Nǔnywɛ́tɔ́xó 8 - MAWUXÓWÉMA

¹ Mɛ̌ ká nyí nǔnywɛ́tɔ́, bɔ nǔɖé jɛ ɔ́, é nɔ́ tunwun nǔ e ɖɔ wɛ nǔ ɔ́ ɖe ɔ́ bó nɔ́ tínmɛ? Mɛ ɖé ɖó nǔnywɛ́ ɔ́, é sɔ́ nɔ́ dɔn nukún mɛ nyɔ ǎ; nukún mɛ tɔn nɔ́ vlɔ́n.

É nyɔ́ ɖɔ è nǐ se tónú nú axɔ́sú

² Axɔ́sú ɖɔ xó ɔ́, mǐ ɖǒ ná se tónú n'i, lě e mǐ dó akpá tɔn gbɔn ɖo Mawu nukɔn é.

³ Mǐ ní má nɔ́ yá wǔ hɔn acɛ tɔn nyi gbě ó. Mǐ ní má nɔ ɖo nǔ e má nɔ́ nyɔ́ nukún tɔn mɛ ǎ lɛ́ɛ wa wɛ ó; ɖó axɔ́sú ɔ́, nǔ e jló ɔ́ wɛ é nɔ́ bló.

⁴ Nǔgbó ɔ́, xó e axɔ́sú ɖɔ ɔ́ wɛ ɖó acɛ hú xó bǐ; mɛ ɖé sixú kanbyɔ́ axɔ́sú ɖɔ étɛ́wú é ka wa nǔ lě é jí ǎ.

⁵ Mɛ e nɔ se tónú nú axɔ́sú ɔ́, nǔ nyanya ɖé nɔ́ wa ɛ ǎ. Nǔnywɛ́tɔ́ tunwun dó ayi tɔn mɛ ɖɔ nǔ ɖokpó ɖokpó ɖó hwe tɔn nú, bó lɛ́ tunwun lě e é ná bló gbɔn bɔ é ná nyɔ́ é.

⁶ Nǔgbó ɔ́, nǔ bǐ wɛ ɖó hwenu; bɔ lě e è nǎ bló gbɔn bɔ é ná nyɔ́ ɔ́ ɖe. Amɔ̌, awě ɖaxó ɖokpó ɖo te kpɔ́n gbɛtɔ́.

⁷ É wɛ nyí ɖɔ: mɛɖé tunwun nǔ e ɖo nǎ wá jɛ wɛ é ǎ. Mɛ ɖé ká sixú ɖɔ lě e nǔ lɛ́ɛ ná wá jɛ gbɔn é ǎ

⁸ Mɛ ɖé kpa acɛ nú funfún e ɖo xo tɔn mɛ é ǎ, mɛɖé sixú hɛn funfún ɖó te ǎ. Mɛ ɖé ɖó acɛ dó kúzán tɔn jí ǎ. Kú ɔ́, ahwan ɖé wɛ, mɛɖé sixú gán ɖ'é mɛ ǎ; dǎkaxixo ná hwlɛ́n mɛ e nɔ xo dǎka ɔ́ gán ɖo ahwan énɛ́ ɔ́ mɛ ǎ.

⁹ Nǔ énɛ́ lɛ́ɛ ɔ́, un mɔ bǐ. Un lin tamɛ dó nǔ e wa wɛ è ɖe ɖo hwe glɔ́ fí lɛ́ɛ bǐ wú. Un mɔ ɖɔ gbɛtɔ́ ɖě nɔ́ kpa acɛ gannaganna nú nɔzo tɔn, bó nɔ́ wa nǔ dó wǔ tɔn.

Nǔnywɛ́tɔ́ lin tamɛ dó gbɛtɔ́ sín ninɔmɛ wú

¹⁰ Un mɔ è ɖo mɛdídá lɛ́ɛ sín cyɔnú wa wɛ: mɛ e wá cyɔnu lɛ́ɛ ɖo Mawu xwé ɔ́ gbe byɔ́ wɛ bó ɖo tíntɔ́n wɛ. Yě ko wɔn nǔ e mɛ énɛ́ lɛ́ɛ dó sin lɛ́ɛ ɖo toxo ɔ́ mɛ. Un mɔ ɖɔ énɛ́ lɔ ɔ́, nǔ yǎyá wɛ .

