Nǔnywɛ́tɔ́xó 6 - MAWUXÓWÉMA

¹ Un lɛ́ mɔ nǔ nyanya ɖokpó ɖo hwe glɔ́ fí; bɔ nǔ énɛ́ ɔ́ nyí nǔ baɖabaɖa ɖaxó ɖokpó nú gbɛtɔ́ lɛ́ɛ.

² Mawu nɔ́ ná dɔkun mɛ ɖé bɔ é nɔ́ jɛ, bó nɔ́ ɖó nǔ kɔ́n nyi kpɔ́, bó nɔ́ xɔ susu. Nǔɖé nɔ́ hwedó e ǎ; nǔ e ko sixú jló e ɔ́, é nɔ́ ɖó bǐ. Mawu ká nɔ́ jó e dó nú é nɔ́ ɖu ǎ; mɛ ɖěvo wɛ nɔ wá ɖu bǐ. Énɛ́ ɖésú ɔ́, nǔ yǎyá wɛ, bó nɔ́ zɔ́n bɔ è nɔ mɔ wǔvɛ́ ɖésú.

³ Mɛ ɖé sixú ɖó vǐ kɔn nyi kpɔ́, bó lɛ́ dɔ́ ji káká bɔ afɔfún nyí hwa bɔ alɔfún nyí hwa. Nú é má ká ɖu gbɛ ɖé ɖo gbɛ tɔn mɛ ǎ ɔ́, étɛ́ é ká nɔ gbɛ dó wa? Nú è ma ka lɛ́ ɖi i dó yɔdo mɛ ǎ ɔ́, étɛ́ é ká nɔ gbɛ dó wa? Nyɛ mɔ ɖɔ vǐ e flɛ́ kɛ́n ɔ́ tɔn nyɔ́ hú éyɛ́ tɔn,

⁴ ɖó vǐ e flɛ́ kɛ́n wá gbɛ ɔ́ mɛ dó wǔvɔ́; é lɛ́ kɔ yi zǐnflú mɛ, bɔ mɛɖé sɔ́ nɔ́ flín i ǎ,

⁵ É mɔ hwe ɖó nukún wú ǎ, é tunwun nǔ e ɖo jijɛ wɛ ɖo gbɛ ɔ́ mɛ ɔ́ ɖě ǎ; é vo hú nya énɛ́ e dɔ́ ji káká é.

⁶ Gbɛtɔ́ ná bó nɔ gbɛ xɔ xwe afɔwó (2.000), bó má ká mɔ gbɛ víví ǎ ɔ́, gbɛ wɛ nyí gbɛ énɛ́ ɔ́ a? Nǔ e ɖó funfún e bǐ jɛ́n ná wá kú ǎ cé?

⁷ Nǔ ná gló wú wɛ gbɛtɔ́ nɔ́ wa azɔ̌; nǔ ká nɔ́ kpé e gbeɖé ǎ.

⁸ Étɛ́ mɛ e ɖó nǔnywɛ́ ɔ́ ká ɖó hú xlonɔ? Mɛ e nyí wamamɔnɔ bó ká tunwun afɔ bó nɔ́ ɖe ɖo gbɛtɔ́ mɛ ɔ́, le tɛ́ ká ɖ'é mɛ n'i?

⁹ Nukún mɛtɔn nɔ nǔ e è ɖǒ ɔ́ wú bɔ é víví nú mɛ ɔ́, é nyɔ́ hú nukún mɛtɔn nɔ nǔ e è jlǒ ɔ́ wú. Un mɔ ɖɔ énɛ́ lɔ ɔ́, nǔ yǎyá wɛ; wezun kán ɖo jɔhɔn gúdo wɛ.

Nǔnywɛ́ kplɔ́n mɛ

¹⁰ Nǔ e tíin din ɔ́, è ko tunwun ɖ'ayǐ xóxó; nǔ e gbɛtɔ́ nyí ɔ́ è ko tunwun ganjí; gbɛtɔ́ sixú dɔn nǔ xá mɛ e tunwun nǔ hú i é ǎ,

¹¹ ɖó è ɖo xó ɖɔ wɛ magbokɔ ɔ́, xógbló nɔ́ sukpɔ́ ɖ'é mɛ. Étɛ́ è ka nɔ mɔ ɖo xó ɖɔ magbokɔ ɔ́ mɛ?

¹² Gbɛtɔ́ sín gbɛ nɔ dín wá yi bléwún yɛ ɖɔhun; mɛ̌ ká tunwun nǔ e nyɔ́ nú gbɛtɔ́ ɖo azǎn kpɛ e é ná bló ɖo hwe glɔ́ fí é mɛ é? Nǔ e ná wá jɛ ɖo kú tɔn gúdo ɖo hwe glɔ́ fí ɔ́, mɛ̌ ká sixú tunwun bó ɖɔ n'i?