Efɛ́zinu 6 - MAWUXÓWÉMA

Vǐ lɛ́ɛ kpódó mɛjitɔ́ lɛ́ɛ kpó

¹ Vǐ lɛ́ɛ mi, azɔ̌ e nyí azɔ̌ mitɔn bó sɔgbe bɔ mi ná wa ɖo Aklúnɔ nukɔn ɔ́ wɛ nyí ɖɔ mi ná se tónú nú mɛ e ji mi lɛ́ɛ.

² Sɛ́n nukɔntɔn e Mawu dó, bó dó akpá d'é jí ɔ́ wɛ nyí: “Sí tɔ́ towe kpódó nɔ towe kpó,

³ bónú gbɛ ná nyɔ́ nú we, bɔ a nǎ dɔ́ ji ɖo ayǐkúngban jí fí.”

⁴ Vǐtɔ́ lɛ́ɛ mi, mi ma nɔ wa nǔ, bó ná dó dó xomɛsin nú vǐ mitɔn lɛ́ɛ ó; amɔ̌ mi hɛn yě, bó gbɛ́ nǔ nú yě, bó ná kplɔ́n yě lě e Aklúnɔ jló gbɔn é.

Kannumɔ lɛ́ɛ kpódó gǎn lɛ́ɛ kpó

⁵ Kannumɔ lɛ́ɛ mi, mi se tónú nú gǎn mitɔn e ɖo ayǐkúngban jí fí lɛ́ɛ é, kpó sísí kpó, kpó sísɔ́sísɔ́ kpó, kpódó ayijlɔ́jlɔ́ kpó Klísu sɛn wɛ mi ɖe ɖɔhun.

⁶ É ní ma nyí nukún yětɔn mɛ kɛ́ɖɛ́ wɛ mi ná bló mɔ̌ ɖe, mɛ e ɖo biba ná nyɔ́ ɖo gbɛtɔ́ lɛ́ɛ nukɔn wɛ é ɖɔhun ó; amɔ̌ mi se tónú klísusɛntɔ́ e nɔ wa jlǒ Mawu tɔn kpódó ayixa tɔn bǐ kpó é ɖɔhun.

⁷ Mi nɔ wa kannumɔzɔ́ mitɔn kpódó jlǒ ɖagbe kpó, Aklúnɔ ɖésú wa azɔ̌ ná wɛ mi ɖe ɖɔhun, bó ma nɔ lin ɖɔ gbɛtɔ́ lɛ́ɛ kɛ́ɖɛ́ wa azɔ̌ ná wɛ émí ɖe ó.

⁸ Bó tunwun ɖɔ mɛ ɖokpó ɖokpó ná mɔ nǔ ɖagbe e é wa ɔ́ sín ajɔ yí ɖo Aklúnɔ gɔ́n; mɛ ɔ́ sixú nyí kannumɔ, mɛ ɔ́ sixú ɖo éɖée sí.

⁹ Gǎn lɛ́ɛ mi, mi lɔmɔ̌, mi ná nɔ zán jijɔ ɖagbe xá kannumɔ mitɔn lɛ́ɛ. Mi ma nylá hun dó yě ó, bó ka tunwun ɖɔ mi kpódó yě kpó wɛ ɖó gǎn ɖokpó ɔ́ ɖo sɛ́xwé; gǎn énɛ́ ka nɔ ɖe mɛɖé ɖó vo ɖo mɛɖé mɛ ǎ.

Ahwanfunnú e Mawu ná klísusɛntɔ́ lɛ́ɛ é

¹⁰ Nǔ e kpo bɔ un ná ɖɔ nú mi é ɖíe: mi ba hlɔ̌nhlɔ́n mitɔn ɖo bǔ e mi ɖe ɖo Aklúnɔ mɛ ɔ́ mɛ, bó ba ɖo hlɔ̌nhlɔ́n tɔn e kpé nǔ bǐ wú é mɛ.

¹¹ Mi fɔ ahwanfunnú e Mawu ná mi lɛ́ɛ bǐ kplá, bó ná sixú nɔ te ɖo mɔ e awǒvi nɔ ɖó nú mɛ lɛ́ɛ nukɔn.

