Efɛ́zinu 2 - MAWUXÓWÉMA

Mǐ ɖo gbɛ ɖo bǔ e mǐ ɖe xá Klísu ɔ́ mɛ

¹ Đ'ayǐ xóxó ɔ́, mɛkúkú ɖɔhun wɛ mi cí, ɖó tónú e mi ma nɔ se nú Mawu é, kpódó hwɛ e mi nɔ hu lɛ́ɛ kpó wú.

² Mi nɔ xwedó gbɛ nyanya e mɛ e nyí gbɛ élɔ́ tɔn lɛ́ɛ nɔ zán é. Mi nɔ se tónú nú gǎn e kpa acɛ nú nǔ e ɖo yɛswímɛ ɖo hwe glɔ́ lɛ́ɛ. Gǎn énɛ́ ɔ́ wɛ nyí yɛ e ɖo azɔ̌ wa wɛ din ɖo gbɛtɔ́ e ma nɔ se tónú nú Mawu ǎ lɛ́ɛ mɛ é.

³ Mǐ lɔmɔ̌ ɔ́, mɛ énɛ́ lɛ́ɛ ɖɔhun wɛ mǐ bǐ cí ɖ'ayǐ; mǐ nɔ zán gbɛ mǐtɔn lě e hwɛhuhu sín ninɔmɛ e mǐ ɖó ɔ́ jló gbɔn é, bɔ nǔ e mǐ lin lɛ́ɛ kpódó nǔ e jló mǐ é kpó wɛ mǐ nɔ́ wa. Đěe é nyí ɖɔ mɔ̌ wɛ mǐ kó cí ɔ́, vǐ e Mawu sín xomɛ dó ɔ́ wɛ mǐ kó nyí ɖ'ayǐ, mɛ bǐ ɖɔhun.

⁴ Lo ɔ́, xomɛnyínyɔ́ Mawu tɔn d'agba, bɔ lě e é ɖó wǎn yíyí nú mǐ sɔ́ é zɔ́n,

⁵ bɔ hwenu e mǐ kpo ɖo mɛkúkú ɖɔhun cí wɛ ɖo nukɔn tɔn, ɖó hwɛ mǐtɔn lɛ́ɛ wú ɔ́, é bló bɔ mǐ lɛ́ wá gbɛ kpódó Klísu kpó. Fɛ́nú Mawu tɔn mɛ wɛ mi mɔ hwlɛngán ɖe.

⁶ Đo bǔ e mǐ ɖe xá Klísu Jezu ɔ́ mɛ ɔ́, Mawu fɔ́n mǐ kpó e kpó wá gbɛ, bónú mǐ ná ɖu axɔ́sú xá ɛ ɖo gbɛ e mǐ ma ɖo mimɔ wɛ ǎ é mɛ.

⁷ É bló mɔ̌, bónú ayǐ e ná wá hɔ́n ɖo sɔ gúdo lɛ́ɛ ɔ́, é ná ɖe dɔkun maɖókpodó e ɖo fɛ́nú tɔn mɛ ɔ́ xlɛ́ mǐ, gbɔn xomɛnyínyɔ́ e é ɖó dó mǐ wú gbɔn Klísu Jezu jí é mɛ.

⁸ Đó xomɛnyínyɔ́ Mawu tɔn mɛ wɛ mi mɔ hwlɛngán ɖe, gbɔn nǔ e mi ɖi é gbla mɛ. É nyí mi ɖésúnɔ wɛ hwlɛ́n miɖée gán ǎ; nǔnámɛ Mawu tɔn wɛ.

⁹ É nyí nǔ e mi wa lɛ́ɛ sín ajɔ wɛ ǎ; énɛ́ ɔ́, mɛ ɖěbǔ sixú yí go ná ǎ.

¹⁰ Đó nǔwiwa tɔn wɛ mǐ nyí; ɖo bǔ e mǐ ɖe xá Klísu Jezu é mɛ ɔ́, é bló mǐ, bónú mǐ ná zán gbɛ e gɔ́ nú nǔ ɖagbe wiwa é. Nǔ ɖagbe wiwa énɛ́ lɛ́ɛ wɛ é ɖésúnɔ kó sɔ́ ɖ'ayǐ nú mǐ, bónú mǐ ná bló.

Klísusɛntɔ́ lɛ́ɛ bǐ wɛ nyí ɖokpó ɖo Klísu mɛ

¹¹ Mi mɛ e ma nyí Jwifu jiji ǎ lɛ́ɛ ɔ́, Jwifu lɛ́ɛ nɔ́ ylɔ́ mi ɖɔ atɔtɔnɔ; yě Jwifu lɛ́ɛ ɔ́, è ka nɔ ylɔ́ yě ɖɔ adagbotɔ́, ɖó wuntun e gbɛtɔ́ lɛ́ɛ sɔ́ alɔ yětɔn dó ɖó yě wú ɔ́ wútu ɔ́, mi flín nǔ e mi ko nyí ɖ'ayǐ é.

