Efɛ́zinu 3 - MAWUXÓWÉMA

Azɔ̌ e Mawu zɔ́n Pɔ́lu ɖɔ ní wa ɖo mɛ e ma nyí Jwifu ǎ lɛ́ɛ tɛ́ntin é

¹ Énɛ́ ɔ́ wútu ɔ́, nyɛ Pɔ́lu e ɖo gan sɛn wɛ ɖó Klísu Jezu e sɛn wɛ un ɖe ɔ́ wú, dó mi mɛ e ma nyí Jwifu ǎ lɛ́ɛ sín tamɛ ɔ́,

² azɔ̌ e Mawu zɔ́n mì ɖo xomɛnyínyɔ́ tɔn mɛ ɖɔ ma wa nú mi ɔ́, un ɖi ɖɔ mi ná kó se.

³ Mawu ɖe nǔɖé xlɛ́ mì, bónú ma mɔ nǔ jɛ nǔbúdo tɔn wú. Un ko ɖɔ xó kpɛɖé dó nǔbúdo énɛ́ ɔ́ wú dó wěma élɔ́ mɛ.

⁴ Énɛ́ ɔ́, ényí ɖɔ mi ɖo xixa wɛ ɔ́, mi hɛn ɔ́, mi ná tunwun lě e un mɔ nukúnnú jɛ nǔbúdo e kan Klísu ɔ́ wú gbɔn é.

⁵ Đ'ayǐ xóxó ɔ́, Mawu ɖe nǔbúdo énɛ́ ɔ́ xlɛ́ gbɛtɔ́ lɛ́ɛ ǎ; amɔ̌ din ɔ́, é ɖe xlɛ́ mɛsɛ́dó mímɛ́ lɛ́ɛ kpódó gbeyíɖɔ lɛ́ɛ kpán gbɔn Yɛsinsɛn jí.

⁶ Nǔbúdo ɔ́ ɖíe: mɛ e ma nyí Jwifu ǎ lɛ́ɛ ná mɔ nǔ ɖagbe e Mawu sɔ́ ɖó ayǐ nú togun tɔn ɔ́ yí xá mɛ e nyí Jwifu lɛ́ɛ, gbɔn Wɛn Ɖagbe ɔ́ jí. Yě bǐ nyí wǔjɔnú agbaza ɖokpó ɔ́ tɔn, bɔ akpá e Mawu dó ɔ́, yě lɔmɔ̌ ná ɖó mǐmá ɖ'é mɛ gbɔn Klísu Jezu jí.

⁷ Nǔ e Mawu sɔ́ hlɔ̌nhlɔ́n tɔn, bó ná mì ɖo xomɛnyínyɔ́ tɔn mɛ ɔ́ zɔ́n bɔ azɔ̌ ce nyí Wɛn Ɖagbe jlájlá.

⁸ Un sɔ mɛ e ma sɔ atɛ́n ɖo mɛɖeɖóvo Mawu tɔn lɛ́ɛ mɛ ɔ́ ǎ, có Mawu ka jɔwǔ mì, bó ɖɔ nyɛ ní jlá Wɛn Ɖagbe e nyí dɔkun maɖókpodó Klísu tɔn ɔ́ mɛ e ma nyí Jwifu ǎ lɛ́ɛ é.

⁹ Má jlá Wɛn Ɖagbe ɔ́ yě, bó ná kplá gbɛtɔ́ lɛ́ɛ bǐ, nú yě ná mɔ nukúnnú jɛ lě e nǔbúdo Mawu tɔn e ɖo wi mɛ ɔ́ ná jɛ gbɔn é wú. Mawu e bló nǔ bǐ ɔ́ sɔ́ tito énɛ́ ɔ́ hwlá sín tɛgbɛ,

¹⁰ bónú din ɔ́, gǎn lɛ́ɛ kpódó hlɔ̌nhlɔ́n e ɖo gbɛ e mǐ ma ɖo mimɔ wɛ ǎ mɛ lɛ́ɛ kpó ní mɔ nukúnnú jɛ nǔnywɛ́ Mawu tɔn wú gbɔn alɔ bǐ mɛ gbɔn agun ɔ́ gbla mɛ.

