Nǔnywɛ́tɔ́xó 7 - MAWUXÓWÉMA

¹ È mlǎ nyǐkɔ ɖagbe mɛ ɔ́, é nyɔ́ hú célu e nyɔ́ wǎn ganjí é. Azǎn e gbe è kú ɔ́ nyɔ́ hú azǎn e gbe è jɔ é.

² È yi xwé e gbe mɛ kú bɔ è ɖo avǐ ya ɖe wɛ ɔ́ gbe ɔ́, é nyɔ́ hú è yi xwé e gbe è ɖo awǎ jɛ ɖe wɛ é gbe; ɖó mǐ mɛ bǐ wɛ ná kú, bɔ é nyɔ́ ɖɔ mɛ ɖokpó ɖokpó ní lin tamɛ dó kú ɔ́ wú.

³ Aluwɛ nyɔ́ hú nǔkiko, ɖó aluwɛ nɔ zɔ́n bɔ è nɔ blá wǔ ɖo nukún mɛ, lo ɔ́ é nɔ́ wlí ayi dó xomɛ nú mɛ.

⁴ Nǔnywɛ́tɔ́ sín ayi nɔ ɖo xwé e gbe avǐ ɖe ɔ́ gbe; xlonɔ sín ayi ka nɔ ɖo xwé e gbe awǎjijɛ ɖe é gbe.

⁵ Nǔnywɛ́tɔ́ gbɛ́ nǔ nú mɛ bɔ è se ɔ́, é nyɔ́ hú xlonɔ ɖo mɛ kpa wɛ bɔ è ɖǒtó;

⁶ ɖó xlonɔ ɖo nǔ ko wɛ ɔ́, é nɔ́ cí lě e nǔywɛ́ nɔ́ ɖo adomɛ bo nɔ ɖo wǔwú wɛ bó má ká nɔ́ sixú bí nǔ ǎ é ɖɔhun; un mɔ ɖɔ énɛ́ lɔ ɔ́, nǔ yǎyá ɖokpó wɛ.

⁷ Nǔnywɛ́tɔ́ e nɔ kpa acɛ gannaganna nú mɛ ɔ́ hɛn ɔ́, é ná wa nǔ xlonɔ ɖɔhun; akpaɖuɖu nɔ́ zɔ́n bɔ é nɔ́ húzú ahizinɔ.

⁸ Hwenu e è fó nǔɖé dó ɔ́, é nyɔ́ hú hwenu e è bɛ̌ é. È xwesɔ ɔ́, é nyɔ́ hú è blǒ glagla.

⁹ È ma nɔ yá wǔ sin xomɛ ó, ɖó mɛ e ma nɔ lin tamɛ ganjí ǎ lɛ́ɛ wɛ má nɔ́ lín sin xomɛ ǎ.

¹⁰ Ma nɔ kanbyɔ́ ɖɔ: “Étɛ́wú gbɛ ɖ'ayǐ tɔn ká nyɔ́ hú gbɛ din tɔn” ó, ɖó mɛ e nyɔ̌ nǔ i ɔ́ nɔ́ kan nǔ mɔ̌hun byɔ́ ǎ.

¹¹ Nǔnywɛ́ ɔ́, nǔ xɔ akwɛ́ gǔ ɖɔhun wɛ, bɔ mɛ e ɖo gbɛ lɛ́ɛ ná ɖu gbɛ tɔn.

¹² Nǔnywɛ́ nɔ́ nya xɛ ɖo mɛ jí lě e akwɛ́ nɔ́ nya xɛ ɖo mɛ jí é ɖɔhun, lo ɔ́, nǔ e nǔnywɛ́ ɔ́ ɖó hú akwɛ́ é wɛ nyí mɛ e ɖó nǔnywɛ́ ɔ́ nɔ́ nɔ gbɛ.

¹³ Mi kpɔ́n nǔ e Mawu nɔ bló lɛ́ɛ: nǔ e Mawu xá ɔ́, mɛ̌ wɛ sixú jlɔ́?

¹⁴ Nǔ nyɔ́ nú we hǔn, j'awǎ; nǔ ká gblé dó we hǔn, lin tamɛ. Mawu wɛ nɔ́ bló bɔ nǔ nɔ nyɔ́ nú mɛ abǐ nǔ nɔ gblé dó mɛ: é nɔ́ bló mɔ̌ bónú gbɛtɔ́ ní má tunwun nǔ e ɖo nǎ wá jɛ wɛ sɔ é ó.

¹⁵ Gbɛ kpɛ e un nɔ ɖo ayǐkúngban jí fí ɔ́, un mɔ nǔ bǐ: un mɔ nǔjlɔ́jlɔ́watɔ́ bɔ é kú, ɖó nǔ jlɔ́jlɔ́ e é nɔ́ wa ɔ́ wú; un mɔ nǔnyanyawatɔ́ bɔ é ɖo gbɛ, ɖó nǔ nyanya e é nɔ́ wa ɔ́ wú.