¹² Hwenɛ́nu ɔ́, zɔ wɛ mi ɖe nú Klísu; jǒnɔ wɛ mi nyí nú togun Izlayɛ́li tɔn, bó ɖo togun énɛ́ e Mawu sɔ́ é mɛ ǎ. Akpá e Mawu dó nú togun tɔn, bó dó nu alɛ xá ɛ ɔ́, midɛɛ lɛ́ɛ ɖ'é mɛ ǎ. Mi tunwun Mawu ǎ; mi ka ɖo nukún ɖó nǔɖé wɛ ǎ; mi ɖo gbɛ ɔ́ mɛ kpowun.

¹³ Amɔ̌ din ɔ́, ɖo bǔ e mǐ ɖe xá Klísu Jezu ɔ́ mɛ ɔ́, mi mɛ e ɖo zɔ ɖ'ayǐ lɛ́ɛ ɔ́, mi sɛkpɔ́ Mawu, gbɔn Vǐ tɔn sín hun gbla mɛ.

¹⁴ Đó Klísu Jezu ɖésúnɔ wɛ hɛn fífá wá nú mǐ; gbɔn kú tɔn gbla mɛ ɔ́, dǒ e klán mɛ e nyí Jwifu é kpódó mɛ e ma nyí Jwifu ǎ é kpó ɖó vovo, bó zɔ́n bɔ yě nyí kɛntɔ́ ɔ́, é mu. É dɔn yě ɖó bǔ, bɔ yě húzú togun ɖokpó ɔ́, bó mɔ fífá.

¹⁵ É bló bɔ é sɔ́ byɔ́ ɖɔ è ní se tónú nú Jwifu lɛ́ɛ sín sɛ́n, kpó nǔ é nɔ zɔ́n lɛ́ɛ kpó, kpódó gbeta tɔn lɛ́ɛ kpán ǎ. É zé akɔta we énɛ́ lɛ́ɛ dó húzú togun yɔ̌yɔ́ ɖokpó ná ɖo bǔ e mǐ ɖe xá Klísu é mɛ. Lě e é ná fífá mǐ gbɔn é nɛ́.

¹⁶ Klísu sú kɛn kún dó, gbɔn kú e é kú ɖo aklúzu jí é gbla mɛ; é dɔn akɔta we lɛ́ɛ bǐ kplé, bɔ yě húzú agbaza ɖokpó, bó gbɔ kɛn e yě ɖe xá Mawu é, gbɔn kú e é kú ɖo aklúzu jí é gbla mɛ.

¹⁷ Klísu wá jlá Wɛn Ɖagbe fífá tɔn ɔ́ mi mɛ e ma nyí Jwifu ǎ, bó ɖo zɔ nú Mawu ɖ'ayǐ lɛ́ɛ, bó lɛ́ jlá mǐ mɛ e nyí Jwifu, bó kó sɛkpɔ́ ɛ lɛ́ɛ.

¹⁸ Đó Klísu jí wɛ mǐ bǐ ná gbɔn, Jwifu kpódó mɛ e ma nyí Jwifu ǎ é kpó, bó ná sixú yi Mawu Tɔ́ ɔ́ gɔ́n, kpódó Yɛsinsɛn ɖokpó énɛ́ sín alɔdó kpó.

¹⁹ Énɛ́ ɔ́ wútu ɔ́, mi mɛ e ma nyí Jwifu ǎ lɛ́ɛ ɔ́, mi sɔ́ nyí jǒnɔ abǐ mɛ e gosín fí ɖěvo bó wá é ǎ; lo ɔ́, mi húzú to ɖokpó ɔ́ mɛ nu xá mɛɖeɖóvo Mawu tɔn lɛ́ɛ, bó ɖo hɛ̌nnu Mawu tɔn mɛ.

²⁰ Nú è nǎ jlɛ́ mɛɖeɖóvo Mawu tɔn lɛ́ɛ dó nǔɖé wú ɔ́, xɔ wɛ yě nyí, bɔ midɛɛ lɛ́ɛ ɔ́, mi nyí blǐki e è dǒ mɛ xɔ ɔ́ ná é, bɔ mɛsɛ́dó lɛ́ɛ kpódó gbeyíɖɔ Mawu tɔn lɛ́ɛ kpó nyí awǐnnya dodó ɔ́, bɔ mi jínjɔ́n jí; bɔ Klísu Jezu ɖésú nyí awǐnnya e ɖo tají é.

²¹ Klísu Jezu wɛ nyí sósyɛ́n nú xɔ ɔ́, bó ná ɛ hlɔ̌nhlɔ́n, nú xɔ ɔ́ ná yi ta, bó ná nyí sinsɛnxɔ mímɛ́ e è sɔ́ ɖó vo nú Aklúnɔ é.

²² Đo bǔ e mi ɖe xá Klísu Jezu ɔ́ mɛ ɔ́, mi lɔmɔ̌ nyí blǐki ɖo blǐki e è dǒ mɛ xɔ ɔ́ ná lɛ́ɛ mɛ; bɔ mi kpódó mɛ ɖě lɛ́ɛ bǐ kpó ná kplé bó ná nyí xɔ e mɛ Yɛ Mawu tɔn nɔ́ nɔ é.