bɔ mɛ bǐ se ɔ́, è kplé ɖyɔ̌vǐ wɔ̌buwɔ́bú ɖé lɛ́ɛ ɖó hɔn ɔ́ mɛ ɖo Súzi, bɔ Hegée ɖo nukún kpé dó yě wú wɛ; è kplá Ɛsitɛ́ɛ lɔ yi hɔnmɛ, bó zé e dó alɔ mɛ nú Hegée e nɔ kpé nukún dó nyɔ̌nu lɛ́ɛ wú é.

⁹ Ɛsitɛ́ɛ sín nǔ nyɔ́ Hegée nukún mɛ, bɔ é nɔ́ wa ɖagbe n'i. É yǎ wǔ ná ɛ nǔ e ɖo tají bɔ é ná nɔ́ dó bló éɖée ɖó ná é, kpó nǔ e é ná nɔ́ ɖu ɔ́ kpó; é cyán nyɔ̌nuví tɛ́nwe ɖo nyɔ̌nuví e ɖo axɔ́sú ɔ́ sín hɔnmɛ lɛ́ɛ mɛ, bó kplá é kpó yě kpó dó xɔ e nyɔ́ hú xɔ lɛ́ɛ bǐ ɖo nyɔ̌nu lɛ́ɛ sín xwé gbe ɔ́ mɛ.

¹⁰ Ɛsitɛ́ɛ ɖɔ nú mɛ ɖěbǔ ɖɔ Jwifu wɛ émí nyí ǎ, ɖó Maadocée gbɛ́ n'i.

¹¹ Ayǐhɔ́ngbe ayǐhɔ́ngbe ɔ́, Maadocée nɔ ɖo xwé e gbe nyɔ̌nu lɛ́ɛ ɖe ɔ́ sín hɔn nukɔn gbɔn wɛ; é nɔ́ ɖo yiyi wɛ, bó nɔ́ ɖo wiwa wɛ, lobo nɔ ɖo do ba nú lě e Ɛsitɛ́ɛ ɖe ɔ́ kpó lě e hɛn ɛ gbɔn wɛ è ɖe ɔ́ kpó wɛ.

¹² Đyɔ̌vǐ e ɖo nyɔ̌nu lɛ́ɛ sín xwé gbe lɛ́ɛ ɖó ná zán nǔ e yě ɖó ná dó bló yěɖée ɖó ná lɛ́ɛ xɔ xwe ɖokpó: yě ná zé sun ayizɛ́n ɖó te, bó sá nǔsáwǔ e è sɔ́ mǐla dó bló ná ɔ́, bó lɛ́ sɔ́ sun ayizɛ́n ɖěvo ɖó te, bó sá nǔsáwǔ wǎnɖagbenɔ kpódó célu e nyɔ̌nu lɛ́ɛ nɔ zán lɛ́ɛ kpán. Énɛ́ ɔ́ gúdo ɔ́, yě mɛ ɖokpó ɖokpó nɔ́ yi axɔ́sú Zɛ̌ɛzɛsi nukɔn.

¹³ Ényí ɖyɔ̌vǐ lɛ́ɛ ɖě ná gosín nyɔ̌nu lɛ́ɛ sín xwé gbe bó ná yi axɔ́sú ɔ́ gɔ́n ɔ́, è nɔ jó e dó bɔ é nɔ́ fɔ nǔ e jló e lɛ́ɛ bǐ.

¹⁴ Gbadanu wɛ é nɔ yi axɔ́sú ɔ́ gɔ́n; ayǐhɔ́ngbe tɔn zǎnzǎn ɔ́, è nɔ kplá ɛ yi nyɔ̌nu lɛ́ɛ sín xwé wegɔ́ ɔ́ gbe, bɔ Caacigazi agooɖojǐe e nɔ kpé nukún dó axɔ́sú ɔ́ sín asi ɖěvo lɛ́ɛ wú ɔ́ nɔ́ kpé nukún wǔ tɔn. É sɔ́ nɔ́ lɛ́ kɔ yi axɔ́sú ɔ́ gɔ́n ǎ; afi nú axɔ́sú ɔ́ wá ɖó jlǒ tɔn bó ylɔ́ nyǐkɔ tɔn ɖɔ è nǐ yi kplá ɛ wá.