¹⁶ Hǔn, bo ma wa nǔ jlɔ́jlɔ́ zɛ jlɛ̌ wú ó; ma ka nyɔ́ nǔ i zɛ xwé wú ó. Étɛ́wú a na wa mɔ̌ bó hɛn gbɛ hwiɖée tɔn gblé?

¹⁷ Mɔ̌ ɖokpó ɔ́, ma xo dǎka zɛ jlɛ̌ wú ó, ma wa xlonɔ nú ó. É má nyí mɔ̌ ǎ ɔ́, étɛ́wú a nǎ wa mɔ̌ bó wɛ́n kú.

¹⁸ Xwedó xó nukɔntɔn énɛ́ ɔ́, ma ka wɔn wegɔ́ ɔ́ lɔ ó; nǔgbó wɛ, mɛ e nɔ ɖó sísí nú Mawu lɛ́ɛ ná sɔ́ xó we énɛ́ lɛ́ɛ dó wa azɔ̌ ná.

¹⁹ Nǔnywɛ́ nɔ́ ná hlɔ̌nhlɔ́n nǔnywɛ́tɔ́ bɔ acɛ tɔn nɔ syɛ́n hú acɛ e gǎn wǒ nɔ kpa dó toxo ɖokpó nu é.

²⁰ Gbɛtɔ́ hwɛjijɔnɔ e nɔ wa ɖagbe bó ma nɔ hu hwɛ ǎ é ɖokpó géé tíin ɖo ayǐkúngban jí fí ǎ.

²¹ Ma nɔ ɖótó xó e è nɔ ɖɔ lɛ́ɛ bǐ ó; é má nyí mɔ̌ ǎ ɔ́, a nǎ yi se ɖɔ mɛsɛntɔ́ towe ɖɔ xó nyanya dó wǔ we.

²² Đó hwi ɖésúnɔ tunwun dó ayi towe mɛ ɖɔ émí lɔ ko ɖɔ xó nyanya dó mɛ ɖěvo wú azɔn mɔ̌kpán.

²³ Un zé nǔnywɛ́ dó ba do nú nǔ énɛ́ lɛ́ɛ bǐ. Un nɔ ɖɔ: “Un ná ɖó nǔnywɛ́.” Un ka kpé wú ǎ.

²⁴ Nukúnnú mɔ jɛ nǔ e ɖo gbɛ ɔ́ mɛ lɛ́ɛ wú bǐ wɛ lín dó mɛ, bǐ wɛ gɔ́ngɔ́n, é gɔ́ngɔ́n ɖésú. Mɛ̌ ká sixú mɔ nukúnnú jɛ wú?

²⁵ Énɛ́ ɔ́, un zin alɔ dó akɔ́n bó jɛ nǔ kplɔ́n jí, bó jɛ do ba nú nǔ jí. Un jló ná tunwun nǔ e nyí nǔnywɛ́ ɔ́ é, un jló ná tunwun nǔ e wú nǔ lɛ́ɛ nɔ́ jɛ gbɔn mɔ̌ é. Un lɛ́ jló ná tunwun nǔ e nyí dǎkaxixo é, nǔ e nyí xlojijɔ é, nǔ e nyí taɖuhunhun é kpó nǔ e nyí tamɛmasɔgbe é kpó.

²⁶ Un ka wá mɔ nǔɖé: un mɔ ɖɔ nyɔ̌nu e ayixa tɔn nyí gɛ̌ bó nyí fɛ́ca, bɔ awa tɔn lɛ́ɛ nyí gɛdɛ é. A jɛ nyɔ̌nu mɔ̌hun sín alɔ mɛ ɔ́, é ná vlɛ́ nu nú we hú kú. Mɛ e nyɔ́ Mawu nukún mɛ ɔ́ nɔ́ gló e; mɛ e ka nyí hwɛhutɔ́ ɔ́ nɔ́ jɛ fɛn tɔn mɛ.

²⁷ Nyɛ nǔnywɛ́tɔ́ ɔ́, un ba do nú nǔ lɛ́ɛ ɖokpó ɖokpó, bó ná mɔ do nú nǔ e wú nǔ lɛ́ɛ nɔ́ jɛ gbɔn mɔ̌ é.

²⁸ È nǎ ɖɔ lɔ ɔ́, un kpo ɖo nǔ do ba wɛ, un ka ko mɔ ǎ. Amɔ̌, ɖo gbɛtɔ́ afatɔ́n (1.000) mɛ ɔ́, un mɔ súnnu e nyí gbɛtɔ́ jɔ gbɛtɔ́ é ɖokpó. Un kpɔ́n nyɔ̌nu lɛ́ɛ bǐ mɛ, un ka mɔ nyɔ̌nu e nyí gbɛtɔ́ jɔ gbɛtɔ́ é ɖokpó vɔ́vɔ́ ǎ.

²⁹ Nǔ e un mɔ kpowun ɔ́ wɛ nyí ɖɔ Mawu bló ayi ɖagbe dó xomɛ nú gbɛtɔ́, lo ɔ́ gbɛtɔ́ hɛn nǔ bǐ hízí.