¹² Đó gbɛtɔ́ lɛ́ɛ ná fun ahwan xá wɛ mi ɖe ǎ; lo ɔ́, nǔɖoyɛswímɛ nyanya e ɖo jǐnukúnsin kpó ayǐkúngban kpó tɛ́ntin, acɛkpikpa lɛ́ɛ, hlɔ̌nhlɔ́n lɛ́ɛ kpódó gǎn gbɛ élɔ́ mɛ tɔn e mǐ ma nɔ́ mɔ ǎ lɛ́ɛ kpó wɛ mi ɖó ná fun ahwan xá.

¹³ Énɛ́ ɔ́ wútu ɔ́, mi ní fɔ ahwanfunnú e Mawu ná mi lɛ́ɛ bǐ kplá din; énɛ́ ɔ́, azǎn nyanya ɔ́ gbé wá su ɔ́, mi ná sixú nɔ te ɖo kɛntɔ́ nukɔn, bɔ hwenu e mi ná fun ahwan ɔ́ fó ɔ́, mi ná lɛ́ kpo ɖo acéjí.

¹⁴ Hǔn mi bó ɖo acéjí. Nǔgbó ní nyí gǒjíblánú ɖo alin mitɔn; hwɛjijɔ ní nyí ganwu nú mi dó.

¹⁵ Kan ɖó dó Wɛn Ɖagbe e nɔ ná fífá mɛ ɔ́ jlájlá wú ní nyí afɔkpa ɖo afɔ mitɔn.

¹⁶ Nǔɖiɖi ní nyí gǎglónú nú mi, bónú mi nɔ sɔ́ hɛn tɛgbɛ, bó ná dó xo gǎ myɔnɔ e kɛntɔ́ ná da dó mi ɔ́ cí.

¹⁷ Hwlɛngán ní nyí gangbákún ɖo ta nú mi, bónú Mawuxó ɔ́ ní nyí hwǐ e Yɛsinsɛn sɔ́ dó alɔ mɛ nú mi é.

¹⁸ Mi ná nɔ xo ɖɛ tɛnmɛ tɛnmɛ, bó ná nɔ sa vo nú Mawu gbɔn Yɛsinsɛn jí hwebǐnu. Mi nɔ́ nɔ acéjí, bó nɔ́ ɖó kan d'é wú titewungbe, lobo nɔ xo ɖɛ nú mɛɖeɖóvo Mawu tɔn lɛ́ɛ bǐ.

¹⁹ Mi nɔ xo ɖɛ nú nyɛ lɔmɔ̌, bónú un ja xó ɖɔ gbé hǔn, Mawu ní ná mì xó e sɔgbe é, bónú ma ɖɔ xó kpódó jiɖiɖe kpó, bó ná dó tín nǔbúdo Wɛn Ɖagbe ɔ́ tɔn mɛ.

²⁰ Un ɖo gankpá mɛ din cóbó ka sɔ́ Wɛn Ɖagbe énɛ́ sín afɔ ɖó te. Hǔn mi bo nɔ xo ɖɛ nú mì, bónú ma sixú jlá Wɛn Ɖagbe ɔ́ kpódó jiɖiɖe kpó lě e un ɖó ná bló gbɔn é.

Pɔ́lu dó gbe sɛ́ dó mɛ, bó dó sú ta nú wěma ɔ́

²¹ Nɔví wǎnyínámɔ mǐtɔn Ticíku e ɖo gbejí ɖo alɔdómɛ tɔn lɛ́ɛ mɛ, ɖo Aklúnɔ sín azɔ̌ lɛ́ɛ mɛ ɔ́ ná ɖɔ xó ce lɛ́ɛ bǐ nú mi, bónú mi ná tunwun lě e un ɖe gbɔn é.

²² Nǔ e wú un sɛ́ ɛ dó tawun ɔ́ wɛ nyí ɖɔ é ná wá ɖɔ lě e mǐ ɖe gbɔn ɔ́ nú mi, bó dó ná akɔ́nkpinkpan mi.

²³ Mawu Tɔ́ ɔ́ kpódó Aklúnɔ Jezu Klísu kpó ní ná fífá kpódó wǎn yíyí kpó, kpódó nǔɖiɖi kpó nɔví ɖo Klísu mɛ lɛ́ɛ bǐ.

²⁴ Fɛ́nú Mawu tɔn ní nɔ kpɔ́ xá mɛ e ɖó wǎn yíyí mavɔ mavɔ nú Aklúnɔ mǐtɔn Jezu Klísu lɛ́ɛ.