¹⁵ Gbe ɖokpó wá su bɔ axɔ́sú ɔ́ gɔ́n yiyi jɛ Ɛsitɛ́ɛ jí; Ɛsitɛ́ɛ Avihayilu ví e tɔ́ tɔn nɔví ví Maadocée hɛn bɔ é su é. Ée é xwe axɔ́sú ɔ́ gɔ́n ɔ́, é byɔ́ nǔɖé zɛ nǔ e Hegée ɖɔ é ní fɔ lɛ́ɛ wú ǎ; Hegée wɛ nyí agooɖojǐe e nɔ kpé nukún dó nyɔ̌nu lɛ́ɛ sín xwé wú é. Ɛsitɛ́ɛ sín nǔ nɔ́ nyɔ́ mɛ e nɔ mɔ ɛ lɛ́ɛ bǐ nukún mɛ.

¹⁶ Hwenu e axɔ́sú Zɛ̌ɛzɛsi ɖo xwe tɛ́nwe bló wɛ ɖo axɔ́súzinkpo jí ɔ́, sun tɔn wǒgɔ́ ɔ́ e nyí Tevɛ́ti sín sun ɔ́ mɛ ɔ́, è kplá Ɛsitɛ́ɛ yi gɔ̌n tɔn, ɖo fí e é nɔ́ nɔ ɖo hɔn ɔ́ mɛ é.

¹⁷ Axɔ́sú ɔ́ yí wǎn nú Ɛsitɛ́ɛ hú nyɔ̌nu ɖě lɛ́ɛ bǐ; é nyɔ́ xomɛ dó wǔ tɔn, bó wa ɖagbe n'i hú nyɔ̌nuví ɖě lɛ́ɛ bǐ. É sɔ́ axɔ́sigbákún ɔ́ xwe n'i, bó sɔ́ ɛ axɔ́si ɖó Vasitíi tɛnmɛ.

¹⁸ É ylɔ́ agɔ̌ ɖaxó ɖokpó dó Ɛsitɛ́ɛ tamɛ, bó ylɔ́ azaglɔ́gán tɔn lɛ́ɛ kpó azɔ̌watɔ́ lɛ́ɛ kpó. É ná gbɔjɛ́ gbɔn tokpɔn lɛ́ɛ bǐ mɛ, bó hun alɔ dó ná nǔ mɛ.

¹⁹ È kplé ɖyɔ̌vǐ lɛ́ɛ azɔn wegɔ́ ɔ́; Maadocée ɖo azɔ̌ wa wɛ ɖo axɔ́sú ɔ́ xwé hwenɛ́nu.

²⁰ Ɛsitɛ́ɛ ka ko ɖɔ nú mɛɖé ɖɔ Jwifu wɛ émí nyí ǎ, ɖó é ɖo sɛ́n e Maadocée dó n'i ɔ́ xwédo wɛ. É kpo ɖo tónú se n'i wɛ hwenu e é kpó ɖo alɔ tɔn mɛ ɔ́ ɖɔhun.

Maadocée ɖe séblá ɖé gba

²¹ Maadocée ɖo azɔ̌ tɔn wa wɛ gbe ɖokpó ɖo hɔnmɛ bɔ Bigitáni kpódó Tɛlɛ́ci kpó blá sé ɖɔ émí ná hu axɔ́sú Zɛ̌ɛzɛsi, ɖó é dó xomɛsin ɖaxó ɖé xomɛ nú yě. Yě mɛ we énɛ́ lɛ́ɛ ɔ́, axɔ́sú ɔ́ sín hɔnta wɛ yě nɔ́ nɔ.

²² Maadocée se séblá énɛ́ e yě blá ɔ́, bó ɖɔ nú axɔ́si Ɛsitɛ́ɛ. Ɛsitɛ́ɛ ka sɔ́ yi ɖɔ nú axɔ́sú ɔ́ bó ɖɔ Maadocée wɛ ɖɔ mɔ̌ nú émí.

²³ É ba do nú xó énɛ́ ɔ́ bó mɔ ɖɔ nǔgbó wɛ, bɔ è dǒ kan kɔ nú azɔ̌watɔ́ we énɛ́ lɛ́ɛ, bó sin dó atín wú, bɔ yě kú, bɔ axɔ́sú ɔ́ ná gbe bɔ è wlǎn nǔ énɛ́ lɛ́ɛ dó wěma e mɛ è nɔ kpi nǔ e kan axɔ́súɖuto ɔ́ sín tan lɛ́ɛ bǐ dó ɔ́ mɛ.