¹¹ Mɛ e wa nǔ nyanya ɔ́, è nɔ dɔn tó tɔn n'i ɖo tɛn tɔn mɛ ǎ. Énɛ́ ɔ́ wɛ zɔ́n bɔ gbɛtɔ́ lɛ́ɛ nɔ́ ɖo nǔ nyanya wa wɛ sɔ mɔ̌.

¹² É ká ɖo mɔ̌ có, nú hwɛhutɔ́ ná bó ɖo dǎka xo wɛ magbokɔ bó ká nɔ́ lɛ́ dɔ́ ji ɔ́, nyɛ ɔ́, un tunwun ɖɔ mɛ e nɔ ɖó sísí nú Mawu lɛ́ɛ wɛ nǔ na nyɔ́ ná, ɖó sísí e yě nɔ́ ɖó nú Mawu ɔ́ wú.

¹³ Amɔ̌, nǔ ɖó ná nyɔ́ nú mɛdídá ǎ; yɛ ɖɔhun wɛ é ná dín wá yi. É ná wɛ́n kú, é ná dɔ́ ji ǎ, ɖó é ɖó sísí ɖěbǔ nú Mawu ǎ.

¹⁴ Nǔ walá ɖokpó ɖíe, bó nɔ́ jɛ ɖo ayǐkúngban jí fí: nǔjlɔ́jlɔ́watɔ́ ɖé lɛ́ɛ tíin, bɔ nǔ e ɖó ná gbo mɛdídá lɛ́ɛ wɛ nɔ́ gbo yě. Mɛdídá ɖé lɛ́ɛ ká tíin bɔ lě e nǔ ná nɔ́ gbɔn nú nǔjlɔ́jlɔ́watɔ́ ɔ́, mɔ̌ wɛ é nɔ́ nɔ gbɔn nú yě. Un mɔ ɖɔ énɛ́ lɔ ɔ́, nǔ yǎyá wɛ.

¹⁵ Énɛ́ ɔ́ wú wɛ nyɛ mɔ ɖɔ é nyɔ́ ɖɔ mɛ bǐ ní j'awǎ, ɖó nǔ ɖagbe ɖěbǔ ɖe nú gbɛtɔ́ ɖo hwe glɔ́ fí zɛ é ná ɖu nǔ, bó nu ahan, bó ɖu gbɛ wú ǎ. Awǎjijɛ e gbɛtɔ́ ná mɔ ɖo nǔ énɛ́ lɛ́ɛ mɛ é wɛ nyí nǔ e ná dó vǐví n'i ɖo gbɛzán e Mawu ná ɛ ɖo ayǐkúngban jí fí ɔ́ mɛ é; awǎjijɛ e é ná mɔ ɔ́ wɛ nyí nǔ e ná dó vǐví n'i ɖo tagba e jɛ wɛ é nɔ́ ɖe ɖo hwe glɔ́ fí é mɛ é.

¹⁶ Gbɛtɔ́ nɔ́ dɔ́ amlɔ zǎn mɛ ǎ, é ká nɔ́ lɛ́ dɔ́ kéze ǎ. Un tɛ́nkpɔ́n bó ná tunwun nǔ e nǔnywɛ́ nyí é, un tɛ́nkpɔ́n bó ná mɔ nukúnnú jɛ tagba e gbɛtɔ́ nɔ́ jɛ ɖo ayǐkúngban jí fí ɔ́ wú,

¹⁷ lobo mɔ azɔ̌ e Mawu wa é bǐ. Din ɔ́, gbɛtɔ́ sixú mɔ nukúnnú jɛ nǔ e ɖo jijɛ wɛ ɖo hwe glɔ́ fí ɔ́ wú nǔgbó ǎ; nǔ e gbɛtɔ́ ɖo tagba jɛ wɛ bó ɖo biba wɛ ɔ́, é ná mɔ ǎ. Nǔnywɛ́tɔ́ ná bó ɖɔ émí tunwun ɔ́, é sixú mɔ do ná ǎ.