¹¹ Mawu wa nǔ gbɔn mɔ̌, bɔ é sɔgbe xá linlin e é ko ɖó sín tɛgbɛ, bó wá bló ɖ'é jí gbɔn Aklúnɔ mǐtɔn Klísu Jezu jí é.

¹² Bǔ e mǐ ɖe xá Klísu é kpó nǔɖiɖi e mǐ ɖó n'i é kpó zɔ́n bɔ mǐ glá bó sɛkpɔ́ ɛ kpó jiɖiɖe ɖaxó ɖé kpó.

¹³ Énɛ́ ɔ́ wútu ɔ́, un ɖo byɔ̌byɔ́ mi wɛ ɖɔ awakanmɛ ní ma kú mi dó wǔvɛ́ e mɔ wɛ un ɖe dó ta mitɔn mɛ é wú ó; ɖagbe mitɔn wú wɛ un ɖo wǔvɛ́ énɛ́ lɛ́ɛ mɔ wɛ.

Wǎn yíyí Klísu tɔn

¹⁴ Énɛ́ ɔ́ wú wɛ un nɔ jɛ kpo ɖo Mawu Tɔ́ ɔ́,

¹⁵ ée nyí Tɔ́ nú hɛ̌nnu e ɖo sɛ́xwé é bǐ, kpódó ée ɖo ayǐkúngban jí é bǐ kpó ɔ́ nukɔn.

¹⁶ Un nɔ byɔ́ ɛ ɖɔ, lě e susu tɔn d'agba sɔ ɔ́, ní dó wǔsyɛ́n lanmɛ nú mi kpó hlɔ̌nhlɔ́n kpó gbɔn Yɛsinsɛn jí.

¹⁷ Un nɔ byɔ́ ɛ ɖɔ Klísu ní nɔ ayi mitɔn mɛ gbɔn nǔ e mi ɖi n'i é gbla mɛ. Un nɔ byɔ́ ɛ ɖɔ mi ní dó ɖɔ do, bó lí dǒ ɖo wǎn yíyí mɛ.

¹⁸ Un nɔ byɔ́ ɛ ɖɔ mi kpódó mɛɖeɖóvo Mawu tɔn lɛ́ɛ kpó bǐ ní sixú mɔ nukúnnú jɛ lě e wǎn yíyí Klísu tɔn gbló sɔ é, lě e é ɖi ga sɔ é, lě e é yi jǐ sɔ é, kpódó lě e é gɔ́ngɔ́n sɔ é kpó wú.

¹⁹ Nǔgbó wɛ! Mi ní mɔ nukúnnú jɛ wǎn yíyí tɔn wú, énɛ́ ɔ́, nǔ e Mawu nyí ɔ́ ná gɔ́ ayi mitɔn mɛ bǐ dégbédégbé. Có mɛɖé ka nɔ mɔ nukúnnú jɛ wǎn yíyí Mawu tɔn wú yí fó gbeɖé ǎ.

²⁰ Mawu ɖó hlɔ̌nhlɔ́n, bó hɛn ɔ́, é ná wa nǔ nú mǐ hú nǔ e mǐ byɔ́ ɛ ɔ́, abǐ ée lin wɛ mǐ tlɛ ɖe ɔ́ gbɔn hlɔ̌nhlɔ́n e ɖo azɔ̌ wa wɛ ɖo mǐ mɛ ɔ́ jí.

²¹ Susu nú Mawu ɖo agun ɔ́ mɛ, ɖo Klísu Jezu mɛ, sín din káká sɔ́yi mavɔ mavɔ! Amǐ!